الحلقة 44
قام الصباح دوش لبس كلو في النوار اكثر لون يرتاح فيه في الخدمة .. برفن .. و خطار منڨالة من مناڨلو هز تلفونو و هبط لقى الجماعة يفطرو
-ههه شنوا مزلت شاد صحيح و ماشي تخدم تحبني نبدل رايي
ضحك و قعد تلفت ملقاش لا ميرال لا ريان
-ميرال مزالت راقدة! ؟
-لا مزالت كيف خرجت عندها متعمل و بش تتعدي حذا نوال يمكن تبات منعرش
-و ريان ؟
-مشى مع ميرال و بعد بش يتعدى يترانا
كمل فطر و خرج عداه نهار كلو يخدم و لاهي من حاجة لحاجة و لعشية مشى تعدى لسارة للخدمة متاعها .. دق الباب و دخل هزت راسها و بقات تخزر اول مرة يجيها للخدمة .. قامت و مشاتلو كتفت ايدها و بقات تتشوحر.. قرب منها و باسها بوسة طويلة من خدها
-جيت مالبارح و مظهرلك كان ليوم بش تراني مهدي!!
- تاعب البارح حبيت نجيك في فورما
-اممم
قربها ليه و شدها من خصرها
-يزي بلا غش راني متوحشك نحب نشبع بيك متفسدهاش و تعمل مشكلة
-باهي هاو بش نسكت توا اما...
قص عليها كلامها و غرق معاها في بوسة طويلة و هي كانت اول مرة تتفاعل معاه كيما يحب هو .. بعد جبدت روحها بشوية وبقات تخزرلو تلهث لين نفسهم تخلط ببعضو و وجها حمار .. حطت راسها ع صدرو و عنقتو
-نحبككك مهدي معاش تبعد تتصورش قداه توحشتك وعدتني بش تكلمني كل لحظة .. شوية متحصلت عليك كان مرتين زح مرضتني
باسها من راسها وقعد يبررلها كالعادة يدخلها منا يخرجها من غادي.. بعد هزها و مشاو عملو قهوة و بقاو يحكيو و بقات تصقصي فيه اش عمل و اش معملش بقات تتفرج في تصاورهم و جوهم وهي بش تموت بالغيرة و الغل .. تتسمى مشافت شي الصحيح الكل عند ميرال كانت كل لحظة تصورها ..
شاف الوقت يلقاها الستة
-هيا سو خليني نوصلك
-مزال بكري عشية سبت علاه بش تروح بيا من توا مزلت مشبعتش بيك مهدي اووووف
-عندي منعمل يا حبي والله
-شعندك متعمل الوقت هذا
-حجات متع رجال
-مهدي جاوب متبداش تتبهنس عليا
-خدمة خدمة
-باهي اما منعرش علاش منيش مصدقتك
-ماشي بش نقابل طفلة ..تحب نجاوبك هكا بش تصدق ياخي
-باهي اس بركا و نقص مالغش قوم وصلني
ميرال الوقت هذاكا كانت راكشة مع منى في بيتها يحكيو
-زح قداش يشد في قلبو تي هاك طلبت منو السماح
-منى اول مرة مهدي يهز عليا خشمو و يتغشش هكا ستانست بيه ميخذش عليا و باللي نقول و نعمل عادي
-محملش كيفاش تقلو هكاكة حسك بعدتو و هو حاسبك كيف اختو و عندو حق عليك
-باهي شنعمل بش يسامحني والله فديت نحس في حاجة ناقصتني !!!
-احكي معاه حاول
بقات سارحة تخمم و فيقها حس تلفونها .. خزرت تلقااه "mahdouchy" حلت فمها و بقات مصدومة موش مصدقة بعد هزت التلفون و تنطرت مالفرش
-منى مهدي يطلللللب !!! زعما سامحني ولا غلط في الرقم
-هززز تو تعرف
-الو!! وي مهدي
- مزلت في دار خالتي ؟!
-اي!!
-هي باه اهبط هاني نستنى فيك قدام الباب
-ااه قدام الباب !! علاه شفما
-شنوا علاه اهبط بش تروح
جات بش تتكلم و تقلو لي هي بش تبات علق عليها
هبطت التلفون و مشات طلت مالشباك شافت كرهبتو واقفة قدام الدار
-تي تكلم قلي شقلك
-قلي اهبط هاو جاء بش يروح بيا
-وووه موش قتلي بش تبات لااا عااااد كلمو قلو منيش مروحة
-جيت بش نقلو شوية علق .. هيا خليني نمشي لا يزيد يتغشش هههه احنا مصدقنا رجع حكى معايا بربي.. تو نجيك نهار اخر كلمة
-اوووف يا مهدي مقررت تسامحها كان توا زح
-هههههه هات بيزو خنمشي هات
