عايزه تقربي لربنا ف الكتاب هنا 😍عايزه وصفات شعر وبشره بردوو ف الكتاب ده😇

عوض ربنا حلو أوي

من 3او4 شهور تقريبا، بنت كلمتني وطلبت مني ادعيلها طول الوقت ربنا يجمعها هيا وحبيبها،، وقولتلها حاضر هدعي لو ليكم خير في بعض ربنا يتمم بخير..

بعدها بأسبوع... لقيتها بعتالي حكايتهم..باختصار :
هيا مخلصة معهد فني، وهو طب.. واتعرفو بشكل ما.. وحصل حوار.. جر حوار...كانوا عارفين ان كلامهم حرام ف قرروا يبطلوا كلام.. بعد ما كل واحد عرف نية التاني اتجاهه...واتفقوا انه هيخلص طب، ويروح يتقدم...
في الوقت ده هيا كانت خلصت وبتشتغل... بيجي ناس، وترفض...
قالتلي بالنص كده : أنا مش شايفه ان ممكن الاقي زوج صالح غيره، ولا أب كويس لولادي غيره...مستحيل ابقا لحد تاني..
وكام اسبوع فاتو ولقيتها داخلة تقولي ادعي كتير... في ايه؟
جاي يتقدم...!
فرحت لها اوي.. ويشهد الله اني كثفت الدعاء، إن كان خيرا يتمم ليهم علي خير..

فات اسبوع.. ولقيتها بتقول ان الموضوع متمش، ومفيش أمل يتم..والده شايف انها أقل منه.. وانه عاوز لابنه دكتورة زيه،،
طب يا حج رغبة ابنك!
لا هو مش عارف مصلحته..وهيتجوز اللي اختارها...
طب وموقف فلان ايه؟!
مفيش!
يعني موافق علي كلام والده!
اه.!
ميستاهلكيش والله،، وتأكدي ان الموضوع مش خير..
بس أنا بحبه... ومش شايفه غيره جوزي.. مفيش حد دلوقتي صالح وكويس زيه.. انا عارفاه كويس...
مين قال كده بس... ومين قال انه كان هيبقا زوج صالح فعلا.. ده الظاهر ليكي يابنتي... بس لما يتقفل عليكو باب الحقيقة هتظهر... أحسني الظن بالله وارضي..

فات اسبوع... هيا مكنتش بتفتح غير يوم الجمعه بس،،
كلمتها لقيتها في حالة حزن شديدة... فقدان الأمل..وخذلان وكل حاجه كانت بايظه فعلا...
اتكلمنا شوية... ولقيتني بقولها...

" طب عارفه، الفترة اللي فاتت دي كنتي بترفضي العرسان علشانه وده الظاهر ليكي،، بس يمكن ده كان بيحصل علشان حد تاني كان بيجهز وهيجيلك...وانتي حتي لو كنتي ميلتي لده... فكان علشان شيفاه صالح وتقي، ورغبتك في زوج يعينك.. علقتك بيه،، اتقلي بس وهيجيلك حاجه حلوه والله وبكره تقولي سوسن قالت "
الأسبوع ده فتحت فيه كذا يوم... وقتها اتكلمت معاها عن عوض ربنا... واد ايه هو جميل ولما بيجي، بينسي كل الوجع اللي فات،، قولتلها انها هيجيلها واحد أول ما تشوفه قلبها هيقولها هو ده..

كانت بتضحك علي كلامي..
بس اقتنعت آخر مرة... وبدأت تدعي ان ربنا يعوض عليها...
كنا بنتكلم بالليل... ونقوم في الثلث الأخير ندعي ربنا يعوضها عاجلا غير آجلا...

فات اسبوع

يوم الخميس..
لقيتها بتقولي باركيلي!
مبارك يا حبيبي هنشرب شربات ولا ايه؟
أيوه..❤️!
قالتلي : " لما دخلت وشوفته، حسيت بسكينه في قلبي متتوصفش، حسيت ان هو ده فعلا.. قلبي دق ليه بشكل عمري ما حسيت بقلبي زي الوقت ده"
كان قريبهم من بعيد... ومسافر يشتغل... وبيدعي بيها من وهيا في ثانوي... قالها انا كنت راجع حاطط ايدي علي قلبي وبقول يارب متوجعنيش فيها... كان بيبقا نفسي اسأل حد عليكي اتخطبتي ولا لا... بس كنت برجع واقول بلاش.. ادعي انت بيقين بس وربك هييسر الحال..

قالتلي :
" عوض ربنا حلو أوي يا سوسن، بينسي كل اللي فات فعلا"

#سوسن_رضا