فيرا تحكي:
نحس بلمساتها على شعري..قاعدة تمشطلي فيه..نزلت راصي..نلعب بيها فيدي..نكبس عليها و نرجع نرخف..كرة صغيرة تاع بونج عطاتهالي الطبيبة..قالت نفرغ توتري فيها..شوية و كملت..حطتلي الدفيرة من قدام..جات فوجهي تحكي..
وردية: اصبري نغلقلك لافاست البرد برا
بعدت يدي شوية..غلقتلي لافاست تاع السيرفات..طلعت راصها ليا..تسڨملي فخصلات شعري لي على وجهي..شوية و تفتح الباب..تلفت ليه..تبسملي..رديتلو التبسيمة..تلفتت ليه تسأل فيه..
وردية: خلاص وراق الخروج جاهزين ؟
هشام: وي..نقدرو نروحو دك..
تنهدت..و اخيرا راح نخرج من هنا..و اخرا راح نشم هواء نقي بعد 5 ايام فهاد السبيطار..تخنقت..حسيت روحي شغل كنت قاعدة عالشوك..قرب ليا..حط يديه الزوج على خدودي..يقرص فيا كي دراري صغار..يحكي فرد وقت..
هشام: راح تخرجي يا صغرونة
ضحكت معاه..حتى هو عيى معايا..5 ايام كاملين و هو معايا..لا بعد ولا خليتو يبعد..نوض بيه و نرقد بيه..منعرفش علاش..اما خايفة..خايفة بزاااف و منرتاح غير وقت يكون معايا..نزل بيدو ليدي..شبك صوابعو فصوابعي..جبدني ليه..وقفت..
هشام: تقدري تمشي ؟
انا: ممممم
هشام: خلينا نروحو مال
هزيتلو براصي ايه..خرجنا..يمشي بلعقل..يسايس فيا تقول طفلة صغيرة..حبسنا فنص الكولوار وقت وقفت الطبيبة فوجهنا..تحكي معايا و تتبسم..
_فيرا ردي بالك على روحك منحبش نزيد نشوفك هنا مرة تانية..تفاهمنا ؟
انا: ايه
تبسمتلي..تلفتت ليه تحكي معاه..
_رد بالك على مرتك
قلبي دق بالقاوي معا اخر كلمة قالتها..رمشت عينيا نحاول نستوعب لي قالتو..طلعت راصي ليه بالزربة..لقيتو يشوف معايا..سألتو بعينيا..ضحك و غمزلي..تلفت ليها يحكي..
هشام: اكيد..مرتي نحطها فعينيا
عينيا وساعو..صدمني لدرجة اني مسمعتش باقي كلامهم..روحي و عقلي و قلبي تعلقو فكلمة "مرتي" لي خرجت من بين شفافو..قد ما حاولت نستوعبها مقدرتش..مفهمتش واش صاريلو..و مفهمتش علاه تقلب هكا..ما فقت غير على نسمة لهواء الباردة لي ضربتني لوجهي وقت خرجنا..غمضت عينيا خذيت نفس طويييل..كبست عالكرة هاديك فيدي تلقائيا..نسمع فيه يحكي..
هشام: بردتي ؟
وردية: قتلها تلبس فاست وحدوخرا محبتش
فتحت عينيا..طلعت راصي ليه..لقيتو مركز معايا..
انا: هأة..مبردتش
تبسم..منعرفش واش بيه اما مؤخرا كل مرة نحكي فيها نلاحظ فرحتو لي لحد الساعة مفهمتش سببها..لف يدو على كتفي..جبدني لصدرو..حطيت يدي عليه..يمشي و انا فحضنو..حبس عند الطونوبيل..فتحلي الباب..طلعت..غلقها..و راح للجيهة الثانية ركب..عقدت حواجبي وقت شفتو حط لمفاتح راح يديماري..
انا: و خالتي ؟
تلفت ليا..باقي يتبسم..
هشام: راح تروح لدار معا واحد مرجالي
هزيتلو براصو نسأل فيه..عوج فمو يحكي..
هشام: مفهمتش..اهدري باش نفهم
عقدت حواجبي..متأكدة انو فهم..اما انا لي مفهمتش علاه قاعد يعمل هكا..مع انو عارف معينيش نحكي..تنهدت..رجعت حكيت..
انا: علاه حنا وين رايحين ؟
هشام: لداري
هزيتلو براصي..تكيت لتالي و تلفت لشباك..مزدت حتى حرف..اصلا منعرفش واش صاريلي..ولات الهدرة تجيني تقيلة و قاعدة نتقادى فالكلام..و مشي عيني نهدر من الاساس..من غير معاه معيني نهدر معا حتى مخلوق..فتحت التاقة شوية..غمضت عينيا نتنفس..من هاداك النهار..هدرت هاداك البوس متنحاتش من راصي..مقدرتش نخرجها و كل مرة نتفكرها قلبي يتعصر..النفس يتغلق عليا..منعرفش علاه بالضبط اما كل مرة نتفكرو حاجة فالداخل تاعي تخنقني..من 5 ايام و انا نفكر فكلامو..فلي قالو..و فلي حابو مني بالضبط..لا اراديا وقت تفكرتو وليت نضغط اكثر و اكثر عالكرة فيدي..نضغط عليها بالزربة و نتنفس..نحاول نهدي روحي..ما حسيت غير بيدو لي شدت يدي..كبس عليا بكل قوتو..تلفت ليه..عاقد حواجبو يشوف معايا..
هشام: سافا ؟
انا: مممم
جبد يدو شوية من يدي..حطها على خدي يحكي..
هشام: منعرفش فاش قاعدة تفكري بالضبط..الحاجة الوحيدة لي نقدر نقولهالك..اهدي و متخافيش انا معاك..و عمري ما نخليك..
تبسمتلو..صح هوما مجرد كلمات..بصح منقدرش نوصف الراحة لي حسيت بيها و انا نسمع فيه..حطيت يدي فوق يدو لي فكتفي..شديتها..و دنيت ليه اكثر..حطيت راصي على كتفو و انا شايدة فيدو..سمعتو وقت تنهد..غمضت عينيا..نحاول منرجعش نفكر فيه..عالاقل مشي دك..
فقت وقت شد فران..جبدت روحي شوية عليه..نشوف معاه..
هشام: خلينا نهبطو
هزيتلو براصي ايه..حبست نبعد فخصلات شعري من وجهي فالوقت لي نزل هو فيه..جا من جيهتي..فتح الباب..تلفت ليه..مدلي يدو..
هشام: هايا
حطيت يدي فوق يدو..كبس عليا..جبدني ليه..خرجت ضربت فصدرو..تبسمت..خذيت نفس طوييل من ريحتو..سمعتو وقت ضحك..جبدت روحي شوية..عرفتو فاقلي..عضيت شفتي..هبطت راصي..جبدت يدي منو بالزربة..نتمشى للداخل و باقي نسمع فصوت ضحكتو..تبهدلت معاه..حبست عند الاسونسور..تفتح..دخلت و دخل مورايا..محاولتش حتى اني نطلع راصي ليه..اول ما تهز فالاسونسور باش يطلع الدوخة لعبت عليا..غمضت عينيا بالقاوي..شديت بيدي فالحيط..محسيت غير بيدو لي تلفت على كرشي..جبدني ليه..حطيت راصي على كتفو..نسمع فيه يحكي..
هشام: فيرا واش بيك !!
انا: د دخت
نفخ بالقاوي..كبس عليا عندو اكثر..شوية و تفتح الاسونسور..حطيت يدي على صدرو جبدت روحي شوية..
هشام: قادرة تمشي ؟
انا: مممم
شدني من يدي..يمشي فيا بلعقل..حبس عند الباب..حط الكابة عالارض..يفتح فالباب..كمل طبعها برجلو..رفد مالارض..دخلنا..غلقها برجلو و رمى لي فيدو عالارض..رجع لف يدو على كتفي..دخل لصالة..قعدني عالفوتاي..تكيت راصي لتالي..رفد يدو يبعد فشعري لتالي..يحكي فرد وقت..
هشام: سافا دك ؟
انا: ا ايه
هسام: خليك هنا نجيبلك تشربي و نجي..
مرديتلوش..سمعو وقت خرج..خذيت نفس طويل..طلعت راصي..حطيت الكرة هاديك قدامي..سقمت روحي..بدات تروح..ثواني و رجع دخل و فيدو كاس ماء..قعد قدامي..شديتو من عندو..شربتو فرد مرة..تنهدت..باارد رتاحيت..
هشام: خلاص ؟
انا: ايه
شدو من عندي حطو عالطابل..رجعت حكيت..
انا: ه هشام
تلفت ليا..شد يدي بيدو..تبسملي..
هشام: احكي فيرا احكي..نسمع فيك
انا: ع علاه قتلها مرتي !!؟
تبسسمة عريضة ترسمت على وجهو..عقدت حواجبي..نسمع فيه يحكي..
هشام: علاه كدبت ؟
بلعت ريقي بالسيف..قبل ما نرجع نحكي..لف يدو مور رقبتي..جبدني ليه..باسني من جبهتي..غمضت عينيا بقوة..قلبي رعش بين ضلوعي..نسع فيه يحكي و شفافو على جبهتي..
هشام: مرتي..و تاعي..و صغرونتي و اميرتي و كلش فحياتي..
قلبي دق دقة وحدة سمعت صوتها..عينيا تحلو على وسعهم..سمعتو و مشي مصدقة..حتى اني كذبت ودنيا..جبد روحو شوية عليا..يشوف معايا و يتبسم..
هشام: واش بيك !
هبطت راصي..خدودي نحس فيهم راح يطرطقو..عارفة فهم اني حشمت منو و قاعدة نستوعب لي قاعد يقول فيه..مع هذا مصر يحشمني اكثر..قبل ما نرجع نطلع راصي ليه..طاحت عيني على حاجة تلمع فالارض..بلعت ريقي بالسيف..نزلت اكثر..رفدتو بين يديا..قلبي غصر عليا و انا نشوف فبراسلي تاع بنات..غمضت عينيا بقوة و رجعت فتحتهم.. فزوج ثواني..زوج ثواني برك كانو كافيين باش ينزلوني من اعلى درجات الفرحة..لاقصى درجة الوجع و الغيرة..تلفت ليه..لقيتو مركز معايا..تبسمت على جنب بإنكسار..فتحتلو يدو..حطيتو فيدو و غلقتلو صبعيته..كبست علي يدو بكل قوتي..
انا: نساتو عندك
جبد يدو مني بلعقل..رفد يدو لسماء..رماه موراه..خبط فالحيط اومبعد منعرف وين راح..طلعت حواجبي..رجعت بعينيا ليه..
انا: علاه..راح تزعف
هشام: ميهمنيش
حكيت بغزول..منعرفش كيفاه خرج معايا لكلام.
انا: وقت كانت عندك سمانة كاملة كانت تهمك بصح
ضحك على جنب..حط يدو على نيفي..جبدني منو يحكي..
هشام: غيوورة
عقدت حواجبي..ضربتلو يدو..
انا: مغرتش
هشام: مممم صح
انا: متقوليش مممم
هشام: علاه ؟
انا: خاطر صح مغرتش
ڨحرتلو..و تكيت لتالي..ضميت يديا..نحس فروحي راح نطرطق بالزعاف..من شوية برك كان مغرقني فالحب..و دك قاعد يتمسخر عليا..اصلا الدموع تجمعو فعينيا وقت تفكرت انو كانت معاه..شوية و رجع شد يدي..نزلت براصي نشوف معا يدو لي كابسة عليا..كنت راح نجبدها منو..اما تكوانسيت فبلاصتي وقت سمعتو يحكي..
هشام: مات باباها
تلفت ليه بالزربة..نستوعب فكلامو..
انا: ك كيفاه !
هشام: مات و هو مانعها تحضر جنازتو..و معندهاش غيري هنا..مكانتش مليحة علاهاديك خليتها
بلعت ريقي بالسيف..اخر حاجة توقعتها..قلبي وجعني عليها..
انا: ربي يرحمو..راهي مليحة دك ؟
هشام: ممم ليديا قوية..و قادرة تتجاوزها
ڨحرتلو..عقد حواجبو..
هشام: وااش ؟
انا: سقسيتك ادا راهي مليحة مقتلكش اوصفهالي
حط يدو على راصو يضحك..عقدت حواجبي نحكي..
انا: علاه تضحك ؟
هشام: والو والو..نوضي تاكلي دك
انا: مآااه
هشام: وشنو مآااه ؟
انا: هشام معينيش والله منيش جيعانة
هشام: مشي كيما تحبي
نفخت بالقاوي..حطيت يدي على خدو..نحكي معا بلعقل..
انا: منيش جيعانة..هشام خليني تعيش
تنهد..حط يدو فوق يدي..
هشام: مدبليليش عينيك هكا
ضحكت..كمل يحكي..
هشام: وقت تجوعي راح تقوليلي تفاهمنا !؟
هزيتلو براصي ايه..نزلت يدي من خدو..حطيتها على جنبو..ترميت عليه..حطيت راصي على صدرو..حابة نرتاح..تعباانة و حابة نرتاح فحضنو..حسيت بيدو لي تلفت على ظهري..خرج صوتو بخوف و لهفة..
هشام: واش بيك ؟ رجعتي دختي ؟
انا: هأة..غير نعسانة
تنهد..عدى يدو بحنية على ظهري..تكى لتالي و انا فحضنو..كبست عليه..نسمع فدقات قلبو..منعرفش شحال بقيت فهاديك الحالة..لي نعرلو اني رتحت..رتحت بزاف و انا عندو..جبدت روحي شوية وقت حسيت بنفسو نتظم..تبسمت..عرفتو رقد..رقد و هو كابس عليا..حطيت يدي على لحيتو..نعدي فيها عليها..مستحيل نقدر نكون سبب فايذائو..روحي هو..قلبي و كلش عندي..قربت ليه اكثر..طبعت بوسة على رقبتو..ضحكت..منعرفش علاه اما عجبني الحال..زدت بوسة ثانية على خدو..نضحك وحدي مالفرحة..مفهمتش علاه..محسيت غير بيدو لي شدتني مراصي مالتالي..غرسلي راصي فصدرو..نسمع فيه يحكي..
هشام: ناوية تهبليني ### ؟ شدي بلاصة احسن ما ندي بوساتي بطريقتي
كبست عليه اكثر..غرست راصي عندو..فكرتو غفى..متوقعتوش يكون فايق..غمضت عينيا..انا مستحيل نسمح تصرالو حاجة..و ماليوم و طلع عندي استعداد نواجه الدنيا كاملة علاجالو..تنهدت براحة..ناسية الدنيا كاملة عندو..منعرفش كيفاه غفيت..فتحت عينيا شطر وقت حركني..طاحت عيني عليه..حسيت بيديه لي تحتي..عرفتو رافدني..تبسمت..كبست عليك اكثر..سمعت صوت الباب كي تفتح..كيما حسيت ببدني لي حطو عالسرير..اول ما جا يجبد روحو كبست على يدو..نزل راصو ليا..حط يدو على شعري يحكي..
هشام: علاه نضتي..ارجعي ارقدي
انا: م متروحش
هشام: منيش رايح متخافيش
قعد على طرف السرير..نزل راصو..منعرفش فاش كان يدير بالضبط..يمكن ينحي فسباطو..نحى الفاست تاعو تان..حطها على طرف السرير..طلع قدامي..حطو يدو تحت راصي جبدني لحضنو..لفيت يدي عليه..غمضت عينيا..تبسمت تلقائيا وقت حسيت بيه يفتحلي فدفيرتي..
انا: و واش راك د دير
هشام: نفتح فيها باش متقلقكش..ارقدي دك كي تنوضي عندي ما نحكي معاك فيه..
منعرفش واش قصدك بكلامو و منعرفش واش حاب يقول..مقدرتش حتى نركز معا هدرتو ميتة بالنعاس..كبست عليه اكثر..عجبتني حركتو كي منساش..حتى ابسط حاجة منساهاش..منساش انو الدفاير يقلقوني..حسيت بيدو لي تغلغلت وسط شعري..هاد الحركة بالضبط تريحني..بقيت نحاول منفكرش..نحاول نفكرش فرشيد هاداك و فكلامو..نحاول نخرجو من راصي و لوكان لدقائق برك باش نرتاح..فنفس الوقت نفكر..نفكر فلي باش نعملو..حاايرة..نقولو لهشام على لي صرا ولا نسكت..و واش نقول لرشيد..خاطر عارفة مراحش يخطيني حتى يدي جواب على عرضو..معرفتش واش ندير..معرفتش وين نحط رجلي وسط كامل هلد النار..نفكر..و نفكر فلي جاي و فلي باش يصرا حتى معلاباليش كيفاه رجعت رقدت..
مهدي يحكي:
شديت فران تحت دارو بالضبط..تنهدت..تلفت ليها..نشوف معاها..تبسمت على جنب تحكي..
ليديا: متأكد ملي راح تديرو ؟
انا: مممم هاتي
مديت يدي ليها..جبدتهم من صاكها..حطتهم فيدي..
ليديا: مفاتح دار هشام رجعو فيدك دك
شفت فيهم..تبسمت على جنب..
انا: استنايني هنا
رميت يدي للباب باش نفتحها..رجعت شدتني من يدي..عقدت حواجبي..تلفت ليها..نسمع فيها تحكي..
ليديا: كدبت على هشام و قلت بابا مات باش نبعدو عليها اطول مدة نقدرلها..و زدت جبتلك مفاتح دارو..هاني نحذر فيك..والله نحرقك كون تعملو كاش حاجة
نطرتلها يدها..ڨحرتلها..فتحتها و خرجت من غير ما نردلها..اخر همي هشام تاع ### دك..لي يهمني دك اني نشوفها و نطمن عليها..معلاباليش ادا لي قاعد تدير فيه صح ولا غالط..لي يهمني هي و برك..منعرفش كيفاه لحقت لعند باب دارو..خذيت نفس طويل..حطيت لمفاتح عالباب فتحتو..دخلت بلعقل..غلقتها مورايا..الظاهر مزال مفاقوش..دخلت نحوس عليها..كبست على يدي..منعرفش علاه جابها معاه لهنا..كيما منعرفش واش راح يصرا..لي نعرفو اني لازم نشوفها..اول ما قربت جيهة وحدة ملبيوت..نحوس عليها..سمعت صوت الباب لي يتفتح..منعرفش على روحي كيفاه فتحت الباب لي قدامي..دخلت بالزربة و غلقتها مورايا..ضربتني ريحتها لنيفي..عرفتها بيتها..غمضت عينيا بقوة و انا نشوف فالسرير فارغ..وين راهي..وين رقدت..فتحت الباب شوية..شقيتو..قلبي دق بالقاوي و انا نشوف فيها..و اخيرااا شفتها..شفت نجمتي..و اخيرااا قدرت نطمن عليها..اما هاد الشئ ميكفينيش..مراحش نخرج من هنا قبل ما نحكي معاها و نسمع صوتها.. و لي راح يصرا خليه يصرا معادش يهمني..حتى لي راح يعملو ادا شافني فنص دارو ميهمنيش..هي و برك..
★★★
الحلقة😚😚
قلت نديرلهم شوية رومنسية نمتعهم بيها قبل ما نقلب الدنيا فوق راصهم😂😂👊
اطوني رايكم..و توقعاتكم بخصوص رشيد..و ليديا و هاهاهاااا علياا مهدي فنص دااار هشاام😌👌و علااش ؟؟ باش يشووف و يهدر معا فيرا فحضوور هشاام😂وااش تتوقعو حيصرااا ؟😈👊
جمجموو الحلقة💃❤✨
