أزهري ||باللهجة العراقية||

البارت|الخامس عشر|~

≤بسم الله الرحمن الرحيم≥

#أزهري...
#البارت|الخامس عشر|~
#ل:إِيلاف الابراهيمي
.
.
.
لا اريد ُ التخلي عن من كانوا كشمعة لي في حياتي..
والان حان وقت اطفأ الشمعة لان الليلة انتهت..
وحل مكان ضوء الشمعة ضوء النهار..
مغامرات الليل انتهت عندما تم اطفأ الشمعة..
لكن بقيا الشمع التي سقطت على مكتبي لازالت موجودة..
لذلك ليس هناك نهاية حتى وإن انتهى.
.
.
.
فات يرعد وكف گبالي وعاط بيه..
أبو يوسف:انتي شنوووووووووو من يا طينة مصنوعة هااااا جاوبي..
زهرة:شبيك انته تره ما جااي افهم شجاي تكول..
التموا خالتي وجدة ويوسف على أثر صوته العالي..
جدة جديلة:شبيك شعندك ترعد يواش يواش فهمنه شسالفة..
ابو يوسف:هايي ما يغزر بيها كلشي كللللللشي ما يغزر لو اشعل الها العشر اصباع واصب نفسي من ذهب واهديهااااا الهاااااا هم ما راح تفرق عدهااااا..
خالتي ايمان:يمه وليدي شمسوية زهرة..
صدت عليه وگالت..
خالتي ايمان:يمه شبيج شمصخمة شمعزية احجي..
عطت بيهم وگلت..
زهرة:شبيكم انتوووووو شمسوية قااابل گاعدة وساكتة..
صديت عليه وگلت..
زهرة:احجي اطربني سمعني شمسوية اني..
گال وهو يكز على سنونه..
أبو يوسف:ليش كايلة ل لابان انج راح تعيشين يمهم..
هاااا احجي شمقصرين أحنه شو مداريج مثل المي بالصنية..
انصدمت اني شوكت كايلة هل حجي بس محد انطاني فگة ادافع عن نفسي..
جدة جديلة:اياااا ناكرة المعروف يول انطلع اللگمة من حلگنة ننطيها الج هاي تاليتنه.. بس هناك حلتلج العيشة مخليج على حل شعرج..
خالتي ايمان:ليش يمه زهورة ضوجناج بشي بدر منه شي ليش تسوين هيج مو انتي أمانة صدام والله من اشوفج اشوفه ليش يا امي تردين تعوفينه وترحين..وگامت تبجي..
عاطت استبرق..
استبرق:انتو شكووووو اتوسلون بيها يروح چلب يچي عشرة الي مايريدنه ما نريده..
يوسف جان يباوعلي بنظرات اقل ما يمكن اگول عليها حاقدة..
باوعت عليهم گلهم ودموعي تنزل رأساً صدقوا كلام لابان ولا واحد طلب مني تبرير..
زهرة:خصتوا كلامكم.. اسفة اقصد خلصنتوا اتهامتكم..
اني ما حاجية هيج حجي ولا گايلة لاي واحد هيج لا لابان ولا غيره..
اني ما اعض الايد الي انمدت الي على گوله جدة..
ولا انسه فضل خالي صدام على گوله خالة ايمان..
ولا اني ما اريدكم على گوله استبرق..
هسه عرفتوا اني شنو حسافه والله عايشه عدكم مدري شكد واكل من نفس ماعونكم وتجون من اول موقف كلكم توكفون ضدي..
عفتهم وإني ما أريد اسمع أي تبرير لانو ماكو مبرر لهل شي..
صعدت وإني مكسورة وإني ضعيفة لو خالي هنا جان محد يتجرأ يحجي ويتهمني ولو امي وابوي هنا اصلا جان منذليت هيج..
فتحت بابا غرفتي شفت الموبايل كدامي وكل ضعفي تحول لقوة وعصبية جريت الموبايل وإني ارجف من العصبية دكيت على لابان شوي وجاوب..
لابان:هلا شصاير الي...
ما خليته يكمل عطت بي..
زهرة:انننننته شلللون تحجي حجي اني ما حاجيته شلللون تلفق عليه هي كلام..
لابان:هااا فهمت ما داكة علمود سواد عيوني داكة لان الافندي السي سيد زعلان مووووو..
لعد شكد حقير هذا الي وصلج الحجي ما عرف يحجي بدون ما يزود..
زهرة:اسكتتتتت لابان انته گايل اله اني اريد اعيش وياكم اني شوكت حاجية هيج هاااا..
لابان: هههههههههههههه،شكد جذاب كالج هيج بالحرف الواحد؟؟
زهرة:شنو تستهزء حظرة جنابك، وبعدين اي كالي هيج بالحرف الواحد..
لابان:اني ما كلت هيج اني كلت اله انو تره لو نريد ناخذ زهرة تعيش يمنه انته متكدر تمعني هو استهزء وگال منو يكول زهرة تقبل تعيش يم كفره..
اني شاط دمي وكلت اله لا تقبل وما عدها اي مانع سالني انته سألها كتله اي وهذا كل ما في الأمر، يا روحي..
عفت كلشي وركزت على كلمة، كلمة نستني كلشي ونستني سبب اتصالي ونستني تبرير لابان..
صحيت على روحي وكلت..
زهرة:والله لابان كال كفره؟؟
لابان:اي واليسوع واذا زيدت حرف كون الرب ياخذج مني..
ما عرفت شجاوب بس الي كلته هو..
زهرة:اسفه اعذرني وسلملي على عمو وعمه وإيلنور..
وسديت الاتصال من دون ما اسمع جوابه حتى..
زهرة:ليش هيج يدك گلبي كلمتين خربطن كياني..
اني ولابان ما النه اي طريقة لالتقاء قلوبنه..
عشقنه مُحرم حرام احبه وحرام يحبني..
هو الحب هيج يعذب لو اني ما عندي اي حظ بي..
يعني هنه حرفين(ح،ب)ما اتوفقت بيهن..
يله هي ظلت عليه لو عندي حظ جان اني عايشة يم امي وابوي..
.
.
.
نزلت وإني ارعد من العصبية نار وتحررك..
وكفت بنص الصالة وعطت..
زهرة:وينه ابنكم الشريف الصايم المصلي ويننننننه..
طلعت خالتي ايمان واستبرق من غرفة خالتي ايمان وجدة جديلة من غرفتها وطلع الشفية هو ويوسف من غرفتة..
جدة جديلة:هاااا زهرة شصاير شبيج حسج يلعلع..
صديت عليه وكلت بصوت عالي وعصبية..
زهرة:هااا يا مسلم يا شريف يل تمشي على اخلاق الرسول (صل الله عليه وسلم) يووووول سويت المسيح كفرة..
باوعلي وهو فاتح عيونه على وسعهم وشرايين كصته برزت من العصبية..
ابو يوسف:انتييي منو كالج هل حجي!؟
زهرة:لا والله انته هذا الهامك!! منين عرفت الموضوع؟
ما همك حجيك ولا همك كفرك..
هذا يعتبر كفر يا مسلم..
انته شدخلك لكم دينكم ولي ديني.
ولا فوك كل هذا تزود حجي وتنقل حجي وتكول المسيح كفرة..
تقرب مني ولزمني من شعري من وره الحجاب..
أبو يوسف:عنددددج رقمه موووووو..
عندج رقم هل گواااااد وخابرتي وهو حجالج كلشي...
منين جبتي منيننننن اني مو شكيته الج..
خالتي ايمان:هدددددها يووول هدددها والله اتبرى منك..
والك أمانة ابووك عووفهاااااا..
هدني وگال بصوت عالي..
أبو يوسف:هااا هاي رحتي اشتكيتي عنده وكلتي اله شكك الرقم وهو ما صدك وانطاج واحد جديد علمود يگ.. وياج..
فتحت عيوني على وسعهم رفعت ايدي وضربته راچدي..
كلت وإني دموعي تنزل ورفعت ايدي وإني اهدد بي وايدي ترجف من العصبية..
زهرة:والله بعد احجي هيج حجي والله اموتك اني زهرة مو وحدة من التعرفهن..
اني تربية ملاك وصدام مو اني الي تخون ثقة صدام الي انطها الي حتى لو هو جوة التراب..
بجيت ونسيت كل الموجودين وكلت..
زهرة:وتكول احبچ!!
الي يحب ميسوي هيج..
الي يحب ما يتهم حبيبه بأبشع اتهام..
او يتصرف وياه بدون ما يسمعله..
او ينادي باقذر ألفاظ..
كلتها وارجع اكولها انته متحبني انته تحب كلشي يخصني الا اني ما تحبني..
عفتهم وصعدت وهمه علامات استفهام براسهم كلهم..
شلت موبايلي وايدي ترجف ودموعي تنزل على الشاشة دكيت على لابان جاوب وقبل ميحجي كلت..
زهرة:لابان الله يخليك تعال أخذني..
گال بخوف وقلق مبين من نبرة صوته..
لابان:زهرتي شبيج منو وياج احجي والله ازوعه حليب امه..
زهرة:ما مبيه شي بس تعال اخذني بسرعة..
لابان:ماشي ماشي ثواني وإني يمج..
سديته من لابان ورحت بدلت شلون ماكان ولفيت الشال وكعدت انتظر اتصال من لابان علمود انزل لان ما أريد التقي بأي واحد بيهم..
رجعتني ذاكرتي الى يوم الي ابو يوسف مد ايده عليه وشلون ضربه خالي وطرده وهسه صار نفس الشي ما ضربه خالي ولا طرده..
بجيت ليش بس اني كل ما استند على شي يروح كل ما اكول ضحكتلي الدنيا ترجع تظلم بوجهي..
بنية ما عدها لا خال لا عم لا ام لا اب لا اخ لا اخت..
عمو جرجيس خطية مقعد ما عليه عتب..
الا خوالي الباقين حتى بفاتحه اخوهم مثل الخطار بس اول ٣ ايام وكفوا وبعدين راحوا بذاك الوجهه حتى مسئلوا بعد حاسبين روحهم خطار خطية بعدهم شايلين على خالي لان ما حظر عرس ابن اخو..
صدگ البطن الوحده يطلع منها الشين والزين..
يعني الي يشوف خالو صدام ويشوف إخوته ما يصدق ذوله اخوه حتى شكلهم مكروه وحقيرين..
حتى على جدة جديلة الي هي امهم ما يسألون..
فزيت على اتصال من لابان رفضته ونزلت ركض مااريد اشوف احد فتحت باب السيارة وصعدت..
صد عليه وگال..
لابان:زهرة عيوني انتي شبيج شو مدري شلونج..
زهرة:ما بيه شي بس حرك السيارة..
مشه وهو يباوع عليه مره وعلى الطريق مره ثانية گال..
لابان: زهرة شبيج شكلج ما عاجبني..
رجيت رأسي على الكرسي مال السيارة وغمضت عيوني وكلت..
زهرة:تعاركت ويه ابو يوسف..
تنهد وما حجه شي وصلنه لبيتهم بعدنه ما نازلين وطلعوا عمه أديل وإيلنور..
نزل لابان وإني نزلت سلموا عليه وبين شكلهن يريدون يطلعون..
لابان:هاا يمه على وين؟؟
عمه أديل:رايحين للسوگ..توصلنه؟
لابان:تأمرين امر،لعد أخذوا زهرة وياكم..
إيلنور:اي شلون لعد هو كيفت لان جتي..
وصدك صعدت وياهم وتوجهنه للسوگ اني جنت ما شايلة فلوس بس البطاقة مال البنك الي من لابان وصله للسوك وگال لابان..
لابان:يمه اني اروح يم ابوي خطية وحده وعود من تخلصن خابرني..
عمه أديل:اي يمه روح عود من نخلص نرمش عليك..
نزلوا وستوني دانزل گال..
لابان:عندج فلوس؟؟
زهرة:اي عندي البطاقة الي منك..وابتسمت..
فتح محفضته وطلع منها هوواي فلوس ما اعرف شكد بالضبط وگال..
لابان:هاج ذني خاف متلكين مكتب مفتح..واياج اياج ترديني تره اموتج..
ما حجيت بس مديت ايدي وأخذت الفلوس حتى شكراً ما كلت اله نزلت لكيت عمه وإيلنور ينتظروني اتسوكنه وإني اشتريت كوومة أشياء طلعت حركة گلبي كلها..
رحنه على محل اشتريته منه ملابس وطلع هذا المحل عنده فرع ثاني بس اخوه كاعد بي عمه أديل كالت راح اروح اني وإيلنور نشتري من الفرع الثاني لان ملكوا بنطرون عنده مثل الي يريدو فكالوا الي اوكف بره المحل لان عيب افوت وإني شايله علاكيك المحل اخوه هذا تفكير عمه ايدل بعد..
ما عارضت وكفت يم محل مال ذهب وهو بسد المحل مال الملابس ووكفت اباوع على الذهب شووي وكفوا مجموعه مال شباب وحد گال..
:يمه فدورة ذهب يباوع على ذهب..
اني على أساس سويت نفسي القوية وكلت باستهزاء..
زهرة:هاي عليه..واشرت على روحي..
همه ظلوا يتحرشون اوني خفت لو ساكته اشرفلي لا اني الي كملت الدافع عن نفسي وكفتهم عن حدهم ولا اني الي ساكته وبالعتها..
ما احس الا الولد مدد بالكاع وابو محل الذهب يضرب يمكن سمعه من يتحارش اني انوب اريد بس المهم كلت هسه يموت الولد واوكع بيها اني كله من وراية..
بس كام ابو محل الذهب طفر الولد هو واثنين شباب وياه..
كام وكف اگبالي الرجال ابو الذهب وگال..
:وانتي الأخرى شعندج واكفه هنا تعرضين نفسج وين اهلج..
رأساً طلعن عمه أيدل وإيلنور وتعذرن من ابو المحل وإني كضيتها الوم بيهم لا وكفني هنا وما خلني افوت وياهن..
صار العصر واذن عاد خابرنه لابان وكال دقائق وإني يمكم وصدك ما تأخر شويه واجه صعدنه وگال..
لابان:بويااااي جايبات اليوم كله شعدجن راح يصير حصار قابل..
وهسه كم يوم وتكولن نريد جديد لان مودته راحت..كالها وهو يقلد صوتنه على أساس..
إيلنور:انته اخر واحد يحجي بسالفه الملابس محد بگدك يشتري ملابس كنتورك يغص ويبلع..
وشكو موده جديده نزلت تروح تشتريها والرب ملابسك اكثر من ملابسي..
هو غلس ما جاوب ضحكت يعني كلام إيلنور صحيح..
وصلنه للبيت ونزلنه فتت سلمت على عمو جرجيس وكعدنه بالصالة..
جان مقابيلي كاعد لابان وعلى يمني عمو جرجيس وإيلنور وعمه ايدل راحت تبدل..
فتحت موبايلي علمود اتصفح بي وصلتني رسالة من نفس الرقم المجهول بس هل مره فديو انتظرت هوواي حتى يحمل الفيديو جنت اتخيل اغنية لكاظم الساهر لان مبين هل انسان يحب كاظم الساهر هوواي..
انفتح الفيديو فتحته..
وهنا جانت صدمتي الفيديو جان اني وعمو جرجيس من يضحك بيه ويدغدني باليوم الي سويت بيه الكيكة لبيت عمو جرجيس..
صفنت هذا التصوير مال واحد كاعد گبالي تذكرت جان بهل يوم لابان گبالي كاعد وجان حيل مركز بالموبايل..
يعني الي يراسلني هو لابان!!
رفعت راسي اله وإني مصدومه باوعلي وابتسم بهدوء وسكت..
رجعت أقره الرسائل السابقة والي هي كلها ادل على انو لابان يحبني..
للحظة جيت انجرف وره مشاعري ونسيت الحرام والحلال..
بس رجعت احاول اصحي نفسي ميصير احبه ما يصير حرام واذا حاولنه وصار راح يصير بينه مثل ماما وبابا ليش ما نتعلم من التجارب السابقة فاحسن حل اني ابتعد وهو يبتعد وكل واحد يعيش حياته بعيد عن الآخر..
فزيت على صوت عمو جرجيس وهو يكول..
عمي جرجيس:عمي زهرة تروحين تزوريبن قبر ابوج كلنه راح نروح..
هزيت رأسي بأي لان احس لساني لحد الان ما استوعب الي يدز الرسائل نفسه لابان..
طلعنه وصعدنه كلنه بالسيارة وتوجهنه للمقبرة دموعي كامت تنزل جانوا يحاولون يهدوني وعبالهم لان راح ازور قبر بابا هيج صار بيه..
ميدرون اني ابجي على روحي الي ما رجعت الي يوم ما ماتت امي..
ابجي على ايام شبابي الي راحت وإني خلصتها حزن وبجي..
وبجيت على حبي لا...... وكرهي اله بنفس الوقت..
وبجيت على حبي المحرم من لابان..
و وفاة خالي الي كسرتني ورجعنتي لنقطة البداية..
شكد سهل انو تنطبع الذكريات بعقلك لكن شكد صعب نسيانها مثل سهوله انبطاعها صعوبة نسيانها اصعب بقاطات..
وصلنه للمقبرة وإني احس اختنكت هنا شكو واحد احبه هنا مدفون..
نزلنه وتوجهنه على قبر بابا اني ركضت وشمرت نفسي على القبر وابجي بحرگة..
ابجي بحرگة طفلة يتيمة..
ابجي بحرگة مراهقة ضايعة...
ابجي بحرگة شابه مخذوله..
ابجي بحرگه بنيه مفارقه اعز ما تمتلك..
.
.
.
عندما تفارق الأهل تحس بالضياع تمشي لتبحث عن الطريق الصحيح لكنك لا تجده!!انا احتاج الى ام تضمني الى صدرها،واباً يحبني عن الوقوع..
جفت دموعي ونفذت طاقتي وانا اتوسل إليهم أن يرجعوا لي..
تعبت وأصبح الحل ثقيلاً عليه..
لم يتعدى عمري الثامنه عشر وتحملت اشياء الجبال لا تحملها..
اي عداله ربي؟؟ انسانيعيش مع أهله ومرتاح ولديه المال ولانل والإخوان والأصدقاء..
وانسان ليس لديه لا اهل ولا مال ولا حب ولا اصدقاء..
اها هي عدالة ربي..
اذ كان هذا اختبار فأنا رسبت به..
لاني لم اعد اتحمل اكثر.
.
.
.
بجيت وشكيت وعاتبت بس ماكو فايده..
ماكو فايده انو يطلع من القبر ويحضني ويواسيني..
عمو جرجيس:بابا لابان ظل يم زهرة واني وامك واختك راح نزور قبر ابو محمد صديقي هو ومرته وجهاله..
لابان:يله روح بويه اني يمها لا تخاف..
ظل يمي لابان انطاني أيده علمود اكوم كمت لزم اديه اثنينهن وهو يباوع على قبر بابا..
لابان:عمي من رخصتك اني اريد اخطب بينتك كدامك واريد انته تكون الشاهد على خطبتنه..
انصدمت ما اعرف شحجي شاكول..
زهرة:بس لابان ميصير يعني..
سكتني وهو يحط إصبعه على حلكي..
باوعلي بنظرات جميلة بيها لمعة حلوه وللهة وحب حسيت نفسي تعمت اكثر بنظراته وجانت حيل عمقية كأنها توصف حبه بس من غير يتكلم وجانت هل نظرات احلى من الف غزل بالنسبه الي ،مثل نظرة ابو يوسف من جان يباوع لزوجته..
شد على أيدي حيل وگال..
لابان:أشهد ان لا اله الا الله وأشهد أن محمداً عبده ورسوله واشهد أن قلبي بين يدك..
.
.
.
هلا والله يالغالين شونكم يارب تكونون بخير وسلامه 💕
اخر بارت على لسان زهرة وراها راح يبدي السرد على لسان بطل اخر..
اعرف النهاية لحياة زهرة يجوز متكون مرضيه للبعض لكن هي نهاية مبهمه ويجوز يتم كشف نهاية حياة زهرة على لسان البطل الاخر والله اعلم لان ما أريد احرك عليكم.
وهسه ياغالين راح انقطع فتره بسبب الامتحانات وان شاء اول ما تخلص الامتحانات ارجع ونختم الرواية سوه..
توقعاتكم شنو..
أولاً:منو البطل الي راح يبدي السرد على لسانه؟
ثانياً:حبيتوا زهرة وشنو رأيكم بقصتها؟
ثالثاً:رأيكم بتصرف ابو يوسف واتهامه لزهرة وتلفيق الكلام؟
رابعاً:رأيكم باسلام لابان؟
.
وبس والله حشتاق الكم هواي شاركوني ارائكم جوه بالتعليقات 💜
.
.
.
مودعين وربي يحرسكم ميضيع الي يم ربي 💜.

#للكاتبة:إِيلاف الابراهيمي.