الحلقة 43
وصلو للمطار لقاو منصف الشوفور يستنى فيهم وصلو منى و تعدى بيهم للدار ..
لقاو الهام و نجلة يستناو فيهم سلمو عليهم بقاو معاهم شوية يسألو فيهم شعملو واش معملوش وين مشاو بقات ميرال تحكيلهم بالتفصيل و توريلهم في التصاور و مهدي طلع للبيتو دوش و رقد ..
كيف جا سي يوسف مالخدمة تلمو الكل يفطرو
-خليتو علينا بلاصة كبيرة حتى من ريان مشى يصيف مع صحابو عندو جمعة و الله الدار بقات مخيبها
-حتى انتوما كيف مشيتو الدار بقات ماصطة من غيركم يا دجو
-خههه ترجعو في الفازة يعني
-هههههه كهو
-بابا سافا الخدمة
-سافا يا مهدي لباس..
-خالتي غدوة بش نمشي عندي اوراق بش نحضرهم للفاك معاش بكري.. و بعد ميسالش نتعدى بحذا خالتي نوال و نبقى شوية بحذا منى
-ووه ميرال مزلت مشبعتش بيك بش تمشي للنوال ااا بديت نغير رااو
-ههههه والله فيسع نبطاش زيد نحب نشوف ايهم خليتو مريض
-ع ذكر ايهم سمعت بحكاية لاكسيدون مهدي علاش مقلتلناش كان مسمعتش من نوال بالصدفة راني قعدت مفيباليش
قعد مهدي يتفكر فاكا الليلة الكلبة خزر للميرال و بعد تلفت للامو
-حكاية فارغة محبيتش نشغبكم
-شنوا حكاية فارغة ولد خالتك ساقو مكسرة وانت تقلي حكاية فارغة تحيل كان صارت للميرال حاجة وانا متهنية عليها معااااك مسيبها وحدها وانت راك درا فين ساهر
رمى الفرشيطة و قام
-شنعمل شتحبني نعمللها نبهت عليها بش متخرجش كسرت كلمتي و مشات وحدها مع ايهم لا تشاور لا تناور .. وانا منيش نخدم عساس ع حد كل حد مسؤول ع روحو و يعمل لي ساعدو .. صحة ليكم.. هز مفاتحو و خرج بقات ميرال حابسة عدات اللقمة لي في فمها بالسيف و طلعت للبيتها
روح مهدي في الليل مخر حل الباب بشوية و جاء طالع للبيتو يسمع في بوه يعيطلو كان قاعد في البيرو متاعو .. مشالو و طل مالباب
-بابا شمسهرك لتوا !!؟
-ادخل مهدي نستنى فيك
- والله تاعب و معيني في عرك كان بش تقلي شبيك مروح توا و ممشيتش للخدمة ...
قص عليه
-ادخل واقعد نحب نحكي معاك
سكت و دخل قعد في الكرسي مقابلو و حط ايدو ع خدو
-تفضل
-مهدي نحبك تعرف راك اغلى حاجة خرجت بيها في الدنيا انت وخوك و اللي نعمل فيه الكل ع خاطركم نحبكم تعيشو مرتاحين و فرحانين اما اكتشفت اني ظلمتك ممكن بطريقة غير مباشرة و مقصديش اما ظلمتك و جاب ربي فقت و نحب نصلح كل شي
-ع شنوا مفهمتكش بابا!!
-شوف نعرف لي انت كنت حابب تكمل تستقر في امريكا و تخدم غادي و تبني روحك غادي و نعرف لي انت متحبش تخدم معايا في الشركة اما انا ملي قتلك ارجع و راني نستنى فيك و معمل عليك مكسرتليش كلمتي و كنت مالسامعين .. انا وقتها فرحت برشا حسيت روحي تهنيت و رتحت من حمل ثقيل اما مخممتش فيك .. اصلا مشى في بالي انك قبلت بالفكرة و فرحان باللي تعمل فيه مكنتش نضن انك مخنوق و تعمل في حاجة فوق من قلبك ..
-بابا فاش تحكي منين طلعت بيها هالهدرة.. كان جيت متقلق راني قتلك بالعكس فرحان اني معاك و مرتحكتك كيف تبدى انت راضي هذيكة الفايدة ..
-شوف متحاولش تاكلني بالكلام ولا تخمم في مشاعري انا و شنوا نحب انا.. اعمل الحاحة لي تحبها انت و ترتحك انت و كيف تبدى انت راضي عاللي تعمل فيه و راضي ع روحك انا بش نكون اسعد حد في الدنيا ..
ماللي حكات معايا ميرال و مشيتو و انا قعدت نخمم و م ...
-ميرال !! شدخل ميرال في الحكاية
-بحكم هي كانت قريبة منك اكتشفت الشي هذاكا وانك موش مرتاح و جات حكات معايا حسستني قداشني بو قاسي و متسلط دونك قررت اني نصلح كل شي ..
-بابا ممكن حكيت معاها في الموضوع اما هي فهمتني بالغالط ماك تعرفها .. انسى و مفماش حاجة غالطة بش تتصلح هه
-شوف في اي وقت تقرر انك تسافر فيه و لا تعمل حاجة انت تحب عليها تقرر انك تبعد و تشوف حياتك كيما يريحك بش تلقاني معاك موش بش نشدك بالعكس بش نساندك و نعاونك و بش نكون فرحان و فخور بيك برشا..
سكت مهدي هبط راسو وقعد سارح .. بعد قام و تلفت للبوه
-يعمل ربي بابا
جاء خارج و سي يوسف عيطلو
-مهدي ميرال وصاتني بش منقلكش لي هي حكات معايا.. متحكيش معاها في الموضوع و متكلمهاش اصلا معملتش حاجة غالطة.. بنت خالتك تعزك برشا و تحب تراك فرحان هذاكا لي خلاها تدّخل في الموضوع ..
عملو براسو باهي و مشى
طلع وعرضتو بيت ميرال قعد حابس شوية بعد حل الباب و دخل يلقاها راقدة كانت لابسة شورط قصير و خلعة و شعرها مسيبتو كان هابط ع وجها و معنقة دبدوب كان مهدي شاريهولها .. قعد يخزرلها بعد قرب هزلها شعرها ع وجها غطاها، سكر الباب و خرج ..
قعد في البلكون يخمم٠.. يخمم في كلام بوه يخمم في اللي عملتو ميرال يخمم في العركة اللي صارت و موقفو منها يخمم في روحو و في اللي ناوي يعملو
