الحلقة 19
نهار دق الباب و دخل يلقاها قاعدة في البلكون و تقرى في كتاب تلفتتلو
-،اهلا مهدي
-ياخي متفدش مالقراية
-القراية تنجم تقول احسن حاجة في حياتي عالم اخر نهربلو ...
وانت قلي شتعمل هوني موش كارك في الخدمة
-روحت بكري .. هيا قوم حضر روحك خليني نخرجك تبدل الجو
-والله ما عيني يا مهدي
-لازمك تبدل الجو عندك جمعتين وانت مالدار لليسي مالليسي للدار قداه بش تقعد هكا
-مهدي اخطاني معيني في خروج
-بش تخرج من غير متناقشني .. و زيد تو نهزك اعمل شوبينغ و نعملو سهرية تحفونة بدل الجو ماني نعرفكم لبنات تحبو الريق هذا..
-انا منحبش و معنديش مع الريق هذاكا
-مالا شتحب
سكرت الكتاب و بقات تخزرلو
- باهي هزني للبحر
قعد يخزرلها بعد تبسم ..
-احسن ما اخترت .. حضر روحك هاني نستنى فيك لوطة ..
اول موصلو حلت الكرهبة وهبطت تجري حلت ايدها و بقات تشم في ريحت لبحر شعرها يهز فيه لهواء نحات صباطها صفنت سروالها و بقات تتمشى و تلعب بالماء بعد تلفتت للمهدي لي كان يخزرلها من بعيد في الكرهبة عملتلو بيدها ايجا .. هو هبط مالكرهبة و جاه تلفون من عند سارة
-وي سارة
-فينك مهدي تعديتلك للشركة قالولي خرج
-اي روحت
-باهي الشلة الكل ملمومين في بلاصة العادة يستناو فينا .. تتعدالي توا تهزني ولا كيفاه
خزر للميرال لي تستنى فيه بعد سكر باب الكرهبة ..
-برى تو نخلط منجمش نجي توا عندي منعمل
خلط ع ميرال بقاو يمشيو ع الشط قعدو يحكيو بعد تهز ساقها و طشو و بحكم هو يموتو عالفراع بدع بيها..قعدو يتجاراو و يتفارعو ويلعبو بالماء بعد ترماو ع الرمل بالتعب..
-محلاااااااه لبحر تتصورش قداه نحبو ..
بقاو ساكتين بعد تلفتلها
-شنوا تحس في روحك خير
-اي توا خير هه احسن معملت كيف خرجتني
-هذا لي بيك تو نخصصلك نهار في الجمعة نجيبك فيه لهوني
-نهار كهو !!!
-تكبرش كرشك عاد لنبطل موش معندي منعمل
-باهي تو نجي وحدي تقلقش روحك
-مفماش مشي للحتى بلاصة وحدك سمعت ولا
-شبيك تتقلب فيسع ياخي مخيبك كيف تتغشش
قعد يڨحرلها و ساكت
بعد ترمات عنقتووو
استغرب ماللول بعد ضحك
-هههه شبيك
-مهدي عيشششك كان مجيتش انت راني معرفتش حقيقة عمر راني مزلت للتوا نفركس عليه و متمنية نشوفو و .. و.. و...
-ميرال الموضوع هذاكا معاش تجبدو .. اصلا منيش فاهم علاش حازنة عليه هذا الكل .. طلع موش في المستوى ربي معاه تو يجي غيرو...
ميرال بقات ساكتة محبتش تجاوبو خاطر بلي تحكي موش بش يفهمها .. كانت تعرف انو ميعرش شمعناها حب .. شمعناها كيف تتوجع وتتعذب من حد تحبو ....
- شوف اي حاجة تربطك بالماضي انساها و اولهم الطفل هذاكا .. احسبها تجربة فاشلة و تعدات ..
قصت عليه كلامو
-اي مهدي معاش بش نخلي حتى حاجة تبكيني ولا دمرلي حياتي أيًا كان.. هو نساني شاف حياتو و تخلى عليا .. و انا هذاكا شبش نعمل بش نتلهى كان بقرايتي مهدي برشا حجات نحب نعملهم و نوصللهم .. ميستهلش بش نبقى دافنة روحي ع خاطرو ولا ع خاطر بابا ولا على خاطر حد .. وقفت و قعدت ماشية جاية تحكي بصوت عالي و متحمسة برشاااا ...
مهدي من ليوم بش نرمي كل شي ورى ظهري نكذب عليك كان نقلك نسيتو اما بش نتناساه بش نعمل برشا جو بش نقرى ليل و نهار صباح عشية قايلة .. كل لحظة بش نقرى فيها بش ناخو الباك بمعدل باهي.. و بش نقرى حقوق نحب نولي محامية نحب نكون من احسن المحامين في البلاد نحب ... و نحب ...
بعد قعدت بحذاه و ترمات ع الرمل من جديد و قعدت تضحك ..
-هو قال لي انا انانية و نخمم كان في مصلحتي و في روحي ... توا هذاكا شبش نعمل بش نكون انانية و معاد نخمم في حد ولا نفكر فحد كااااان روحي
كان يخزرلها و يسمع فيها ضحككككك بعد قام
- فريمون مرسي نحيت عليا تعب كبير هذا شكنت حابب نخليك تعملو حابك تنسى تفسخ و تبدى من جديد و ترجع اقوى ..توا تهنيت عليييك قوم روّح
-ههه والله مصارها امان خليني عيش خويا
-ميرال عندي منعمل
-٠ماشي لللا سارة متاعك
قرن حاجبو
-وانت منين تعرفها سارة
-اوووه بربي كل يوم و انت في التلفون وي سارة .. ا سارة وينك .. سارة هاني جاي.. سارة راني منيش جاي سارة سارة سارة
-ياخي تتجسس عليا
-بربي بيتك بجمب بيتي سي نرمال نسمع.. خلي عاد كيف تخرج للبالكون تقولش عليا قاعدة حذاك.. زيد نسمع في برشا حجات اخرى بخلاف حكاياتك مع سارة ..شي كبيررر نحشم بش نعاودو--'
هبط و شدها من وذنها بالقوي
-كان مزلت تتنصت عليا وذنك نقصهملك فهمت
-والله لاني بالعاني صوتك واصل شتحبني نعمل تي بربي ملقيت منسمع انا نعيش في جفاف عاطفي وانت نهار و طولو تتمعشق بحذايا والله شي يوجع القلب اصل
-هه باهي قوم تو ندبرلك راجل قوم بركا .. كارثة متع وذني
