احببت ابن خالتي الجزء الأول
الحلقة 13
لين طاح الليل و هي تمشي و كل مرة تقعد في بلاصة تبكي شوية و تقوم ..
لين لقات روحها بحذا لبحر .. قعدت مقابلتو من بعيد تخزرلو و سارحة ..
مكانتش وحدها غادي مهدي كان قاعد في بالكرهبة من بعيد يخزرلها .. ماللي مشات و هو يتبع فيها ..
لحظتها حس روحو هدى هبط و مشالها قعد بجمبها .. من كثرت التخمام و الوجيعة .. محستش بيه ...
- علاش تمشي للغادي
قامت من سرحتها مفجوعة دارتلو كان اخر واحد تتوقع انها تراه .. بعد لفتت وجها وبقات ساكتة
-منيش مسيبك كان متجاوبني
-فماش علاش بش نجاوبك
-لا بش تجاوبني و بعد تو نمشي ع روحي
خزرتلو بقات ساكتة بعد هزت راسها للسماء و بدات تحكي .. ممكن لحظتها كانت مستحقية انها تفرغ قلبها للحد حتى لو كان مهدي لي ساعتين للتالي مخلا مسمعها ..
-عامين للتالي تعرفت عليه.. بدات بعركة بعد ولات صداقة بعد ولى حب لين ولى كل شي في حياتي.. قول "حياتي" ... كان معوضلي الام . البو . الخو .. الصاحب ... كان مصبرني ع عيشتي .. مصبرني ع كل حاجة خايبة ...
اشهرة لتالي سمع بابا و بطلني مالقراية كيما تعرف .. من وقتها مقابلتوش اما كنا نتواصلو عن طريق اختو لي كانت تجيني بالسرقة .. لين نهار جاء واحد عندو لفلوس و اكيد بويا عطاني من غير ميخمم تي كان بش يطير بالفرحة .. ماللي سمعت صحبتي معاودتش ريتها رغملي كنت مستحقتلها مستحقة نعرف هو شعمل فينو شناوي يعمل كيفاه بش ينقذني ويجي خرجني مالهم هذاكة كيما وعدني .. كنت مستحقة نراه تخنقت كان لازم نراه و منجمتش مخليت معملت لكن شي بويا كان اقوى مني و منو سمعت بيه تعارك مع بابا عركة كبيرة .. لكن مصار شي لقيت روحي كان لابسة روبة ويحظرو فيا بش نكتب صداقي .. صداقي ع انسان منعرفوش صداقي و انا مزلت مفرحتش بعمري و بقرايتي .. مفهمتش كيفاه صار و شنوا صار لقيت روحي قدام بابكم و واقفة قدامك ليلتها...
سكتت شوي خزرتلو و بعد عاودت هزت راسها و رجعت تحكي و مهدي كان مركز معاها عاللخر .. و محبش يقص عليها جملة ..
-لقيت روحي في عالم اخر عايشة عيشة اخرى جو اخر و دنيا اخرى.. الف حاجة تمنيتها جاتني في طبق من ورد .. لقيت حب اخر و لهوة اخرى .. جو متع قراية صحاب جدد كرهبة تهز و كرهبة تجيب نقرى في احسن ليسيات و عند اخسن الاساتذة نلبس اعز لبسة و ناكل اعز ماكلة .. ايدي راسي معاش نهزها.. لكن بقات حاجة ناقصة .. نجمتش نقرى نجمتجش نركز في القراية حاولت نبدى من جديد و حياة جديدة لكن منجمتجش .. منجمتش ننساه اي حاجة تفكرني فيه منجمش نكون فرحانة من غيرو هو الانسان الوحيد لي يفهمني ويشجعني ويدعمني نجمش نعمل شي من غيرو .. مستحقيتلو برشا مستحقية نحكي معاه مستحقية نراااه بررشا حجات نحب نقولهالو و نحب نسمعها منو .. حاسة غصة في قلبي ع قد ماهو قريب مني ع قد ماهو بعيد .. 4 شهور خلات فيهم الدنيا وجلات تقلبت حياتي الف قلبة و هو مفماش ..........
بقات ساكتة تخزر للفراغ لي قدامها.. مهدي كمل سمعها هبط راسو قعد سارح هو زادة يخمم بعد تلفتلها
-حاسب مفهمت انو الشخص هذا يا إما يقرى غادي ولا يخدم غادي .. وانت وين تلقى الفرصة تمشيلو الشخص هذا اكيد لي اسمو عمر متع المرة لي فاتت
عملتلو براسها اي
-شقلك شنوا صار !
- ' ملقيتوووش...' وين نمشي للفاك نبقى نفركس عليه اما منلقاهش ناس لكل حفظت وجوهها كان هو مفماش .. معاش نجم نتحمل معرفتش كيفاه نوصلو .. وين نلقاه وقتاه بش نلقاه بالرسمي تعبت ...
و تشدها البكية تهبط راسها و تسيب دموعها ..
-باهي يزي اكيد بش تلقاه و ترجعو كيما قبل و احسن معندو وين يمشي ... جبد مشوار و مدهالها .. بقات تمسح في دموعها و هو يخزرلها و جها ولى احمر و عينها حمارو.. خلاها لين سكتت و شدها من ايدها و دورها ليه
-ميرااال اول مرة بشج نقول للحد الكلمة هذي بخلاف امي اول مرة نقولها و انا حاسها .. "سامحني", عالليصار قبيلة مفهمتش كيفاه انفعلت هكاكة حسيتك عديتها عليا محملتهاش مكنت نقصد حتى كلمة قلتها كانت فورت غش مشكلتي كيف نتغشش معاد نفهم شي ..و انا موش منفهمش و لى منعرش لبنات عارفك متربية و عاقلة، تصرفاتك حفظتها حفاظة .. نعرفك ع شنوا تمشي و ع شنوا تجي اصلا من اول مرة ريتك فيها قريتك قراية .. شخلاك ع قد متقلل تربيتك معايا و تعلي صوتك و تعملي مشاكل نعديلك خاطر نعرف موش من قلبك تبدى تحكي هكاكة بش تبين قداكش قوية رغم انو مفماش وحدة حساسة و خوافة قدك .. حتى كيف تبدى تكذب عليا منجمش نكلمك .. نسكت رغملي نكره الكذب اما نحسك عندك حاجة و منحبش نحرجك و خليتك ع راحتك ...
لي صار قبيلة هبلني محملتش نراك هكاكة في تاكسيات ماشية لبلايص متعرفهاش و نزيد نكلمك تقلي نقرى .. حاس روحي حكيت برشا ع كل حال سامحني و كهو ..
بقات ساكتة تخزرلو ..
- هيا قوووم خلينا نروحو ...
قام و خزرلها يلقاها متحركتش من بلاصتها
-هيا قوم ظلامت الدنيا و خالتك خلاتها بالتلفونات
-منجمش نرجع مهدي حتى لو كان طلبت السماح كلامك منجمش ننساه برى ع روحك
-ماللي عرفتك اكثر من شهرين توا واحنا نتعاركو منخلي منقلك و متخلي متقلي و ننساو و توا بش تنسى خاطر انت تعرف انو لكلام لي قلتو فورت غش و منيش قاصدو دونك قوم و تحرك قدامي و يزي بلا دراما هالليلة الكلبة
جبدها و قعد يكركر فيها من ايدها ..مرة يزرقهالها و مرة يفصعهالها حاسة انو نهار بش يجبدها جبدها ينحيهالها و يرتاح--
