عباس م اتكلم معاي ولا كلمة لحدي م وصلنا البيت بس اجي داخله اشوف ليك نص بنات الحلة شغلات في البيت بقيت متحيرة ديل جابهم هنا شنو وعايزين شنو وليه بنضفو الحاجه العايزه تحصل شنو تخليهم يجو وينضفو كتار كدا، ،،،عاينت لي عباس قلتا لي القصة شنو؟
قال لي انتي شايفه شنو؟
قلتا لي اي نعم شايفه بنات بنضفو بس م عارفه بنضفو لي شنو لو البيت وسخ في اليوم ولا اليومين الكنت فيهم مافي ديل كان تنتظرني لحدي م اجي وانا بنضفو متعب بنات الناس ساي لي شنو ؟
قال لي انا م جبتهم سيدة هي الرسلتهم عشان ينضفو ليها بيتها لانو العرس خلاص
انا كلمة العرس خلاص دي بقت تتردد لي العرس خلاص العرس خلاص قلتا لي يعني اتفقت مع ود عم سيدة لي العرس؟
قال لي بطلي أسئلة كتيرة وطيري ادخلي وقبل م تدخلي عايزك تعرفي حاجه واحدة انا رجعتك تاني مع انو كنت حالف عشان خاطر سليمان اخوكي لانو حسسني انك مسئولة مني لكن والله لو فكرتي تسرقيني تاني لا بعرف سليمان لا عيسي تحترمي نفسك وتقعدي مع عيالك كافية خيرك شرك وخليني اعيش بسلام ويدك دي لميها عليك وم تسرق حاجه حقتي عشان م تنقطع مفهوم؟
قلتا لي مع انو حاولت كتير عشان م تعرس وانت لسة مصر وداير تتم عرسك خلاص مبروك ي زول وان شاء الله تتهني وانا كدا كدا قاعدة في بيتي وكافية خيري شري انت بس م تقصر من أولادك وانا هينة
عباس :_ انا ياتي يوم قصرت في حقك من حقوقهم ولا دايرة تعملي ليكي موضوع كمان
منى:_ م دايرة اعمل اي موضوع جديد وانا زاتي عيال منك م دايراهم عشان م اذيدهم واعذبهم ساي بس عيالي الإتنين ديل دايراك م تنقص ليهم حاجه لحدي م يكبرو والزمن داك ربنا بفرجها وبعرف لي وجهة وبعرف رأسي من رجليني
عباس:_ ههههه وهو الداير يجيب منك عيال تاني منو انتي رجعتي البيت دا عشان تخدمي عيالك الاتنين ديل وتكبريهم عشان كدا خليكي مشغولة بيهم وم تدخلي في أموري مع سيدة
منى:_ اشبعو ببعض اديني المفتاح بتاع العوضة ماشة ادخل حاجاتي وارتاح ولما ديل ينتهو خليهم يمشوا !!!!
عباس:_ ههههه اديكي مفتاح شنو ؟
منى :_ بسم الله مالك ي عباس كلامي دا م واضح داير لي قومة وقعدة كمان
عباس :_ العوضة دي بقت حقت سيدة خلاص انتي شايفة الراكوبة ديك انا عملتا ليكي ليها مشمع عشان تقعدي فيها انتي وعيالك صيف علي خريف
منى :_ بس دا كان المطبخ انا بقعد فيهو كيف وبعدين انت م تبني ليها عوضة تطلعني من حقتي لي؟
عباس :_ ي زولة العرس جا سريع وم لحقت ابني حاجه والطين في بلدنا دي داير لي سته شهر حدين ينتم وانا م عندي صبر لي الزمن داك هسي خليها تقعد هنا لحدي م ابني ليها
منى :_ بس وعدتي وحاجاتي ودولابي اوديهم وين ؟
عباس :_ هههه م تخافي هي التقول عدة عديلة زي عدة العوين المهم انا كبرت الراكوبة ودخلتهم ليكي فيها الدولاب علي إتجاه وسرير واحد ليكي انتي وعيالك علي إتجاه واتجاه فيهو عدة الأكل عشان تاكلو معاكم بالمرة هناك
منى:_ انت جادي ي عباس كل ديل في مكان واحد انت عيالك ديل لقيهم في الشارع لمن بتتصرف معاهم كدة وكل دا عشان مرة
عباس :_ عيالي كدا م مقصر معاهم مش كفاية لميت ليهم امهم السراقة؟
منى :_ عباس انا م سرقت وانت عارف كدا كويس واكيد بتكون عديت القروش ولقيتهم في مكاناتهم وم ناقصين ولا فلس
عباس:_ والله المهم لو م كان لحقتك كان شلتيهم وكان ح تشلي مرة واتنين وتلاتة وكدا باعتبارك سراقة من الدرجة الأولي
منى :_، الله يسامحك وحسبي الله ونعم الوكيل علي الظالم والمفتري
عباس:_ انتي جنيتي ي ولية بعد م عملتا فيكي خير وجبتك من اخوكي الكارهك وم باقي لي إلا يبوس رجلي عشان اجي اسوقك منو تتحسبني علي احترمي نفسك وكلمة تاني والله حاجاتك ديل من الكارو م تنزليهم وارجعك بدربك
(بصراحة انا خفت لما قال ارجعك بدربك خفت اتشرد انا م مشكلة بس عيالي ذنبهم شنو واصلن لو اموت سليمان م بخليني ادخل البيت داك مع الحربوية حقتو ديك عشان كدا راكوبة في مكان يسترني افضل من اشر نفسي وأولادي في الشوارع )
(سكت ساي وم رديت لي اي كلمة وسقت بسمة من يدها وبرعي أصلا شايلا مشيت علي الراكوبة لقيتو مجدع لي حاجاتي زي التقول مخزن وملابس في الأرض وحال م يعلم بي إلا الله قعدته بكيت كويس من الغلب العلي بس سكته لما سمعت بسمة بتسالني امي مالك بتبكي وبقت تبكي معاي شكلها ي قلب امها بتشيل الهم مع أمها من هسي نضفت ليهم مكانات ختيتهم فيها ولميت ليهم حاجات يلعبوا بيها وبقيت انضف وارفع في الحاجات، ،،،بنات أهل سيدة جو اتابقوني لقوني شغالة وحالي بالبلا بقو يضحكو من رسينهم وفوق وشي مطاعنات وكلام بس وحياتكم عملتهم زيهم وزي الأرض واحد ولما م لقو مني عود نافع سكتو وهم ماشين قالوا لي اجهزي بعد اسبوع سيدة بتجي عشان تسيطر عليكم كلكم وتمشيكم علي كلمتها )
سيدة كانت بتتعرك امها قالت ليها هسي في داعي كان ترسلي بنات اهل ابوكي السحارات ديل كلهم بيتك انتي م عارفاهن م بدورن ليكي الخير ومراضهن عباس م يعرسك؟
سيدة قالت ليها ههههه ي امي عرسي من عباس دا خلاص شبه تم وانا م رسلتهم هناك من فراغ رسلتهم عشان احرق دمهن بالغيرة هن منو فيهن م كانت دايرة عباس وتجاري تحتو بس عاجبني كان مطنشهن، ،،،امها ردت ليها والله غلبتني ي سيدة
سيدة:_ ي امي م تركزي معاي كتير ولا مع البعملو انا عرسي دا برغم من اني مبسوطه دايرة اعرس عباس بس مصممة اكيد كل الناس الكانو واقفين في طريقي وبيني وبينهم تار واحسن حاجه في الموضوع عباس طرد منى من البيت بعد م مسكها بتسرق منو هههههه
فاطنه قالت ليها م تفرحي م بطلقها ليكي ولا ح يطلقها وهو مشارطك علي الحاجه دي من البدايه
سيدة:_ ههههه ومنو القال ليكي انا دايرة يطلقها بس خليها عند اخوها لحدي م افوق ليها
دنيا جات داخله وبدون مقدمات قالت ليها واي ي سيدة عباس رجع منى من بيت اخوها.....
يتبع
