الحلقة 17
تكي مهدي هالكرهبة و قعد يحكي في التلفون وهي بقات تريچل في روحها و تفركس بعينها و قلبها يدق .. و بعد انتظار طويل شافتو جاي من بعيد هو و چروب كان يحكي و يضحك كيما عادتو حست بضربة في قلبها
و وجها حمار مهيش مصدقة انو عمر قدامها و قاعدة تشوف فيه.. بلحمو بدمو بمشيتو بضحكتو حلت الباب هبطت تجري و خلتو محلول .. بقات تجري لين وقفت قدامو بشوية و حبست تخزرلو و تلهث حبت تتأكد لي قدامها عمر بالرسمي ولا تحلم .. اول مشافها تصدم اخر حاجة كان متوقع يشوفها قدامو قعد يثبت موش مصدق بحكم تبدلت فيها برشا حجات خاصة لوك شعرها و ستيل لبستها .. هو مزال مستوعبش و هي تترمى في حضنوو و تعنقو بكل قوتهاااااا .. مهدي لحظتها نسى التلفون قعد حابس يخزرلها من بعيد بعد تبسم كيف شافها عنقتو و قعد يتمتم "شو بنت لحرام معاش تحشم والله منحاسبها عليها ..
بعدت شوية و بقاو يخزرو لبعضهم
-ميرال شتعمل هوني
-فركست عليك ولقيتك عمر زح وينك وين كنت متتصورش قداه تعبت من غيرك ..
-عمر شكوني ؟؟؟!!
كانت طفلة حاطة الحطة و واقفة بحذا عمر و مصدومة مالموقف لي صار
تلفتلها عمر مربوث
-ااا قريبتي نسكنو فرد بلاصة .. براو ادخلو واطلبولي معاكم هاني خالط
جبد ميرال من ايدها و بعد بيها شوية هي بقات مصدومة من ايجابتو
-شنوا قريبتي و نسكنو فرد بلاصة صار هذا شوليت نعنيلك
-ميرال افهمني م...
-شبش نفهم !
- قاعدين يخزرولنا من غير متصيح و تعمل الفضايح .. و كان انت تعبت حتى انا تعبت زادة في جرتك شهور وانا عامل المستحيل بش نوصلك ضيعت خدمتي و قرايتي و قعدت غادي نتعارك مع لي يسوى واللي ميسواش وفي لخر سي بوك مخلا معمل فيا و في عايلتي .. بعد سيادتك هربت الله اعلم وين مشيت كنت تنجم تجيني انا اول واحد و لا تبعثلي مع شكون انت فين .. غبرت و جاية توا تقلي تعبت من غيرك و واخيرا لقيتك
-عمر فاش قاعد تحكي انا اول مهربت مالدار مكنتش عارفة فين ماشية من اصلو مكنتش نجم نجيك خفت لحد يشوفني واول مريڨلت اوموري قعدت نفركس عليك من بلاصة لبلاصة كلمت اختك علقت عليا و تلفوناتك مسكرين .. شبيك تلوم فيا ع حاجة معندي فيها حتى ذمب
-باهي مدام ريڨلت اومورك ديجا هاو باين عليك شنوا تحب مني
-ياخي شبيك بش تهبلني تي انا عملت هذا الكل ع خاطرك هربت تذليت كل يوم وانا مطيشة في الفاك متاعك نفركس عليك 4شهور كاملين وانا بش نهبل من غيرك نستى وقتاش نراك و نرجعو كيما قبل و انت جاي توا تقلي شتحب مني ! عمرررر فييييق شبيكككك
-يزي بلا صياح ..ميرال انت عمرك معملت حاجة ع خاطر حد ديما تخمم في مصلحتك الف مرة نقلك ايجا معايا تقلي لا و قرايتي و شبش يقولو لعباد توا ركبلك بش تهرب و تعمل هذا الكل ع خاطري .. فات الفوت .. يزي ما تعبت و ضحيت معاك معادش نحب مشاكل و تكسير راس انا مصدقت خرجتك من مخي و نسيتك .. و توا حابب نخمم كان في روحي شوية.. نبني مستقبلي و نحقق احلامي كيما تقول انت ..
-بش نحسب روحي مسمعت شي .. اما نأكدلك انو معاش بش يكون فما مشاكل حياتي تبدلت والله معاش فما حتى خوف من حد بش نكون قريبة منك وليت نسكن هوني عند خالتي عمر م....
-ميراال يزي لي بيناتنا وفى عندو اشهرة..شبيك متحبش تفهم ياخي ..
مهدي كان في الكرهبة مركز معاهم ويستنى فيها قعدو برشا يحكييو لين شافها قامت تضرب فيه ع صدرو ودز فيه و تصيح .. عمر شدلها ايدها درى اش قلها و دفرها وقام يصيح هو زادة قلها برشا كلام يوجع قلها لي هو معاش يحبها و معاش عينو بيها قلها بش تبعدو و تخليه يعيش حياتو
-مالصدمة طاحت في القاعة وتفلقت بالبكاء ع طول صوتها الناس الكل بقاو يخزرولهم ..
كانت تبكي و تسب فيه و تتحصر عالايامات لي عداتهم تبكي عليه
مهدي كيف شافها هكاكة هبط مالكرهبة و مشالها يجري ساقو اعلى من راسو .. طول جبدها من ايدها بقوة و قومها قعد شادها و تلفت للعمر عرف انو وجعها وخذلها شدو من رقبتو بزق عليه و دفرو "منيش مسيبك هاني راجعلك"..هز ميرال و مشى .. . عمر قعد واقف في بلاصتو موش فاهم شي راجل مذخم جاء في لحظة هزها و مشى ! شكونو منين تعرفو و منين يعرفها كيفاش و صلت لغادي كيفاش ولات هكاكة و كيفاش للتوا منساتوش.. برشا اسئلة بقات دور في مخو
