الحلقة 28
ليلتها مرقدش مالتخمام قعد يسترجع في كلامو للسارة قعد يتفكر في دموعها سعات يحس انو غلط و ساعات يحس انو لي عملو موش غالط بالعكس هذاكا لي كان لازم يصير..
تعداو قريب جمعتين لا هو طلب ولا هي طلبت محاولش يتصل بيها ولا يقابلها مكان عندو ميقول و هي زادة مكانتش مستعدة تواجهو .. كانت موجوعة منو برشا وفي نفس الوقت حاسة روحها غلطت وقصرت معاه كلامو لحظتها حسسها قداش هي ناقصة في برشا حاجات حسسها بالرسمي انها انسانة فاشلة رغم غرورها.. من بعد لي صار مخرجتش مالدار كانت كل يوم تبكي ولا راقدة ولا تتفرج في تصاور مهدي و تتفكر في كل لحظة معاه..
ميرال الجمعتين هذوكم عدتهم محواس و تبحير مرة مع دار خالتها نوال و بنت خالتها منى ويخرجهم ايهم ولد خالتها .. و ساعات تخرج هي و صحابها .. و سعات هي و ريان .. مدام الهام و سي يوسف مزالو مسافرين عجبتهم القعدة زادو جمعة اخرى و سيبو مسؤولية الخدمة والدار ع مهدي..
روح للدار مع حكاية نص الليل يلقى ميرال تتفرج في فيلم في الصالة مظلمة الدنيا و تاكل في القطانية ومتفاعلة.. رمالها طبلية الشكلاطة متع العادة و قعد جمبها..
-شسمو الفيلم
-اسكت !!
قعد ياكل في القطانية و مركز بعد نطق مسكين
-ع شنوا يحكي مفهمت شي راني
-شڜشششت مهدي شكون قلك تفرج من اصلو خليني نتفرج رايضة
جاه تلفون خرج يحكي بعد دخل يشوف في الطفلة طالعة فوق الكانابي و تصيح و جايبة ما عندها
"تي بوسها يا خراااا يا بهيمممم بوسها و اهرب بيهااااا حسسها بشوية رومنسية شجبري هذا .. " هي هكاكة و تجيها مخدة منتالي تجيبها طايحة
-بوسهاااا اااه تبوسك لفعة ..قوم ارقد تحرك
-ههههه هاو الجبري لاخر جاااء اصلا شفهمك في الرومنسية انت
تهز مخدة و ترميها عليه
هي تضرب و هو يضرب لين استسلمت
-باهي سافا ههه والله تهديت .. امان خليني نكمل نتفرج والله فيلم طيارة
مشى سكر التلفزة و جبدها من ايدها
-اخطاك بركا.. ايجا حطلي نتعشى منحبش نقوٍم نجلة
-مهدي تعلم اخدم روحك بروحك هوكا لعشاء حاضر سخن و كول
-لا ريچلي اوموري و برى ع روحك
قعدت تسخنلو في العشاء .. بعد حطتلو و قعدت مقابلتو
-كنت تخدم ولا ساهر مع صحابك
-لا هذي لا هذي
-ممم مالا باز مع سارة
قعد سارح شوية بعد خزرلها
-حتى هذي لا زادة .. كنت في بلاصة كان نقلك عليها تو تمرجني
-ويييبن!!!
-بلٍصت الكرهبة بحذا لبحر قعدت ساعتين سارح نخزر للنجوم .. تفرهدت زيد وحدي من غير الجوجمة سيادتك .. العززززز
-ياااااا مسقطك والله .. عندك برشا مهزيتنيش ديجا حضر روحك غدوة بش تهزني
-نرجعو للاياماتنا
-ههههه اي .. ع ذكر نرجعو للاياماتنا بش نوريك شكون رجعو للاياماتهم ع قاعدة ههههههه
جبدت تلفونها و ورتو سلفيات عاملينهم يوسف و الهام شي كبير .. قعدو يفركو فيهم عليهم ويتضيحكوو .. كمل تعشى و خرجو للجردة هو جبد يتكيف وهي جبدت كتاب تقرى فيه .. هي غاطسة مع كتابها و هو سارح يخمم منجمش يخرج سارة من مخو ..
بعد تلفت يلقى ميرال هزت كرسيها و بعدت
-شبيك!! ؟
-قلقتني ريحت الدخان مهدي
-باهي ارجع اقعد حذايا تو نحيه
-لا سافا هكا تقلقش روحك ..
هوما هكاكة و تسمع فيه يضحك هزت راسها تلقاه يخزر للبيسين وشايخ ضحك
-سملا شفز عليييك
-باش يفكرك .. ؟!
-اااه باز يفكرني بعمايلك قطعتلي النفس نهارتها زعمة مت لا وزيد شوشطني بالماء السخون برى لا تربحك يا مهدي والله لا ننساه النهار هذاكا
-لا باين فيك نسيت روحك كيفاه كعبرتهالي مع بابا دين امك شتاكل ضوء رديتني نعذب فيك و بش نقتلك..
-ااا مالا تحبني نعديهالك بالساهل
-هه ميرال .. صغرونتي
-شتحب
- المرة هذي يوسف و الهام موش في الدار هه و حتى من نجلة راقدة و ريان درا فين يتهومل و العساس ماخو كونجي ..
بلعت ريقها وبقات تخزرلو مسمرة في بلاصتها قلبها بدى يدق والافكار السيئة بدات دور في راسها .. خزرتو ما دل ع خييير
-مهدي شقصدك
-يعني فم حد بش ينقذك من طرح التعذيب الليلة هههه
هو كمل جملتو و هي قامت تصيح و تتنطر كالمهبولة دخلت تجري طلعت للبيتها و سكرت الباب ترعش بقات واقفة تستنى فيه بش يخلط .. لكن مفما شي .. مشات بشوية طلت مالبلكون تلقاه قاعد في بلاصتو يكشخ بعد هز راسو خزرلها
-بوهالية زايد
-اووف ممسطك ..باهي ارمي لكتاب عالاقل
-مشى هز لكتاب لي كان مرمي عالڨازون.. قعد يقلب فيه
-تي ارمي بركا موش متاعك الحاجات هذي
-والله تو نطلعلك تو نوريك موش متاعي كيفاش
-باهي ارمية تو نحاول نشدو
-قلي وين وصلت
-صفحة 43
جبد الكرسي و قعد مقابلها حط ساق فوق ساق حط الصفحة 43 وبدى يقرى بصوت عالي..شاخت عليه ضحك تكات هالحيط متع البلكون و حطت ايدها ع خدها و بقات تسمع فيه .. و هو كل مرة ياقف و يخزرلها
-سافا
-اي اي كمل
قعد يقرى و غطس هو زادة مع الكتاب ولى يقرى موش خاطر يحب يفدلك ولى يحب يقرالها .. كان متفاعل مع الكتاب و مستمتع هو زادة و كل مرة ياقف يحكيو و توضحلو حاجة بحكم هو مبداهش ماللول... قعد هكاكة لين و صل للصفحة147 حس روحو سايي معادش فيه ..
-نكملوه غدوة عالبحر موش خير
-هههههههه بو زينو هو كي يبدى يعرف يخمم ..
-برى مرقد برى
