احببت ابن خالتي الجزء الأول

18

الحلقة 18
طلعت طول للبيتها تكركر في ساقها مصدومة .. مكان فما حد في الدار كان نجلة بقى مهدي يحكي معاها.. لين يسمع في حس الفوق طلع يجري حل الباب يلقاها تضرب و تكسر في كل حاجة تلقاها قدامها كانت تصيح ع طول صوتها مهمها في في حد و مشافت حد شعرة لجابت الفاز في راس مهدي .. نجلة ماتت بالرعبة حطت ايدها ع فمها و بقات تخزر و مهدي قرب منها بش يهديها..
-سافا يزي
-ابعدوني اخرجو عليا منحب نرى حد اخرجوووووا
-ميرااال اهدى عيش اختي
-قتلك سيبني متفهمش ياخي اخررررج
-منيش مسيبك يزي بلا صياح و نحي اللي في يدك
تزيد ترميه عليه جاء ع صدرو و ترجع تشدها الهستيريا كان يحاول يشدها و هي تزيد تهبل كانت تضرب فيه و دز فيه بش يخرج ويبعدها محبتش تهدى و هو منجمش يسيطر عليها كانت تتصرف بطريقة موش عادية و تقلهم لي هي بش تقتل روحها و ترتاح . . في لحظة و من غير ميشعر هز ايدو و لفها بكف..
حطت ايدها ع خدها و بقات واقفة مصدومة معملت حتى رياكسيون مهدي بيدو تصدم مالشيء لي عملو.. بلع ريقو و خزرلها.. حطت ايدها ع وجها كالصغار و تفلقت بالبكاء.. محملش يشوفها هكاكة قرب منها عنقها و لزها ليه بقوة بش متزيدش تتهور
-سامحني ميرال من غير منشعر .. لزيتني بش نتصرف معاك هكا
مجاوبتوش و بقات تبكي عندو .. قعد معنقها و هي تبكي بالشهقة مالصدمة و مالقهرة... اطلقت سراح دموعها لي منجموش يخرجو قبيلة كانت حاسة بخنقة و غصة فقلبها سيبت روحها وبقات تبكي لا علا تتفرهد
-قلي شصار !؟ شعملك
بعدت عليه مسحت دموعها و خزرتلو وجها كان احمر و عينها حمر تسخف ..
-معاش عينو بيا و بمشاكلي قلي نسيتك .. معاش دور بيا ..خليني نشوف حياتي.. تعبت منك وم...
حط ايدو ع فمها سكتها
-ميرال اطلب اي حاجة تحبش حتى نفسخو مالدنيا نفسخهولك تووو ..
عملتلو براسها لا و قعدت فوق الفرش
-باهي حاول ترتاح توا معاش تسترجع اللي صار .
تكات غطاها و خرج ..
اول حاجة عملها مشى للعمر فشخو كيما حب واشتهى خلاه مدمدم و مشى .. كان مخو موش فوقو سارح ويخمم في ميرال كانت غايضتو برشا كان حاس بالذمب و ندم انو فركس عليه و لقاه حب يعاونها شوية زاد كمل عليها
روح في الليل يلقاها راقدة قلولو لي هي مخرجتش من بيتها جملة و محبت تاكل شي..

تعدات ليامات .. ولات تقوم تحضر روحها يهزها الشوفور ويجيبها مهدي مالقراية .. لعادت تعلق ولا تتكلم ولا تدخل في حجات متعنيهاش .. لعادت تكسرلو راسو بحسها و بلادتها لعادت تدلل كيما قبل تسبو و تعملو مشاكل و تزيد تضربو بساكها ولا تشدو من وذنو.. مهدي توحش ميرال متع قبل ميرال لي تقومو من نومو مفجوع و تهرب ميرال لي تصيح و تعمل في المشاكل ماللي تقوم لين ترقد .. ميرال لي تدخل للبيتو تسرقلو الشمبوان .. ميرال لي تسرقلو البطاطا من صحنو .. ميرال لي تحكي بصوت عالي.. ميرال لي ديما تسئل متسكتش .. ميرال لي ديما تسلفي ..توحش الضحكة لي كانت ع وجها متفارقهاش توحش يراها هابطة مالدروج تجري و تضحك و شادة قطوستها في ايدها و ترميها ع وجهو سعات ..
ولات جثة هايمة تاكل و ترقد و تمشي تقرى و تروح ديما سارحة ديما راقدة و ديما مسكرة ع روحها و تبكي...
كان كل ميخرج للبالكون يراها قاعدة في البلكون متع بيتها يا شادة كتاب و سارحة فيه .. يا هازة راسها للسماء و تخمم .. يقعد يخزرلها و يدخل ...