الحلقة 6
قامت الصباح فطرت مع خالتها وراجل خالتها و بعد خرجت هي و الهام هزتها خذاتلها برشا دبش شيختها.. بعد هزتها ڨدتلها شعرها .. ظهر زينها لي كان مخبي ورى التعب و الحزن و قلة اهتمامها بمظهرها..
مشاو للرستو عالبحر هبطو فطور و قعدو يحكيو..
-من ليوم نحبك تهتم كان بقرايتك و كهو نشاء الله من غدوة نريڨلو لوراق و نقيدك في ليسب بريفي نحبك تجيبلنا الباك ع اول عام تفاهمنا
- نشاء الله
-اعطيني نومرو بوك توا
تفجعت ميرال و وجها حمار
-علاااه!!
-بوك لازم يعرف لي انت عندي
-لاااا امان.. والله ميجي يهزني عيشك خالتي منحبش نرجع غادي والله تعبت والله نعرفو موش بش يسيبني
-ميرال نوعدك مستحيل ينجم يمسك وكان حاول يعمل اي حاجة نشكي بيه .. اوثق فيااا ..و توا بش تمشي معايا لبلاصة بش نقابلو شكون لازمك تشوفو ويشوفك
بقات ميرال تخزرلها مستغربة كملت فطورها ومشاو..
وصلت قدام ڤيلا كبيرة حللها العساس الباب ودخلت ..
-خالتي لوين جبتني .. دار شكون هذي
سكتت الهام مجاوبتهاش وهبطت مالكرهبة .. هبطت ميرال في جرتها وبقات تخزر واقفة متحركتش
-ميرال عزيزتي هات ايدك .. بش نقابلو شكون و نروحو شبيك خايفة ..
دخلو حلتلهم الخدامة الباب بقاو في الصالة يستناو لين هبطلهم راجل كبير شاد عكازو .. رغملي كبير في العمر اما عندو وقار و هيبة طاغية قامتلو الهام و وقفت ميرال في جرتها.. باستو من ايدو قعدتو وقعدت بحذاه .. ميرال بقات واقفة لعرفت تقعد ولا تسلم عليه ولا شتعمل بالضبط..
-بابا شحوالك ..
-جمعة كاملة مجيتش طل عليا لا انت ولا اختك توا جاية تسأل شحوالي.. هات شعندك و برا ع روحك
سكتت الهام تنهدت بعد شدتو من ايدو
-يا بابا تعرف قلبي معاك اما راني كنت مسافرة.. و مهدي قبل ميمشي يخدم يتعدالك و يكلمني يطمني عليك كل يوم .. باهي علاش متجيش تبقى عندي علاش راسك كاسح
....
-الهام!!!!
-باهب بابا موش موضوعنا توا.. ليوم جيت و جبتلك معايا شكون بش يراك و تراه ..
تلفتت لميرال
-ميرال ايجا سلم ع جدك بو امك..
سي محمد لحظتها هز راسو وبقى يخزرلها ماللول منتبهلهاش جملة .. قعد يثبت فيها وجهو لبيض ولا احمر تكبس بلع ريقو و خزر لبنتو ع جنب خزرة مادل ع خير
-اي يا بابا هذي حفيدتك لي متعرفهاش.. حفيدتك بنت امينة بنتكككك ..
ميرال ايجا سلم ع جدك قتلك
قربت ميرال طبست باستو وهو كان جامد مخزرلهاش حتى فوجها .. حست روحها في وضع خايب هذا جدها بو امها لي اول مرة تراه حستو بارد.. جامد.. مفرحش حتى كيف شافها .. دخلت بعضها وجها حمار مشات طول خرجت وبقات تستنى في خالتها البرة
سي محمد لحظتها ولا يرعش كان يتنفس بالسيف بقات الهام تخزرلو بعد نطقت
-ليوووم جا النهار لي بش تفسرلي و توضحلي كل شي .. علاش حرمنتا من اختي السنين هذي الكلّ.. شنوا لي عملتو بش تكرهها و طردها ..
-سكر فمك شكونك انت بش تحاسبني شنعمل.. تعرفني منحبش نسمع اسمها علاش تجيبلي في بنتها .. من ليوم معاش نحب نرى منظرك في داري انت زادة
-والله مفهمت صعبك وجبروتك هذا الكل علاش وين بش يوصلك.. رانا صغارك علاش الغطرسة هذي الكل
قام وخلاها
-متحبش تراها وتعطيها من حنيتك .. دونك تعطيها حقها وحق امها من واجبك تعوضلها ايامات الحرمان والعذاب لي عاشتهم في جرتك.. بابا اقف نحكي معاك
زاد قوى في مشيتو وهو يتعكز طلع في لاسونسور دخل لبيتو شرب دواه وقعد يرعش..
الهام خرجت تهز في روحها هزان تلقى ميرال تستنى فيها في الكرهبة ومهبطة راسها
قربتها ليها وعنقتها بعد ميرال جبدت روحها وخزرتلها
-خالتي فهمني شنوا لي صاير علاش ماللي انا صغيرة منعرفكمش لا انتم تجونا لا احنا نجوكم امي عمرها محكاتلي على بوها تحكيلي كان عليك انت وساعات مهدي ولدك كيف كان صغير.. علاش كيف بوها لباس عليه هكا هي بقات تاعبة ملقاتش باش داوي روحها في مرضها..
تفلقت الهام بالبكاء
-امك 18 سنة لتالي تعاركت مع بابا مفهمتش هي هربت ولا هو طردها مفهمناش علاش مرة يقلنا تحب حد و هربت معاه مرة يقلنا كسرتلي كلمتي مخلاناش حتى نسألو عليها ولا نفركسو.. انا وخالتك نوال فركسنا عليها لين فقدنا الامل خذاتنا مشاكلنا والصغار ...لين سمعنا بيها ماتت .. وقتها جيت وعرفت لي هي عندها طفلة حبيت نهزك نهارتها معايا اما بوك مخلانيش وعندو الحق اما كان جيت نعرف حقيقتو راني والله ماخليتك ....
