عايزه تقربي لربنا ف الكتاب هنا 😍عايزه وصفات شعر وبشره بردوو ف الكتاب ده😇

دي تقريباً أحلى دعوة ممكن حد يدعيها لأي بنت

"ربنا يرزقك بالزوج الصالح"

دي تقريباً أحلى دعوة ممكن حد يدعيها لأي بنت لم تُرزق برفيق حياتها بعد، بس هو مين الزوج الصالح ده!!

الزوج الصالح يا بنات مش زي زوج فلانة ولا زي زوج علانة، الزوج الصالح سيدنا محمد اختصرلنا مواصفاته في "ترتضون دينه وخُلقُه".

هو شخص هيكون مناسب ليكي انتي بس، دينه وأخلاقه مناسبين عليكي بالمللي، تفكيره وردود أفعاله لايقين عليكي، مرتاحة وانتي معاه وحاسة ب وَنَس.
الزوج الصالح مش أبو لحية، ومش اللي حافظ القرءان الكريم، ومش إمام المسجد، ومش طالب العلم الحاذق، ومش المثقف القاريء، ومش المتعلم اللي معاه خمستلاف شهادة، ومش المرتاح مادياً ووسيم، ومش الشاب الچينتل، ومش الشيخ الفرفوش.
الزوج الصالح اللي ترتاحي لهواه، يعاملك بما يُرضي ويتقي الله فيكي وف قلبك، يصونك ويحبك ويبقى فاهم كويس إنك أمانه، أمانه من ربنا أولاً ثم من أهلك اللي إئتمنوه عليكي، الزوج الصالح اللي يبقى عارف يحتويكي بكل مشاعرك المتناقضة وبكل اضطراباتك النفسية، بكل أفكارك وأحلامك وحتى لو متعارض معاها هيعرف يتفاهم معاكي ويوصلك لبر أمان يريحك ويريحه.
الزوج الصالح بيصلي وبيعرف ربنا وبيخاف ربنا، بيجاهد يعرف دينه كويس، كان حافظ قرءان يبقى خير، إمام مسجد خيرين، طالب علم يبقى ثلاث خيرات، وهكذا كل ما يزيد حاجة فا دي ف ميزان مميزاته وإضافة ليه ولكِ، إنما مش ده الأساس.

الزوج الصالح له ميزان متغير، يختلف بينك وبين صاحبتك وبين قريبتك وبين جارتك وبين أقرب حد ليكي هي أختك مثلاً، كل واحدة ميزان الزوج الصالح عندها هيختلف ع حسب مقدار حظها من الدين، ومقدار حظها من العلم، ومقدار حظها من الثقافة، هيختلف ع حسب التفكير والمباديء والثوابت والبيئة والأسرة نفسها والعائلة، هيختلف ع حسب درجة التعليم وع حسب الأحلام والطموحات المستقبلية، ميزان ملهوش معيار ثابت وملهوش نتائج واحدة لأن ببساطة كلنا مختلفين بسبب العوامل اللي فاتت دي، دي غير كمان القدرات والطاقات اللي ربنا بيرزقنا بيها من غير حول منا ولا قوة.

فبلاش لما تيجي تختاري زوجك الصالح تقيسيه ع ميزان حد غيرك عشان متندميش، بلاش تختاري زوجك الصالح على معيار واحد بس وتنسي أو تتناسي الباقي، خليكي واثقة إن زوجك الصالح ده اللي هيرتاحله قلبك وترتاح له سريرتك وروحك تطمئن في جواره.

الله يرزقكن يا بنات أزواجاً صالحين ترتضين دينهم وخلقهم وتأنسون في جوارهم ⁦❤️⁩
- عليةة سيد