فيرا تحكي:
واقفة قدام لمرايا نشوف معا روحي..عدلت حوايج السبور لي لابستهم..لميت شعري للفوق..تنهدت وقت طاحت عيني على الرزنامة..تعدا يوم وحدوخر على غيابو..21 يوم..لا حوس ولا تصل..دمعة سخونة لقات طريقها على خدي..رفدت يدي بالزربة مسحتها..هنا و خلاص..ستنيتو بزاف..طول هاد المدة و انا نلوم فروحي و نقول غلطتي..نقول انا لي خسرتلو خدمتو..ستنيتو يزعف سمانة..عشر ايام..اما هو بلي عملو بينلي انو كان يحوس غير على سبة باش يبعد..هو عمل مشكل من اصغر غلطة..كل صباح نفيق نشم ريحتو فالبيت..نقول بالاك جا..بالاك راهو هنا..نهبط للتحت نجري و منلقاهش..هو ختار البعد..ختار انو يخليني فنص الطريق..بزاف هاكا..نشفو دموعي ملبكا..عييت و انا نستنى فيه..ستنيتو حتى قتعنت انو مراحش يولي..رجعت رفدت يدي مسحت الدموع لي عاودو هبطو..رفدت تيليفوني من فوق لاكوافوز و نزلت لتحت..قابلتني خارجة من بيتها..تبسمتلي..
وردية: و اخيرااا خرجتي من هاديك البيت
انا: بونجور
وردية: بونجور بنوتي..وين رايحة !
انا: رايحة نجري شوية..حابة نشم هواء نقي
وردية: وي غير روحي احسن حاجة تعمليها
هزيتلها براصي..رجعت حكات..
وردية: 10 دقايق و يكون لفطور حاضر
انا: لا معينيش
وردية: بصح..
انا: كي نجي ناكل..باي
رميتلها بوسة فلهواء..و خرجت بالزربة..حطيت تيليفوني فجيبي..درت الكيتمان..غنا زايد..و خرجت مالدار..نجري رايحة لصطاد..محبيتش نروح بطونوبيل معينيش نسوق..نجري و تفكيري عندو..مشي بيدي..مشي حاجة نقدر نتحكم فيها..نحاول منفكرش فيه..نحاول نتجاوزو..نلقى روحي نفكر فيه ستين مرة فالدقيقة..معلاباليش علاه دار هاكا..معلاباليش علاه قاعد يعاقب فيا ببعدو..اما الحاجة الوحيدة لي نعرفها و متأكدة منها..انو يحبني..هشااام مهمها دار يبقى يحبني..الراجل لي شفت لمعة الدموع فعينيه وقت عرف اني ملكو مستحيل يكون ميحبنيش..مستحيلل..حبست شوية وقت قابلني الصطاد..الدوخة لعبت عليا..ستندت بيدي عالحيط نرد فالنفس..فتحت قرعة الماء شربت منها..دفقت شوية فيدي بللت وجهي..نرد فالنفس..كرشي مغصتني..منعرفش واش صاريلي هاد اليامات..كل مرة تتعاود نفس لحكاية..اما شوية وبت و تتعدالي الحالة..بقيت واقفة فبلاصتي حتى حسيت روحي احسن..خذيت نفس طويل..قطعت الطريق بالزربة..اول ما جيت ندخل..محسيت غير بيد شدتني من يدي بكل قوتها..ردني ليه حتى خبطت فصدرو بقوة..غمضت عينيا فهادوك الثواني لقلال لي كنت لاسقة فيه فيهم..قلبي دق بالقاوي وقت شميت ريحتو..هو..و شكون من غيرو لي يقدر يشدني بهاد الطريقة..غمضت عينيا بقوة و رجعت فتحتهم..جبدت روحي بالزربة..طلعت راصي ليه..ياااه..قلبي ضرب ضربة وحدة وسط صدري..عينيا دارو على وجهو كامل..شعرو نازل على عينيه..لحيتو هايجة..شبيه زيان هادا هاكا..ثواني سرحت فيهم و انا نشوف معاه..نسيت انا وسط الطريق..نسست نسأل روحي واش جابو و علاهش راهو هنا و كيفاه لقاني..جيست نشوف معاه..شحاال توحشتو..شحال حابة نعنقو..فيقني وقت نطر الكيتمان من ودني بقوة..رمشت عينيا..فقت على روحي..
هشام: ### هبببلتي نتي !! تجري هاكا وسط الطريق بالكييت !
بلعت ريقي بالسيف و انا نسمع فصوتو..شحال توحشت عياطو..اما فلحظة رجعت يمعت عيطتي انا هاداك النهار..هاداك النهار لي عيطتلو فيه و مشافش فيا..هاداك النهار لي حرقني فيه..حطيت يدي على يدو لي شادني بيها..غرست دفارتيا فيه نحكي..
انا: مشي شغلك فيا..نحي يدك
مردليش..جبدني ليه اكثر حتى مولاتش مسافة بيناتنا..يحكي و يلز على سنيه..
هشام: متهبلينيش احسنلك..فهمي ### كيفاااه تخرجي بهاد اللبسة هاكااا
طلعت راصي ليه..طاحت عيني فعينيه لي شاعلين نار..تبسمت على جنب نحاول نخبي وحشي ليه..الا ما يخلص بعدو عليا غاالي..رجعت نحكي..
انا: قتلك مشي شغلك..بواش من صفة تحااسبني نتا
هشام: بصفتك ملكي اناا
رفدت يدي حطيتها على صدرو..نطبع فيه لتالي و نحكي..
انا: صحح معلوماااتك هشام الرااشدي..انا كنت ملكك..اما دك كل واحد فطريقو..و بعد عليااااا
رخف يدو شوية على يدي..فكرتو راح يطلقني..اما هو نزل بيديه الزوج لخصري..كبس عليا و جبدني ليه اكثر..حتى ولا نيفي يقيس معا نيفو..قلبي نحس فيه راح يخرج مبلاصتو..حطيت يديا على يديه نحاول نجبد روحي..رجع حكى..
هشام: مشي بيدك يا روحي..متقدريش تبعيديني عليك
انا: علاه منقدرش..مشي نتا خليتني و عطيتني بالظهر !! ياخي نتا بنفسك لي بعدت عليا علاه حتى منبعدكش انا..نتا جبت سبة و بعدت عليا و خليتني نلوم فروحي خاطر زعفتك..ستنيتك ترجع اما نتا خترت تبعد..معنتها بعدعليااا دك
صوتي تخنق بالبكاء..وليت ندرب فيه قصدرو باس يبعد..دموعي لي كنت حابستهم نزلو غصب..منيش لعبة فيدو باش يبعد وقت ما حب و يرجع وقت ما حب..محسيت غير بيديه لي تلفو على ظهري..جبدني لعندو..عنقني..نسمع فيه يحكي..
