أحببت من كنت أكره 💛(متوقفة مؤقتاً⚠)

الجزء الثالث عشر

في صباح مشرق وهادئ ذي سماء صافية في(فيلا)استيقظت بنشاط؛جلست علي السرير لتستوعب ما الذي يدور من حولها،نظرت للساعة الموضوعة في المكتب الذي بجانب السرير،أدركت أن الساعة هي التاسعة لم تعرها اهتماما وقفت وتذكرت نباح أمها كما تقول هي إذا لم تجهز ولكن هذه المرة لم يكن موجودا،قامت بترتيب سريرها فتحت باب الغرفة وذهبت في الممر ولم تدرك أن هناك أحدهم قال:صباح الخير،ردت من دون أن تشعر:صباح الخير،شقت طريقها إلي الحمام أخذت دشا نشط لها عقلها وجسدها،وأثناء ماهي تستحم تذكرت أن احدا قال لها:صباح الخير،تذكرت تلك نبرة الصوت قالت بصوت عال:فهد بعد أن أدركت كل ما يدور حولها بعد هذا الدش المنعش،وبماذا فعلت بالأمس والآن وبالذي ستفعله لاحقا،أوقفت المياه التي ارجعت لها نشاطها من جديد والتي ارجعتها لي وعيها،توضأت،استاكت ورتبت شعرها المبعثر أمام المرأة و خرجت ودخلت إلي غرفتها وصلت صلاة الصبح،خرجت وهي ترسم إبتسامة مشرقة في غاية الفرح(ونست أنه عندها امتحان بعد تلاتة أسابيع💔🐸)توجهت نحو الأسفل(انقلب دارجي🐸💔)صبحت علي القاعدين كلهم أمها قالت ليها:شايفاك مبسوطة،تعالي اشربي الشاي.
بلسم:أنا دايرة شاي لبن.
قعدت في الكنبة ومنتظرة بعد مسافة سألت:انتوا شربتوا الشاي ولا لأ؟!.
فهد:لا.
كشفت حوليها ما لقت لغمان سألت تاني:انتوا لغمان وين؟!.
نوني:لسع ما صحى.
بلسم:أمشي اصحيه؟!.
نوني:لا ما بنصحك.
بلسم:لي؟!.
لغمان ب تسائب:لأني صحيت.بلسم اتخلعت لغمان قعد جنب نوني،آمال جابت الشاي،آمال:قبيل اتكلمت مع ابوكم قال أنه ح ياخد إجازة كم أسبوع كده وبجي هنا قريب؛قبل ما بلسم تمتحن.
نوني:بالجد ابوي جاي؟!دي سنتين!!
بلسم:سنتين شنو ي بت الناس دي سنة واحدة والله واحد.
نوني:سنتين.
بلسم:سنة واحدة ي بت ما تغالطيني.
نوني:انتي مطرطشة ساكت؛سنتين.
فهد:هي قبل ما تقلبوها لينا شكلة ومشكلة خلوه الغلاط والكلام؛بعدين كلام بلسم صح؛سنة.
بلسم:هسع منو المطرطش؟!.
بلسم شالت كبيتها بتاعت الشاي وختتها تاني وقالت:هسع ابوي إذا جاء حيمعطني بكلامه داك تاني:انا زمان سويت،انا زمان عملت وانا وزمان فعلت،وانا زمان وانا زمان؛ح يعذبني عذاب القبورة.
فهد:بصوت منخفض أخفض من الخافض زاتو:بلسم خلاص اسكتي.
بلسم:المهم انا ماشة اجيب كتابي بتاع الرياضيات عشان أقرأ لغمان مش انت ما ماشي الليلة؛عايزاك تسرح لي مسألة ما فهمتها،باي ومافي زول يهبش الشاي بتاعي.
لغمان:ومنو الهيبشو عان ذي دي.
بلسم خشت الغرفة غيرت رأيها شالت كتاب جغرافيا ومرقت،لقت لغمان مافي قعدت جنب نوني و همست ليها:لغمان وين؟!.
نوني:مشى يستحم.
بلسم بهمس:لي؟!
نوني:انتي مالك أسئلتك كتيرة وبايخة كده؟!مشى يستحم يعني مشى يستحم خلاص.
بلسم:بس الزول ما يسألك تقعدي تزاهجي فيه.
نوني:انتي مالك؟!مش ب حقي ومن حقي؟!.
بلسم:حقة صعوط،حقة التخنقك.
لغمان جاء بفلينة داخلية وبنطلون بيت وبجغف في شعره:كبيتوا لي الشاي ولا لأ.
بلسم:يكبوا فيك موية نار؛يشوشيو لسانك بالنار.
آمال:بسم الله الرحمن الرحيم؛مالك علي إخوانك تداعي فيهم ذي ده من صباح الرحمن؟!.
لغمان:خليها؛والله وبالله وتالله دعواتها دي ما لاحقة السقف ده!!
بلسم:سقفا ينهد فيك.
لغمان:مالك علي ي بت الناس!!
بلسم:تململ في نار جهنم.
لغمان:تريبة حبوبات بس.
بلسم:حبة التخنقك.
لغمان:بسم الله الرحمن الرحيم.
نوني:خلاص خلاص،اشربوا الشاي.
لغمان:ذنبي شنو اصرف عربي في البهيمة دي.
بلسم:هوي اوعك تغلط معاي.
لغمان:واااي انا خايف شديد داير أموت من الخوف.
فهد:خلاص خلو العباطة والعوارة القاعدين تسوها دي.
بلسم ولغمان سكتوا علي أساس أنه خايفين وكده وبعد ثواني فكوا ضحكة كده هزت الأرضية كلها.
نوني:هسع البضحك هنا شنو؟!
فهد:متخلفين مش؟!خلاص كان ما بطلتوا العوارة دي ما بجيبها ليك ي بلسم.
بلسم وقفت ضحك فجأة.
بلسم:انتي جادي؟!
لغمان:هي شنو ي بلسم؟!
بلسم:انت بس وقف عوارة.
لغمان جاء جنب نوني وقال بهمش:هي شنو؟!
نوني:لزته وهي بتقول بزهج:ياخ زح مني.
آمال:اشربوا الشاي انا ما عملتوا عبس.
بلسم:ي فهد انت مالك اتأخرت كده؟!ما عايز تفتح العيادة اليوم.
فهد:لالا انا قلت لي تمتم أنه انا ح اتأخر عشان كده هي ح تمشي قبلي وابدر مني.
لغمان:خليكم من الكلام ده كله البسكويت وينه؟!
آمال:نسيتوا ي لعمان؛أمشي جيبه.
لغمان:لي انا بس.
آمال:لأنك انت الطلبته.
لغمان:خلاص بلسم أمشي جيبيه.
بلسم:انت ما تجيبه براك؛مكسر ولا مقطع ولا مشلول.
لغمان:انا اكب...قبل ما يتم الجملة؛بلسم:اكبر منك،هه خلاص نوني أمشي انتي جيبه.
نوني:خلاص طيب بجيبوا.بعد ما مشت،لغمان:بلسم رسلتي منى لي؟!ح تجيب لينا البسكويت قليل.
بلسم:ما كان تجيبه براك انا شغالة خدامة تحتك وأنا ما ما عارفة ولا كيف؟!
آمال:كمان وكمان،وانا ما خدامة؟!
بلسم:براك ابيتي تجيبي ليك شغالة.
آمال:وانا زاتي ما خدامة امسح واكنس واطبخ واغسل واكوي وارتب و...قبل ما تم،بلسم:براك عملتيها في نفسك قاليك جيبي شغالة تشتغل ليك نصف الشغل بس ما إلا كله ابيتي.
يتبع..
وصوت.