فيرا تحكي:
جبدت روحها شوية مني بعد ما عقمتلي الجرح..حطت لابوات فارماسي عالطابل و تلفتت لعندي..شدت يدي وسط يديها تحكي و تتبسملي..
وردية: دخلو شادين يدين بعضكم..احكيلي دك واش صرا بيناتكم
عضيت شفتي..وجهي حسيتو راح يطرطق مالسخانة وقت تفكرت لي صرا..هبطت راصي..منعرفش بالضبط كيفاه راح نقوللها..
انا: ا انا و و هو يعني ح حنا م...
قبل ما نكمل نحكي قاطعتني تسأل بلهفة..
وردية: متقووليليش لي راهو فراصي ! و سايي وليتي ليه و رجع ليك !!
طلعت راصي ليها..هزيتلها براصي ايه..نحس فروحي راح نطرطق بالحشمة..ما فقت غير وقت حضنتني بكامل قوتها..معنقتني و تخبط فظهري مالفرحة..جبدت روحها مني..تشوف معايا..الفرخة باينة فوجها..تنهدت تحكي
وردية: كون تشوفي شحال فرحتلكم..نشاء الله نشوفكم مزوجين و بولادكم
تبسمتلها..منعرفش ادا حيجي هاداك النهار..منعرفش ادا صح حنلحقو لهاديك الدرجة و نخرجو من هاد لوسخ..ادا حيجي وقت نعيشو فيه كيما اي عائلة..فرحانين كيما الناس..جملتها خلاتني نروح لعالم وحدوخر..زعنا راح نبقاو معا بعض ؟ زعما راح نبقاو كيف كيف رغم كامل هاد العوائق..منعرفش..لي نعرفو اني مراح نندم على حتى قانية نجزوزها و انا معاه..قاطعتني من سرحتي وقت رجعت حكات..
وردية: حافظي عليه..هشام مشي كيما يبانلك من برا..هشام رافد فقلبو جروح الدنيا كاملة
عقدت حواجبي..نحاول نستوعب لي تقول فيه..لا اراديا كبست على يدها تحت يدي..
انا: و واش قصدك ؟
هزتلي براصها لالا تحكي..
وردية: يا بنتي منقدرش نقولك انا..وقت يحب هو راح يحكيلك..اما لي حبيت نوصلهولك انك تردي بالك..متجرحيهش و متزيديلوش جرح فوق جروحو ردي بالك عليه صدقيني ادا وصلتي تمسي جروحو و داويها فراح يكون كيما الطفل الصغير بين يديك..اما ردي بالك..ردي بااالك تحطي ملح فوق الجرح خاطر ساعتها راح تخسريه نهائيا..لي فيه يكفيه
غمضت عينيا بقوة و رجعت فتحتهم..بلعت ريقي بالسيف..كلامها دخلني بعضي..مفهمتش..مفهمتش قصدها..واش من جروح قاعدة تحكي عليهم !!..معناها هشام عندو حاجات مخبيهم عليا ؟..كيما واش ؟ واش الشئ لي مخبيه !! واش السر لي عندو ! الحاجة لوحية لي طاحت فبالي ساعتها و مخي صورهالي انو كانت عندو حبيبة قبلي..قلبي دق بالقاوي وسط صدري..الفكرة كملت على لي بيا..زعما حب وحدة قبلي ؟ زعما قدرت وحدة غيري تدخل قلبو !! مستحيل..
تهزيت و تحطيت على صوت الباب لي يدق بالقااوي فيقني على روحي..تلفت ليها بالزربة عاقدة حواجبي..
وردية: خليك هنا انا نشوف شكون
هزيتلها براصي ايه..ناضت تزرب فخطواتها..تنهدت هزيت راصي نبعد فالافكار لي غزاوني..شوية و سمعت صوتو يعيط بإسمي..عينيا وساعو..تنفظت مبلاصتي..خرجت ملتم نجري..وقفت مقابلاتو عند الباب..نشوف معاها..واقفة قدامو مشي مخلياتو يجوز..قربت ليها بالزربة..وقفت موراها نحكي..
انا: م مهدي !
تلفتت ليا..قبل ما تلحق تحكي نحالها يدها لي مانعاتو بيها..منعرفش كيفاه قرب مني بهاديك السرعة..جبدني لحضنو كبس عليا بكامل قوتو..عينيا وساعو..يديا بقاو معلقين فالهواء..نسمع فيه يحكي..
مهدي: خفت..خفت بزاف تكون صراتلك حاجة مور ما سمعت بالاكسيدون
بلعت ريقي بالسيف..طلعت عينيا نشوف معاها..عملتلي براصي لالا..تنهدت..نزلت بيديا لجنابو..كبست عليه و بعدتو شوية عليا..حسيتو فاق على روحو..جبد روحو بلعقل..نزلت يديا منو..تبسمتلو نحكي..
انا: انا مليحة مصرالي والو
رفد يدو بالسيف حطها عالضمادة لي فجبهتي يحكي..
مهدي: و هادا لي فجبهتك واش !!
رجعت بخطوة لتالي..كبس على قبضة يدو نزلها..رجعت حكيت..
انا: والو غير ضربة خفيفة
غمض عينيه..تنهد براحة..رجع فتحهم..هزني و حطني..و بعدها تبسم على جنب..ابتسامة استهزاء..عقدت حواجبي مسي فاهمة حركتو..فنفي الوقت مستغربة حالتو و انفعالو لي مشي طبيعيين..تي كي كان واقف عند الباب لونوكان مخطوف..مفهمتش واش بيه..قبل ما نرجع نحكي سبقتني وقت شداتو من يدو..تلفت ليها..ڨحرتلو تحكي..
وردية: هاك طمنت عليها..معنتها اخرج من هنا احسن ما تطيحها فالمشاكل
نطر يدو منها بقوة..رجع شاف معايا..تبسملي بهدوء..
مهدي: راح نبقاو على تواصل
رديتلو التبسيمة..هزيتلو براصي ايه..خذا نفس طويل..و تلفت خارج..اول ما عمل خطوة برا الباب خبطت الباب من موراه بكامل قوتها و رجعت تلفتت ليا..
وردية: هادا بالذات ردي بالك منو
انا: علاه واش دار ؟ خاف عليا برك
وردية: هاني قتلك كوني تسمعي لكلام انا ادرى منك
انا: مهدي مستحيل يأذيني
وردية: مراحش يأذيك نتي خاطر يحبك اما لي راح يتأذى منو هو هشاام ياا فيراا هشااااام
عينيا وساعو..هزيتلها براصي لالا..مستحيل لي تقول فيه يكون صح..مهدي مستحيل يكون يحبني حنا جيست اصدقاء..لالا امبوسيبل يكون صح هاد الشئ..و حتى ادا كان صح امبوسيبل نخليه يقرب جيهة هشام و لا يعملو حاجة بسببي انا..محبيتش نزيد معاها بالكلام..خاطر عارفة مهما حكيت مراحش نقنعها ولا نبدل رايها..تلفت رجعت دخلت لصالة..رفدت صاكي ملتم و طلعت بلا ما نزيد حتى حرف..دخلت للبيت..رميتو عالسرير..كنت رايحة نقعد..اما جزت عالمرايا..حبست فبلاصتي و انا نشوف فروحي..مزلت لابسة السيرفات..بلحظات تفكرت ردة فعل مهدي وقت شافني..زعما يون بسبة لي لابساتو ؟لا..اكيد مسي على هادي..اصلا هو واش عرفو انها تاع هشام..تبسمت..مع انو حالتي داخلة بعضها اما حبيتها عليا..تي حتى شعري تبوكلا خاطر ممشطتوش بعد الدوش..عمري ما شفت روحي هكا..رفدت يدي فتحت لافاست تاع السيرفات نحيتها..رميتها عالسرير..و قربت لخزانة جبدت روب حمراء تاع دار قصيرة..لبستها بالخف..قربت لسرير باش نرفد الصاك..تفكرت تيليفوني لي مخلياتو لداخل..فتحت نحوس عليه..قلبي دق بالقاوي وقت فتحتو و لقيت ميساج من عند رشيد..غمضت عينيا بقوة و رجعت فتحتهم..من نهار لي رحت فيه للميتم مزدتش رديت على اتصالاتو..كل مرة يعيط نقطع عليه..مفهمتش دك واش يسحق..خذيت نفس طويل..فتحت الميساج..عقدت حواجبي و انا نشوف معا فوتو..فتحتها نزومي فيها..هشام !! هشام معا مرأة..قاعدين فجنينةتاع دار..مفهمتش !! شكون هادي ؟ وعلاه بعتهالي..ثواني و لحقني ميساج بعدها..كبست عالتيليفون فيدي و انا نقرا فيه..<<هشام لقى مديرة الميتم و حكى معاها و عرف كلش..قوليلو هو يقولك لي سمعو من عندها>> قبل ما نلحق نستوعب لحق واحد ثاني <<طبعا ادا كانت عهدك القوة الكافية باش تسمعي الحقيقة>>..بلعت ريقي بالسيف..قلبي خض بالقاوي..قعدت عالسرير نوازن فروحي..مسحت لي ميساج مالتيليفون..و حطيتو..ترميت لتالي..نشوف معا السقف..علاه هشام..علاه عمل فيا هاكا..قلتو ميروحش..قتلو ميحوسش عليها..كنت عارفة اني راح نتحط فموقف هاكا..راح نقدر نسمعها من عندو ؟ منقدرش نكدب و نقول منيش حابة نعرف..اما فنفس الوقت خايفة..خايفة بزااااف..غمضت عينيا نحاول نهرب من هاد الافكار..منيش حابة نبكي..مراحش نبكي..بقيت نحاول نهدي روحي و نحافظ على هدوئي..حتى معرفتش كيفاه غفيت..
فتحت عينيا بلعقل على يد تلعبلي شعري بحنان..خذيت نفس طوييل وقت شميت ريحتو..تلفت ليه بلعقل..طاحت عيني فعينو..تبسمتلو..شاف فيا بنظرة غريبة..للحظات سفت فعينيه الحزن..الخوف..الحب..بلعت ريقي بالسيف..نظرتو وصلتلي بزاف حاجات..و خلاتني نستنتج لي جايني..ستندت بيديا عالسرير..تقعدت..تقعد حتى هو..رفدت يدي رديت شعري لتالي..رمى يدو لخدي..عدا ابهامو فوق الضربة لي فجبهتي يحكي..
هشام: مراهيش توجعك ؟
انا: هأة
تنهد..نزل يدو بلعقل..قبل ما يبعدها شديتو..
انا: هشام
طلع بعينيه ليا..اول ما طاحت عيني فيعنو..هرب بعينيه مني..عضيت شفتي..اول مرة نسوفو متوتر لهاد الدرجة و قاعد يهرب مني..تي حتى صوتو خرج يعرس وقت سألني..خذيت تفس طويل..نجمع فقوتي باش نقدر نسألو..منعرفش كيفاه خرجت معايا الهدرة..كيما منعرفش كيفاه لقيت هاديك الكدبة..
انا: لمرأة لي تلاقيناها فالميتم هاداك نهار عيطتلي خاطر خليتلها رقمي و قاتلي بلي المديرة لقدمة عيطتلها..قاتلها بلي رحت ليها
غمض عيني بقووة و رجع فتحهم..حسيتو دخل بعضو..كبس على يدو لي شايداتو بيها..تبسمت على جنب..رجعت حكيت..
انا: عادي هشام..قولي
تنهد..جبدني من يدي..قربني ليه اكثر..جيت قاعدة اجونو قدامو..رفد يدو عداها على شعري ردو لتالي..
هشام: منعرفش كيفاه راح نقولك..صدقيني هادا من بين اصعب المواقف لي عشتها فحياتي..
قاطعتو قبل ما يكمل..
انا: هشام من غير مقدمات..قولي كلمة وحدة..شكون حطني لتم ؟
بلع ريقو بالسيف..غمض عينيه و رجع فتحهم..كأنو يسأل فيا ادا مستعدة..هزيتلو براصي ايه..رجع حكى..
هشام: يماك حطاتك لتم بعد موت باباك
موس..موس و تغرس فيا..فهاديك اللحظة لي هدر فيها..و معا هادوك الكلمات لي خرجو من بين شفافو..حسيت كلي روحي طلعت مني..وجع مشي نورمال حسيتو فقلبي..كانو ضربة قوية جاتني لقلبي..حريق و لهب داخلي..اما لي غريب فالموضوع..انو منزلت مني حتى دمعة..مبكيتش..جيست تبسمت..تبسمت بإنكسار بين شفافي..تقبلت الضربة بكل دم بارد..تقبلتها و سمعتها..اصلا كنت موجدة روحي ليها..قبل ما يرجع يحكي حطيت راصي على رجلو..تنهدت بحرقة..غمضت عينيا..حسيت بيدو تحطت على راصي..نسمع فيه يحكي..
هشام: ف فيرا سافا ؟
انا: ممممم
هشام: متأكدة ؟
فتحت عينيا..قابلوني عينيه لي فوقي..عينيه لي كانو مليانين خوف..حسيت بخوفو..من عينيه لي يترجاو فيا..من يدو لي ترعش..من دقات قلبو..و الحزن لي باين فعينيه..عرفتو استغرب ردة فعلي..و عارفة تصدم من برودي..تي حتى انا تصدمت من روحي..تبمستلو نطمن فيه..
انا: متخافش انا مليحة..متعودة اصلا
نزل عليا اكثر..باسني من جبهتي و رجع جبد روحو..تبسمت بين شفافي بالسيف..نسمع فيه يحكي..
هشام: فيرا يا روحي متحكيش هاكا متعرفي بالاك يكون عندها اسبابها م..
قبل ما يكمل..رفدت يدي حطيتها على شفافو..سكتو نحكي..
انا: ميهميش هشام عادي..انا تقبلتها..تعيش متزيديش تجبدلي هاد الموضوع..
تنهد..شدلي يدي لي على شفافو..باسها من كف يدي..جسمي قشعر من شفافو..تبسملتو..رجعت نحكي..
انا: عيانة..حابة نرجع نرقد..اما اوعدني..اوعدني انا نلقاك هنا وقت نفيق..متخلينيش كيما هوما
تنهد بصوت كلو حسرة..رجع حكى..
هشام: مستحيل..مستحيل يجي نهار و نخليك..نتي برك خليك مرتاحة و كوني متأكدة اني دايمن موراك..ظالمة ولا مظلومة انا طول عمري معاك..
اول ما كمل كلامو غمضت عينيا براحة..كلماتو كانت كفيلة باش تريحني يكفيني انو وعدني..يكفيني هو معايا و ميهمني حد بعدو..ادا كان هو معايا فانا قادرة نواجه الدنيا كاملة..حسيت بيه وقت جبد الغطا من تحتي..غطاني..نحس فيدو تمشي و تجي على شعري بحنانة..كبست على يدو الثانية فيدي..وجع مش نرمال قاعد ينغز فيا فقلبي..اما بدل ما يتجمعو الدموع فعينيا..تجمع الكره فقلبي..كانت اول مرة فحياتي نحس فيها بالحقد تجاه انسان..كانت اول مرة نحس برغبة الانتقام..فكرة اني كنت حمل ثقيل حتى على ماما..خلات رغبة غريبة تنولد داخلي..رغبة اني نحرقهم كاملين..و نخلص فيهم ثمن كل دمعة نزلت من عيني..هو بفمو قال انو مكاش صدف فحياتي..معنتها مراحش نتهنى حتى يدفعو ثمن كل حاجة..معادش يهمني لي راح يصير منا للفوق..و مولا يهمني حتى بنادم من غير هشام..حتى نفسي مولاتش تهمني..لي رجع صح يهمني انهم يدفعو ثمن لعبهم بيا..و بحياتي..و استغلالهم ليا..مراحش نغفر..راح يخلصوها بالواحد..جا الوقت لي صح نعاملهم فيه بنفس معاملتهم ليا..الا منخليهم لعبة بين يظيا ولا ميكونش اسمي فيرا..منعرفس كيفاه غفيت..منعرفش طيفاه قدرت نرقد بهادلك الوجع كامل لي قاعدة نحس فيه فقلبي..لي نعرفو اني رقدت مرتاحة فنفي الوقت..مرتاحة خاطر عارفاتو جبني..و مستحيل يخليني..
الراوية تحكي:
قاعد على هاداك الكرسي..يلعب بالستيلو في يدو..طلع راصو على صوت الباب لي طار من بلاصتو..تبسم على جنب و هو يشوف معاها..تكى لتالي يحكي بكل برود و استفزاز..
رشيد: يااا اهلا و سهلاا..هادي غيييبة
ڨحرتلو..قربت ليه بالزربة..تكات بيديها عالبيرو..نزلت عليه..تشوف معاه بعينين شاعلين..تماما كيما اللبوة كي تقرب لولادها..خبطت البيرو بيديها تحكي..
_فهممممني بواش من حق تقول لبنتي بلي انا لي سمحت فيهااا
رشيد: ههههوصلوك الاخبار عالطاير بصح علاه شبيني كدبت ؟ مشي نتي لي حطيتيها لتم ؟
_رشيد احسنلك متلعبش معايا..انا و نتا نعرفو انك نتا لي جبرتني على هاد الشئ
رشيد: مممم بصح فيرا و لا مروة ولا منعرف واش اسمها متعرفش هاد الشي مسكينة
_زوج كلمات نقولهوملك..بالاااك..باالاااك تقرب جيهتها ولا تعمللها جاحة..هاني نحذر فيك..ادا كنت يكتلك فالماضي..فتأكد اني مستعدة نقتلك دك
رشيد: اووو خفت يا مادام
تبسمت على جنب..جبدت روحها لتالي..تبسمت فوجهو تستفز فيه..رجعت حكات..
_اصلا الخوف هو احسن حاجة ديرها..خصوصا و نتا عارف انو هشام رجع يعشق حاجة اسمها فيرا..يتنفسها..رجعت تمسي فعروقو..و هاك تعرف لي يحب واس يقدر يدير..معنتخا احسنلك ترد بالك ماليوم و طلع م..
قبل ما تكمل كلامها..تنفظ مبلاصتو جا واقف..عينيه رجعو ظلمة..خبط البيرو بكامل قوتو يحكي..
رشيد: الحب هاداااك لي تحكي عليه نجلفلك غير انا لي راح نكون مقبرتو..مستحييل نسمحلها تقرب ليه اكثر
_تأخرت..تأخرت بزااااف خاطر الحب لي نولد بيناتهم دار اجنحة يا رشيد..دار اجنحة و رجع عءق..لا انتا و لا واحد غيرك يقدر يوقف فوجهو..و صدقني..هاد العشق هو لي راح يكون مقبرتك..و راح تدفع ثمن كل حاجة درتها فالماضي..رح تدفع ثمن الحرام لي عاشو فيه فيرا و هشام و نتا لي كنت سببو.. لي مقدرتس انا نديرو..العشق لي بين بنتي و هشام هو لي راح يديرو..و اتفكر كلامي مليح..
قالت كلامها و عطاتو بالظهر خرجت ملتم..خلاتو يغلي..يغلي وحدو كيف الثور الهايج..كلام هاد المرأة لي سنين و هي ساكتة (مراحش نقوللكم لمرأة هاديك شكون معا الوقت تعرفو)..خلاه يشحن اكثر..و يزيد كرهو اكثر و اكثر لحاجة اسمها فيرا و سلالتها كاملة..ترمى لتالي عالكرسي..رجلو تتهز مالعصب..يتمتم بين شفافو..
رشيد: راح نشوفو..نشوفو شكون لي يربح فلخر..انا ولا الحب لي قاعدة تحكي عليه..كيما درتها من سنين..راح نرجع نديرها دك..و كيما مكاش لي وقف في وجهي مقبل..مراحش يكون كاين لي يوقف فوجهي دك..مراحش نتهنى حتى تبعد هاديك من هشام..
★★★
رايكم لبنااات😏توقعاااتكم ؟ واش راح يصرا ؟😈..واش راح دير فيرا ؟😉و شكون لمرأة هاديك ؟ زعما بانت فالحلقات لي قبل و لا هادا اول ظهور ليها ؟؟؟؟ و واش تتوقعو من رشيد😈
صوتو و بينو روحكم هنا😌✋
