فيرا تحكي:
وجيعة قوية نحس بيها فراصي..جسمي نحس فيه مدقدق..مشي قادرة حتى نتحرك..يدي نحس فيها سخونة و ثقيلة..نفتح فعينيا و نرجع نغلق..فتحت عينيا شوية..نشوف فسقف ابيض مضبب..غمضت عينيا شوية و رجعت فتحتهم..الصورة وضاحت عندي..يمكن بيت تاع سبيطار..منعرفش..نزلت عينيا ليدي..قلبي دق بالقاوي و انا نشوف معاه..حاطر راصو على يدي و شادها..بلعت ريقي بالسيف..حركتها شوية..تنفظ مبلاصتو..طلع راصو ليا..
هشام: فيرااا
رفد يدو حطها على خدي..غمضت عينيا بقوة و رجعت فتحتهم..حتى اني مقدرتش نسمع لي قاعد يقول فيه..جيست نشوف معاه..حالتو داخلة بعضها..شوميز تاعو قفاليها مفتوحين..عينيه حمورا..قلبي عصر عليا..فثواني رجعت تفكرت كلش..كل حاجة صرات تعدات بين عينيا..حسيت بدمعة سخونة نزلت من عيني..عينيه وساعو..ما فقت غير وقت تحطت جبهتو على جبهتي..يدو على خدي تمسح فدموعي..مغمض عينيه يحكي فوجهي بصوت هادي..
هشام: اششش متبكيش..متبكييش يا روحي هاني هنا..
قلبي حسيتو يخبط بالقاوي وسط صدري..روحي تعلقت فكلمتو..حبيت نردلو..حبيت نحكي معاه..اما والو..مقدرتش..لكلام وحل فحلقي..حسيت بشفافو لي تحطو فوق جبهتي..جبد روحو شوية..حاط يدو على شعري..يعديها فيها و يحكي فرد وقت..
هشام: فيرا احكي معايا..جاوبيني متخلعينيش عليك..
بلعت ريقي بالسيف..للحظات شفت فعينيه الخوف..شفت الشوق..شفت الحنان..و يمكن حتى..شفت الحب..حركت يدي لي فوق السرير شوية..شديت بيها صبعو..كبست عليه..نحكي بالسيف..
انا: ه هشام
نزل براصو ليدي لي شايدة يدو..كبس عليها..و رجع بعينه ليا..يحكي..
هشام: احكي ا عمري..هاني نسمع فيك..اشكي
انا: خ خليك ه هنا
تبسملي..قعد جبني عالسرير..نزل بيدو لخدي يحكي..
هشام: علاه انا نقدر نروح و نخليك
تبسمتلو بالسيف..منعرفش شبيه يحكي هكا..منعرف واش صاريلو..كيما منقدرش ننكر فرحتي..منقدرش ننكر رعشة قلبي و انا نسمع فحروفو..منقدرش ننكره انو قلبي قاعد يدق معا كل حرف يخرج من بين شفافو..احاسيس مخلطة قاعدة نعيش فيها..بين فرح و حزن..بين خوف و اطمئنان..ضايعة..حاااسة اني ضايعة..لكلام مشي قادرة نخرجو..تعباانة موغالمون..مشي قادرة نحكي و لا حتى نتحرك..حاسة عقلي مهدود..فشلانة..حابة نغمض عينيا و نرتاح اما مشي حابة نبعد عينيا عليه..خايفة نفيق و منلقاهش..خايفة..
قاطع سرحتي صوت الباب لي تفتح..دخلت..تلفتنا ليها فيزوج..الضحكة ترسمت على وجها وقت طاحت عيني فعينها..جبد يدو من شعري بلعقل..غمزلي و تبسملي..رديتلو التبسيمة بالسيف..قربت بالزربة لطابل حطت كيسان القهوة لي جابتهم..و قربت ليا..حطيت يدها على راصي تحكي..
وردية: فيرا صغرونتي و اخيراا فقتي..لاباس عليك !
هزيتلها براصي ايه..نطمن فيها..كملت تحكي..
وردية: كاش حاجة توجع فيك ؟
هزيتلها براصي لالا من غير ما نحكي..اصلا مشي قادرة..تلفتت ليه..كأنها تسأل فيه بعينيها..رجعت شافت معايا..
وردية: معليش منتعبكش بالهدرة ارتاحي و...
قبل ما تكمل كلامها..رجع تفتح الباب..تلفتت للباب..دخلت مرأة..باين فيها طبيبة..
ناض مبلاصتو..و باقي شد صوابعي فيدو..قربت ليا تتبسملي..
_سافا ؟
انا: ممممم
_عندك وجع فراصك ؟
هزيتلها براصي ايه..حسيت بيدو لي كبست على يدي..طلعت راصي ليه مستغربة حركتو..تبسملي..كملت تحكي..
_توقعت هاد الشئ..حاجة طبيعية دك تدريجيا يحبس..راح نفحصلك دك..و بعدها نشوفو
قربت ليا اكثر..فتحتلي عينيا شافتهم..قاستلي ضغطي..و تحسست نبضاتي ولا منعرفش واش..بعدها جبدت روحها..
هشام: كلش نرمال ؟
مردتلوش..حكات معايا انا..
_لاباس عليك..راح تبقاي هنا يامات..ترتاحي و بعدها راح تقدري تخرجي..اما لازمك تنتبهي لروحك اكثر و تحاولي متتوتريش..تفاهمنا ؟
تبسمتلها بالسيف..تلفتت لهشام تحكي..
_مسيو هشام خلينا نخرجو لبرا نحكو
قالت لي عندها و عطاتنا بالظهر خارجة..تلفت ليا..حط يدي بلعقل عالسرير..و نزل عليا اكثر..باسني من خدي و جبد روحو يحكي..
هشام: راجعلك
هزيتلو براصي..بعد مني..لحقها..عضيت شفتي..قلبي عاصر عليا..منعرفش علاه اما نظراتها مطمنونيش..كانت قادرة تحكي معاه هنا..منعرفش علاه خرجاتو معاها..قاطعني صوتها و هي تحكي..
وردية: فيرا..راح نروح بالزربة للحمام..مراحش نتأخر تقدري تبقاي وحدك ؟
هزيتلها براصي ايه..تبسمتلي..خرجت تزرب فخطواتها..تنهدت..غمضت عينيا نرتح فيهم..حاسة بفراغ فالداخل تاعي..بوجع فقلبي..بصداع فراصي..قلبي عاصر عليا..مغمومة حابة نخرج من هنا..
فتحت عينيا على صوت الباب لي تفتحت..تلفت ليها..نشوف معا ممرضة دخلت و غلقت الباب موراها..عقدت حواجبي من تصرفاتها..كأنها دخلت بالسرقة..قربت مني..وقفت قدامي تحكي..
_فيرا جبروت ؟
انا: ممممم
_البوس قالك متنسايش عرضي ليك و متنسايش اخر مكالمة قبل ما تلحقي لهنا..قالك عرضي مزالو قائم..و خمي مليييح فاخر كلام قلتهولك
رمات كلامها و خرجت تجري..مبعوثة و وصلت الرسالة..رمات هلدوك لحروف لي رجعوني لتالي و خرجت بالزربة..فثواني كل حرف قالو رجع تعدا فراصي..كل حرف خرج من بين شفافو رجعت سمعتو كأنو قاعد يحكي قدامي..دموعي نزلو وحدهم..تخقت..تخنقت و النفس تسكر عليا..مقدرتش نتنفس..تخنننقت رااني تخنقت..معلاباليش كيفاه ستندت بيديا عالسرير..نضت بالزربة..تقعدت فبلاصتي..نحاول نفك خيط السيروم من يدي..محبش يتنحى..محبش..طرطقت بالبكاء..حاسة بالعجز..بالقهر..اسوء احساس وقت تحس روحك مربوط و مقادر دير واااالو..لميت رجليا لصدري..حطيت يديا على رجليا..حطيت راصي..نتنفس بالقاوي..نحاول نطلع لهواء..حابة نعيط..اما مقدرتش..مقدرتش نخرج صوتي..جسيت نبكي فالسكات..نبكي بشهقات صاميتين..
هشام يحكي:
بعدنا من بيتها..وقفت قدام بيروها..تلفتت ليا..نشوف معاها عاقد حواجبي..نستنى فيها تحكي..وقت قالت خلينا نحكو برا عرفت انو حابة تحكي حاجة من غير ما تسمعها فيرا..خذيت نفس طويل نهدي فروحي..سألتها..
انا: واش كاين !!
_لاحظت انو كلامهل قليل ؟ و قاعدة تتجنب الكلام ؟
انا: وي اما مشي حاجة طبيعية بعد ما فاقت انها تكون تعبانة هكا ؟
_يمكن تكون طبيعية و راح يزول اما كاين احتمال تان يكون هلد السئ بسبب ازمتها النفسية
انا: واش قصدك ؟
_يمكن منا و طلع كلامهل يقل..و بصراحة قادر حتى يتقطع
بلعت ريقي بالسيف..نحاول نستوعب لي قاعدة تقول فيه..كملت تحكي..
_حاول متخليهاش توصل لهاد الدرجة..كلمها..معلاباليش كيفاه نشرحلك بصح حاول دايمن تنطقها يعني تهدرها..
انا: ك كيفاه !
_منعرفش هنا يجي دورك..مرتك و انتا لي تعرف واش الامور لي قادرة تتجاوب معاهم..احكي معاها فمواضيع تحبهم..مواضيع متأكد انها راح تردلك وقت تسألها عليهم..نظن فهمت قصدي !
انا: فهمت..ميرسي
_و ادا مقدرتش الاحسن تعرضها على طبيب نفسي و كيما قتلك حاول تجبدها بالهدرة باش تفهم لي صاري معاها..
هزيتلها براصي ايه..عطيتها بالظهر راجع ليها..تخمامي فكلام الطبيبة..كبست على يدي بكل قوتي..سؤال واحد يدور فراصي..واش لي وضلها لهاد الحالة..واش لي خلاها توصل تتأزم لهاد الدرجة..وقت جبدت روحها مني هاديك الليلة و طلعت لبيتها ملحقتهاش..مع اني شقتها مشي قد بعضها اما ملحقتهاش خاطر فكرتها غير مقلقة و راح ترتاح..متوقعتش باش يصرا فيها هكا..متوقعتش باش نشوفها مهدودة لهاد الدرجة..تي صوت عياطها لتو يرن فودني و صوت وقعتها عالارض مزلت نسمع فيه..وصلت عند بيتها..رفدت يدي فتحت الباب..عينيا خرجو و انا نشوف معاها..ضامة رجليها و حاطة راصها عليه..تبكي !!..مسمعتش صوت بكاها اما متأكد قاعدة تبكي..قلبي خض بالقاوي..منعرفش على روحي كيفاه لحثت لعندها..رفدت يدي ترعش حطيتها على وجها..طلعتهولها..عينيا وساعو و انا نشوف فدموعها..دموعخا لي نازلين كيف الشلال..صدرها لي طالع هابط..
انا: ف فيرا !!!
اول ما خرجت اسمها من بين شفافي..ترمات عليا بكل قوتها..عنقتني بقوة..تبكي..تشهق..رفدت يدي مخلوع حطيتهم على ظهرها..
انا: فيراا واش بييك..اححكي يا روحي وااش صراالك !!!
فيرا: ه هشااام..م متخلينيش..متخلينيش تعيش
انا: اششش راني هنا..فيرا اهدي عيش حبي..اهدي..
بلعت ريقي بالسيف..نعدي فيدي على طول ظهرها..كبست على راصها مالنالي غرستو فصدري اكثر..كبست عليا حتى حسيت بدفرتيها لي تغرسو فظهري..باقي تشهق..تشهق كيف الدراري الصغار..تصدمت..تصدمت..تخلعت..راصي حبس..منعرفش واش صرالها..من 5 دقايق خليتها لاباس عليها..معرفتش واش نقول..منعرفش كيفاه لازم نهديها..
فقت على منظر الممرضة لي دخلت..تحط فكاش حاجة فالسيروم لي معلق..تلفتت ليا..طمن فيا بعينيها..عرفتها حطتلها مهدئ..كبست على ظهرها بكامل قوتي..كون قدرت نخبيها عندي منقصرش..حطيت راصي على شعرها..نشم فريحتها..قلبي واجعني على حالتها..دقايق قلال و ترخفت فحضني..حسيت بدفرتيها وقت خرجو من لحمي..عرفتها رقدت..رخفت يديا عليها..حطيت يدي على راصها و يد على ظهرها..رديتها للور بلعقل..بستها من جبهتها بلعقل..جبدت روحي منها بلعقل..نشوف معا الممرضة لي سقمتلها السيروم فيدها..عديت يدي بالزربة على وجهي..تلفت للباب..نشوفها فيها واقفة لتم و يدها على فمها..عرفتها هي لي عيطت لطبيبة..رجعت تلفت ليها..قعدت قدامها..شاد يدها..قلبي عصر عليا من منظرها..راقدة و محاسة لوالو..منيش مصدقة اني قاعد نشوف فالطفلة لي نعشقها فهاد الحالة..مراحش نتهنى حتى نعرف لي وصلها لهنا..مراحش نتهنى حتى نعرفش واش صاريلها..مستحيل نخليها..مستحيل نبعد عليها دقيقة حتى نخرجها من هاد الحالة..هي كلش عندي..مستحيل نسمح لحد يقرب ليها و لا يأذيها..
🔝🔝🔝🔝🔝🔝
نظن عارفين انو فالحلقات الجاية يستناو فيكم احداث جديدة😚لكرونيك راح تاخذ مجرى وحدوخر😈😈
اطوني توقعاتكم..زعما فيرا تقبل تخدم معا رشيد ؟؟ و واش نوع اوامرو ليها ؟😒 و ليديا و مهدي لوااااش يخططو
