≤بسم الله الرحمن الرحيم≥
#أزهري...
#البارت|الثالث|~
#ل:إِيلاف الابراهيمي
صلوا على محمد 💜
.
.
.
كنت اعرف حبك عذاب لكنني استمريت...
كنت اعرف امتلاكك صعب لكنني بقيت...
كنت اعرف كرهك لكنني أحببته...
كنت اعرف غيضك تجاهي لكنني عشقته...
لو كان حبك ذنب وأستطيع أن اتوب...
ولو كان حبك عبادة لكنت اول داخلين الجنة.
.
.
.
چاي اتحظر بعد ما عرفت الموضوع الي يخطط اله يوسف وهو عزيمة بالمطعم...فرحت لان حسيت اكو احد يفكر يسعدني وهو يوسف أحسه رچال چبير ولا چنه طفل يخاف عليه ويحبني ودائما يذكرني...
شكد حلو لو چان عندي اخ او اخت تضل الي من ريحة اهلي على الأقل اكول ضلي اهل...
بدلت ونزلت وصوت الكعب قبلي احب ارتداء الكعب مو لان يطول لان ينطي انبطاع عن قووة الشخصية،وهو يچبرچ هم تمشين عدل...
جان يوسف يحب اللبس الرسمي الشيك نسخة أبوه المصغرة جانوا لابسين ملابس مقاربة لبعض...
ابتسموا الي من نزلت تقدم هوو ومد أيديه باوعت بعيونة وحطيت ايدي بأيده ونزلت، قابلتنه امه وهي تباوع علينه وابتسامة صادقة على وجها..
اعرف شنو يدور ببالها بس مستحيل يتحقق..
وصلنه للمطعم من شكله الخارجي مبين فخم دخلنه. اسقبلنه نادل وهي ينحني امامنه دلانه على الطاولة وكعدنه جاب النه المنيو وهنا بدت المشاكل..
:بابا اني اريد برگر اطيب من المرگة والتمن..
: ابني برگر ندري شحاطين بي ما حاطين مدري لحم چلاب مدري زمايل..
صدق لعبت نفسي واچيت اتقيأ بسبب التوصيف القذر الي وصف بي البرگر..
كلت:على بختك چايبنة ناكل لو تلعب نفسنه شنو هيچ تحجي..
ابتسم وبرود گال:لا مو قصدي بس التمن والمرگ واضحة مكوناتهم ذيج هي بس البرگر ادري شنو بنص العچينة..
يوسف:ويجوز اللحم الي بنص المرگ ما ذابحينه على طريقة الإسلام..
وباوع بمگر لابو..الصراحة انصدمت من كلامه بس عرف يسكت ابو وبعد مشدات كلامية كل واحد طلب على ذوقة يوسف برگر وإني فتة بشاورما الدچاچ وهو مرگ بامية وتمن..ناگل اني ويوسف ويباوع علينة بشمئزاز صدگ لعب نفسي ذبيت الخاشوگة وكلت:
كافي تباوع علية تره والله سديت نفسي شبيك ما صارت طلعة..
كال:اسف مو قصدي ودنك رأسه وكمل اكله..
حيل هادء هوو وابدا ما باوع النه وراها ،ميناقش ابدا وميعصب يحاول يضل هادء وهاي الصفة حيل حلوه يعرف يتحكم بأعصابة..
رجعنا للبيت بعد ما تعشينة ويوسف ما شاء الله ابدا ماسكت بس الصراحه سوالفه تخبل...
چاي انزل من السيارة هو نزل قبلي ومن نزلت ضل صافن بعدني ما فايته وصاحني...
گال وعيونه تتفحصني:بعد لا تلبسين بنطرون..
فكيت عيوني على وسعهم وعصبت من صدگ لان لبسي مبي شي بنطرون كتان اسود وقميص نيلي وشال اسود وگعب اسود..
گلت:عفواا شكلت..
گال:مثل مسمعتي انتي محجبة على شنو هل بنطرون اكو بدائل تره..
لو بيدي الطخه بحچاره على صماخة...
گلت:بس ما اظن لبسي مغري لو ضيق لو شفاف..
گال:لا استغفر الله بس عليش هل بنطرون..
مچاوبت بشئ بس نظراتي جانت واضحة خزرته وفتت..
والله يا الله على لساني اگله لعد ومرتك الي چاتت سافره ولبسها گله فوك الرگبة صدگ حزت بنفسي بس مدري شلون تمالكت نفسي ومحچيت وگلت على شنو اعير اله اهتمام وانطي اكبر من حچمه...
.
.
.
قلتي لي أن رسالتك ستكون علاجا لاشتياقي..
لكنني عندما اقرأها كأني اضع الملح على جروحي..
وتهيج جميع مواجعي تنزل دموعي حارقتا وجهي..
واذوق ملوحتها عندما تصل إلى شفتي..
كيف لي أن استطيع نسيانك..؟؟؟
كل ما حاولت جميع محاولاتي تبوء بالفشل...
واقل ذكرى،او حادثة،او ذكر اسمك،يرجعني الى نقطة البداية.
.
.
.
استبرق:حاولي وياه تقربي اله، ليش بسرعة تقطعين الامل؟
كلت:طلع من گلبي بعد طاب گلبي منه ماضي وانسه..ضحكت وكلت حب مراهقة..
استبرق:انتي ليش ضعيفة ليش متتمسكين بالاشياء الي تحبيها وتخليها اتضيع من ايدچ..
تحاشيت النظر الها خايفة تشوف طبقة الدموع الي اكتسحت عيوني ولفهتي واحنه چاي نحجي بموضوعه..
:عن يا ضعف چاي تحچين!!؟تره مرتين اعترفت مرتين وهو شنو سوه غير يركض وراها وإني گالي:بطلي سوالف المزعطة تكبرين وتنسين وإذا حيل حيل ما كدرتي وطلع حبچ صحيح سمي ابنج على اسمي..وكرصني وراح.
وتكولين الي اني بسرعة اتخلى..
استبرق:بس هي هسه راحت جربي من جديد..
:كل عقلج تحجين لو اموت ما اعيد التجربة خضتها مرتين وبهل مرتين رجعت اجر بذيول الخيبة وراية،فگني عني ياخة وسدي الموضوع..
استبرق:تمام تمام على راحتج بس تردين نصيحتي لو اني منج والله الزك اله لزگه مثل ظله اصير اله اخلي گوه گوه يحبني..
:تسلمين خلي نصيحتج الج..
استبرق:گبر يطمچ مو صوچ صوچي..
عافتني وكامت وإني عبالك فتحت على جروحي القديمة وحطت عليهن قاصر اني ما نسيت بس جنت احاول انسى بس چتي استبرق وهيچت كل مواچعي شكد صعب الرفض من شخص تحبة،والاصعب يرفضك علمود شخص آخر يشوفة انو هو احسن منك اني عشت هل تجربة مو مره مرتين هم وبالمرتين أتلقى رفض كل مرة اقوى من الي قبلها..
اذكرت اول مره اعترفت بيها چان عمري بوقتها ١٥ سنة چنت مراهقة وطايشة وبدون تفكير اعترفت اله...
:اووووكف..طلعت اركض وراه وصحت اله يوكف..صد عليه وگال ببتسامة:
ها يحلوة شعندچ..
توترت فوك توتري وكلت بدون مقدمات:
احبك..
گال بضحكة:وإني هم احبچ..
كلت:لا مو هيج اني من صدك احبك..
:هههههههههههههه بطلي سوالف المزعطة تكبرين وتنسين وإذا حيل حيل ما كدرتي وطلع حبچ صحيح سمي ابنج على اسمي..وكرصني وراح.
مسحت دموعي وإني اطرد هل حادثة المؤلمة من رأسي شكد حاولت انسى بس مكدرت ورجعت اني الخبلة وبدون كرامة ارجع اعترف اله مره ثانية كعدت اتذكر الحادثة، ستوني صافنه وصاحتني استبرق نزلت دا اشوفها شتريد..
:هاااا استبرق شتريدين؟؟
:اخووي العينتين مشتهي من ايدچ كيكه واكوله اني أسويها الك يكول:لا متسويها طيبة..وتقلد علية.
ضحكت وكلت:ميخالف هسه ابدي بيها...وبديت اسوي بيها وهي مثل ظلي وين ما اروح تلحكني تكول اريد اتعلم سر المهنة علمود ميضل يصنف علية حطيتها بالفرن وره نص ساعة فاحت ريحتها بالبيت گله..
استبرق:اخخخخ والله ريحتها ريحة مخدرات..
:ههههه والله خبلة انتي..
:شنو هل ريحة الطيبة..
:سوتلك المدام كيكة مو ما تعجبك كيكتي..
:هههههههه اي والله الصراحة كيكچ ضخر وتلعب النفس ولا تنأكل..
:اووووي هاي عود دارس علم نفس ولا تعرف تتعامل متكول اجرح احساس اختي المرهف..
:اووي صدقة دولي ام احساس مرهف،هاي اذا اكو احساس علمود اجرحة..
صافنة عليهم واضحك حلوه علاقتهم حييل..باوعلي وابتسم وإني راسا صديت سويت نفسي اشوف الكيكة..
استوت وحظرت استبرق الچاي الصراحة محد يعلى عليها بالچاي ابدا..
التمينة بالحديقة اني وخالو ومرت خالو واستبرق وهو چان يحچي بالموبايل وكام خالي يحچي عليه:
حرام من شفته وشافني لازم هل موبايل ميهده ابد عبالك رويحته بي..
كالت مرت خالو:شتريد منه ياعيني هسه شوي ويجي...
اجه والتمينة كلنه ضحك وسوالف حلوة اللمة ما اكول نسيت ماما بس الصبح التهي وياهم لكن من يجي الليل واخخخخ يالليل كل الذكريات تنزل على عقلي عبالك زيت حارر..
.
.
.
اي حبٌ حبك...؟
واي عذابٌ عذابك...؟
وصلتُ اعلى مراحل الحب..
وهو الشغف..
لكن ماذا فعلت انت؟؟
اسقطتني من أعلى سماء الي حضيض الارض.
.
.
.
:كاعدة استبرق تشوفني بملابسها مال الكلية لانو الدوام على الابواب اعرف غايتها من هل فعل شنو..تحاول تقنعني ارجع ادوام بس بطريقة غير مباشرة..
هي اكبر مني بسنة يعني راحت مرحلة ثانية كليه تدرس هندسة طبية..
استبرق:يولي اني حييل متحمسه للدوام الكلية تجنن جنة جنة على أرض الواقع وتونسين ويه الكروبات كل يوم سفرة وكل يوم طلعة حيل حلوة
وحتى السنة الملابس تخبل تحمسج تخليج ادوامين..
:سوسة..
:هااا..
:محاولتج بائت بالفشل..وابتسمت.
:ها يعني هيچ..
:اي هيج، شفتها ضايچه حضنتها وكلت الها لا تشلين هم اني هيج مرتاحة..
هي ما كالت شي ابتسمت وراحت..
اني قدم الي خالو على كلية كال علمود خاف اعلى المعدلات السنة الچاية انتي ضامنة كليتچ..
.
.
.
وكفت كدام الباب وكل المواقف،الذكريات،الضحكات،والعركات،المشحنات..
كدامي مرن مره وحدة،ليش سهل الفقدان بس صعب النسيان..
ليش سهل الحب بس صعب الكره..
نزل خالي وابنه من السيارة وهو يباوعلي..
تقدمت وحطيت المفتاح بالباب وفتحته،لفحتني ريحتها أو مفتحت الباب كعدت بالطرمة وإني ابچي:لييييييش ياربي والله اختبارك صعبببب،امييييي وينج بنيتج ادورلج زهرتج تعبت يا امييي.
كمت وهمه يباوعلي وعيونهم مغورگة..
فتحت باب المطبخ وفتت اباوع واكول:هنا لعبت،وهنا اكلت،وهنا وكعت،وهنا هي چانت تطبخ،وهنا هي جانت تنظف،وهنا كعدت بحظنها وهي توكلني..
تقدمت وإني اتملس كلشي وبهدوء دموعي تنزل ،فتت للصالة وإني اباوع بكل رگن بيها،باوعت للمگينة وبصفها الدشداشة الي جانت تخيط بيها واعتازت خيط وراحت تجيبة بس ما رجعت وكملت خياطها..
:ماما ارجعي مو انتي متحبين تخلين شغلة على النص حبابة ارجعي وكملي الدشداشة..باوعت وإني اشوفها كاعده على القنفة وتباوع على التلفزيون ويمهاا ماعون حب تقدمت ناحيتها صدت عليه وكالت:هاا ماما جيتي تعاي حبيبتي تقدمت علمود احظنها بس اختفت بجيت بصوت عالي وكلت:ماماااااااا وينچ جوعانة ما استوة الغدة..
باوعت للمطبخ الي اجاني منه مصدر الصوت،شفتها وهي ماده رأسها من الباب كالت:يخسه الجوع يروح امچ ثواني ويمچ الاكل..
ركضت دا احضنها وهم اختفت..
كلت وإني ابچي:ماماااااااا صدريتي وصخه حبابة اغسليها عندي امتحان..
مدت رأسها من بابا الحمام وهي شايلة قطعة ملابس وتكلب بيها:
جيبها ما دام جاي أغسل الملابس السود..
ركضت الها بس اختفت كعدت وإني ابچي:ماما ليش تروحين حبابة عندي امتحان صعب درسيني.. ملكيت رد ورجعت احجي:
ماما حبيبتي انتي ادري بيچ زعلانة لان منظفت الغرفة ماتي وعد بعد ما اخليها تتهوس..
ماما تدرين نادين تزوجت واحد طاك والله حضوض..
ملكيت جواب وعطت: لييييييش متردين ماما ردي عليچ الله ماما بيتج ماكله التراب تعالي وشوفي حاله،وبتج اكلها الحزن على فراگچ تعاي وشوفيها، خالي جان منصي رأسه ويبچي وهو ما شفته يمكن بره واكف..
خالو:يله امشي نروح..
مچاوبت بس توجهت لغرفتها وفتحتها وريحتها تغلغلت لروحي غمضت عيوني وإني اشتنشق عطرها فتت على كيفي لان شفتها متمدة ونايمة على السرير خفت تكعد تقدم على كيف اغطيها واختفت..دفنت وجهي بابمخدة وعطت:لاااااا يروحي انتي لتروحين ملحكت اشبع عيني منج والله مشتاگتلچ ماما ليش رحتي وعفتيني ماما انكسرت وراچ محتاچتج والله ما اشتاگتي الي؟؟ ادري بيچ اشتاگيتي الي بس انتي زعلانة مني..ضحكت ودموعي تنزل:ادري بنفسي غالية عليچ..بچيت بصوت:
غالية عليچ بس شنو الفائدة وانتي عفتيني.
رحت للكنتور وسحبت منه دشداشة وحضنتها وإني ابچي ثنيت على رگبي واشهك:فراگچ تعبني واشتياقي الج دمرني ليش انتي رحتي گبلي ليش مو اني گبلچ صوتج،وصورتج ميفارگن بالي لو ثانية.. كمت اعاتب بربي:
ليش هي باذات اخذتها مو تدري معندي غيرها،ليش ما اخذت من الساسين الحرامية ما جيت اله عليها،مو اتكول وأما اليتيم فلا تقهر بس محد قهرني غيرك لا اتذيها فوتها الچنة لان هي چانت تحبك..مجنت ادري شنو احچي كمت اهلوس وابچي و احچي بكلام مو مفهوم فات خالو وكومني من الكاع وسندني عليه ومشاني طاقتي نفذت ما بيه حيل انطق شي بس ضليت اهلوس بكلمات مو مفهومه وضليت حاضنه دشداشتها..باوع عليه بشفقه، حگه والله لان حالتي يرثى لها صعدني خالو بالسيارة وصعدوا همه وصلنه للبيت وتلكني استبرق وخالة ايمان مرت خالي محچن شي لان مبين حالتي مو مال أحد يحچي شي صعدني بغرفتي وضلن يمي لحد ماغفيت ومهديت دشداشتها أبداً.
.
.
.
: حالتي بعد زيارة بيتنا وهاي جانت اول مرة أزوره بيها بعد وفاة ماما انتكست حيل ورجعت ازود من قبل ما رجعتلي الهستيريا بس صرت انعزالية بشكل كبير وحتى ما احچي ويه استبرق بس ويه صديقات على الموبايل..
هيفاء من صديقات المقربات حيل وكل اسراري تعرفها وتحبني وتخاف عليه بشكل..
وصلتني رساله على الواتس فرحت علمود اشوف من الي رسل وجانت هيفاء مدك عليه لأن تدري ما راح احاول..
.
هيفاء:هلاو حبيبي شونج شخبارج؟
:مو زينة..
هيفاء:ليش اسم الله؟
: هيفاء تعبت حيل حالتي النفسية حيل جاي تدهور..
هيفاء:عمرري انتي شبيدي عليج،زين احچي ويه ابن خالج مو هو طبيب نفسي؟؟
:اي بس اني ما أريد احجي وياه وهو حتى ما كلف على نفسه وسئل..
هيفاء:ليش انتي مو تكولين حنين عليه؟
:لا حبيبتي حاير يريد يرچع مرته وحتى مو بحالي..
هيفاء:يااا هو مو مطلقها؟؟
:حصل فتوة مدري شنو والشيخ كاله يصير..
هيفاء:عاد مرته زينة لو حقيرة..
:هي حبابه ومثقفة وكافية خيرها شرها..
هيفاء:اييي خوش لعد من صالحچ علمود محد يضوچچ..
:اي والله ما عايزه مشاكل خليني بحال مشاكلي النفسية..
هيفاء:حياتي انتي سلمي امرچ بيد ربچ وهو يحلها..
:ونعم بالله،يله حبيبي اني رايحه..
هيفاء:الله وياچ ديري بالچ على نفسج ولا تقطعين.
:أن شاء الله.
.
كمت توضيت وليست ملابس الصلاة وصليت ركعتين سنه وثلاث ركعات وتر وكعدت ادعي ربي بكل خشوع وتذلل:
الهي انته اعلم بحالي ريحني وريح گلبي اني تعبت والله هي ماتت وارتاحت وإني الي تحملت العواقب،ربي ما أريد انساها بس ريحني من ذكراها المؤلمة الي كل ما تمر على بالي تسبب الي ازمات وكوراث بكلبي وعقلي،ربي انته اعلم بحالي ريحني وريح گلبي.
.
.
.
امطار غزيرة تمطر على قلبي لتجعله يزهر..
لتأتي انت وتشب النار في قلبي وتقتل ازهاره.
.
.
.
كعدت الصبح ثاني يوم وإني اسمع صريخ جووه،نزلت ركض الصريخ جاي من المطبخ فتت واول ما فات نكسر جوه رجلي كلاص وكرد فعل رجعت خطوة ليوره،اباوعله الوجه احمر واليدين مجرحه والكزاز مالي المطبخ اول مره اشوفه بهل عصبية هاي خفت حيل وحتى ما تجرأت اسئل شصاير، عاط وكال:
والله والله والله هاي ثلاث مرااااات والي خلللللق السماااااء اذا قبلت اذبحها على قبلة اليهود..
.
.
.
هلا والله يالغالين، شونكم يارب تكونون بخير 💕
كم طن دموع بجيتوا والله اني طنون مال دمع😭😭حيل انقهرت على بطلتنه.
أولاً:منو تتوقعون الشخص الي اعترفت اله بطلتنه بحبها وصدها.
ثانياً:تتوقعون حاله بطلتنه ترجع مثل ما هي لو تزيد.
ثالثاً:وشنو تتوقعون الكلية الي قدمت عليها بطلتنه.
رابعاً:وشنو سبب غضب بطلنه؟ومنو الي يريد يذبحها وشنو السبب.
وبس والله شاركوني ارائكم جوه بالتعليقات٠
.
.
مودعين وربي يحرسكم ميضيع الي يم ربي 💜.
#للكاتبة:إِيلاف الابراهيمي.
أنت تقرأ
أزهري ||باللهجة العراقية||
Roman d'amour🔴{مكتملة} من انا؟!انا التي سخرت لها الأقدار حياة غير الحياة العادية... من انا؟!هل انا اللقيطة، ام اليتيمة، ام المتشردة، ام انا فرد زائد في هذا المجتمع ليس لي اي فائدة أن مت ام عشت... اشتقت ليس لاحبتي الذين فارقوني، بل اشتقت لروحي الضائعة اريد ان ار...
