عايزه تقربي لربنا ف الكتاب هنا 😍عايزه وصفات شعر وبشره بردوو ف الكتاب ده😇

💙

في رمضان بنت بعتت ليا على الأسك إن خطيبها كان عندهُم وكانوا بيتناقشوا في موضوع؛ فـ في نُص الكلام بدون ما تفكر  قالتله " على فكرة بقى أنا مش فرض عليا أشتغل في البيت وأخدمك ولا مُطالب مني أخد بالي من أهلك وأشوف طلباتهُم "، فطبعًا هو زعل وما ردش عليها وبعدين بتسأل هو زعل ليه ! والبنت بعدها بعتت ليا على ما سنچر وإتكلمنا وفهمت من كلامها إن اللي وصلها الأفكار السامة دي جروبات البنات على الفيس والفيمنست.

إنبارح كُنت بكلم واحدة صاحبتي؛ فبعتت ليا إسكرينات من كذا جروب من الجروبات اللي ظهرت مُؤخرًا وكذا مُشكلة بقى بين بنت وزوجها أو بنت وخطيبها والكومنتات أنا ما قدرتش أكملها قراءة من كتر القرف والله، خراب بيوت درجة أولى، وروح الفيمنست اللي جواهُم شغالة مش بتنام.

وفيه جروب بقى ظهر مؤخرًا بينشروا عليه قصص حبهُم وقد ايه هُما كافحوا في الضلمة والسرقة وتغفيل أهاليهُم و فاز بيها في الآخر.. مش دي القضية، القضية إن البنات مُنبهرة وفرحانة بالعك دا.. ومش بس كدا برده ! دا بيتمنوا يعيشوا حاجة زي كدا وبيبدأوا يسعوا بقى عشان يلاقوا البطل الخارق اللي قصتهُم معاه هتلف السوشيال كُلها زي دول.. اه معلش، ما البنات دي كُلها مش أحسن منهُم في حاجة ")

- أنا ما كنتش ناوية أتكلم عن حاجة زي دي، بس لازم.

الجروبات اللي ظهرت دي هي اللي دمرت عقول الجيل دا، رسّخِت عندهُم إعتقاد  إن إنت إتخلقتي عشان تكوني إسترونج إندبندينت وومن وتلفي العالم كُله وتشتغلي وتنجحي وتعملي شوبينج وتتصوري ويجيب ليكِ ورد كُل يوم ويعزمك برا البيت وعنده عربية زي زوج صاحبتك، اه طبعًا أومال ! هي مش أحسن منك في حاجة.. وشُغل البيت دا يع ! هو أنا الخدامة الفلبينية اللي إشتراها ولا ايه ! ما يشتغل في البيت زيُه زيي دا مش فرض عليا.. معلش أنا مش أقل من أي بنت من اللي بشوفهُم على السوشيال بيخرجوا ويتعمل ليهُم مفاجأت وعايشين حياتهُم، وبلا بلا بلا..

بُصوا يا حبايبي..
سيبكُم خالص من فتاوي الشيخ فلان وغيرُه اللي بتقول إن الزوجة مش مُلزمة شرعًا بخدمة زوجها.. الزواج يعني مودة ورحمة وحُب، فمش هتقفي لزوجك وتقولي ليه أنا مش مُلزمة بكذا، قوم جهز لنفسك العشا وإشتغل في البيت زيك زيي.. كلمة أنا مش مُلزمة شرعًا دي تقوليها في محكمة الأُسرة، مش في بيتك. 

اللي نعرفُه واللي إتربينا عليه إن طالما فيه موده ورحمة الست تخدم زوجها بعنيها، لو مش بتعرف تطبخ بتتعلم عادي، لو مش متعودة على شُغل البيت بتتعود، بتعمل المُستحيل عشان بيتها يكون أهدى وأحسن بيت في الدُنيا، ومش بتنتظر حاجة من الطرف التاني غير التقدير لتعبها وإحترام مساحتها الشخصية وعلى فكرة هو لو كويس بيساعدها عادي بدون ما تطلب وبيحترم تعبها في البيت ودا ما يقللش منُه ")

بالنسبة لأهل زوجك فمش فرض عليكِ، و لو هتعملي كدا؛ فدا برًا بزوجك وإحتسابًا للأجر، ولكن هرجع وأقولكُم برده.. إحنا إتربينا إن طالما أهل زوجك و والدته كويسين يبقى تشيليها على دماغك وجوا عنيكِ وتستقبليهُم أحسن إستقبال ويتعاملوا أحسن مُعاملة، زي ما بتعاملي والدتك وأهلك بالظبط، مع إحترام مساحتك الشخصية برده. 

الصور والشو وشُغل الفيمنست اللي بقى مُنتشرة على السوشيال، بقت بتزرع أفكار سامة ومُتخلفة في عقول البنات اللي لسه أصلًا مش متزوجة ودي بشارة لمُستقبل الله أعلم بيه، وبتخليهُم ينجرفوا ناحية الإختيار الظاهري والصوري وبس، مع إن أغلب الموجودين على السوشيال دول ناس فيك أصلًا وحياتهم في الواقع غير السوشيال نهائي، وإنتوا اللهُمَّ بارك بتصدقوا وتمشوا وراهُم.

وحاجة كمان..
مشاكلكُم اللي بتعرضوها على بعض في الجروبات دي وما فيش أي إحترام لخصوصية بيتك ولا أي وعي بإن حياتك هي حياتك وبس ومش من حق مخلوق يتدخل فيها ولا يعرف عنها شيء هي أول خطوات تدمير حياتك.  

نفوق كدا أحبابي في الله ونعقل وسيبكُم من شُغل تقليد الغرب دا و الفيمنست كمان.. السوشيال دا عالم إفتراضي.. عالم ايه ؟ إفتراضي إن شاء الله.
ما تفرحوش بقصص الحُب الحرام دي، البدايات التي لا تُرضي الله، نهايتها لا تُرضي صاحبها.

كُفوا أعينكُم عن رزق غيركُم تُرزقوا، مالكيش دعوة بصاحبتك وبنت الجيران والبلاد المُجاورة، إختاري صح وبلاش سطحية وإنت هتبقي أحسن من أي حد.
- مها عبدالكريم