المهيوب

ساحة الطيران٢٠٢١/١/٢١

❤صباح المحبه❤
.....نازك الحمراني...مكدرت انام  بلي صار بغداد من تفجيرات..لذالك مثل كل حادثه تصير أرخها بقلمي..كتبت الكم مشهد بسيط عن الصار لا أحلل نقل بلا اسمي

....بائع الأقنعه....
كعدت الصبح..على صوت أمي تحضر الجاي،عالكه الصوبه تحميلي خبزه...

لجيت روحي  يمها أتريك بحنيتها قبل لا اتريك بلخبزه التخبزها كل يوم

امي الخلصت عمرها قهر،وتفكير بينه،بعد مااستشهد ابوي بحرب من حروب الوطن الماتخلص لان اليحكمونه ماهمه بس يشربون العسل واحنه النه كشر البصل وامنه صارت محتاره على لكمتنه تتوسل

رغم شاطر بدروسي،بس فضلت أصير درس للي يگول هل بلد مابیه عیشه،ورغم عمري ١٢سنه شلت حمل العيشه ويه امي الي عمت عيونها وما گامت تخيط بعد

النوم بعيني حتى غسلت وجهي مرتين،
اخذت كلاص الچاي من الصينيه غمست خبزه وجاي أكل وحامد الله..گالت امي

-هاااا عادل الیوم من وگت تعال لآ تتأخر.

-حسب الرزق يمه،اذا الكى رزق ابقى أكثر من ١٢ لان يفيدنه

-يمه اذا ماتخاف على روحك خاف على عربانه معیشتنه
وذا تكسرت شون تالي

-ههههه لاتخافين لا عليها ولا عليه اثنين تعبانين والتعبان ماتطيحه المهازل

-الله يخليك ييمه شلت الهم وبعد زغيرر
لاعشت مثل الجهال ولا راح تكبر مثل الشباب

.-شني زغير يمه أنه رجال ومطلع لكمة البيت وداير عيني عليكم لااادكولين زغير

-رجال وبعشر رجال...الله يرزقك يمه ..

-رايح يمه

-الله وياك يمه محروووس باالله..اليوم مسويتلك مرك دجاج حمره من التشتهيها روحك وتمن ابيض

-الله دجاج خوش يمه وذا تاخرت اريد الفندوه مو تنسين مااحب الفخذ فندوه

-غالي وطلب رخيص بس تعال خلينه نتغدى سويه......مشتاقه اكل وياك انت وخوانك كوه ابلع الگمه من انت ماگو
واعرفك ماتشتري شي تبقى جوعان

-الله کریم ییمه...كعدت على حافة الزوليه
لبست جواريبي خليتهن فوك البجامه

أخذت قمصلتي ادفيي جسمي البارد
..ردت اسد السحاب لكيته خربان تذكرت
أليوم احمد مفتح باله وكلي عنده قمصله
بالف اليه...

لازم اشتغل اليوم اكثر اطلع الف زياده
..اووف ياربي الرزق منك مو من احد

اخذت عربانتي فتحت الباب وطلعت امي سدت الباب وراي..ونظراتها كل يوم تاذيني من تزتني

اعرف تنقهر عليه خاصه من تشوف ابن جوارينه يروح للمدرسه ولازم كتبه وكاشخ بلقميص الابيض