تنهدت و انا نشوف معاه..راقدة على كرشي قدامو..منعرفش شحال عندي و انا هكا..نشبع منو..نشبع من ابسط ملامحو..كأني قاعدة نحفظ فتفاصيلو..اسبوع كامل و انا هكا..كل يوم نوض قبلو غير باش نشبع منو قبل ما يفيق..رفدت يدي نعدي فيها بلعقل على لحيتو..تقعدت..بستو من خدو و جبدت روحي وقفت..خرجت من بيتو..دخلت لصالة..نحوس على دوزاني..رفدت بواطة الدواء و الكرة هاديك من فوق الفوتاي..شربت حبة..و خرجت ملتم..دخلت لبيتي..قربت للكابة..حطيتهم لداخل و غلقتها..تنهدت..ليوم راجعة لدار..منعرفش علاه قتلو يردني..حتى هو حسيتو معجبوش الحال..جيست يساير فيا..
رفدت حوايج ملتم..دخلت لدوش..دوشت بالزربة..خرجت و بيجامتي فيدي..طبقتها و حطيتها على طرف السرير..رجعت تلفت للمرايا نشفت شعري..رديتو لتالي من غير ما نشدو..سقمت روحي و خرجت..دخلت للكوزينة وقت سمعت صوت لتم..تبسمت و انا نشوف معاه..لحق ينوض و يوجد لفطور..حكى من غير ما يشوفني..
هشام: بونجور
تبسمت..مزال يحس بيا..مزال يحس بوجودي..هاد الشئ برك يطيرني لسابع سماء..
انا: بونجور
تلفت ليا..تبسم معايا يحكي..
هشام: اقعدي
هزيتلو براصي..قربت لطابلة..جبدت الكرسي..قعدت مقابلتو.. حط قدامي التوتست و كاس لحليب و قهوتو قدامو و قعد..نزلت راصو نشرب و ناكل..نزلت لاماش تاعي على عينيا..طلعت راصي بالزربة للفوق طلعت..و رجعت ناكل..عاودت هبطت..نخفت عليها بالقاوي بعدتها على عينيا..كل مرة ترجع تهبط على وجهي نرجع نطلعها..هبلتني..طلعت راصي على غفلة لقيتو يشوف معايا..عقدت حواجبي..هزيت راصي نسأل فيه..
هشام: واش بيك ؟
رجعت عملتلو براصي واش..نفخ بالقاوي يحكي..
هشام: شحال من مرة قتلك احكي متديريليش ليجاست هكا !
انا: معينيش
هشام: بصح انا نحب نسمع صوتك
تبسمتلو..رجع حكى..
هشام: شربتي دواك ؟
انا: ايه
دنا الكرسي للور..وقف..قرب لعندي..تلفت ليه..تكى قدمي عالطابلة..يشوف معايا..رقد يدو حطها على شعري..رفد لاماش تاعي بين صوابعو من غير ما ينزل عينيه مني..
انا: واش راك دير !
مردليش..حط يدو داخل جيبو..عقدت حواجبي و انا نشوف فالمشبك تاعي فيدو..طلعت راصي ليه بالزربة..
انا: وين لقيتو !!
مردليش..شدلي بيه لاماش تاعي..و نزل عليا اكثر باسني من خدي..غمضت عينيا نستحلى فقربو..خذيت نفس طويل من ريحتو..جبد روحو حد يدو على خدي يحكي..
هشام: متأكدة حابة تروحي ؟
انا: مممم
هشام: راح توعديني قبل
انا: بواش ؟
هشام: راح تردي بالك على روحك و تبقاي هادية و متتوتريش
انا: و نتا راح توعدني انك راح تحكي معايا كل يوم..
هشام: علاه انا نقدر نبقى بلا ما نحكي معاك
وقفت مبلاصتي..من غير ما نفكر..ترميت عليه حضنتو بكل قوتي..لف يديه على ظهري..كبس عليا..يمكن حبيت نفرغ شوقي..ولا يمكن عنقتو خاطر قلبي قاعد يوجع فيا..ولا يمكن قاعدة نصارع فروحي..بين اني نبعد او نقرب..جبدت روحي شوية وقت حسيت روحي احسن..نزل بعينيه يشوف معايا..خذيت نفس طويب نحكي..
انا: راح نروح نجيب دوزاني باش نروحو
عملي براصو ايه..جبدت روحي عليه..خرجت ملتم..دخلت لبيتي..لبست باسكاتي بالزربة..رفدت دوزاني و خرجت لعندو..لقبتو قاعد يستنى فيا..شد من عندي و سبقني للباب..حبس شوية عند الباب..تلفت ليا يشوف معايا..فهمتو..فهمتو انو قاعد يسأل فيا ادا متأكدة..طمنتو بعينيا..و تبسمتلو..تنهد و رجعت تلفت للباب..فتحها..خرجنا معا بعض ملتم..نظن بزاف حاجات راح يتبدلو ماليوم و طلع..منعرفش واش هوما بالضبط..بصح راح تكون نقطة تغيير..هبطنا لتحت..ركبت و ركب قدامي..ديمارا بلا حتى كلمة..تكيت لتالي نفكر..نفكر فلي جاي..فلي راح يصرا..و فلي راح نديرو..فهاد الاسبوع اللخر انا خذيت قراري..و منيش باش نتراجع عليه..
فقت وقت شد فران..نزل..فتحت الباب نزلت..تنهدت و انا نشوف معا الدار..تلفت ليه..عطى دوزاني لواحد مالرجال يدخلهم..قرب ليا..وقف قدامي..نزل براصو ليا..يشوف معايا..
هشام: انتبهي على روحك
انا: حتى نتا
نزل عليا اكثر..حط يدو على رقبتي..غمضت عينيا نستحلى فلمسة يدو..حط شفافو على راصي..باسني من جبهتي..تبسمت..جبد روحو شوية..فتحت عينيا..طلعتىراثي ليه نحكي..
انا: اهبط ليا
هشام: علاه
انا: حتى انا حبيت ندي بوسة
ضحك..يحكي
هشام: وقت حبيت ندي بوستي مقتلكش اطلعيليا انا لي وصلت ليك..معنتها نتي لي لازم توصلي ليا
انا: بصح نتاا طويل بزااف
هشام: خلاص مال متديهاش
بوزت شفافي و انا نشوف معاه..يضحك وحد...عارفاتو يعمل فيها بلعاني..ضربت الفكرة فراصي..حطيت يديا على كتافو..طلعت على طراطش صوابعي..حسيت بيدو ليتلفت على خصري..باقي يضحك..اول ما لحقتلو طلع راصو لسماء..جا وجهي فرقبتو..
انا: هشاااام حببس ما تدير فالزكاارة اهبط
بقيت نفارع فيه باش يهبط فراصو اما والوو..يعمل فيها مكرة فيا و يضحك..من غير ما نفكر مرتين..حطيت شفافي على رقبتو..بستو منها..قلبي ضرب بالقاوي..يمكن خاطر اول مرة نبوسو بهاد الطريقة..تقطع صوت ضحكتو..حسيت بيدو وقت كبست عليا اكثر..هبط راصو بلعقل ليا..تبسمت..رجعت بستو مرة ثانية من لحيتو نحكي..
انا: شح ديتها
محكى حتر حرف..بلع ريقو بالسيف..حسيتو تكوانسا..عينيه لڨري فعينيا..عينيه لي قاعدين يلمعو بطريقة غرييبة..للحظلت حسيتو سرح..رجعت حكيت..
انا: واش بيك
هشام: عقلي قاعد يقولي ندير حاجات ميطيحوش فبالك
عقدت حواجبي مستغربة..رجعت سألتو.
انا: كيما واش ؟
تبسم على جنب..تلفت جيهة الدار و رجع تلفت ليا..رخف يدو عليا..نزلت عالارض..باقي نستنى فيه يحكي..سوية و رجع حكى..
هشام: نهار يجي وقتهم تعرفيهم
هزيتلو بكتافي بعدم فهم..رجع ضحك..
هشام: روحي دك خليني نروح
انا: علاه وين رايح ؟
هشام: لخدمتي
انا: مشي لعندها ؟
نفخ بالقاوي..عدا يدو على وجهو..نعرف انو هاد الاسئلة يقلقوه و ميحملهش..اما مشي بيدي..رجع حكى..
هشام: منيش رايح لعندها اصلا علاه نروح ليها ؟ راايح لخدمتي
انا: متعيطش
هشام: منيش نعيط..روحي دك
قلبت عينيا..بعدت بخطوات لتالي..رفدت يدي عملتلو باي باي..رجع حكى..
هشام: متنسايش دواك
انا: و متنساش تعيطلي
هشام: منقدرش ننساك متخافيش
ضحكت..دارلي باي باي..عطيتو بالظهر..و تلفت داخلة..اول ما لحقت للباب تفتحت..قابلتني تضحك..
وردية : بنوووتي توحشتك
انا: حتى انا
ترمات عليا تعنق و تبوس..جبدت روحها شوية تحكي..
وردية: ادخلي ادخلي
بعدتلي مالطريق دخلت..غلقت الباب مورايا..
وردية: سافا ؟ رتحتي ؟
انا: ممممم
وردية: الظاهر هشام كان متهلي فيك
انا: ههه وي..خالتي راح نطلع لبيتي عندي ما ندير
وردية: راحتك..ادا حتجتيني عيطيلي
هزيتلها براصي ايه..تلفتت..طلعت بالزربة للبيت..اول ما دخلت سمعت صوت تيليفوني لي قاعد يصوني وسط حوايجي..غمضت عينيا بقوة و رجعت فتحتهم..كنت متوقعة هاد الحركة..كنت متأكدة من انو راح يعيط..كيما عارفة و متأكدة انو مراقبني..خذيت نفس طويل نطم فطرف القوة لي عندي..قربت ليه..كل خطوة نعملها جيهتو ضربات قلبي يزيدو اكثر..جبدتو..و جبدت الكرة هاديك فيدي..نضغط عليها نحاول نهدي روحي..رفدت عليه..غمضت عينيا بقوة نسمع فيه يحكي..
رشيد: عسلامتك يا صغيرة..معرفتش ادا نسقسي على صحتك فالاول ولا نعتذر منك خاطر يظهرلي تعقدتي مني
كبست على الكرة فيدي..نهدي فروحي..خذيت نفس طويل نحكي
انا: واش تسحق ؟
رشيد: اااا نزعف منك هاكا..رفدتي عليا و تلعبيها مشي عارفة واش نسحق ؟معليش رغم انك جرحتيني فقلبي بصح راح نرجع نقولك اني عيطت باس نسمع اخر قرار منك
بلعت ريقي بالسيف..اسبوع كامل و انا نفكر باش قدرت ناخذ قراري..معنتها اد المرة حكيت من غير تفكير ولا تردد..
انا: موافقة
سمعت صوت ضحكتو لي حسيتو كيف لحبل يخنق فيا..عضيت شفتي..قبل ما يرجع يحكي قاطعتو..
انا: خليني نكمل..موافقة عالخدمة معاك اما بشروطي
رشيد: شروط !!؟
انا: راح نقول لي عندي و راح تسمعني للخر انا نعطي عرضيرو نتا تعطيني عرضك..و ادا تفاهمنا نقولو مبروك ادا متفاهمناش كل واحد فطريقو
رشيد: نسمع فيك
انا: اول حاجة انل مراحش نخدم معاك بلا ثمن..ادا حبيت نخدم معاك فبالمقابل نتا راح تحمي هشام
قاطعني وقت ضحك ضحكة طوييلة..رجع يحكي
رشيد: نعتذر منك بصح فكرتوني فروميو و جوليت
محبيتش نردلو..كملت نحكي ديراكت..
انا: ثاني حاجة انا راح نكمل نخدم معا هشام..و خدمتيمعاك راح تكون سرية..و ثالث حاجة انا مراحش نفذ كل حاجة تقول عليها اي خدمة راح تعرضها عليا انا لي يكون عندي الاختيار طبعا مور ما نفكر..و انا لي راح نقرر نعملها ولا لالا..موافق ولا لالا ؟
سكت شوية..حسيتو قاعد يفكر..كبست عالكرة اكثر و اكثر..نحاول نهدي روحي و نضبط ضربات قلبي لي قاعدة تتسارع..شوية و رجع حكى..
رشيد: موافق على شروطك كاملة
تنهدت براحة..منعرفش ادا لي درتو صح و لا غلط..لي نعرفو اني درت هكا باش نحمي هشام..خاطر عارفة و متأكدة انو مشي ناويلو الخير..درت هكا باش نحميه منهم و نحميه حتر من حبي ليه..درت هكا باش نحافظ عليه..عارفة ادا عرف لي عملتو عمرو ما يسامحني..امل حتى انا مراحش نقدر نسامح روحي ادا صراتلو كاس حاجة..هادا هو الصح ليا و ليه..و لناس كامل..هادي الطريقة الوحيدة باش نقدر نحميه..قطع تفكيري وقت رجع يحكي..
رشيد: نظن نقدرو نقولو مبروك دك
انا: معندكش شروط ؟
رشيد: لا بصح عندي نصائح
انا: نصائح ؟؟؟
رشيد: مممم..بما انك وليتي تخدمي معايا فننصحك انك تدققي فابسط التفاصيل..
انا: واش قصدك ؟
رشيد: مرات يكونو مفاتيح الالغاز بين يدينا..و تكون الحقيقة قدام عينينا..حلول الالغاز يا فيرا تلقايها مخبية بين سطور ابسط ذكرياتك
قلبي دق بالقاوي معا كل حرف حكاه..منعرفش واش قصدو بالضبط..منعرفش وين حاب يوصل..بلعت ريقي بالسيف..كمل يحكي..
رسيد: فمنظمة القرش..مكاش حاجة اسمها صدفة..اذا كنتي ليوم تحكي معايا فهاد الشئ مسي خاطر قدر..كلش عندو سبة فيرا جبروت..كلش..
قبل ما نلحق نسألو..ولا حتى نحكي..قطع فوجهي..نزلت التيليفون بالزربة من يدي..قلبي يضرب بالقاوي..صوت انفاسي ماشية و تقوى..رميت يدي بالزربة لبواطة الدواء..جبدت حبة..بلعتها من غير ما نسرب الماء حتى..قعدت على طرف سرير..نفكر فاخر كلماتو..فلي قالو..واش قصدو ؟..واش قصدو بمشي صدفة ؟؟ يعني كنت مستهدفة ملول ؟ كان عارف انو ياسين راح يموت ؟ و واش قصدو بحلول الالغاز تلقايها مخبية بين سطور ابسط الذكريات..واش حب يقول..واش من الغاز ؟ و واش من ذكريات قاصدهم ؟؟ شكون هادا و علاه حاب عليا انا بالضبط..فثواني دخلت فدوامات تاع افكار..خوف تملكني..خوف ملي جاي و ملي راح يصراظ.معادش عرفت واش الصح و واش الغلط..و معادش قدرت نفرق بين الالظالم و المظلوم وسط هاد الناس..اسرار فكل بلاصة..معرفتش منين نبدا و معنديش حتى راس الخيط..كلش نعرفو اني لازم نحمي هشام و نحمي عشقي ليه..مراحش نخليه..الخدمة معا رشيد كانت هي الحل الوسط..باش نقدر نحميه من غير ما نبعد عليه..
★★★
الحلقة😗
بنااات رايكم😈توقعاااتكم..واش تستناو فالحلقات الجايين !!!
هشام و فيرا..ليديا و مهدي..رشيد لي دخل لحكاية و بزاااف سخصيات جايينكم فالطريق💃اللعب بدااا👌 شكون رشيد ؟ و واش يسحق ؟ علاه خدمها معاه ؟ و صح حابلها الخير ؟؟ ليديا راح تسكت على علاقة هشام و فيرا ؟؟ مهدي راح يسمح ففيرا بهاد السهولة ؟؟
و هشاااام لاحظتو انو مزال معترفش بحبو بصريح لعبارة لفيرا ؟؟😭😭وقتاااه يعملها ؟ و زعما قضية ادا كان زواج فيرا و ياسين مزال دور فراصو ولا خلاص نساها ؟😰😈😈
كااامل هاد الاسئلة تكتشو اجابتهم فالحلقات الجاية😚لكرونيك مزالها فبداياتها..نحبكم حاضريين واجدين😍❤
أطغاو بتصويتاتكم و بارتاجيو الكرو في بروفيلاتكم
