الحلقة 10
يا ربي فينك يا عمر كيفاش بش نطلعك و انا منعرش فين تقرى ..كيفاه نوصلك يا ربي عاوني راني تعبت.. بقات تخمم فيه قداش توحشتو و توحشت صوتو .. عندها ثلاث شهور مشافتوش ماللي فاق بوها بحكايتهم ولات تسمع في خبارو من بعيد و هو زادة .. متعرش وينو و شعمل من بعدها شنوا صار فيه كيف سمع لي هي بش يعرسولها و انها هربت .. كانت متشوقة تراااه و تترمى فحضنو و تشكيلو همها وتفرغلو قلبها كيما قبل .. هو كانلها الدافع لي خليها تعيش و تغامر و تضحي و تصبر .. هو الانسان الوحيد لي حبها و حسسها بالاهتمام من بعد امها.. معوضلها امها و بوها و الخو لي مجابتوش امها.. مكان عندها ثيقة في حد كان فيه هو ...
قعدت دور في الدار لين شافت باب مردود متع بيت عمرها مدخلتها طلت بشوية تلقى سي يوسف قاعد يخدم
-مييرال ادخل بنتي حاشتك بحاجة
دزت الباب و دخلت و هي حالة فمها
-وااااااو لكتب هذم الكل متاعككككك!!!
-هه اي شنوا باين فيك تحب المطالعة
-اي عاللخر و ديما نقرى كنت في المكتبة لي طانت بحذانا قداش توحشتها و توحشت كل تركينة فيها... صحة لييييك عندك عالم خاص بيك هكاا
-شخص كان جاو لي في دار يفهمو كيفك ميعرفوش قيمت لكتب لنهار شفت واحد من ولادي شاد كتاب
قعدت دور و تتفرج و تشوف في الكتب
-عندك الحق كل يوم تجي تهز كتاب اما تحاسبني بيه قاريتو لكل و نتناقشو فيه شرايييكك
-يااااا بالرسمي نجم نهز نقرى هههههه عيشككككك تي نحاسبك بيه حافظتو كان لزم
-ههههههه ايا خوذ راحتك و اختار لكتاب لي يعجبك مالا
...
خرجت و هي هازة كتاب في ايدها و قطوستها تبع فيها تربعت في الجردة و غطست تقرى ..
روح مهدي كيف شافها حاول ميعملش حس و مشالها وقف وراهاىشافها شتعمل وبعد فجعها صيفت فجعة خلاها تتبربص في بلاصتها .. قامتلو و طاحت تضرب فيه و تصيح و تعيط و هو واقف يخزرلها متحركتلو حتى شعرة
-احشم و هبط ايدك
قعدت دز فيه و تضرب فيه ع صدرو في لحظة كان قلبها بش ياقف في جرتو.. حسها مهيش ناوية تحبس كان تلقى تقتلو اما هذاكا الجهيد خزر للبيسين لي وراها و خزرلها و ملقااااات روحها كان مرمية فيه.. اي اي في عز الشتاء هزها و رماها فيه بدبشها لكن موش غادي المشكلة المشكلة انها متعرش تعوم وللاسف البيسين متعلهم كان غارق زادة -- هبطت كالدبوزة مسكينة بقات مرة تطلع و تهبط و تتبربص بيدها تحب تعيطلو منجمتش تحب توصل للحافة بش تشد فيها و منجمتش زادة
قعد شايخ ضحك
كان يسخايلها تمثل متعرش تعوم بش تخليه يهبطلها
كيف كثرتلها بدى يصيح
-اخرج عاد و يزي بلا مصاطة
ميييرااال نكلم فيك راو
تي تو يتسكرلك النفس يا هم اطلع
شي لا حياة لمن تنادي .. لحظتها وين استوعب لي هي متعرش تعوم.. طول تبلنجا بدبشو حس باللي حست بيه الماء كان بارد و الطقس بارد حتى الشمس مفماس .. جبدهاا خرجها كانت تتبربص تحب ترد النفس منجمتش وجها حمار عاللخر رماها عالچازون و مالربثة كيف شافها في الحالة هذيكة قعد يخضخض فيها و يضرب فيها ع وجها زاد كمل عليها محست بروحها كان دزتو و قامت تكح دخل و تخرج في النفس بالسيف حست روحها عندها شهر متنفستش بقات تلهث و تجبد في النفس بكل جهدها..كيف حست روحها خير و هدات شوية خزرتلو و ترشقت بالبكاء ع طول صوتها
-يزي عيشك والله لا فيبالي لي انت متعرش تعوم
زادت تفلقت اكثر بالبكااااء قعد يخزرلها هو بيدووكان يلهث خاف لتصيرلها حاجة في جرت لعبو بقى واقف شافها كيفاه ترعش مالبرد و الخوف و الفجعة
هزها و دخل بيها يجري حطها في البانو و طول حل الماء السخون بش متمرضش.. زاد كمل عليهااا بالماء السخون شوشطها قامت تصيح و تفكلو الماء و دورو ليه هو و تبقى طش فيه بالماء السخون في وجهو حبت تشوشطو كيما شوشطها غمض عينو تحمل شوية قرب منها
و يجبدها من شعرها و يخنقها و يبقى الماء يضرب في الصقف
-نرمااال انت تحب نغفصكككككك توا ..ماكش ناوية تريض
-سيبنيييي والله منوريييك والله منشكي بيك حبيت تقتلني و زيد تعذب فيا بالماء السخون
-سكر فمكككك
-منيش مسكرةةةةةة والله متشوف
حطلها ايدو و سكرلها فمها خاطر شوي اخر و بش تلم الجيران عملتلو شوهة ماي فالحة عاد هي .. هوما هكاكة و تدخل عليهم الهام مفجوعة تزيد تخلط نجلة و يخلط سي يوسف و يشهقو الكل مصدومين
-شفمااااا شتعمل!!
مهدي سيبها حط ايدو ع شعرو و دخل بعضو و بقاو لثنين يخزرولهم ساكتين يلهثو و يرعشو ويقطرو بالماء من راسهم لساسهم و السال دوبان كلها مبلولة..
-مفم شي جيت نفدلك معاها خلاتها الدنيا
-هكا لعباد تفدلككك بش تقتلها و تقلي تفدلك
-وانطلقت عاد ميرااال تتشكى و تتبكى حكاتلهم كل شي مع شوية بهارات زايدين و كعبرتهالو اكلي بالضبط.. ڨحرلها و خرج مشى بدل دبشو بعد خلطت عليه امو لقاتو ينشف فشعرو
-مهدي شنوا لي عملتو هذا جاب ربي وعدتني
-امي والله جيت نفدلك معاها و برا وين نعرف لي هي متعرش تعوم و خفت لتمرض دخلتها و صبيت عليها ماء سخون خاطر ريتها ترعش ..
-ربي يهديك والله تعرف كان تمرض مناكلك بسنيا
-هههه امان امي ولدك راني بش تاكلني ع خاطرها
-ابعد من خليقتي توا..وترتني من وقتاش انت تلعب في اللعب هذا
-ههه شوي تفوريخ خلي الواحد يبدل الجو
