الحلقة 45
هبطت تجري حلت باب الكرهبة و طلعت
بقات تخزرلو ساكتة و تتبسم تستنى فيه بش يقول حاجة لكنو قعد يچحرلها و مقال حتى كلمة..
ملقات متحكي و ملقات متقول مفهمت شي معرفتش مغشش موش مغشش!! نسى لي صار !! منساش!! .. بلعت ريقها و دورت وجها للشباك .. و هو خدم الكرهبة و طار
مجابش من ثنية الدار جاب ثنية اخرى..
تلفتتلو مستغربة
-موش مروحين ياخي
قعد يسوق مطفيها مجاوبهاش لين وصل بحذا لبحر نفس بلاصة العادة .. حبس الكرهبة و تلفتلها
-ليوم شنوا !
-سبت
-واحنا شنوا مستانسين نعملو بالسبت
-ههه نجيو للهوني
-اهبط مالا و متكسرليش راسي
شاخت ضحك هبط هو و هي خلطت وراه وشدتو من وذنو
-ياخي موش كنت مغشش وقالب وجهك و متحبش تحكي معايا تلعب بيا ولا شنوا
- تعرفني نتغشش عليك تي مناخذش عليك من اصلو
- خاطرك تعرف انت شنوا بالنسبة ليا واللي لكلام هذاكة فورت غش معرفتكش علاش هزيت خشمك للدرجة هذيكة زح خليتني نخطط و نكمبس كيفاش بش نرضيك الهم هذا تعرفني منحملش نبقى نحكيش معاك نكلب!!--'.. ع شكون بش نتموصت ع شكون بش ندلل مع شكون بش نتعارك .. شكون بش يفددني ويطلعلي الدم غيرك --'
-نعرف ماكش قاصدة اما عملت هكاكة حبيت نربيك بش تعرف شتحكي و المرة الجاية كيف نقلك حاجة تسكر فمك متناقشنيش خاطر انا الوحيد لي عندي الحق ندخل فيك و نتحكم فيك و نخاف عليك و نعمل كل شي
بقات تخزرلو رغملي معجبهاش كلامو اما سكتت و هبطت راسها و بقات تمشي لين وصلت للشط
جبدها ليه و عنقها
-نفدلك عليك صغرونتي تعرفني نشيخ كي نستفزك
-مخيبك كيف تتغشش و تتقلب عالعبد تولي حد اخر مبرد دمك جاب ربي جيت صغرونتك كيما تقول انت
قعد ساكت مجاوبهاش..
قعدو ع الشط بعد جبد من جيبو زوز سلاسل كل وحدة فيها حرف M .. بقات ميرال تخزرلهم جبدتهم من يدو وبقات تقلب فيهم
-يااااا مهدي زح محلاهم هاذم الزوز ليا انا ههه عيشك والله موش نرمال اما كارك مخذيتهمليش كيف كيف اما موش مشكل ههه .. قربت منو باستو و رجعت تشوف فيهم
-دين والديك ديما تتنطر عالحاجة كالبوهالية ماكش بش تنحيها هالصنعة
-...! هزت حاجبها وبقات تخزرلو مستغربة
- زيد بحلق اكا لعوينات مليح مغلبتني كان بيهم ..
جبد من يدها وحدة و خزرلها
-وحدة ليك و وحدة ليا وحدة فيها حرف اسمك و وحدة فيها حرف اسمي وحدة بش تبقى عندك و وحدة بش تبقى عندي منعرش علاش اما كيف عجبوني خذيتهم كنت بش نعطيهملك ليلة العركة شوية مكتبش ..
-ههههه صااار .. ماك قول هكا ماللول .. محلاها الفازة .. اما مفهمتش انا قعد عندي حرف اسمي ولا حرف اسمك انت ياخي ههه وضحلي 😂
-انا بيدي منعرش هههه شرايك انت! تحب تلبسها ع اساس حرف اسمي ولا اسمك
-ههههه باز حرف اسمي ماو لباس نلبسلك في حرف اسمك.. غريبة والله
-ههههه باهي دور دور خنلبسهالك .. و جرب ضيعهاااا ماني نعرفك
