بقيت واقفة فبلاصتي..فكرة تديني و فكرة تجيبني..لتو مزلت نفكر فلي شفتو لبارح فمكت ياسين..منعرفش واش لازم ندير بالضبط..نقول لهشام..و لا سكت و نحبث فالامر وحدي..زعما هو صح من البوليس..اكيد كاين غلطة فالموضوع..مستحيل يكون من البوليس..
كبست بيديا على طرف اليخت..وقت بدا يتحرك..تلف مورايا..تمشيت لداخل..وقفت عند الطاولة لي برا نشوف معاه..مقابلني..واقف وسط الرجال..يعطيهم فالاوامر ولا منعرف واش..تبسمت..منعرف شحال تعدا عليا وقت و انا فهاديك البقعة نشوف معاه..غير من بعيد..كيما كل يوم..عيني عليه غير من بعيد..نشوفو و نتأملو من غير ما نقرب..من غير ما نقيسو..تنهدت..رجعت للور..من غير ما يشوفني ولا ينتبه ليا..طلعت للفوق..وقفت عند الحافة..رفدت يدي بعدت خصلات شعري لتالي..منعرفش شكون لي هايج كتر..مواج هاد لبحر ولا ضربات قلبي..قلبي لي وليت نحسو سوفاج..يحب عليه..حاب على هشام..و معادش قدرت نسكتو ولا نحبسو..رجع يدق بإسم هشام..يعيط بإسمو..وسط كامل هاد الفوضى لي عايشة فيها و هاد الاسرار و الوحوش لي دايرين بيا فكل بلاصة..نسمع غير فإسم هشام..و نشوف غير فهشام..غمضت عينيا..خذيت نفس طويل..قلبي دق بالقاوي وقت شميت ريحتو..فتحت عينيا..تبسمت نحكي..
انا: كملت خطابك معاهم ؟
حسيت بصدرو لي لسق ظهري..و بنفسو فرقبتي..جسمي قشعر و هو يحكي فودني..
هشام: مممممم
غمضت عينيا بقوة و رجعت فتحتهم..لسقت لا اراديا فطرفاليخت نحاول نبعد عليه..سمعتو وقت ضحكت..دنا ليا اكثر..حط يديه عالاطراف..ولا حاصرني بين يديه..بلعت ريقي بالسيف..رجع حكى فودني..
هشام: اهبطي لتحت..و متخرجيش حتى نكملو
عقدت حواجبي..مستغربة كلامو..رجعت حكيت..
انا: علاه جبتني مال كي مراحش نحضر
هشام: مشي انا جبتك
تلفت ليه بالزربة..وجهي جامعا وجهو..سنتمتر واحد يفصل بيناتنا..هبط عينيه ليا..رجعت حكيت..
انا: كيفاه مشي نتا جبتني ؟
تنهد..نزل يديه لي حاصرني بيهم..بعد بخطوة لتالي..رفد يدو يبعد فخصلات شعري لتالي..من غير ما ينزل عينيه مني..بقيت مركزة معاه..رجع حكى..
هشام: ميهمش..و مراحش يهمك..
عوجت فمي..طلعت حواجبي نسأل فيه..
انا: رشيد كيراف هاداك صح ؟
يدو تكوانسات فشعري..عينيه ترشقو فيا..نظرة فثواني تبدلت..نزل بيديه على طول خدي حتى لفمي..حط زوج صبعيته على شفافي يحكي..
هشام: معادش تجبدي اسمو على شفافك..فهمتي ؟
صوتو خرج جااد لاقصى درجة..مكبوس..هادي..يخوف..هزيتلو براصي ايه بالزربة..شوية و تبسم على جنب..عقدت حواجبي..سألتو براصي واش بيه..خاطر مقدرتش نحكي و صبعو على شفافي..ضحك يحكي..
هشام: والو
نزل صبعيته..دار يديه داخل جيابو..
انا: تضحك اومبعد تقولي والو ؟
هشام: مممممم
قلبت عينيا..رجعت شعري مور ودني..كبس ملامحو و صوتو..رجع حكى..
هشام: اهبطي للتحت راح نوصلو..متخرجيش ملتم حتى يخلاص كلش
هزيتلو براصي ايه..بعدلي من طريقي..جبدت روحي منو..تمشيت بخطوات مبعدة عليه..لحقت لدروج باش نهبط..حطيت يدي عليهم..حبست شوية..رجعت تلفت ليه..لقيتو متكي عالحافة يشوف معايا..تبسمتلو نهدر..
انا: هشاااام
هشام: مممم
انا: رد بالك على روحك
ضحك بتڨوعير..طلع راصو لسماء..عقدت حواحبي..منعرف فاش قاعد يتمتم..شوية و رجع شاف فيا..
هشام: روحي روحي قبل ما نوصل ليك
انا: علااه
هشام: هااني نقولك روحي
عوجت فمي..عطيتو بالظهر..غلطتي لي لعبتها ننصح فيه..منعرف علاه ضحك..مشي تاع خير..نزلت هادوك الدروج بغزول..نسمع فيه يعيط..
هشام: ### متعوجيليييش فمك
ضحكت..محبيتش ندور نردلو..و حتى هو مزادش حكى..هبطت لتحت..لقيتهم كامل مستفين عالحواف تاع اليخت..تنهدت..احساس خاايب بزااف عاقدة ينغز فيا فقلبي..خذيت نفس طويل..تبسمت معا روحي بالسيف نهدي فروحي و نبعد فهاد الافكار السلبية لي قاعدة تنكد عليا..دخلت لداخل..القاعة فارغة..غير انا و الكابتن لي يسوڨ..قبل ما نقرب نقعد سمعتو يحكي..
_اغلقي الباب
_اوكي
رجعت تلفت للباب..غلقتها و قربت للفوتاي ترميت عليه..نسمع فصوت حركة و كلام برا..قلبي قاعد يدق بالقاوي..قلبي عاصر عليا..منعرف علاه..اما منيش مرتاحة..شوية و حبس اليخت..الاصوات برا قوات كتر..قلبي دق بالقاوي..تلفت بالزربة لعند الكابتن هاداك..نسأل فيه..
انا: واش صراا !!
حكى من غير ما يشوف فيا..بكل دم بارد..
_قطعنا طريق السفينة و البوس قاعد يسيي يردهم منين جاو بلا ما يصرا اشتباك
مرديتلوش..رجعت تلفت..تكيت بيديا عالطابلة..ندعي تجوز على خير و ميصرالو والو..ندعي يرجعلي بخير..تهزيت و تنفظت على صوت الرصاص..محسيتش لروحي كيفاه عيطت باسمو بكامل صوتي..غطيت وجهي بيديا كحركة لا ارادية..ندعي يكون بخير و متكون صراتلو حتى حاجة..فثواني الدم جمد فيا..طرافي بردو وقت حسيت بحاجة باردة تحطت على راصي..قلبي رجف مالداخل..دقات قلبي تسارعو..نزلت يديا بلعقل من وجهي..عينيا خرجو و انا نشوف فيه..الكابتن..حاط سلاحو على راصي..فمي تحل من الصدمة..تبسم على جنب..
_نوضي
رمشت عينيا سحال من مرة..نحاول نستوعب لي صرا دك..رجع عيط..
_نووووووضي قتلك
تهزيت و تنفظت على عياطو..رفدت يديا بالسيف ساندت بيهم عالطابل..وقفت..نشوف معاها..
انا: راح تندم والله
_اتحركي قدامي خليك مالهدرة الزايدة
بلعت ريقي بالسيف..نحاول نكبس روحي قد ما نقدر..تمشيت قدامو و سلاحو باقي على راصي..رجليا يرعشو..نبلع فريقي و نعاود..وقفت عند الباب..نسمع فيه يحكي..
_افتحيها
رفدت يدي بالسيف حطيتها عليه..غمضت عينيا بقوة و رجعت فتحتهم..ضغط بالسلاح على راصي..يديا يرعشو..فتحتها بالسيف..عملت اول خطوة لبرا..قلبي عصر عليا و انا نشوف معاه..عاطيني بالظهر..حاط سلاحو فراصي قبطان السفسنة لي حبسها..رجالو مسيطرين عالوضع..ساعتها فهمت..فهمت اني مرة ثانية راح نكون عائق فطريق انسان..فهمت اني مرة اخرى راح نكون حمل ثقيل..فهمت ساعتها اني راح نكون النقطة لي راح ترجعو للور..فهمت انو بلاصتي مشي معاه..فهاديك الدقيقة نسيت كلش..نسيت وين رانا و الوضع لي راني فيه..كلش قاعدة نسمع فيه هو كلمة "عائق".. و كلش قاعدة نشوف فيه هو هشام..حتى منعرفش كيفاه خرجت اسمو من بين شفافي..
هشام يحكي:
قلبي دق بالقاوي وقت سمعت صوتها..تلفت بالزربة ليها..سطل ماء و تكب عليا..عينيا خرجو و انا نشوف فيها..وسط هاديك الظلمة..وسط هاديك الضجة انا سمعتو..سمعت صواها و شفت لمعة الدموع فعينيها..عروقي حسيتهم تكبسو..الدنيا دارت بيا..رمشت عينيا شحال من مرة نحاول نستوعب لي قاعد نشوف فيه..مقدرتش نزل عيني من عينها..شوية و سمعت هاداك يحكي من مورايا..
_هشام الراشدي يا اما تهبط سلاحك من راصيرو تخلينا نكملو طريقنا..يا بإشارة مني تطيح جثتها قدامك
بلعت ريقي بالسيف..عينيا منزلوش من عينيها..غمضت عينيا بقوة و رجعت فتحتهم..عمري ما توقعت نطيح فهكا موقف..الدنيا حبست عندي..ثواني حسيتهم تقاال على قلبي..معرفتش واش ندير..معرفتش واش نقول..معرفتش كيفاه نطمنها..حاب نقرب ليها و نمسح هادوك الدموع لي نازلين منها..اما حاس روحي مربوط..مشي قادر نتحرك..مكوانسي فبلاصتي..رجع حكى..
_هايااا معنداااش نهار كامل ليك..يا تبعد يا تموت
معا اخر كلمة منو تلفت ليه بالزربة..نڨحرلو..تي حتى لكلام و مقدرتش نطلعو..اخر كلمة منو دخلتني فالحيط..تروهجت..النفس تسكر عليا..خذيت نفس..و زوج و ثلاثة..نحاول نهدي روحي..رجعت تلفت ليها..نشوف معاها..شهقاتها لحقوني..صوتهم لحقني بالقدا..لحقني و قاسني و دمرني و عمل عملتو فيا..تشوف معايا و تعملي براصها لالا..غمضت عينيا بقوة..بين عقلي و قلبي..بين خدمتي و بينها..حياتها اهم عندي من كلش..من غير ما نفكر مرتين..صبعتيا تفتحتو بلعقل وحدهم..سلاحي طاح فالارض..و معاهم نزلو دموعها اكثر..سمعتو يحكي من مورايا اما مقدرتش حتى نركز معا لي قاعد يقولو..جيست مركز معاها..بعد هاداك من قدامها..مقدرتش نتحرك..ولا نحكي..عيني في عينها..كل دمعة تنزل من غينيها نحس فيها كيف لجمر على قلبي..فقت..فقت على روحي وقت سمعت صوت السفينة لي
صوت السفينة لي رجعت كنلت طريقها..فقت على صوتها لي خلاني نفيق انو قلبي غلق عقلي..و اهميتها عندي غلبت اهمية خدمتي لي طول عمري هي اهم اولوياتي..ساعتها برك عرفت اني صح غرقت..صح غرقت فيها و معادش نقدر نخرج..ساعتها عرفت انو خلاص..انا دخلت لهاد لبحر و جريتها معايا ليه..و مكاش لي راح يرجع يخرجنا منو..معلاباليش كيفاه..معلاباليش كيفاه تمشيت هادوك الخطوات جيهتها..وقفت قدامها..قد قد..نزل راصي نشوف معاها..قلبي لتو قاعد يخبط..قلبي لتو نحس فيه راح يخرج من بلاصتو..من ثواني برك كنت راح نخسرها..كنت راااح نخسر هاد الفرخة المجنونة و متبقاش فحياتي..من غير ما نفكر و من غير ما نتردد..لفيت يدي على ظهرها..جبدتها لعندي..كبست عليها فحضني بكامل قوتي..لفت يديها على ظهري..حطيت يدي على راصها..نسمع فشهقاتها لي ماشيين و يعلاو..كبست عليها فحضني اكثر..لوكان قدرت لوكان راني دخلتها بين ضلوعي..نسيت وين رانا..نسيت رجالي لي قاعدين يشوفو فيها..نسيت لي صرا..كلس هامني دك انها لاباس عليها و بين يديا..نسمع فيها تحكي..
فيرا: سمحلي..سمحلي هشاااام سمحلي
شهقاتها و صوتها المتقطع بالبكاء زاد على ليا بيا..حطيت راصي على شعرها..نشم فريحتها لي ترد فيا الروح..عديت يدي على طول ظهرها نحكي..
انا: اششششش اهدي..مصرا والو..اهدي...
نزل بيديها من ظهري لجنابي..كبست عليا بدفرتيها..جبدت روحها شوية عليا و باقي شادتني..تنهدت..رفدت يدي نمسح فدموعها..
انا: علاه لبكا ### خلاص تعدات
مردتليش..مردتليش عينيها حسيتهم مركزين مورايا..عقدت حواجبي..نزلت يديا شوية شوية من خدها..تلفت مورايا نشوف وين راهي تشوف..تكوانسيت فبلاصتي..تكوانسيت و انا نشوف فرجالي يشوفو معانا..يتبادلو فالنظرات بيناتهم..مفاهمين والو..وقتها عرفت اني عملت غلطة عمري..وقتها برك عرفت اني اعلنت مكانتها عندي قدامهم كامل..وقتها فقت على لي عملتو..غمضت عينيا بقوة..كبست على قبضة يدي..عيطت بكامل صوتي..
انا: فاااااش تشوووفوو ف### رجعوو اليخت و #### كل واحد لشغلو..
هبطو ريصانهم..تسرسبو من قدامي..عديت يدي بالزربة على وجهي..رجعت تلفت ليها..عينيها مرشوقين فيا..محكات والو..محكات حتى حرف..اما نظرة عينيها وصلتني بزاف حاجات..نظرة قهر..وجع..لوم..مفهمتش..مفهمتش كيفاه نفسرهم..مقدرتش نرجع نقرب ليها..كلش تقلب عليا فثواني..من ثواني كلش كنت نخمم فيه هو وجودها بين يديا..و دك كلس قاعد نخمم فيه هو كيفاه نحل هاد المشكل..و نسيهم فلي صرا..اكيد راح يوصلو لخبر..معرفت ساعتها واش لازم ندير..معرفتش كيفاه نتصرف..و ملقيتش لكلام لي لازم نقولو..قبل ما نلحق نهدر..قاطعتني تحكي..
فيرا: سمحلي..و وخلينا ن نقصوها هنا..
بلعت ريقي بالسيف..نحاول نستوعب لي قالتو..كلامها لي رماتو كيه السهم و عطاتني بالظهر بلا ما تستنى حتى اجابتي..عطاتني بالظهر و قربت لطرف اليخت..و خلاتني فبلاصتي نحاول نستوعب لي قالتو..واش قصدها بخلينا نقصوها هنا..واش قصدها بهاد الهدرة..تبسمت بإنكسار..هي حبتها..هي قررت تبعد من اول مشكل..هي لي دات القرار..و عطاتني بالظهر..هاد المرة القرار قرارها و راح تتحمل نتائجو..مكنتش راح نخير البعاد..مكنتش راح نبعد..كنت راح نشد يدها و نحميها منهم كاملين..اما هي لي خيرت انها تبعد..كبست على يدي بكل قوتي..نمنع فروحي من اني نرجع نقرب ليها..غمضت عينيا بقوة..<<مشي مشكل فيرا..قررتي تبعدي..و انا راح نفذ>>
الراوية تحكي:
غلق البيسي..بعد ما شاف نتائج خطتو..و كيفاه جازت..خبط البيرو بكامل قوتو..يغلي مالزعاف..تكى لتالي..رفد القارو بين شفافو..شعلو..خذا نفس طويل..و رجع بعدو..نفخ..طلع لهواء من فمو..تكى راصو للور..يحكي معا روحو..
رشيد: غلطت..غلطت اا هشام غلطت..تماما كيما توقعت..نتا غرقت و لحقتك متأخر.. ناوي تحرق روحك..و تأكد مراحش نسمحلك..كيما دخلتها لحياتك راح نخرجها..مراحش نسمحلك دمر لي بنيتو من سنين..
تنهد..رجع القارو لفمو..مستحيل يسمح انو كلش يدمر..و هشام لي بين عينيه مسنين مراحش يخليه يضيع بهاد البساطة..
★★★
الحلقة😙
بنات تفاعلو❤اطوني رايكم..و توقعاتكم😱..
واش راح يصرا بعد لي صرا ليوووم فاليخت😱😱فيراا علاه بعدت على هشاام و خلاتو هكااااك😭😭💔و رشيييد واش دخلو فهشاام😱😱
كلهم حاجات تكتشفوهم فالحلقات الجايين😋😏تفااعلو برك❤📎
