فيرا تحكي:
نفتح فعينيا بلعقل..حسيت بيدين كابسين على كرشي..عرفتو معنقني مالتالي..حطيت يديا على يديه..فتحتهم باش نقدر ندور ليه..تقعدت بلعقل فوق السرير..تلفت ليه..غاطس فالنوم..حطيت يدي على خدو..نعدي فيها على لحيتو..راقد..حتى هو عيى بزاف معايا اخر فترة..نزلت عليه اكثر..بستو من خدو و جبدت روحي..وقفت..غطيتو و بعدت عليه بلعقل..فتحت الباب بلعقل باش مديرش الحس و خرجت..دخلت للكوزينة..ديراكت للفريجيدار..نحس فكرشي قاعدة توجع فيا مالجوع..لقيت عصير..جبدتو..فرغت فالكاس..تلفتت للقجور..نحوس عالقاطو..عقدت حواجبي وقت ملقيتوش..طلعت راصي للبلاكار لفوق..فتحتو..عينيا لمعو وقت شفتو..اما بعيد بزاااف..طلعت رجليا..نحاول نلحقلو..تكوانسيت فبلاصتي وقت حسيت بنفسو فرقبتي..قلبي دق بالقاوي وقت تحطت يدو على خصري..تبسمت تلقائيا..جبدو..و بعد شوية..تلفتت ليه..طاحت عيني فعينو..تبسمت و انا نشوف فحالتو..شعرو هابط على عينيه..باين فيه النعاس..رفد يدو يبعد شعري للور..يحكي فرد وقت..
هشام: علاه نضتي دك..مزال الحال
انا: جعت
هشام: هادا مراحش يشبعك
طلعت كتافي بلا مبالاة..
هشام: و دواك شربتيه ؟
عملتلو براصي لالا..
هشام: اسبقي فيه قبل
هزيتلو براصي..نفخ بالقاوي يحكي..
هشام: احكي متبقايس تهدري بالاشارة
انا: معينيش
سكت شوية..ترطز بعينيه فعينيا..عدا يدو على خدي و مسى بيها لداخل شعري..يحرك فيها..عارف انو هاد الحركة تريحني..غمضت عينيا نستحلى فلمستو..نسمع فيه يحكي..
هشام: فيرا واش صرالك..واش وصلك لهاد الحالة ؟
فتحت عينيا..نشوف معاها..قلبي وجعني وقت رجع فكرني..معرفتش واش نقول..واش حنقولو ؟..نقولو انو البوس تاعو قال انا لي قتلت ياسين خاطر كنت حمل ثقيل على كتافو ؟..نقولو اني خايفة عليه مني و من ضعفي ؟..نقولو خايفة نسبب دمارو !! نقولو ابعد عليا خاطر راح نكون عائق فوجهك و قدام اهدافك..الكلمة هادي بالضبط وقت نتفكرها النفس يتغلق عليا..فثواني عينيا تعمرو بالدموع..مستحيل نقولو..مستحيل نقولو تان بلي عرض عليا نولي نخدم معاه..منقدرش..اكيد يقتلو..والله يقتلو نعرفو وقت يزعف..ما فقت غير وقت نزلو دموعي..نزلو سخونين يحرقو..عينيه وساعو..حط يديه على خدودي فيزوج..
هشام: علاااش الدموع ### علاش راكي تبكي ؟
معرفتش واش نحكي..معرفتش واش نقول..معنديش اصلا واش نقول..دموعي نزلو اكثر و اكثر..خذا نفس طويل..جبدني ليه بكامل قوتو..لف يديه على ظهري..عنقني..يعدي فيدو على طول ظهري..لفيت يديا على ظهرو..نسمع فيه يحكي..
هشام: اشش خلاص..متبكيش..اهدي
بلعت ريقي بالسيف..وجيعة قوية فقلبي قاعدة نحس بيها..عجز عالكلام مفهمتش علاه قاعدة نحس بيه..حاسة روحي ضايعة..ضااايعة و مشي عارفة واش لازم ندير..منعرفش شحال تعدا علينا وقت و حنا هكاك..جبدت روحي منو شوية وقت حسيت روحي هديت..رفدت يديا نمسح فدموعي..حط يديه على يديا نزلهملي..طلعلي راصي..طاحت عيني فعينو..تبسملي..رفد يدو هو يمسح فدموعي..يحكي فنفس الوقت..
هشام: متزيديش تبكي
تبسمتلو..بعدت بخطوة لتالي من غير ما نحس..بعدت عليه تلقائيا..منعرفش علاه درت هكا..يديه بقاو معلقين فالسماء..عقد حواجبو..يشوف معايا..قبل ما يحكي قاطعتو نحكي..
انا: ر راح نجيب د دوايا و نبدل حوايجي
نزل يديه بلعقل..مستنيتوش يردلي..قبل ما يحكي..تلفت..عطيتو بالظهر..زربت فخطواتي خارجة..زربت مبعدة عليه..نفسي مشي عارفة علاه قاعدة نعمل هاكا..مشي عارفة علاه قاعدة نبعد عليه..يمكن خاطر حاسة روحي قاعدة نعمل فالصح..ولا يمكن خاطر حابة ناخذ راحتي باش نفكر و نقدر نرتب افكاري و نعرف واش ندير..و نفرق بين الصح و الغلط..فتحت باب البيت..دخلت..طاحت عيني عالكابة لي فوق السرير..قربت ليها..فتحتها نحوس فيها..جبدت تيليفوني و حوايجي حطيتهم قدامي..اول ما رفدت الدواء..سمعت صوتو..
مهدي: فيرا
تلفت بالزربة جيهة الدوش..عينيا خرجو..نشوف فيه قدامي و مشي مصدقة..بواطة الدواء طاحت من يدي..فمي تحل مالصدمة..
انا: م مهدي !!
تبسملي..قرب جيهتي..كل خطوة يعملها جيهتي نحس فضربات قلبي يتسارعو..واش راهو يدير هنا !! كيفاه دخل !! واش جابو !! و الاهم واش حيصرا ادا شافو هشاااام هنا..فثواني دخلت فدوامات تاع افكاار..و ما حسيت غير بيديه لي تلفو عليا..ما فقت غير وقت تحط بدني لاسق فبدنو و عنقني..عاتها برك فقت عالوضع لي راني فيه..و عالموقف لي تحطيت فيه..و عالجريمة لي راح تصرا ادا شافو هنا..محسيتش لروحي كيفاه رفدت يديا دزيتو بكل قوتي..بعد لتالي مصدوم..قربت ليه نحكيو نخبط فيه فصدرو..
انا: واش راااك دير هنااا !! كيفاااه دخلت ؟؟!! هبلت مهددي هبللللت !!!
شد يديا بين يديه جبدني ليه عينيه مركزين معايا..يحكي بصوت هادي..بنبرة حنان..
مهدي: كاان لازم نشووفك..كان لاازم نطمن عليك
هزيتلو براصي لالا مصدومة..جبدت يديا من يديه..بعدت عليه بخطوة لتالي..متوقعتش باش توصل جرأتو لهنا..متوقعتوش راح يتعلق بيا لهاد الدرجة..مستنيتهااش منو..
انا: اخررج من هنا مهدي..لازمك تخرج من هنا قبل ما يشوفك هش....
مكملتس جملتي..مكملتش هدرتي تفتحت الباب..عينيا خرجو و انا نشوف معاه واقف عند الباب..تلفت مهدي بالزربة ليه..قلبي سايي..حسيتو نزل للارض و انا نشوف معاه..واقف عند الباب..عينيه محلولين على وسعهم..يمكن كلمة مصدوم قليلة باش توصف حالتو..رمش عينيه كأنو يحب يستوعب لي يشوف فيه قدامو..عروقو فثواني تكبسو..عرفتو راح يهد الدار علينا..غمضت عينيا بقوة على صوت عياطو..
هشام: مهدددددددي ### ##
عياطو..عيااطو هز حيوط الدار..فتحت عينيا على صوت خبطة قوية..فمي تحل و انا نشوف فمهدي عالارض..طلعت بعينيا لهشام..يتنفس بالقاوي كي الثور الهايج و يسب بكلمات فحياتي ما سمعتهم..
رجعت بعينيا لمهدي لي مزال عالارض..عينيا وساعو و انا نشوف فقطرات دم عالارض..رجعت تلفت بالزربة لهشام..عرفتو راح يزيدلو من نظراتو..
انا: هشااام
عملت خطوة جيهتو..اول ما قربت ليه..من غير ما يشوف فيا..من غير ما يتلفت ليا..طبعني لتالي بكامل قوتو..حتى خبطت معا الحيط..حطيت يديا عليه نسند فروحي..ثواني..ثواني كانو كافييين باش يقلبو الدار كاملة..نشوف معاهم صدومة..
اول ما جا مهدي يطلع راصو..نزل عليه اكثر راح يرجع يضربو..رفد مهدي رجلو ضرب رجل هشام..طاح قدامو..قبل ما ينوض مهدي جبدو هشام من يدو طيحو قدامو..و طلع فوقو يضرب فيه..يعيط بكللل قوتو..كلمات مقدرتش نفهمش..مقدرتش نستوعبهم..للحظات الخوف سيطر عليا..فكرة وحدة جات فراصي..حاجة وحدة ضربت فمخي.."انا السبة"..انا السبة فلي قاعد يصرا هنا..انا السبة فمداربتهم هادي..راح يقتلو بعععض و اناااا..انااا برك السبة..صورتهم تضببت بين عينيا..غمضت عينيا بقوة..نتنفس
بالقاااوي..نلهث..نفسها..نفس الحالة تاع هاداك النهار..نفس الاحساس..خوف..رعب..قلق..توتر..غضب و حزن..كاامل هاد الاحاسيس قاعدين يخنقوو فيا..دقات قلبي قاعدة نسمع فيهم..اصواتهم نسمع فيها بعييدة..بعيدة و عاالية بزاااف..حطيت يدي على رقبتي..نحاول نجبد النفس..شهقات قاعدين يطلعو مني..كأنهم شهقات الموت..فتحت عينيا بالسيف..دموعي نلو بالوقت..كبست على روحي..لميت طرف القوة لي عندي باس قدرت نخرج اسمو من بين شفافي..
انا: ه هشام
تلفت ليا بالزربة..عينيه وساعو..منعرفس علاش..يمكن لي بيا ظاهر عليا لهاد الدرجة..غمضت عينيا بقوة نوازن فروحي..محسيت غير بيدولي تلفت على خصري..جبدني ليه..حط يدو فوق يدي لي على رقبتي..حسيت بيدو الثانية لي تحطت على خدي..يدو ترعش..ترعس رعيش..معرفتش ادا مالزعاف ولا من حاجة اخرى..كبست على يدي لي تحت يدو نسمع فيه يحكي..
هشام: فيرا اهدي..هدي روووحك..اهدي خلاص مصرا والو..اتنفسي..
مقدرتش..مقدرتش باقي نستنفس بالقاوي..نسمع فيه يعيط..
هشام: ### ## اخرررررج منااااا ### براااااا
كبست على جنبو بكل قوتي..فتحت عينيا بالسيف..طاحت عيني فعين مهدي..وجهو مدمدم كاامل..شفت فعينيه الخوف..شفت الحزن..شفت الانكسار..ترجيتو..ترجيتو بعينيا باش يروح..و متأكدة انو فهمني..عدى يدو بالزربة على وجهو..هزلي براصو ايه يحكي و يرجع للور بخطوات خارج..
مهدي: اهدي فيرا..خلاص رايح..اهدي
هشام: ### مزاااااال تهدددر براااااا
غمضت عينيا..شوية و سمعت صوت الباب تغلق..عرفتو راح..رفدت يدي بالسيف..حطيتها على صدو نبعد فيه عليا..
انا: ا ابعد..ابعد ه شاام ابعد مقد مقدرتش نتنفس..مقدرررتش
دموعي نزلو اكثر و اكثر..رجع حكمني نزل براصو ليا..جبدني معاه لتالي..قعدني عالسرير..حط يديه على خدي يحكي..
هشام: اششش اششش اهدي..استناي..استناي دقيقة
بعد شوية عليا..يديه يرعشو..كلامو متقطع..يحكي و يلهث..خرج بالزربة..منعرفش وين راح..مشي قادرة حتى نركز..شديت بيديا على طرف السرير..نحسب بالمقلوب..من 10حتى ل1..باش نقدر نهدئ..شوية و رجع قعد قدامي و دوايا فيدو..حط الحبة ففمي..و حطلي كاس الماء على شفافي..شربني منو..بلعت بالسيف..نزل الكاس من عندي..لف يدو على خصري..جبدني ليه..جا راصي فصدرو..رفدت يدي كبست عالتريكو تاعو..لف يديه عليا..نسمع فيه يحكي..
هشام: اشششش مصرا والو..هدي روحك و تنفسي بلعقل..مصرا والو..مراكيش هنا..راكي فبلاصة بعيدة..غير انا و نتي..بلاصة الهواء تاعها نقي..
تنهدت..منعرفش علاه اما كللمو ريحني..ريحني بزاف..مجرد التفكير فلي قاعد يقول فيه خلاني نرتاح..حسيت بهواء بااارد دخل صدري و رجعلي الروح..دنيت ليه اكثر..نتنفس بلعقل..نستحلى فيدو لي تمشي و تجي على ظهري..نسمع فدقات قلبو..منعرفش شحال بقينا و حنا فهاديك الحالة..لي نعرفو انو هديت فوجودو..جبدت روحي شوية وقت حسيت روحي احسن..طلعت راصي ليه..نشوف معاه..مركزة معا عينيه..رفد يدو عداها على وجهي..يبعد فشعري لتالي..
هشام: رتاحيتي دك ؟
هزيتلو براصي ايه..تنهد براحة..رفدت يديا حطيتهم فوق يديه..نزلتهملو..نزلت بعينيا ليه..عينيا وساعو..طلعت راصي بالزربة ليه..
انا: د دم !!
هشام: متخاافيش متجرحتش غير دم هادا ال###
بلعت ريقي بالسيف..رجع حكا..
هشام: كيفاه دخل !!
انا: م منعرفش
هشام: قاسك !! دنا ليك قبل ما نجي ؟؟
هزيتلو براصي لالا..رجع حكى..
هشام: علاش..علاااش معيطتيليش وقت شفتيه علااش !!؟
بلعت ريقي بالسيف..نخرج فالكلام..
انا: مقدرتش..مقدرتش نهدر..
تنهد..كبس على يديا..يحكي..
هشام: خليك هنا راني راجع
هزيتلو براصي بالزربة لالا..رجعت شديتو..عارفة..عارفااتو راح يلحقو و ميتهنى غير وقت يقتلو..نعرفو و نعرف زعافو..شايفة رجلو لي مزالها ترعس مالزعاف..عارفاتو حاكم روحو بالسيف قدامي..
انا: متروحش تعيش
حط يديه على خدودي..جبدني ليه..حط جبهتو على جبهتي يحكي..
هشام: ملكي ###..نتي ملكي..مستحيل نسمح لمخلووق يقيسك..مستحيييل..
تبسمتلو بالسيف..جبد يديه مني..عداها على وجهو بالزربة..تنخ بالقاوي..حط راصو بين يديه..مرفقو مستند على الجونو تاعي..رجليه يرعشو بالزعاف..بقيت لثواني سارحة معاه..فهاديك الدقيقة انا عرفت لي لازم نعملو..فهاديك الدقيقة عرفت القرار لي لازم ناخذو..ساعتها برك عرفت الجواب لي لازم نعطيه لراشيد و عرفت الطريق لي راح نديها..ساعتها انا خذيت قراري و عرفت لي راح نعملو..فهاديك اللحظة انا صح دفنت فيرا لقديمة..و بدات ولادة فيرا الجديدة..فيرا لي راح تحمي هشام و تحافظ على حبها..فيرا لي راح تحمي هشام من نفسها و من عشقها..
★★★
الحلقة😚😚
رايكم بناااات😈توقعاااتكم للي جااي💃💃💃
وااش جوابها ؟؟👌واش قررت ؟؟
