فتحت عينيا و رجعت غلقتهم..منعرفش شحال راهي الساعة..اصلا معلاباليش ادا رانا فليل و لا فنهار..حطيت يدي على راصي لي نحس فيه راح يطرطق..رجعت فتحتهم..طاحت عيني عليه..متكي لتالي عالحيط و مغمض عينيه..يدو مزال شادني بيها..و اليد الثانية باقية على راصي..تبسمت بالسيف..رفدت روحي بلعقل من فوق حجرو..تقعدت..تلفت ليه..رفدت يدي حطيتها على خدو..تنهدت..وفى بوعدو و مزالو هنا..اصلا لوكان يخليني هوانا مستحيل نعيش..هو كلش بقالي فحياتي..كلش عندي..من غيرو انا منقدرش نعيش..فكرة انو راح يجي نهار ميكونش فيهمعايا تهدني..تخلي التفس يتقطع عليا..حتى اني مفقتش كيفاه كبست على خدو وقت طاحت فبالي..فيقني وقت تنفظ من بلاصتو مخلوع..جا قاعد..من غير ما يستناني نحكي..حط يديه فيووجعلى وجهي يحكي بلهفة..
هشام: يا عمري واش بيك ! واش صرالك !
عرفت روحي خوفتو وقت كبست عليه هكاك..تبسمتلو نحاول نطمنو..هزيتلو براصي لالا نحكي..
انا: م مبيا والو
غمض عينيه..خذا نفس طويل..جبد يديه مني..عداهم على وجهو و انل مركزة معاه..رجع نزلهم..يشوف معايا..
هشام: فيرا متأكدة معندكش واش تقولي ؟ هاكا بهاد البساطة..
عضيت شفتي..فهمت قصدو..فهمت انو مستوعبش ردة فعلي و مدخلتش لراصو..من غير حتى مقدمات و من غير كلام..قربت ليه اكثر ترميت على صدرو..عنقتو..حسيت بيديه لي تلفو على خصري..نسمع فيه يحكي..
هشام: وقت ما حبيتي تحكي راح تلقايني دايمن هنا
كبيت عليه اكثر..حسيتو تنفظ..خرجت منو آه صغيرة..عينيا وساعو..جبدت روحي منو بالزربة..نشوف معاه..حاط يدو على كتفو و مغمض عينيه..من مللمحو باينة يتوجع..حطيت يدي فوق يدو لي على كتفو..نسأل فيه..
انا: هشام واش بيك !!
هشام: و والو
عضيت شفتي..من غير ما نفكر..قربت ليه اكثر..رفدت يدي نحل فقفالي الشوميز تاعو..كل مرة يحج يدو على يدي باش ينحيها نرجع نبعدهالو..فتحت القفالي لولين تاع الشوميز..نزلتهالو جيهة كتفو..عينيا خرجو و انا نشوف فيها زرقاء..شهقت..حطيت يدي عليها بالسيف..مررت صوابعي..
انا: و واش هادا
تنهد حط يدو على شعري يحكي..
هشام: و راسك غير والو متخافيش غير ضربة خفيفة مالاكسيدون
عينيا وساعو..تنفظ مبلاصتي نزلت مالسرير
انا: ياخي نتا بقيت بيهاا مصبااح هاكا !! و زيد كيفاه والو راهي زرقاء كامل
هشام: اششش واش بيك تعيطي..ارجعي لهنا خليني نرقد
كان راح ينوض..رجع حكيت..
انا: احبس..احبس متتحركش..خليك كيما راك راني جاية
هشام: وين !!
انا: دك نولي
خليتو هكاك و عطيتو بالظهر خرجت مالبيت نزرب فخطواتي..هبطت لتحت..الدنيا ظلمة..دخلت لصالة..رميت يدي شعلت الضوء..طاحت عيني عالساعة تاع الحيط..01:30..ياخي كامل الرقاد لي رقدتو اداوين فاتت نص الليل ؟!..حسيت روحي شغل رقدت بزاف..كملت دخلت..كيما توقعت..خلات لابوات فارماسي فوق الطابلة..رفدتها بالزربة و رجعت طلعت ليه..فتحت الباب دخلت..لقيتو منحي الشوميز و متكي لتالي يستنى فيا باش يرجع يرقد..قربت اكثر..طلعت قدامو..تلفت يشوف معايا..
هشام: واش هادا
مرديتلوش..فتحت لابوات..جبدت بوماد..حطيتلو منها و هو مركز معايا..نعدي فيدي عليها بلعقل نحكي فرد وقت..
انا: ادا وجعتك قولي
مردليش..حتى انا محاولتش نشوف معاها..اصلا خدودي نحس فيه فورو مالسخانة..نزرب اعطيني غير نكمل و نجبد يدو من صدرو لي نحس فيه يغلي..اول ما كملت رديت البوماد لبلاصتها و غلقت لابوات..حطيتها عالطابل دو نوي و رجعت مقابلتو..طاحت عيني فعينو..قلبي دق بالقاوي من نظراتو..يشوف فيا بعينين ذابلين و شبه تبسيمة صغيرة على شفافو..جسمي رعش كامل..بلعت ريقي بالسيف نحكي..
انا: وجعتك ؟
هشام: وي
انا: اااه !! صح وين ؟
هزلي براصو ايه رفد يدو حطها على قلبو يحكي..
هشام: هنا
زميت شفافي..مننع فالابتسامة من انها تترسم على وجهي..حكيت بتمسخير
انا: و كيفاه نداويك ؟
مزاد حتى حرف..شدني من يدي جبدني بكامل قوتو..جيت طايحة عليه..كبس على راصي مالتالي بقبضة يدو..غرسو فصدرو..
هشام: قربك هو دوايا
غرست راصي عندو اكثر..نسمع فدقات قلبو المتزايدة..ضحكت مع اني مشي قادرة على الضحك..اما دايمن يعرف كيفاه ينسيني فحزني..حطيت يدي على صدرو جيهة الضربة عديتها على بلعقل..حسيت يدو لي حاطة راصي عليها رعشت..رجع حكى..صوتو خرج ببحة غريبة..
هشام: حبسي و ارقدي
انا: رقدت بزاف مجانيس نعاس
هشام: مترقديش ؟
انا: مممم
هشام: معنتها خلينا نستغلو هاد الوقت فحاجة ثانية
عينيا وساعو..فهمت مخو الخامج وين داه..كبست عليه اكثر غمضت عينيا بقوة نحكي..
انا: اععع هشام..
هشام: وشنوو هشام
انا: خلني نرقد
هشام: دك وليتي حابة ترقدي ا فرخة
ضحكت..خبيت راصي عندو..سمعتو وقت تنهد..سكتنا فيزوج..سكت نمنع روحي من اني نفكر فكاش حاجة..جيست نحاول نستمتع بقربو و ننسى الدنيا..نعيش كل لحظة و انا قريبة ليه..فلحظة منعرفش كيفاه تفكرت كلام خالتي صباح وقت حكات عليه..منعرفش علاه جات فراصي فكرة اني نسقسيه..اما قاطع افكاري وقت رجع حكى..
هشام: فيرا
انا: مممم
هشام: نعشق ###..##### عليك
تبسيمة ترسمت تلقائيا على شفافي..حكيت و انا مغمضة عينيا..
انا: نتنفسك..نموت فيك..
قلت لعندي و بعدها رجعت غطست فالنوم..عياانة بزااف و رقادي متقطع..تاااعبة و مهدودة..موغالمون و فيزيكون..اخر حاجة متءكرتها هي ملمس شفافو السخونين لي حسيت بيه فوق جبهتي..بعدها غطست فاانوم و نسيت كبس و انا فحضنو..نسيت لي يستنى فيا..نسيت لي عرفتو ليوم و رشيد و مهدي و المنظمة..نسيت كلش و انا بين يديه..
هشام يحكي:
فتحت عينيا صباح..نحس فحاجة ثقيلة على نصي الايسر..تحركت شوية..نزلت راصي ليها..تبسمت و انا نشوف معاها..مزال مكبشة فيا كيما رقدت لبارح..حطيت يدي على رقبتها مالتالي..جبدت يدي من تحت راصها بلعقل باس متنودش..تقعدت مقابلها..رفدت يدي رديتلها شعرها لتالي..نزلت عليها اكثر بستها من نيفها و جبدت روحي..رفدت يدها الصغرونة بين صبعتيا..قربتها لشفافي طبعت بوسة عليها..خفت و مزال خايف..خايف من ردة فعلها لي صدمتني..خايف من تصرفها لبارح..عارف و متأكد انو تجرحت..عارفها تقاست..اما ردة الفعل هاديك مستنيتهاش منها..دمعة و مطيحتهاش و انا لي زاد خوفي عليها..نزلت يدها حطيتها عالمخدة..احسن شي نعملو اني نسقسي هاديك الطبيبة..تنهدت..جبدت روحي وقفت..غطيتها.. فتحت لقجر تاع الطابل دو نوي..جبدت ورقة الدواء تاعي..نحوس على رقم الطبيبة..رفدت تيليفوني ماركيتو عندي و رجعتها لبلاصتها..رفدت الشوميز تاعي من الارض لبستها بالزربة.. رجعت نزلت عليها اكثر..بستها من خدها و جبدت روحي..خرجت من عندها..نزلت لتحت..الدار فارغة..اكيد مزال مفاقتش..خرجت لبرا..وقفت عند الباب..رفدت تيليفوني نعيطلها..شوية و ردت..
_الو..شكون معايا ؟
انا: دكتورة نجابي ؟
_وي شكون ؟
انا: هشام الراشدي..مزال شافية عليا ؟
_اااه ادا مكنتش غالطة راجل فيرا لي كانت عندنا من مدة !
انا: وي
_تفضل كاشما كاين ؟
عديت يدي على سعري رديتو لتالي..منعرفش كيفاه راح نبدا الهدرة..خذيت نفس طويل نحكي..
انا: منعرفش كيفاه نشرحلك الوضع..لبارح فيرا تعرضت لموقف صعيبة و نظن اثر عليها بزاف
عضيت شفتي وقت تفكرت حالتها لبارح..النفس تغلق عليا..رجعت حكات..
_كيفاه اسرحلي اكثر
انا: يعني هي تعرضت لموقف..من المفروض يعني انا ستنيتها تبكي..تعيط يعني هكا المفروض تكون ردة فعلها فكرة..فالاول كنت شاك يمكن يكون بسبة ياسين..بصح دك وليت متأكد انو معندهاش علاقة بيه..واش مال..لازمني نعرف خاطر مبقيتش قادر نتحمل نشوف حالتها هكاك..نحس فعروقي راح يطرطقو..لازمني نخليها تفرغ لي فداخلها..اما كيفااااه..فقت من سرحتي على طونوبيل حابسة فطرف الطريق تسينياليلي..عقدت حواحبي..عرفتو..من الطونوبيل عرفتو هو..خذيت نفس..مشي ناقصو..مشي ناقص هدرتو حتى طرف..شديت فران موراه..فتحت الباب نزلت..منعرفش واش يسحق من عندي بالضبط..اول ما قربت لطونوبيل فتحلو الشوفور الباب..نزل مستند على عكازتو..كيف العادة..يتبسم هاديك الابتسامة الباردة المستفزة..ڨحرتلو نحكي..
انا: واش !
رشيد: هاكا تستقبلني
انا: اسمعني..منيش ناقصك دك..احكي لي عندك خليني نروح
حرك راصو بإستسلام..تنهد يحكي..
رشيد: حاجة ما نفعت معاك..معنتها خليني ندخل فالموضوع ديراكت
انا: احسن
رشيد: الفترة هادي يا سي هسام ملاحظتش انك اهملت خدمتك !
انا: مأهملتهاش
رشيد: اهملتهااا..و بسبة طفلة تان
قلبي دق بالقاوي..من غير ما نفكر قربت ليه خطوة..جيت فوجهو العينين فبعضاهم..حاكم روحي بالسيف عليه نحكي و نلز على سنيا..
انا: الطفلة هاديك لي راك تحكي عليها..احسنلك متدخلهاش فنقاشاتنا و تخلي اسمها بعيد على شفافك
رشيد: يا حسرتي عليك..لهاد الدرجة !! لهاد الدرجة غرقت فيها
انا: حاجة متخصكش هادي..نتا غير ابقى بعيد عليها
رشيد: اما تعرف مليح انو حبك ليها راح يحرقها
تبسمت على جنب..جبدت روحي لتالي..عارفو وين حاب يوصل..عارفو حاب يقنعني بكل الطرق اني نبعد عليها..رجعت حكيت
انا: و نتا واش دخلك ؟ بالاك حاب نحرقها
رشيد: العينين هادو لي قاعدين يلمعو و هوما يحكو عليها مستحيل نصدق انهم حابين يحرقوها
انا: مليح كي خرجت تشوف..معنتها حط فبالك..انو النار لي راح تحرقها مستعد نطفيها بكفوف يديا..معنتها احسنلك تبقى بعيد عليها قيس السماء و الارض خاطر ادا قربت منها ساعتها انا لي راح نحرقك
رشيد: مستعد تواجهني على خاطرها ؟ تظن هي تان مستعدة تواجه الناس على جالك ؟ متأكد انها تستهل لي تعمل فيه علاجالها هشام ؟ تستهل ثقتك و حبك ليها ؟؟
تبسمت فوجهو..هزيتلو براصي ايه..بعدت بخطوة لتالي..رجع قرب مني..رفد صبعو يحكي و يضرب فقلبي..
رشيد: رد بالك..رد بالك خااطر هاد الطفلة لي ولات اقرب ليك من حبل الوريد قادرة تقطعهولك..رد بااالك هشام انا لي نعرف هنا كل واحد واش يسوى..ادا نتا عاطيها كامل ثقتك فتأكد انها عاطياتك ثقتها..و تفكر دايمن..النسااء عمرهم ما يستهلو الثقة..
رفدت يدي بعدتو يدو عليا..تروهجت من طريقة كلامو..كان يحكي كانو واثق ملي قاعد يقول فيه..كانو حاكم عليها حاجة..دخلني بعضي..حاولت نكبس روحي قد ما نقدر..تبسمت على جنب نحكي..
انا: مشي شغلك نتا..بيناتنا غير الخدمة..معنتها باش تظمن سلامتك خليك بعيد على حياتي الشخصية..
مستنيتوش يرجع يحكي..عطيتو بالظهر..نزرب فخطواتي..اعطيي غير نبعد عليه..نسمع فيه يحكي مورايا..
رشيد: ارجججع لخدمتك صفقة الممنوعات الجاية نحبك نتا تشرف عليهااا..و خلي عيون الجليد بعيدة المرة هادي
رفدت يدي فالسماء بلا ما نتلفت ليه..عملتلو باي باي..ركبت ديراكت..ديماريت منبعد عليه..من غير ما نرجع نشوف فيه..كلامو يتعاود فودني..نبرة صوتو..طريقة هدرتو..كبست عالفولون بكل قوتي..مستحيل تكون فيرا قاعدو دير فحاجة مور ظهري..فيرا مستحيل تخون ثقتي ولا ديرها..فيرا حاجة وحدوخرا..ادا كانو النساء ميستهلوش الثقة كيما قال ففيرا هي روحي و خلاف عليهم كامل..ادا هي اقرب ليا من حبل الوريد كيما قال..فهي مستحيل يجي نهار تقطعو ولا تطعني فظهري..هاديك روحي و صغرونتي..امبوسيبل تعملها بيا..ادا الدنيا كاملة خانت ثقتي..فيرا مستحيل تعملها..اكيد حكى هكاك غير باش يشوش تفكيري..امبوسيبل تعمل فيرا حاجة من مورايا..امبوووسيبل
★★★
توقعاتكم ؟؟ واش راهو يحاول يدير رشيد ؟و وين حاب يوصل😉؟ و علاش قالو تان بلي خلي عيون الجليد بعيدة فالصفة هاديك ؟ و صح راح تبقى بعيدة ؟😏🔥زعما هسام راح ينولد الشك فقلبو جيهتها ؟ ثقتو فيها راح دوم ولا راح تدمر ؟
صوتوو لبنااات😍رايكم و توقعااتكم
