الحلقة 48
تعداااات ليامات .. رجعت ميرال تقرى .. بدات مرحلة جديدة في بلاصة جديدة مع عباد جدد مختلفين انواع و اشكال لكن هي مكانش عندها مشكل كانت تتأقلم فيسع مع اي وضع و دخل روحها و ميصعب عليها شي..
تعدات سوايع.. ايامات .. شهور.. كانت تقرى .. مهدي كالعادة يخدم ولا مسافر و لا يحوس .. منى زادة كانت تقرى فاكيلتي كانت اكبر من ميرال بعامين .. ريان مرة يقرى و مرة فاصع يتهومل اذاكا ديما معلبالو بحد و ملاهي بيه حد مسيكن ..
علاقة مهدي و ميرال متبدلتش بالعكس زادت قوات اكثر و اكثر .. كانو كل شي يعملوه مع بعضهم يفطرو يتفرجو يخرجو يسهرو يقضيو يحوسو و كل نهار سبت يبقاو عالبحر يحكيو اذاكا نهار مقدس لازم منو.. و بطبيعة عركهم و مشاكلهم ماشية وتزيد اذيكة حاجة متتنحاش ..
الناس الكل يعرفو قداشهم قراب لبعضهم حتى من سارة كانت تحس فيها اقرب منها للمهدي و مكثر عركها معاه ولى عليها ..
مهدي يحس في روحو ياسر ولى متعلق بيهامينجمش تتعدي ساعة و ميكلمهاش ويشوفها شتعمل حتى كيف يبدى متفاضي وهي تبدى في الدار يكلمها ابال فيديو ويبقاو يحكيو ولا يتعاركو المفيد يراها .. حاجات موصلش عملهم حتى مع سارة ..
نهار خرج مالخدمة و مشى هز سارة بش يمشيو يفطرو و كلمتو ميرال في الثنية
-مهدي كان كملت الخدمة تجي تروح بيا ملقيتش تاكسيات عندي نص ساعة
-موش نورمالمون تكمل بعد الساعة هذي
-اي اما البروفة مجاتش
-فاش قام تفركس ع تاكسي مالا ماو ماللي تخرج تكلمني
-تي ماو محبيتش نقلقك نعرفك تبدى تخدم الوقت هذا
-باهي هاني جايك توا دريجين و نكون عندك
دور الكرهبة و رجع..
-ياخي موش بش نفطرو مهدي توا
-اي بش نهز ميرال ونمشيو نفطرو مع بعضنا و نروح انا وياها مرة وحدة نبقاش ماشي جاي نهار كامل
قلبت وجها و تأففت هي موش حاملتها و تزيد تفطر معاهم --
-شوف كان بش تقلب وجهك موش لازم منها تو نروح بيك توترليش عصابي شيفدد فيك .. مفهمتش شنوا مشكلت معاها الطفلة
-مشكلتي معاها انت .. ماكش تشوف في روحك ياسر راك ياسر عاطيها قيمة و قدر! مقراتش تاخذ تاكسي و تروح فاش قام تكلم فيك وانت لي تقلك عليه تقلها الله يبارك .. موش معندك متعمل بش تبقى تهز فيها و تجيب..
-انا منبه عليها بش كيف متقراش ولا تخرج بكري تكلمني و متخذش تاكسيات .. انت شحرق شعيرك انا لي نهز و نجيب انت شنوا لي مقلقك قاعدة تسوق في بلاصتي !!!
-باهي مهدي باهي
-و متنساش لي تحكي عليها راي بنت خالتي دمي و لحمي موش نعطي قيمة و قدر للبراني و هي لا
-شقصدككك؟؟!!
-مقصدي شي تنجم تبدل الموضوع توا
-هه ولا قول باز ماكش تقصد فيا بطبيعتك ماكش عاطيني لا قيمة ولا قدر
-بربي!!
-هذاكا اللي صاير مهدي راجع روحك شوية خاطر ساعات نحسك متحبنيش عاملني مجرد صورة قدام لعباد .. متتصورش قداكش تبدلت معايا ماللي ظهرت في حياتنا
خذا فران قوي و ضرب الفولون بغش سارة ترعبت من ردت فعلو
قعد حابس بعد خذا نفس قوي حاول يهدى و يحكي بشوية تلفتلها
-شوف ممكن انت لكلام والتصرفات لي تعمل فيها هذي الكل بسبب غيرة و غيرة معندها حتى مبرر اما ميسالش نعذرك و بش نحسب مسمعت منك شي اما نحبك تعرف انو انا كان مجيتش نحبك و كان مجيتش انت تعنيلي حاجة راك ماكش معايا توا في الكرهبة .. عيشك نحي لحكايات الفارغة من مخك حاول ترجع سارة متع قبل سارة لي عرفتها اول مرة لي نبدى شايخ كيف نبدى معاها لي الضحكة ديما ع وجها ديما عاملة جو و متركزش مع الحكايات الفارغة سارة لي ضاربتو فروحها و مينجم حد يوجعها ولا يغلبها ولا يزعزعلها غرورها وثيقتها بروحها ..
سكت تنهد و خدم الكرهبة و هي هبطت راسها و بقات تخمم في كلامو حست روحها برسمي تبدلت ع قبل ممكن حبها ليه لي ماشي ويزيد السبب..
تعدى للميرال يلقاها واقفة في الظل متكية عالحيط و حاطة الكيت تستنى فيه كانت شادة شعرها لفوق عاملة في وجها فون و شوية ماسكرا و حاجة خفيفة و مات في فمها كانت ياسر كلاس حتى في لبستها.. كيف شافتو طلعت تجري سلمت ع سارة و ماللي طلعت و هي تحكي و تضحك مسكتتش
-بعد لقات قهوة متع مهدي هزتها هي جات بش تشرب و مهدي فكهالها
-نحي من يدك
سارة ضحكت و تلفتتلها
-ههه باين فيك متعرش لي مهدي ميحبش شكون يشربلو من كاسو
خزرلها مهدي و ضحك "هههه فهمتني بالغالط منحبهاش تفسد فطورها "
-و تفلقت ميرال بالضحك منتالي
-وانت باين فيك متعرش يا سارة لي انا و مهدي ناكلو ساعات فرد صحن و نشربو قهوتنا فرد كاس و ناكلو بنفس لمغرفة .. هي مزالت بش تزيد تحكي و مهدي تلفتلها ڨحرلها و برق فيها عينو بش تسكت و هي قلبت وجها كان تلقى تزيد تغزلها اكثر بش تعرف شتحكي معاها ...
مهدي قعد يسوق ويتمتم وحدو محبش حتى يخزر للسارة "لتربحك يا ميرال لازم تكعبرها في كل مرة متشدش فمك لازم ترجع فازتك يعني! والله منحيهالك هالصنعة"
سارة بقات تغزل تحس في معدتها وجعتها بالعمل .. بقات ثنية كاملة قالبة وجها
