الحلقة 33
لحظتها جاه تلفون من نومرو ميعرفوش علق المرة لولة لكن النومرو شد صحيح اضطر انو يهز
-الو
-الو مهدي!
-وي شكون معايا
-منى بنت خالتك .. سمحني كان قلقتك اما بش نسألك ع ميرال كلمتني قتلي بش تجي مشالها أيهم بش يجيبها و للتوا ما جاو و تلفوناتهم لثنين مسكرين! في الدار هوما ؟؟
-شنواااا !! فاش تحكي منى
-مهدي راني ماني فاهمة شي من قبيلة و انا نطلب فيهم و لتوا مجاو والله خايفة
-باهي علق تو نعاود نكلمك و كان تحصلت عليهم قلي..
قام مزروب بش يترشق بالغش
-مهدي شفما
-قوم سارة لازم نروح تو نحكيلك
ثنية كاملة و هو يطلب فيهم و لا واحد فيهم تلفونو تحل كان بش يهبل
-والله منوريك يا ميرااال لازم تعمل حاجة تبقاش رايضة كالعباد
-مهدي هدي روحك تو تلقاها
-شمخرج امها قلتلها مفماش خروج ديما تكسرلي كلمتي والله لاني معديهالها المرة هذي
كان يتحلف بش يهبل كان يراها لحظتها عادي يغفصهاااااا وشوف وشوف يبرد دموووو
اول موصل للدار دخل يعيطلها كان عندو امل يلقاها الدنيا قلبها دار بلاصة بلاصة لكن شي حتى نجلة كانت راقدة و مفيبالها بشي ..
جاه العساس يجري
-سي مهدي كانك ع ميرال راو جاها سي ايهم بالكرهبة هزها ..
-علاش مكلمتنيش علاش تخلي فيها تخرج موش نبه عليك بابا بش تحطها في عينك
-سئلتها قتلي راو مهدي فيبالو و مهيش بش تبطى
-باه تو نحاسبك عليها هذي تو بعد نتلهى بيك
هز روحو و خرج يجري طلع في الكرهبة و سارة تبع فيه و تهدي فيه .. كلم منى قتلو لي هوما مجاوش
قعد يدور بالكرهبة يفركس ويحاول يتحصل على واحد منهم لكن شي .. الغش لي كان فيه تحول للحيرة الدنيا الكل قلبها البلايص الكل مشالهم خاصة لبلايص لي يعرفها تحبهم .. كل لحظة يزيد يهبل و يتحيٍر اكثر .. مشى لصحابها الكل و كلم احمد بش يزيد يفركس معاه .. و كل مرة يضرب الفولون ويقوم يصيح
-مكارنيش خليتها ..
-مهدي اهدى بربي وين عندها تمشي تو نلقاوها علاه هذا الكل
تلفتلها و سكت بعد مشى للدار خالتو زاد قلبها الدنيا كان بش يهبل كيفاش ايهم يمشيلها بش يهزها و ميشاوروش يخططو وحدهم و هو لا في علمو لا في دراه كان متحلف فيه .. تعدات اكثر من ساعتين و هوما عالحالة هذيكة.. لين جاء تلفون للنوال كلهم خزرولها و وقفو
هزت و في لحظة طاح التلفون من ايدها و قامت تصيح بالفجعة و الخوف..
-ايهم ايهم في السبيطار عمل حادث يا منى جيبلي مفاتح الكرهبة تحرك .. مهدي اسبق انت عيششششك
مهدي بقى حابس في بلاصتو مالصدمة وجهو لخلخ و عينو حمارو اخر حاجة كان يتوقعها انهم يكونو عملو اكسيدون
نفس اللحظة تعدات عليه قبل كيف قالولو اختك عملت اكسيدون .. قعد واقف موش مستوعب شي خالتو تصيح و تبكي و سارة تجبد فيه بش يمشيو ..
مشى طلع في الكرهبة هايم مصدوم
يحس في طرافو جمدو معاش ينجم يحركها ..
-مهدي خدم الكرهبة شبيكككككك
-كان .تطلع صارتلها حاجة! كان تطلع مشات هي زادة...
كان يخرج في الكلام بسيف حابس في بلاصتو مصدوم
-مهدي نعرفك اقوى من هكا متخافش كان فما حاجة راي قالت خالتك امشي خنشوفو متخافش موش بش يصير شي خايب
خدم الكرهبة و مشى كان يلوم في روحو تمنى لو مخلاهاش لحظتها تمنى لو خذا بخاطرها و قعد معاها تمنى لو ممشاش و خلاها كان حاس بذمب كبير حاس روحو السبب.. مردش بالو عليها مستحفضش عليها.. كان خايف لتطلع مشات وخلاتو وميطلبش منها السماح.. كان خايف لا ميخلطش ويراها.. يرى خزرتها .. يراها تلوم و تسب فيه و تتشوحر كيما عادتها .. ميراش ضحكتها لي ولى يعشقها .. تسيب دلالها بلادتها و مصاطتها......
