الحلقة 21
نهار كانت قاعدة في بيتها تقرى حكاية 11 متع الليل حست روحها تعبت رمات الكراسة و خرجت للباكون لقات مهدي قاعد في الجردة يتكيف تهبط تجري و تجيه من تالي تفجعو و تشيخ ضحكك بعد تجبد كرسي و تقعد مقابلتو
-شتعمل هوني برى اقرى
-تعبت اخطاني .. جبدت السيڨارو من ايدو و رمتو
-تعرفني نحملش ريحتو ههه
-تحملش الدخان تقوم من بحذايا موش تعمل لي عملتو توا .. بش نفشخك نهار ع تصرفاتك راني شاد روحي بالسيف
-باهي اس بركا قلي شتعمل هوني كي سبتك ماكش البرى تتهومل مع صحابك من بواتا للبواتا
-تاعب و معيني في خروج
سكتت تكات عالكرسي و حطت ساقها فوق الطاولة و بقات تخزر للسماء
-مهدي شو النجوم محلاهم واااو جادووووغ
هز راسو و بقاو يخزرولهم ..
-مهدي شنوا احلامك و طموحاتك لي تحب تحققها .. ولا قول انت عندك كل شي احلامك الكل محققة هه ملا سؤال حتى انا
بقا ساكت بعد عمل كيفها و حط ساقو فوق الطاولة و حط ايدو ورى راسو و خذا تنهيدة كبييييرة
- .. قريت في امريكا و تخرجت par mention.. حبيت نكمل نبني روحي غادي نعمل projet كيمل نحب انا .. كانت عندي برشا حاجات نحب نعملها مخطط لحياتي بالباهي اما موش كاتب .. بابا اصر اني نرجع للتونس و ناقف معاه في الخدمة.. منجمتش نعارضو.. .. ّ...عندي اكثر من عام ملي رجعت لتونس ..هذي هي حياتي نهار كامل نعديه نخدم و في الليل نسهر و نشرب و نعمل كل شي لي يتعمل واللي ميتعملش ..نحس في روحي عايش حياة تافهة .. موش هذا انا موش هذي العيشة لي نحب عليها ..
بقات ميرال تسمع فيه و ساكتة بعد قربت كرسيها بحذاه
-مهدي علاش متخزرش من ناحية اخرى بالعكس شوف قداكش ناجح في خدمتك حاسب منسمع من عم يوسف ملي وليت معاه الشركات كبرو و سمعت انك حليت فروع في زوز بلدان اخرى ديما تربح اي صفقة تدخل فيها.. حياتك موش فاشلة .. الف حد يتمنى يعمل شطر لي تعمل فيه انت كل مرة و انت في بلاصة كل مرة تقابل عباد جدد و تدخل في خدم جديدة و تجرب اي حاجة تجي ع بالك.. والله قداش تعجبني حياتك نحس فيك انسان ناجح رغملي مزلت صغير ..عنديش برشا نعرفك اما في ظرف اشهرة عرفت هذا الكل .. و مزلت بش تعمل ..
-ميرال لي نعمل فيه مجرد واجب عادي يعني نحس في روحي واقف مع بابا .. موش خدمتي خدمت بابا .. كنت حابب نبدى وحدي و مالصفر نصنع روحي بروحي .. جاوني برشا عروض في امريكا برشا حجات كنت نجم ننجح فيها ونقلبها الدنيا هههه .. انسى..
-اهررررب هه اعمل كيفي و اهرب و حقق احلامك مهدي و عم يوسف يجي نهار و يفهمك
-هههههه ضحكتني و معيني في ضحك
بقات ساكتة لكنها بقات دور في الحكاية قي مخها وقررت انها تعمل حاجة .....متعرش شبش تعمل اما لازم تعمل حاجة ماكم تعرفوها تريضش..
-مهدي
-امم
-قلي شنوا اكثر حاجة تفرحك
-قلي شفز عليك انت هالليلة الكلبة الساعة !!
-تي امان جاوب نحب نعرف
-نعرش.. بون! نفرح كيف نعمل حاجة باهية نعاون حد ولا ناقف مع حد ولوني منيش ديما نعمل في الحجات الباهية.. نفرح كيف نرى الهام تضحك.. نفرح كيف نرى بابا فرحان و فخور بيا في الخدمة..
-و شنوا الحاجة لي تغشك
-الاسئلة ياسر
-ههه و شنوا اخر
-الكذب
-وشنوا اخر
-الخنقة
-و..
-كهو ميرال كهو برى مرقد فددتني
-باه باه اخر سؤال
شنوا كثر حاجة عملتها و ندمت عليها
-منندمش
-هممم.. و شنوا اكثر حاجة متحبهاش في روحك
-دمي السخون فيسع نتنرفز نتقلب و نقلب الدنيا نجم نولي شيطان في اي لحظة.. و نعمل حاجات عمري منتصور اني نعملها اي حاجة تجي ع بالي نعملها..
-ههه اي نعرفك كيف تتنرفز والله بالرسمي تولي شيطان نحسك تتحول 😂 قول خافت .. زادت حطت كرسيها بجمبو لسقت فيه و حطت راسها ع كتفو
-وشنوا اكثر حاجة متحبهاش فيا
-اسئلتك التافهة ..
-اعلاه زح لازم نسأل مدامك انسان قريبلي لازم نكون نعرف عليك برشا حاجات بش نفهمك و نحس بيك و نعرف كيفاش نكون معاك خاطر معاش نحب نغشك هههه تصدقهاش لخرى
-كولني كولني بالهف اصلا نجاوب فيك خاطر فادد نوسع بيك في بالي ..
-ههه موش مشكل المفيد تجاوب .. قلي شنوا اكثر ماكلة تحبها بخلاف مقرونة نجلة؟
.......
بقاو ليل كامل و هوما في الجردة هي تسأل و هو يجاوب بعد دورها هو يسأل و هي تجاوب .. بعد دوروها ضحككك كل حد يحكي ع اكثر مغامرات و حاجات تضحك عملوها .. جبدو اهم الاسرااار و فركوها لي يتحكى و اللي ميتحكاش ليل كامل و هوما يضحكو وين يجي بش يجبد ڨارو تفكهولو .. و هكذا دواااليككك .. تكاو عالڨازون و بقاو يحسبو في النجوم صنعة لي معندو صنعة هه.. قداش ملات عليه الدار و ونستو حتى كيف يبدى فادد تضحكو وتخرجو مالمود الخايب..
لكن مكانوش وحدهم كان سي يوسف يخزرلهم من بعيد كان قاعد في البلكون يتفرج فيهم كيفاش كانو يحكيو .. يتفارعو .. يضحكو .. يتعاركو يشدها من شعرها و بعد يرضيها و يرجعو .. يتعاركو و ترضيه هي .. --' ملا ليلة... ضحك و دخل و هوما بقاو متكين لين هزهم النوم لبرة عالڨازون
