الحلقة 26
مهدي كمل فطر و خرج .. مشى للسارة لي عداتها ليلة كاملة مرقدتش مالتخمام و الغزول .. دق الباب اول محلت و شافتو قلبها ولى يدق و تربثت جات بش تسكرو في وجهو و هو دزو و دخل.. مشى قعد و حط ساق ع ساق و قعد يخزرلها .. كانت لابسة نويزات قصيرة و باينة مزالت كيف فاقت مالنوم.. وقفت مقابلتو كتفت ايدها و خزرتلو بتسوميم
-شتحب !!؟
-باين فيك مزلت مفقتش و مالية راسك باللي صار لبارح نمشي ع روحي مالا انا.. هو جاء واقف و هي تقوم تصيح
-مهدي شتحب تعمل ياخي وين تحب توصل
-انت لي وين تحب توصل للا سارة كان معاش عينك بش نكملو مع بعضنا قلي اما تبداش تتسبب ع حكايات فارغة و تكسرلي راسي
-حكايات فارغة هه كل شي عندك حكايات فارغة انت
-شوف سارة هذيكة بنت خالتي ليوم و غدوة و معزتها من معزة اختي لا اكثر لا اقل ..وحتى كان بيني و بينها حاجة موش بش نخاف ولا بش نحشم منك افهمها .. و توا تحب تصدق فبها متحبش ربي معاك ..مدامني منيش غالط في شي موش بش نبقى نبررلك و نتشحت فيك تعرف الريق هذاكا معنديش
بقات ساكتة بعد تفلقت بالبكاء
-مهدي علاه هكا علاه ديما تحسسني اني حاجة ثانوية في حياتك اي مشكلة تخسر عليا كان ربي معاك .. كان جيت قريب مني و تحكيلي كل شي .. راو عمري مخممت هكاكة راو عمري متصدمت كيما تصدمت البارح تجبدلي عليها بطريقة عابرة و برى اما عمرك مقتلي لي هي تعيش معاك لي هي قريبة منك للدرجة كيفاش تحبني نقبلها لحكاية وقتها..
-هههه هاك جيتها بيدك مالا .. تلوم فيا كفاش منحكيلكش هههه علاه وقتاه حسستني انك مهتمة بحياتي الخاصة من اصلو بش نحكيلك ..اصلا شتعرف عليا انت عمركش سٱلتني شقريت ! عمركش سألتني شنحب شنكره كيفاش نخمم شنوا البلايص لي نحبها و البلايص المنحبهاش .. شنوا نحب نعمل في حياتي شنوا لي معملتوش .. تعرف الحاجة لي تفرحني ؟؟ تعرف شنوا لي غششني؟؟ تعرف انا كيفاه نخمم تعرف شنوا اكبر عيوبي هه اكيد متعرش خاطرك تعرفني كان من برى عمرك محاولت تعرفني من قريب.. ماللي نراك لين نروح وانت تحكيلي ع شنوا شريت و وين مشيت و شنوا المارك لي تحبها و السهرية لي تحب تمشيلها تقعد لاهية بالعباد كيفاه يخزرولك و غايرين منك ع شنوا الله اعلم.. كل منقرب منك نزيد نكتشف قداكش مزيانة ..موهرة و مذخمة مرى قوية اما من داخل فارغة تبقبق لاهية كان بالقشورررر... كان يحكي وهي تخزرلو مصدومة حتى لين سكت و هي بقات بوشبي منجمت تقول حتى كلمة اصلا ملقات متجاوب ..
مهدي خلاها و خرج و طربق الباب بقوة طلع في الكرهبة وقعد مصدوم مالكلام لي خرج منو هو بيدو موش فاهم شي حاجات بدى يحس فيها ليامات لخرى و معرفش كيفاش خرجو .. سارة حستو عبد اخر مهدي اول مرة يقلها كلمة تجرحها كان ديما يحسسها انها احلا و اجمل و اروع طفلة عرفها في حياتو .. مكانتش تتوقع انو بش يجي نهار ويقلها لكلام هذاكا حاجات عمرها مخممت فيها ولا جات ع بالها ...
مهدي كل لحظة يعديها مع ميرال تخليه بطريقة غير مباشرة يزيد يراجع حساباتو و علاقتو بسارة .. يحس انو ميرال قريبتلو برشا تعرف عليه برشا حجات حتى نقاط ضعفو .. كانت تفهمو و تعرف كيفاش تاخذو و حتى كيف يتغشش تعرف الطريقة لي تخليه يرضى بيها رغملي في نظرو مزالت صغيرة .. لكن برشا تصرفات و برشا تفكير تمناه لو جا في سارة زادة
