الحلقة 42
اول مطلع الصباح لبست دبشها و مشاتلو للشومبر متاعو تجري مكانتش تنجم تصبر .. هي جات بش دق و الباب يتحل و تخرج منو طفلة .. نفس الطفلة لي شافوها البارح لعشية في البحر متعدية هي و كلبها بقات حالة فمها.. و الطفلة بقات واقفة تخزرلها
-ابعد بش ندخل حاشتي بمهدي
-pardon !!!?
-ااه تفهمش عربي احسن
خرجت الطفلة و ميرال دخلت و سكرت الباب لقات مهدي راقد و يجبد فيه خميري..
-مهدي قوووووم حاشتي بيك
-امم
-تي قووووم
حل عينو بشوية و عاود غمضها و كيف استوعب شكون يحكي معاه قام مفجوع
-كيفاه دخلت انت لهوني
و بعد قعد يخزر بجمبو و كلي يفركس ع حاجة
-تهنى خرجت عرضتني في الباب
رجع تكى و جبد تلفونو شاف الوقت و خزرلها
-شبيك! شتحب
-جيت بش نحكي معاك في حاجة اما لقيت ما اهم .. شتعمل عندك الطفلة هذيكة هوني!
-نقري فيها في شوية math
-مهدي تبداش تجبد عليا بالدم البارد نسيت روحك كيفاه وعدتني بش تنحي عليك اللعب و قتلي معاش نخون زح للدرجة متخممش في سارة كان تسمع شبش تحس
-الله غالب رجعت في وعدي و كان قلبك ع سارة تهنى معندها منين تسمع
قام جبد منشفة بش يدخل يدوش
-هذي بش تكون اخر مرة مهدي مكانش انا لي نقوللها ومنيش نفدلك
خزرلها هز حاجبو و ضحك
-اصلا شدخلك انت مالك الا بنت خالتي و معندكش الحق تقلي شنعمل واش منعملش ..
-مهدي لكلام لي قلتو البارح موش بقصدي سامحني!! عيشك انساه والله فورت غش ..
-كيف تجي خارجة سكر الباب وراك
دخل يدوش و خلاها واقفة حابسة في بلاصتها عينها تعبات دمووع و بعد خرجت
بقات في ااشومبر راقدة مخرجتش .. احمد و مهدي و منى تلمو يفطرو مع بعضهم
-احمد: ويني ميرال شبيها للتوا ما هبطت
-منى: محبتش خليتها راقدة
مهدي قعد يفطر موش هوني بعد قام
-انا هاني هابط نعوم شكون يهبط معايا
-منى: تستناني نلبس فيسع و نجي
-باهي متبطاش .. وانت احمد ماكش هابط
-لا معينيش (احمد محبش يهبط معاهم حبو يهبط وحدو هو و منى و يخليها تستغل الفرصة بش تكون معاه وحدهم)
مشات منى و مهدي يعومو و بقى احمد يتمشى في الاوتال و ميرال راقدة و مظلمة الشومبر في عالم اخر .. كيف روحت منى تلقاها قاعدة في البلكون
-وين كنت للتوا
-كنت نعوم انا و مهدي
-و احمد وينو !
-منعرش خليناه الصباح يفطر قلنا تو يخلط علينا مخلطش
-مهدي مسألش عليا !!؟
عملتلها براسها لا
-هو شايخ يعوم و عادي كأنو مصار شي وانا يعلم ربي بحالي .. مبرد دمو مشيتلو الصباح بكري حبيت نطلب ااسماح تلفني جملة وحدة متتصورش قداه غاضتني
-شيهمك فيه يحب يعمل حب عزيز اهبط و شيخ روحك تملاش راسك
-منحبش و موش حابة نرى منظرو
حتى لعشية محبتش تهبط تقعد معاهم عالبحر .. تلمو وحدهم يحكيو ويفدلكو و هي بقات تقرى في كتاب ع روحها..
-مهدي: منى كلم ميرال شوفها شتعمل
و قلها تهبط مناش جايين بش تقعد سيادتها في الشومبر نهار كامل
-احمد: مفهمتش شبيها نبعثلها في الميساجات متجاوبش زعمة متقلقة ماللي صار البارح
سكت مهدي و قلب وجهو و منى جبدت التلفون بقات تحكي معاها و بعد علقت..
-قاعدة في الشومبر و قتلي منيش هابطة و علقت عليا
قام مهدي ونفظ سروال و خزرلهم
-حضرو رواحكم غدوة الصباح مروحين نشاء الله ..
مشى و بقات منى و احمد يخزرو لبعضهم موش فاهمين شبيه ..
اللي هذا قعد في الليل يحضر في روحو و من غدوة الصباح تقابلو اللوطة و مشاو للمطار ..
-مهدي كان يتجبد و يتجنب لحديث مع ميرال لابس اللينات و حاط كيت و موش هوني .. طلعو في الطيارة ريججلو اومورهم و اول مبدات تطلع خزرلها حب يشوفها خايفة ولا! جات العين في العين .. قعد يخزرلها شوية بعد دور وجهو ..كان كل حد ع روحو ثنية كاملة ساكتين مهدي ملفت وجهو للشباك سارح و ميرال شادة كتابها تقرى فيه و كل مرة تسرح شوية تتفكر قداش عملو جو في الجيان قداش هبلو و ضحكو و سيبو هبالهم تخزرلو و تهبط راسها .. و هو زادة ماللي طلع للطيارة و هو يسترجع فاكا النهار .. فرررق كبير
