فيرا تحكي:
حطني الطاكسي عند البلدية..نزلت..طاحت عيني على الطونوبيل تاع هشام..قلبي دق بالقاوي..رجعت نزلت راصي لتيليفوني..نعاود نقرا فالميساج لي لحقني من عندو..<<الحقي هشام للبلدية لازمك تعرفي حاجة>>..خذيت نفس طويل..دخلت..قلبي عاصر عليا..منعرفش علاه اما كل خطوة نعمل فيها نحس فيها كأني نمشي عالجمر..وجيعة خفيفة نحس فيها فكرشي..منعرفش حتى كيفاه خرجت مالدار..حتى من الطونوبيل مقدرتس نسوڨها..طاحت عيني عليهم..الدنيا دارت بيا و انا نسوف فيهم مجتمعين في ثلاثة..هشام ليديا و رشيد..خذيت نفس بالسيف..نرمي فالخطوة بالسيف..وقفت مور هشام سواسوا..متأكدة انو ليديا و رشيد شافوني..اما بقاو ساكتين..كبست على التيشرت تاعي بيدي و انا نسمع فيه يعيط..مفهمتش كلامو..مفهمتش واش قاعد يقول..شوية و رجع حكى رشيد..
رشيد: لي قدااامك رافدة حفيدي فكرشها..مشي بيدك هشاام هاد المرة نتاا راح تسمع الكلمة..رااح تتزوجها حبيت ولا كرهت..
فهاديك الدقيقة..الدوخة لعبت عليا..كأنو الدنيا كاااملة حبست..مبقيت نشوف قدامي والو..واالو من غير هشام و ليديا..نرمش فعينيا و نعاود..نحب نستوعب لكلام لي يقول فيه اما مشي قادرة حتى..النفس تغلق عليا كانو واحد قاعد يخنق فيا..دموعي لقاو طريقهم على خدي..نسمع فصوتو و مشي مصدقة..
هشام: مشي وليدي مصبااح و انا نقولك مششششي وليدي راااني نقولك
ليديا: وليدك هشااام..متنكرووش تعييش متعملش فيا هاكاا
قبل ما يرجع يحكي..سبقتو وقت حكيت..
انا: ه هشام
تلفت ليا بالزربة..عينيه خرجو و هو يشوف معايا..
هشام: ف فيرا
رشيد: احكي معاها و لحقنا..رانا نستناو فيك لداخل باش تقعد
غمزلي ملور..فهمت قصدو..قلبي حسيتو تقسم نصين..جبد روحو هو و هاديك داخلين..اما حنا..فلثواني كان الصمت فيهم سيد الموقف..لثواني فيزوج بقينا ساكتين..من غير حتى حرف..جيست نشوفو فبعضانا..دك فهمت..فهمت علاه كان مبدل هكاك..دموعي محبوش يحبسو..قرب ليا خطوة..رفد يدو باش يمسحهم..رجعت بخطوة لتالي..هزيتلو براصي لالا نحكي..
انا: متقربش هشام..متقربش..هاد المرة مراحس نسمحلك
هشام: ف فيرا ياروحي اسمعيني قبل
انا: مبقاتس حاجة تتحكى هشام..سمعت لي لازم نسمعو
دمعة من عينو نزلت..قلبي دق بالقاوي معاها..غمضت عينيا و رجعت فتحتهم..وجيعى كرشي ماشية و تقوى..اما الوجع لي نحس فيه فقلبي اكبر من اي حاجة..بلعت ريقي بالسيف..
انا: انا حبيتك..عشقتك..عطيتك اغلى ما عندي..
هشام: حتتتى انا..حتى انا ### عشقتتتك
قربت ليه..طلعت على طراطش صوابعي قدامو..رقدت يدي بالسيف حطيتها على شفافو سكتو..
انا: متحكيش هشام..متحكيش..عندي منك طلب واحد..طلب واحد و نحلفلك انو اخر طلب..
بلع ريقو..عينيه مرشوقين فعينيا..رجعت حكيت..
انا: اتزوجها
غمض عينيه بقوة..دموعو لي كانو مجمعين فعينيه نزلو..و معاهم نزل قلبي عالارض..مستنيتوش يحكي و لا ستنيتو يردلي..نزلت بيدي ليديو...شديتو نجر فيه مورايا..داخلة لعندهم..نسمع فيه يحكي..
هشام: فيرا ياروحي متعليش هاكا..مدمريناش فيزوج
انا: بالاساس نتا دمرتنا هشام..عمري ما نسمحلك عليها..عمري ما نغفرلك..
كبست على يدو اكثر..منعرفش منين جاتني هاد القوة..لي نعرفو اني واقفة على رجليا بالسيف..دخلت للقاعة لي هوما فيها..قربت لطاولة هاديك..وقفت قدامهم..طلعو ريصانهم فيزوج ليا..موجدين كلش..حتى من كاتب العدل موجود..تبسمت بإنكسار..كانو محضرين كلش لجنازتي..و ستناوني غير وقتاه نحضر..تلفت لعندو..طلقت يدو..
انا: سينيي
حط يديه فيزوج على وجهي..نيفو يقيس معا نيفي..يحكي و يرعش..
هشام: ياروحي منقدرش..مديريش فيا هاكا..متحكميش عليا بالاعدام راني
