.
(ماقبل الاخيرة)
مهدي يحكي:
دخلت قربت لريسيبسيون..منعرفش علاه عيطتلي نجي لهنا عالصباح..منعرفش لواش راهي تخطط بالضبط..وقفت قدام الممرضة لي لتم..طلعت راصها تسوف معايا..
_تفضل مسيو
انا: من شوية دخلت عندكم مريضة
_اعطيني اسمها
انا: ليديا..
سكت شوية وقت تفكرت اني منعرفش كنيتها حتى..مالا حصلة حصلت روحي فيها..رجعت حكيت..
انا: اسمها ليديا..روجية شعرها احمر
_اااه خلاص تفكرتها..عتدها نص ساعة ملي دخلت عند طبيبة النساء..شوية و تخرج تقدر تستناها هنا
عقدت حواجبي..مستغرب اكثر..واش جابها عند طبيبة نسائية هادي..قبل ما نلحق نتوقع تفتح الباب..طلعت راصي ليها..خارجة تتبسم وحدها..بزوج خطوات جيت قدامها..
انا: واش راكي ديري هنا !
ضحكت فوجهي..رفدت الورقة لي فيدها فوجهي..عينيا وساعو..قلبي دق بالقاوي..
انا: ن نتي حامل !!
هزيتلي براصها ايه..الدنيا دارت بيا..منعرفس كيفاه سألتها..
انا: وليدي ؟
اول ما حكيت قربت ليا اكثر..جات فوجهي..تحكي و تلز على سنيها..
ليديا: بالاك تعااود هاد الهدرة..الطفل هادا لي فكرشي قطعة من هشام..وليد هشااام
هزيتلها براصي لالا..نستوعب فكلامها..شديتها من يدها بكل قوتي..
انا: متكدبيييش..عارف مصرا بيناااتكم والو..هادا وليدي انا
نطرت يدها مني بقوة..دزتني لتالي تحكي..
ليديا: مشي وليدك قتلك..و رد باااالك توقف فوجهي انا و هشام راح نتزوجو اليوم..رد بااالك تغلط معايا..خاطر رشيد هاد المرة فصفي..هاني وصيتك
شديتها من فكها بكل قوتي..نحكي بين شفافها..حطت يديها عاى يدي تحاول تجبد روحها مني..
انا: مستحيل نسمحلو يربي وليدي..نحلفلك غير هاد الزواج مراحش يتم..م..
قبل ما نكمل نحكي..حطت الممرضة يدها على يدي..
_اطلقهاا واش بيك هبلللت !! اطلق ولا نطلبلك الامن
شفت فيها و رجعت شفت معا ليديا..نطرت يدي منها رجعت لتالي ترد فالنفس..
انا: انساااي نخليه يربي وليدي..
ليديا: مشي وليييدك
محبيتش نردلها..قلبت عينيا و خرجت..متعياش ملكذب..متأكظ انو مصرا بيناتهم والو..هاد الزواج راح يكون على جثتي..مستحيل نسمحلو يتم مهما كان..هاداك وليدي انا..مستحيل نخلي واحد غيري يربيه..
هشم يحكي:
حطيتها بلعقل عالسرير..تكيت قدامها..رفدت يدي نعدي فيها على وجها بلعقل..رديتلها شعرها لتالي..نزلت عليها اكثر بستها من خدها..طلعت لودنها نحكي..
انا: حبيبي
فيرا: ممممم
انا: نوضي يا نعسانة
دخلت فصدري حشرت روحها عندي تحكي بصوت ناعس..
فيرا: هأة هشام خليني
تبسمت و انا نشوف معاها..غمضت عينيا و رجعت فتحتهم..قلبي حسيتو تقسم
.. نصين..كيفاه قدرت نديرها..كيفاه هانت عليا و قدرت نمس وحدة من غير هاد الصغرونة..كيفاه شبهت وحدة اخرى بيها و انا اكثر واحد عارف انو مستحيل تكون كاينة وحدة كيما هي..كيفاه راح نواجها..و كيفاه راح نخليها تسامحني..من غير ما نحس خرجت تنهدية من عروش قلبي..حسيت بيدها لي كبست على صدري..جبدت روحها شوية مني..فتحت عينيا عاقدة حواجبها تشوف معايا..تبسمتلها بالسيف..رفدت يدها حطتها على خدي تعدي فيها بلعقل..غمضت عينيا نستحلى فلمستها..شوية و حكات..
فيرا: هشام ياروحي واش بيك !
فتحت عينيا نشوف معاها..هزيتلها براصي لالا..رجعت حكات..
فيرا: متقولش والو..متأكدة بيك حاجة..حاجة فيك متغيرة
ڨحرتلها نحكي..
انا: كيما ريحتي لي ولات متعجبكش
عضت شفتها..و رجعت حطت راصها على صدري بالزربة..تبسمت..عرفتها خافت..
فيرا: مشي قصدي والله
انا: مممم
فيرا: مزعفتش مني ؟
انا: مممم
ضحكت وقت سمعتها نفخت بالقاوي..كبست عليها اكثر فحضني..نزلت راصي خذيت نفس طويل من ريحتها..نستغل فكل لحظة من قربها..كأني نحاول ناخذ اكبر كمية من ريحتها..شوية وقت و رجعت حكات..
فيرا: هشام
انا: مممم
فيرا: علاش انا منعرف عليك والو ؟
عقدت حواجبي..جبدت روحي عليها شوية..نزلت راصي نشوف معاها..
انا: واش قصدك ؟
فيرا: يعني انا منعرف عليك والو غير اسمك
انا: و واش حابة تعرفي اكثر ؟
فيرا: كلش عليك..طفولتك..شبابك..عائلتك..و كيفاه وليت تخدم معا المافيا
قلبي دق بالقاوي..عينيا فلحظات حامو على وجها كامل..منعرفش واش جاب هاد السؤال لراصها دك..كيما منعرفش واش راح نقول..جيست نشوف معاها و هي مركزة معايا تستنى فيا نحكي..مقدرتش نخرج لكلام..و مافقت غير وقت جبدت روحها عليا تقعدت تحكي..
فيرا: ادا شايف انو مشي لازم تحكيلي و انو علاقتنا موصلتش لدرجة تحكيلي هاكا حاجات عادي..راحتك مراكش مطر
طلعت حواجبي..نشوف معاها مصدوم..كيفاه نفعلت قبل ما نلحق حتى نحكي..عطاتني بالظهر..جبدت روحها اكثر باش تنزل من السرير..تكيت لتالي..اول ما حطت رجلها فالارض حكيت..
انا: بابا قتل يما
تلفتت ليا بالزربة..عينيها محلولين على وسعهم..تبسمت بإنكسار..غمضت عينيا..كملت نحكي..
انا: ضربها و هي حامل حتى طلعت روحها..ههه تعرفي كان حيكون عندي اخ..كنت فرحان بيه..فالاخير تصدمت ببابا خارج من البيت و هي جثة بين يديه..
حسيت بيها وقت طاحت عالسرير..فتحت عينيا بالزربة..نشوف معاها..لونها مخطوف..فمها محلول شطر من الصدمة..تبسمت..كملت نحكي..
انا: حطني عند خالتي وردية و راح بعد موتها..بدل حتى كنيتو باش ميكونش عندو صلة بيا..هههه و بالمقابل دخلني للمنظمة تاعو..
فيرا: م متقوليش ا انو رشيد !!
هزيتلها براصي ايه..عارفها تصدمت و مكانتش تستنى فيها..دموعها نزلو..غمضت عينيا بقوة و رجعت فتحتهم..رميت يدي لخدها..نسمح فيهم و نحكي..
انا: متبكيش..انا..انا راح ندمو عليها..مراحش نتهنى حتى نشوفو جثة قدامي غارق فدمو..
غمضت عينيا بقوة..النفس نحس فيه تغلق عليا..كل مرة نتفكر القصة هادي نحس فدمي يفور..طول هاد السنين حاكم روحي عليه بالسيف..كل مرة نسوف فعينيه يقولي راصي نفرغ سلاحي فيه..للدك مزال صورتو و هو مخرجها من هاديك البيت غارقة فدمها بين عينيا..للدك مزال صوت عياطها نسمع فيه..كبست على قبضة يدي بكل قوتي..نحس فروحي راح نطرطق..ما فقت غير على يديها لي تلفو على راصي..و محييت غير وقت غسرت راصي فصدرها..قلبي دق بالقاوي..لفيت يديا على خصرها..جبدتني ليها اكثر..نسمع فيها تحكي..تحكي و تعدي فيدها على شعري..
فيرا: اهدا..انا معاك..هشام هدي روحك..منحبش نشوفك هاكا
خذيت نفس طويل من ريحتها..من كلامها عرفت انو ملامحي و انا نحكي خوفوها..منعرفش شحال بقينا و حنا فهديك الحالة..لي نعرفو انو لمستها على شعري ريحتني..لي نعرفو انو قربها دواء بالنسية ليا..فيقنا من هاديك الحالة صوت تيليفوني..رخفت يديها شوية عليا..جبدت روحي بلعقل..تبسمتلها و رميت يدي لتيليفون..قلبي دق بالقاوي و انا نقرا فإسمها..فتحت الميساج..نقرا فيه و نعاود..<<هشام محتاجتك فامر مهم بزاف..ميقبلس التأجيل بخصوص لي صرا هاديك الليلة..راني نستنى فيك فالبلدية>>..قلبي دق بالقاوي..طلعت راصي بالزربة لفيرا لي مركزة معايا..هزتلي براصها تسأل فيا...
انا: ا امين يسحقني..لازم نروح ضروري
هزيتلي براصها ايه..قربت ليها اكثر..بستها من جبهتها..خذيت نفس طويل من شعرها و جبدت روحي وقفت نعدل فحوايجي..رجعت حكات..
فيرا: هشام استنى
تلفت ليها عاقد حواجبي..
انا: واش !
فيرا: متشهية حاجة
انا: واش متشهية ؟
تبسمت بمكر..رفدت روحها وقفت فوق السرير..و قربت مني باستني من رقبتي..قلبي دق بالقاوي..جسمي رعش كامل من لمسة شفافها على رقبتي..جات تبعد..حطيت يدي على على خصرها..نزلت راصي لرقبتها بستها حتى انا و رخفت يدي عليها..حضنتني بالقاوي..كبست عليها عندي..منعرفش علاه اما احساس خايب متملكني..كأنها اخر مرة..شوية و جبدت روحها مني..تشوف معايا..
فيرا: نحبك
انا: ##### عليك
عضت شفتها..بستها من خدها و جبدت روحي
انا: باي
فيرا: باي
رفدت تيليفوني و مفاتحي و خرجت ملتم..منعرفس كيفاه لحقت لطونوبيل..ديماريت طاير فالطريق..اعطيني غير نوصل ليها و نفهم منها لي صاير..قلبي مشي مطمني..متأكد كاين حاجة..و الاهم مفهمتش واش راهي دير فالبلدية ؟ وعلاه طلبت مني نروح ليها لتم !!؟..
★★★
