هوي ي منى دا كلام شنو دا خربتي بيتك وجاية تخربي لي بيتي فعلآ زي م فدوى كانت بتقول لي عنك قلبك أسود وم عندك عزيز ودا انا حالي اجاري واتعزر لي عباس عشان يلملم الفضايح العملتيها ويرجعك بيتك ويستر عليكي هسي اجي ألقاك دايره تخربي لي بيتي وحال دا دا يوم واحد قعدتي هنا طلعتي فدوى خاينة وبتعرف رجال غيري ولو قعدتي شهر ولا سنه بتعملي شنو ؟
بتفضينا من البيت وتقعدي فيه براكي ي الشقية رافعة رأسك والله اصلك م فيكي خير الله لا كسبك خير ان شاء الله
كلام سليمان حرقني صح كلام فدوى سليمان مستحيل يصدقني لانو فدوى عامية علي عيونه بالشيوخ والعروق عشان كدا كانت مطمنه وم خايفه وعارفه تمامآ أنو سليمان م بصدقني وأنا اتسرعتا م كان لازم اتكلم بخشمي ساي والقي لي ديل وبعدين أتكلم بكل ثقة
قلتا لي دا كلام شنو ي سليمان انا م خرابة بيوت ولا دايرة اخرب ليك بيتك ولو حاجه م سمعتها م بتكلم ساي وبفك خشمي وانا عشان انت م تكون نايم علي اضانك قلتا افتح ليك عيونك مرتك دي عاملاك زي الأرض الواقفين فيها دي وطالعة ليك في راسك ومدلدلة رجلينها ولعبة فيك احسن ليك فتح عيونك زيك وزي الرجال واحسم الحاجه الحاصلة دي
فدوى جات من هناك تبكي يعني انا عشان استقبلتك في بيتي واكرمتك أخر كرم والحاجه الدايراها بجيبها ليكي لحدي عندك تعملي فيني كدا امنتك علي نفسي وبيتي مع انك جيتي متهمنك بالسرقة هسي دايرة راجلي يشك فيني اقسم بالله آخر زول اتوقعت منو يشك فيني انتي ي منى يعني تفتكري بعد كل العوارض المرينا بيها انا وسليمان بعدين اتزوجن اخلي وامشي اخونو بالسهولة دي هو منو البستاهل انا الحلة دي كلها م شايفة فيها راجل غير سليمان واذا انتي عباس م بقدرك وبعد داك داير يعرس فيكي م تبقي قلبك أسود وتخربي لينا بيتنا
قلتا ليها هس انا م كذابه وانتي عارفه كدا ودموعك دي واضحة انها دموع تماسيح وسليمان م بتغش فيها عشان كدا لما اكون بتكلم مع اخوي خليكي بعيدة وم تدخلي!!!!!
فدوى:_ بكون بعيدة وم بدخل في حالة تكوني انتي واخوكي بتتكلمو في موضوع م بخصني بس هسي الموضوع دا بخصني وبخص اهلي وسمعتي وم تتوقعي مني اسكت ليكي داك اخوك لو عايز يصدقك يصدقك بس اتاكدي بكل الأحوال انا م بخلي اتهامك لي دا يمر مرور الكرام بدون م ادفعك التمن غالي علي وحتي لو اخوكي يطلقني حقي ليكي م بخلي
منى :_ ههههه تصدقي صدقتك والله البشوفك بقول فعلآ زولة بريئة وم عندك يد في حاجه بس انا سامعة الموضوع دا بعضاني البكره باكلها الدود دي والكلام دا بتسال علي يوم القيامة
فدوى :_ مدام كدا انا م عندي كلام معاكي تاني وكلامي مع اخوكي اها ي سليمان انت رأيك في الموضوع دا شنو انا خلاص اختك دي م عندي معاها شغله والموضوع أنت البتحسمو لأنك انت الراجل والكلام البتقولو أنا بمشي وم بناقشك فيهو بس دايراك تعرف في كل الأحوال انا منى اختك حقي م بخلي ليها ولو علي التلفون القالت سمعتني بتكلم بي دا هاك دا التلفون شوفو لو لقيت مكالمة من زول غيرك انت وناس أمي ولو قلتا بكذب عليك وبكون مسحت الرقم انا عندي حل تاني خلي التلفون معاك وشوف لو زول اتصل ليك فيهو اصلا كنت بتكلم مع رحاب اختي وكنت بهظر معاها ومنى جات داخله وسمعتني وفهمت الموضوع غلط وحبت تنتقم مني عشان الصباح م خليت ليها شاي بس والله انا نسيت ي سليمان ولو كنت عارفه بتتهمني بالموضوع دا كلو كان عملتو ليها المهم انت خلي التلفون معاك وتحدد هسي دا ي مصدقني ي مصدق اختك ي أنا ي منى في البيت دا
سليمان :_ انتي جنيتي ي فدوى خلي تلفونك معاكي انا لو كنت بشك فيكي ولو بسيط م كان عرستك ولا فكرته فيك
منى :_ شنو ؟يعني انت م مصدقني ؟ مفتكرني بكذب عليك ؟ انا اصلن مافي حاجه بيني وبين مرتك تخليني اتهمها ساي
سليمان:_ منى قفلي زفتيكي دا والله إلا اكسر ليك أسنانك البتتكلمي بيهم وتتهمي بيهم الناس علي الفاضي والمليان يعني عشان عباس اتهمك دايرة تتهمي مرتي ذاتي غلطان م كان اتكلم معاه واطردك واخليكي في الشوارع زي الكلبه ممكن تتربي ياخ مالك حرقتي قلبي الله يحرق قلبك الزول بقي يكره حياته عشان انتي فيها الله لا كسبك خير ان شاء الله
فدوى :_ انا اعتبرتك زي رحاب اختي ي منى وكنت متمنيه ألقي منك معامله زي معاملتي ليكي بس ي خساره الحقد والحسد عمو علي عيونك يعني بس عشان شفتيني انا واخوكي مبسوطين ومتفاهمين مع بعض دايرة تخربي بينا ليه م بتختي في بالك دا اخوكي ومن المفترض تتبسطي لما تشوفي اخوكي مبسوط ليه محسساني سليمان دا عدوكي م اخوكي أول مرة اشوف اخت قلبها أسود علي أخوها بشكل دا المهم م علينا علاقتك بي اخوكي اصطفلي معاها بس تصل لي بيتي لي هنا وبس وبظن لازم اخد موقف حاسم عشان الحاجه البقت دي م تبقي تاني وبرجع وبخيرك ي سليمان ي انا ي منى في البيت دا ولو قلتا دي اختك وبتقيف معاها علي حساب بيتنا وسعادتنا انا بمشي بيت اهلي وعافيه ليك بس م تتوقع منى اقعد معاها في بيت واحد اختك دي م ابتتحمل وانا خايفه علي نفسي منها هسي اتهمتني بشرفني ي عالم المره الجايه تعمل لي شنو عادي بتوقع منها تجيب لي سم وتسممني بي عشان تطلعني من البيت وتنفرد بي انت قايل هي بتنقطع من البيت دا تاني لا لا م ابتنقطع لانو اختك خبيثه وسيدة مسكينه وعباس مستحيل يرضي فيها وم تستبعد يطلقها ليك بسببها وهي متأكدة من الحاجه دي عشان كدا قالت تخرب لي بيتي وتقعدفيهو هي وتستولي علي كل حاجه!!!!
سليمان :_فدوى اسكتي وم تكبري الموضوع انا عارف منى كذابه
فدوى:_هههه أسكت؟ انت بتتوقع مني بسكت وبمشي الموضوع ؟
لا والله شكلك اخترت اختك وانا م عندي مكان في البيت دا عشان كده احسن اطلع بكرامتي قبل م انطرد منه او افقد عمري وانا بحاول احافظ علي بيت وراجل م بهمو امر مرتك هسي من المفترض تكون اخدت موقف لانو دا شرف مرتك والموضوع م ساهل بس شايفاك بتتعامل مع الموضوع بكل برود لذلك دي مشيتي بيت ابوي
سليمان :_ قلتا ليك بس واقيفي هنا انا اتكلمتا مع عباس واقنعتو يجي يسوقها هي وعيالها ويريحنا منها واتلفت علي قال لي شوفي هنا انا موضوع فدوى دا بمشي ليكي وبدمدمو في مكانه دا وبغطيهو بس والله ي منى اسمع انك مديتي يدك وسرقتي تاني اتكيكي في الشارع بتاع الله اكبر دا واضبحك قدام كل ناس الحلة ديل وارتاح منك ومن عمايلك وحتي لو بتسرقي بطلي السرقة البتعملي فيها دي وامسكي بيتك وعيالك عديل وعباس دا م عندك طريقه بي يعرس ولا يقعد عليكي بنفسك وعيالك ومن يوم الليله م تطيري تجي البيت دا إلا كان يحصل البدخل الناس تجي تدخلي زيك زيهم واحد وتطلعي تطيري طيري جهزي حاجاتك راجلك زمنو جاي ولو مرة اسمع أنك فتحتي موضوع فدوى دا تاني
من الزعل قلتا مالي ومالو ان شاء الله تخونو وتعمل العايزه مش انا عملتا العلي وفتحت لي عينه وهو م داير يصدق يبقي براحته وبعدين هنا عذاب وهناك عذاب وعذاب عباس افضل من أمور سليمان دي مالي ومالهم ان شاء الله يحرقو هم الإتنين جهزت حاجاتي وردمتهم في قدام الباب من عباس جا شلتهم رفعتهم بيدي وركبت عيالي وركبت وانتظرته لحدي م طلع وطول الطريق م فك خشمه معاي لحدي م وصلنا البيت ودخلنا بس أشوف.......
يتبع
