حبيبي 😻عسكري😘

Part 87

💖حبيبي عسكري💖

فات للدار عرفهم بلي رقدو...دخل لشمبرتو الفرحة ماشي سايعاتو....بدل وطول يرقد....

صباح مختلف...كلو حنان وحب..مغمور دفء عم القلوب.. وسكينة رجعت ليهم..
ناض على صوت حركات امو وهيبة..فات دوش...رجع يلبس...
عيطولو يشرب معاهم لحليب..
نوفل: يما وجدي روحك للعرس..
صفية: تاع من..
نوفل: تاعي.
هيبة: ياخاه راح تتزوج ونورسين
صفية: علاش ياوليدي رميت بنت الناس...وراح تزيد تتزوج هاواش خصها نورسين كي الوردة..
نوفل: يما اسمعيني راني باش نتزوج بنورسين..
هيبة: هههه هذا خبر مليح..
نوفل: هي حبت نديرلها عرس..وعندها حق من قبل تزوجنا بلاعرس...حبت كورطاج وكل شيء...
صفية: نديرلها عرس ماكان حتى مشكل ترجع برك لدارها
نوفل: المهم يما...النومرو تاعها عندكم وتفاهمو....
كمل يلبس...وخرج..اليوم باش يخرج بكري من الخدمة يروح لمحسن يتصورو..
..صفية كملت نورسين...تفاهمو غدوة تديرولها الحنة..وبعدو العرس..عيطت لشبيلة ...خبرتها شبيلة تشوكات ماشي فاهمة..بصح لازمها تبع امها....
كمل خدمتو. بدل الكومبا و..خرج...راحلها هزها وديراكت لمحسن..يديهم مع بعض..ابتسامتها مافارقتهاش..يحس بها رجعت نورسين تاع بكري..الي يعشقها . بكل براءتها.. دخلوهم لغرف منفردة..لبسوهم...(كوستيم مزير لنوفل من تحت سروالو قصير...بابيون..وشوميزي...لابسة غوب..طويلة خيرتها محترمة . وبالدرعين طوال شوي مزيرة عليها مكياجها سامبل...وكواف سامبل مع اكسسوار على جنب .
تصورو وضحكو....لعبو وعشقو عاشو لحظات مستحيل تنسى علابالو تجاوز المسموح ولكن ضحتكها تخليه يتنازل على كل الدنيا..تبدل..وماعادش نوفل الي يخليها تخلص اغلاطها يسمعلها ويرضيها...
كملو خيرو الصورة الي تنزل في المجلة . محسن كي سمع بهم راح يعاودو زواجهم..عطاهم هدية شهر عسل في ماليزيا..نوفل رفضها لان خدمتو ماتسمحلوش يخرج خارج البلاد...الا باجراءات تطول وهوما مزروبين....
بدلهم المكان لمستغانم....

فات النهار تاع اليوم حل غدوة..انفال ونورسين يوجدو اليوم حنتها....ميتة بالفرحة....لبست قفطان و مكياج غامق...طلعت شعرها..حست روحها عروسة بالرغم من انها بعيدة على عايلتها انفال ورهف قامو بها...
لعشية وصلت..جات صفية وشبيلة وكاميليا وهيبة....
جابولها جهاز كما يحب الخاطر...
قعدت في وسطهم...حناتلها صفية بالصلاة على النبي...وماء الورد..يترش على كفوفها..دموع الفرحة.....والزغاريت تتعالى.....
تصورو معاها...حتى شبيلة حست باللحظة. شافت الفرحة في عينين هذ اليتيمة.....
كملو...وراحو للدار نوفل على اعصابو كان حاب يروح ماخلاوهش....يدي فالهدرة من عند هيبة وكاميليا بطلوع الروح مخلينو على اعصابو...بسيف عطاوه تصاورها..شافها وهي بالقفطان...حسها كبرت وزيانت....الطفلة الي جابها اول مرة...كبرها مع حبو وعشقو خلاها مرا....ذايب في كل تفاصيلها عينها يبرقو بالدموع...شادها ويتفرج معاها طول الليل يعاود يتفرج فيهم..ماشي صابر عليها.....
هي حالتها اكثر منو تشوف في حنتها الي تحطت على جالو...تمناتها تكون من قبل..ولكن هكذا القدر حبها...رقدت على ريحتها مع ماء ورد...والف شوق في بالها...ليه..باش تكون غدوة في حضنو مرة اخرى...