الحلقة 36
قعد ليلة كاملة يغفى شوية ويقوم يمشي يطل عليها موش من عوايدو كان ماللي يحط راسو يتعدى في الطويل ميقوم كان بسيدي وسيدك.. ليلتها بحكم كان متحير و متوتر كان يرقد ويقوم .. كيف عرف روحو بش يبقى متحير فرش لوطة بحذاها كوات جاب مخدتو و رقد غادي المرة هذي تحمل الرقدة لوطة موش كيما المرة ليفاتت
ماللي قام الصباح قومها غسلت وجها و خلطت عليه لقات نجلة حطتلهم فطورهم في الجردة و هو قاعد يستنى فيها كيف شافها جاية طفى الدخان
-يا مهدي عالصباح تتكيف
-الله غالب .. هيا اقعد نفطرو
-ريان فين للتوا مجاء
-كلمتو قلي بش يروح بعد
-وانت ماكش ماشي تخدم ياخي شبيك للتوا في الدار
-منيش ماشي هيا كول ويزي مالاسئلة
قعد ياكل و يخدم بالتلفون هز راسو يلقاها تخزر للصحن
-شبيك!!
-نحبش ناكل بالليسار
-شنوا نحبش ناكل بالليسار هذي بش تبقى جيعانة مالا
-كان توكلني نبقاش جيعانة هههه
-زيد سيب دلالك عليا زيد
-بش توكلني ولا توا
جاتو غريبة بش يوكل حد عمرو معملها اما ضحك و خذا منها الفرشيطة و قعد يوكل فيها مرة ليها مرة ليه
هوما هكاكة و جاتهم نجلة
-مهدي وحدة اسمها سارة تناديلك
-دخلها لهوني
دخلتها و مشاتلهم للجردة التالانية تلقاه قاعد يفطر هو و بنت خالتو موش هوني .. قام سلم عليها و سلمت هي ع ميرال و قعدت معاهم ..
-مهدي كلمتك سبعين مرة مهزيتش عليا و مشيتلك للشركة قالولي مزال مجاش وليت تعديتلك و هوكا منها نشوف ta cousine و نطمان عليها.. شغبتنا عليك البارح راك
تبسمتلها ميرال و مجاوبتهاش ..
-منعرش تلفوني وين طيشتو ..
-توا هكا عزيزي متقولش سارة تتشغب عليا
قعد ساكت مجاوهاش بعد خزر للميرال هز الفرشيطة و رجع بش يوكلها
-لا سافا شبعت مهدي افطر انت انا هاني طالعة للبيتي
-طرس قتلو شبعت شكليت بش تشبع
-مهدي سافا
-اقعد قتلك
-باهي تو ناكل وحدي تقلقش روحك
-ع راحتك .. المفيد كول ..
كملت فطرت و هو قعد يحكي مع سارة و لاهي بميرال في نفس الوقت ..
كيف كملت فطورها قامت و خزرتلو
-تنساش بعد شوية بش تهزني للسبيطار نشوفو ايهم وعدتني راك هاني طالعة نلبس
.. يخزرلها سملة وقتاش وعدها و وقتاش حكاو فيه الموضوع من اصلو .. هزت روحها و مشات
-تطريدة بذخامة هذي هههه
-لا مقصدهاش اما م. ماو و عدتها حبت تذكرني و برا
-باهي نخليك مالا انا منعطلكمش تو بعد نحكو
-ابقى افطر معايا منحبش نفطر وحدي
-بشرط توكلني انت كيما كنت توكل في الطفلة
-اول حاجة اسمها ميرال موش طفلة و بعد خزرلها للايدها.. و هاو لباس عليك تنجم تاكل وحدك مشاء الله..
عداتها بضحكة و بقات تخزرلو ساكتة
-مهدي سامحني البارح مكانش قصدي نخليك و الله وزيد مروحت كان متأكدت لي هي لباس
-انسى سارة انسى
-ريتك كيفاه تبكي باين فيك ياسر تحبها اول مرة نشوفك في الحالة هذيكة .. كنت ديما تقلي راني معنديش قلب ومنحسش اما لي ريتو البارح كان العكس..
قعد سارح شوية يتفكر في روحو البارح بعد موتت اختو اول مرة تهبط دمعة من عينو عمرو مخاف ع حد بالطريقة هذيكة .. رمى الفرشيطة و تكى عالكرسي و خزرلها
-مالها الا بنت خالتي و امانة عندي سي نرمال نتفجع عليها شتحبني نعمل كنت نجم نخسرها ..
-مهدي ياخي امها و بوها وين هي علاش ساكنة معاكم
-امور عائلية
-شمعنااااهة!!!
سكت مجاوبهاش
-بااه سامحني كان قلقتك صحة فطورك
هزت ساكها و مشات و هو قعد يخزرلها معمل حتى رياكسيون بعد جبد ڨارو و قعد يتكيف..
