حجر القلوب (صعيدى)

الفصل الثالث : 3

( فى الصعيد )
كان الطريق خالى امامه مظلم بعض الشئ ، كان فقط ما يضيئه هو ضوء القمر ، لذلك كان يقود بسرعه وعقل متشتت فى طلب رؤيه والدته له ، حتى ظهرت امامه بجوادها من العدم فأسرع بالضغط على الفرامل لتتوقف السياره وبالفعل توقفت لكن بصعوبه بالغه ولم يفصل بين سيارته وبينها سوى بعض الأنشات فصهلل حصانها وارتفع بقدميه الاماميه فتمسكت باللجام بقوه ثم اخذت ترتب على رقبه جوادها حتى هدئ وعاد الى وضعيته ، اخذ ينظر لها من داخله سيارته بشده ، لا يعلم من اين ظهرت ومن هى ، لم يستطع معرفتها لانها كانت ترتدى عبائه طويله بدون اكمام تغطى كتفيها مغلقه برباط عند الرقبه ذات غطاء رأس كبير يغطى كامل وجهها ماعدا شفتيها الحمراء ونصف وجهها الابيض ، وما أن ترجل خارج سيارته انطلقت بجوادها دون النظر للخلف .
_____________________________
( بيت فاروق وهدان )
شمس : لساتك صاحى يا جدى .

فاروق : لا نعست شويه .

شمس بخبث : يا جدى !! انا عرفاك زين ميجيلكش نوم غير وكل واحده منينا فى سريرها .

فاروق : ولما انتى عارفه كدا يا تاعبه حالى رجعه متأخر وقلقا قلبى عليكى ليه .

شمس : اولا كنت عايزه ابقى لوحدى وانسى الكلام الى سمعته ، ثانيا حسيت ان سلطان بجى بطيئ هبابه جولت اشوف سرعته .

فاروق : اشك انك عرفتى تنسى يا شمس ، دنتى كل مشاكلك انك مجدراش تنسى .

شمس : جدى !! ملهوش لزمه الحديت ده دلوقتى ، يلا عشان تطلع تنام .

فاروق : انام ايه ، الفجر خلاص على اذان لازم اروح الجامع ، اطلعى نامى انتى عشان تعرفى تروحى شغلك الصبح .

شمس : لا هقرأ قرءان عما الفجر يأذن بعدين انام .

فاروق : ماشى يا حبيبتى ، فى رعايه الله .

شمس : دير بالك عاحالك .
_____________________________
( بيت عيله الزناتى )
عاصم : نعععععععععم ، مين ده الى يتجوز .

عثمان : جرا ايه يا عاصم اهدى شويه خلينا نتكلم بالعقل .

عاصم بغضب : عقل ايه انت خليتو فيها عقل ، جواز مش هتجوز انا بنت تاجر السلاح دى انتو نسيتو هو عمل ايه .

روايح : الى فات خلصوه الكبار يا ولدى وعدى عليه سنين وخلص عنده الحكى ، وكمان مش اما هى توافج عليك الاول .

عاصم : انتو كمان مخدتوش رأيها وكمان مين دى الى متوافقش دنا عاصم الزناتى الى البنات كلها تستنى بس اشاره منه  .

روايح : بلاش عجرفه فارغه ياولدى خلاص انا جولت هتتجوز شمس يعنى هتتجوزها ، عقل اخوك يا كبير .

عاصم : هو بالعافيه انا اول مره اشوف راجل يتجبر على جوازه ، الكلام ده للحريم مش ليا .

روايح : يا ولدى انت زين الرجال وهى زينه الصبايا انا مش جيبالك حاجه عفشه وكمان اتجوزها الاربع شهور دول وبعد كدا طلقها .