أزهري ||باللهجة العراقية||

البارت|السادس عشر|~

≤بسم الله الرحمن الرحيم≥

#أزهري...
#البارت|السادس عشر|~
#ل:إِيلاف الابراهيمي.

صلوا على محمد 💜
.
.
.
صدگ جان العشگ نار..
وصدگ طلع حبچ صعب وجبار..
.
.
.
~إسرائيل~لقب نبي الله يعقوب ومعناه عبدالله..
إسرا:عبد،وأيل:الله..
بس ما مطروق اسمي هوواي يمكن بسبب اليهود الي شهوا سمعه هل الاسم او مو يمكن هو اكيد..
صار اسم مكروه بالنسبه النه ونتشائم من نسمعه ودائما الشخص الي مو زين ننعته بسرائلي دلالة على انو هو شخص أخلاقه مو حلوه..
جنت حيل أكره اسمي من جنت بالمدرسة الابتدائية جانوا الاطفال يحجون علي ويكلون انته كافر وانته اسرائيلي ومن هل حجي..
جنت كل مره ارجع للبيت ودموعي عشرة عشرة واشكي واعاتب بابوي ليش سميتني هل اسم باوعلي ابووي وگال..
صدام:وليدي السبع تعرف قصه نبي الله يعقوب عليه السلام؟؟
إسرائيل:لا بس قصه موسى (عليه السلام) ومحمد (صلى الله عليه وسلم)..
حجاها النه مدرسنه..
اتذكر لحد الان شللون حطني ابووي بحضنه وبده يحجيلي..
صدام:هذا نبي من أنبياء الله من قوم إسرائيل سمووا يعقوب لان جان وياه تووم اخ لان ولد وره اخو سموا يعقوب يعني عقب أخاه اجه وره اخوو كبر يعقوب وصار جميل الخلق والأخلاق والناس تحبه وجان يفوت اول واحد للبيت المقدس ويطلع منه اخر واحد لذلك العالم كامت تناديه إسرائيل معناها عبدالله كبر يعقوب وحب الناس كبر اله صار اخو يغار منه جان اخو مو مثله ملتهي بالصيد وعايف العباده..
خافوا عليه امه وأبو فدزوا يم خاله بالعراق..
تزوج خوات اثنين جان قبل بعثه النبي حلال تتزوج خوات وحده جابت اله عشر ولد وحده جابت اله اثنين وام الاثنين جان من ضمنهم يوسف (عليه السلام) جان نبي الله يعقوب يموت عليه ويحبه اكثر من اخوانه لان جان يسمع الكلام وما يعصي والده ابد غاروا منه إخوته وبعدوا عن ابو وصبر نبي الله يعقوب على فراق يوسف اربعين سنه وراها الله انطاه هديه تعرف شنو هي؟؟
إسرائيل:سياره؟
ضحك ابووي بصوت وكال وهو يكرصني من اذني..
صدام:ولك قبل ما جان اكو سيارات..
لا انطاه هديه وهي انو التقى بابنه ولكى وكافأه على صبره..
شووف اني سميتك اسم حيل حلو على اسم نبي الله يحبه والناس جانت هم تحبه..
حجاها ابووي للقصه بطريقه سهله ومسليه يسهل عليه فمهمها..
جنت بوكتها اني ثالث ابتدائي كلت بذكاء رغم صغر سني..
إسرائيل:لعد اني هم راح اسمي ابني يوسف من أكبر ويصير عندي جهال..
.
.
.
صدك لو كالوا الحلو ما يراد
لان يرفع السكر..
.
.
.
واكف جوة شجرة موجودة وره الكلية مكان مابي احد رفعت ساعتي وزفرت بعصبية يعني أحنه جان لازم نلتقي من 10ونص وهسه الساعه ب11وعشر دقايق..
لمحتها جتي تمشي ببطئ ولابسه فستان فوك الحجل بشوي وكعب وفاله شعرها الي واصل لحد كتفوها ابستمتلي وهي تتقدم نحوي صفنت عليها ياربي شوكت تصير الي شوكت اكدر اقابلها كدام الكل مو بالختلات..
آزادي:هلاووو شونك..
سويت نفسي زعلان وكلت من وره خشمي..
إسرائيل:جان لا جيتي..
باوعتلي بابتسامة وكالت..
آزادي:اسفه بس والله الدكتور تأخر يله طلع اخذ وقت زيادة للمحاضرة..
ابتسمت وكلت وإني اباوع بعيونها..
إسرائيل:مشتاقلج..
باوعت لغير صفحه علمود متلتقي عيوني بعيونها الخضر وبيهن خط عسلي..
آزادي:اي صدوك مكلت وين حنروح؟
إسرائيل:كيفج وين ما انتي تكولين اني وياج..
ضحكت وكالت..
آزادي: يعني مثل ما يكولون اني افصل وانته تلبس..
إسرائيل:بالضبط هيج..
.
.
.
كاعدين بمطعم بسيط جدا وگبالي آزادي تاكل بلفة الفلافل اني ابد ما احب هل نوع من المطاعم احب المطاعم الراقية والاكل الغربي بس آزادي جانت عكسي بسيطة بشكل وتحب شكو شي بسيط وإني تلبية لرغبتها جبتها لهل مكان..
خلصت اللفة مالتها وارتاجت على الكرسي وهي اطبب على بطنها..
كالت بضحكة..
آزادي:اااف هسه تمام احس ردت بيه الروح..
إسرائيل:لعد وشوفتي مترد روحج..
ابتسمت بس غيرت الموضوع وكالت..
آزادي: يله عيني حاسب لا عبالك تفلت من العزيمة..
ضحكت ورحت حاسبت وطلعنه من المطعم..
اخذت ايدها بين أيدي جانت أيدها بيضة كطن وناعمه حيل ولابسة بيها محبس على شكل فراشة ضغطت على أيدها عبالك حطير مني ضلينه نمشي ونحجي بمواضيع مختلفة..
وصلنه قريب من منطقتهم هديت أيدها وصرت مقابيلها باوعت بعيونها وكلت..
إسرائيل:احبج آزادي،انتظر منج إشارة علمود اجي اخطبج بس كولي والله بنفس اليوم تلكيني يمج..
ضحكت وهي تكول..
آزادي:باي اسرائيل اشوفك باجر..
ضليت اراقبها وهي تمشي وتدخل بيتهم تنفست براحة وكملت مشي لحد بيته دخلت للبيت وإني حاط اديه بجيوبي وادنن..
إسرائيل:ياطير يا مسافرله وصله هذا الكلام ميت حبيبك گله والليل ايد ما ينام..
فتت للصالة وشفت خالتي ملاك يمنه هي وبتها زهرة الي جان عمرها بذاك الوقت ١٢سنه..
سلمت على خالتي الي جنت اني اكبر منها بسنه ادري غريبة بس جدتي حبلت بيها على كبر..
جنه اني وياها من أحنه جهال حيل قريبين لبعض مثل اولاد العم أو الأصدقاء حتى ينصدمون من يدرون هاي خالتي..
إسرائيل:هلا هاي منو يمنه اليوم..
كامت تلكتني سلمت عليها و زهرة ضلت كاعده تلف بشعرها على أصابعها دلالة على توترها..
كرفضت كدامها ولزمت ايديها وكلت بحنان..
إسرائيل:شونها زهرتنه..
كالت الي بضحكة..
زهرة:زينه الحمدلله..
إسرائيل:اي ودراسة شونها..
زهرة:أسأل ماما اني كله الاولى على الصف..
كرصتها من خدها وادري بيها تكره هل الحركة بس ما اكدر الزم نفسي يم خدودها دائما اشوف صورها لازادي واكول الها اريد بنية مثلها..
إسرائيل:عفية السبعة كل ما تطلعين أولى اجيب الج هدية حلوة..
كالت بزعل وهي تفرك خدها..
زهرة:ما أريد هداياك بس بطل تكرصني..
ضحكنه عليها وملاك رزلتني..
ملاك:صدك إسرائيل تره حيل توجع كرصتك حتى خدها يصير ازرك..
كلت وإني اكوم واتوجهه لغرفتي..
إسرائيل:والله شسوي هي بنتج خدودها تشهي..
.
.
.
لو صبحت بعيونچ..
اهديلج غزل تصفن عليه فيروز..
.
.
.
حسيت على ايد ناعمه تهز بجتفي وصوت ناصي يصيح باسمي علمود يكعدني ما ميزت من البداية بعدين عرفته صوت زهرة..
زهرة عندي محبة الها خاصة من معزة امها احسها مثل بنتي ما شافت من ابوها شي عمرها سنه ونص واتوفه احس شي بداخلي مسؤول عنها بس هي تملك شخصية حيل قوية واحسها صعبة حيل..
رفعت راسي تجاها وإني ساد عين ومفتح عين لان مشغلة الضوة وصاير بعيني..
إسرائيل:زهيرة الف مرة اكلج من تجين تكعديني لا تشغلين الضوة وتكعديني انعمي..
كالت بضوجة من وره خشمها..
زهرة:عفية إسرائيل لا تكلي زهيرة والله اسمي زهرة..
كمت كعدت على الجرباية وكلت بضحكه..
إسرائيل:شبي زهيرة اصلا احلى من زهرة يخبل..
اصلا ناوي اكول لملاك تغير اسمج من زهرة الى زهيرة..
اشو هاي اطلعي اركضي والدموع عشرة عشرة اسمعها تتوسل بأمها لا تغيرين اسمي خربت عليها من الضحك كمت غسلت ولبست تراكسودي وطلعت علمود اتعشة..
لكيتها لابده بحضن ابوي، وابوي يسكت بيها ويكول الها اني أعلمه..
فتت اضحك سلمت وابوي استلمني دگ رزايل..
صدام:لك يل جايف تبجي زهرة والله بعد اذا كلت الها زهيرة اشلع اذانك..
شو هاي استوكت بابوي طلعي راسج من حضن ابوي مدت السانها وكالت..
زهرة:نننن اذا اني زهيرة فانته عزرائيل..
سويت الها بسطية بأيدي وكمنه نتعشة وإني زردمت عليها العشة خطية كل ما ترفع راسها تلكاني مخنزر عليها..
ايمان: إسرائيل عوف البنية تاكل..
إسرائيل:شبيج يمه قابل شمسوي الها اني..
صدام:والله يا اسرائيل اكوم اشلع اذانك عووف البنية..
ملاك:يمه بنيتي راح يوكف گلبها من الخوف..
ضحكت باستهزاء وكلت..
إسرائيل:والله اكص ايدي اذا بنتج العرمة تخاف هاي توديني للشط ترجعني عطشان..
جانت استبرق حيل تحب زهرة نطت من مكانها وكالت..
استبرق:خطية ترة زهرة ما تقصد سامحها..
كلت وإني مسوي نفسي عصبي..
إسرائيل:اذا اجت اعتذرت هسه وكالت بعد ما اعيدها اسامحها..
كامت بخطوات خايفة تمشي تجاهي كالت وهي مشابكة اديها وحده بالثانية..
زهرة:اني اسفه اسرائيل وبعد ما اعيدها..
قدمت وجهي واشرت على خدي يعني بوسيني..
هي باستني صار وجهي بركبتها جانت رطبة وبيها ريحة طيبة حييل..
وخرت مني وإني مسحت وجهي وحاولت ارجع طبيعي..
باوعتلي ملاك وكالت..
ملاك:ها صافي يا لبن..؟
ابتسمت وهزيت رأسي..
دك موبايلي هذا لابان كمت غسلت انقطع الخط رجعت خابرته جاوبني..
إسرائيل: ها لك عار هاي ليش جايب بالفيزياء ٧٠ امده عقلك المحشش..
لابان: هههههههههههههه لك هاي منو كلك..
إسرائيل:ما تخفه علي خافية..
لابان:بداعه آزادي باجر راح اجي عليك ادرسني لان هذا الخميس عندي امتحان..
إسرائيل:والله انته حلفتني بالغالية بس اني كلت الك اجيب اقل من تسعين ما ادرسك بعد هي ساقط لو بس ادري وين عقلك..
ظل يتوسل بيه خووش خليته يذل نفسه ونسيت اني الي داك عليه وشل رصيدي توشل لزمته دك رزايل..
سديته منه وإني اضحك على سوالفه دزيت رسالة لازادي..
💭:شونه حبيبي الحلو صدك زوزو باجر ما راح ادوام لان هذا الحقنه يريدني ادرسه كلت خاف تشتاگيلي تحملي يعني..
سديته موبايلي وإني اضحك اتمنى اشوف ردة فعلها شلون..
كعدت بالصالة جانوا كلهم ملتمين اول ماكعدت جتني رسالة فتحتها جانت من عمري..
💭:شو انته عايش الدور هو منو معبرك اصلا لو تغيب سنه ما اسال عنك..
ضحكت على سوالفها كتبت الها..
💭:ها خوش طلع بيج وفه يعني وره السنه تسألين مو؟
طفيت الموبايل واباوع عليهم شفت زهرة تحوص يم امها وامها تسكت بيها وتقنعها..
إسرائيل:شبيها زهيرة منو وياها..
ملاك:يمعود تريد ترجع اكو فلم يريد يبدي وتريد تشوفه وذبحت روحها اقنع بيها ماكو..
إسرائيل:افففا عليج امشي لغرفتي اشغل الج المكيف والتلفزيون وانطيج حبشكلات وتابعي فلمج براحتج..
هي ما جذبت خبر كامت ركض كدامي..
فتت للغرفة شغلت الها المكيف والتلفزيون وهي صافنة عليه..
إسرائيل:اي زهيرة وين يبدي فلمج..
زهرة: MBC 3 مال سنديلار..
طلعت الها القناة ورحت للثلاجة جبت الها حبشكلات وجيت يمها..
إسرائيل:اي زهيرة تعرفين هذا قصته شنووو..
هي تربعت كدامي وعافت الفلم وكامت تشرحلي قصته..
إسرائيل:يخيتي اذا تعرفين قصته عليش ذبحتي روحج تردين تشوفي..
زهرة:اني احبه حييل وكل ما يبدي اعيده..
ابتسمت على سوالفها ارتجيت على تاج الجرباية مالتي واخذني الواهس صفنت وياها..
هي شوي شوي كامت تتقدم يمي الى ان ارتاجت على صدري انبطحت وحطت رجل فوك رجل وتاكل بالجبس كمت العب بشعرها جان حيل ناعم ولونه تمري على اشكر وطويل حيل ماشاء الله..
ردت اضحك عليها..
إسرائيل:زهرررة شنو هاي براسج قمل..
هي كمزت من حضني بسرعة وكانت تضرب على رأسها وتنفض بي..
زهرة: والله عرفت راح يصير بيه وياي وحده بالصف بيها وكلت الماما تكول عادي بس لا تتقربين يمها كله من وره ماما..
كامت تريد تبجي خربت عليها من الضحك..
زهرة:ليش تضحك والله اني نضيفة لتكول لأحد عفية يكوم محد يحبني..
إسرائيل: هههههههههههههه اسف زهرتنه بس جنت اتشاقة وياج كلشي مابيج يخبل شعرج..
شو هاي انبطحي فوكي وكومي وين اليوجع عض وكتل وكفش وإني خربان ضحك اريد بس افك روحي منها گلبتها وصرت فوكها ورفعت ايديها فوك..
إسرائيل:يووول زهيرة كد تصرفج هذا انتي..؟
هي نظراتها جانت نارية عبالك تريد تفترسني..
زهرة:خاااااااالو صدام الحكني..
عاطت بكل علوا صوتها انوب بس اريد اسكتها ماكو،كمت من فوكها وإني مصدوم مدري منين طلعت الدموع وكانت تبجي اجه ابوي وامي وملاك واستبرق يركضون ظلوا مستغربين حتى اني استحيت من نفسي هسه شيفكرون بيه هم عبالهم مسويلها شي مو أخلاقي..
صدام:احجي شمسوي للبنية وهيج تصرخ خاف كرصتها شي..
إسرائيل:لا والله بس جنت اتشاقة وياها اكول الها بشعرج قمل وهي زعلت..
هموا ضحكوا عليها بس خووش رزلوني وهي الچلبة تباوعلي وترفع بحواجبها ادري بيها مخايفة بس هذا تخطيط منها مدري ليش تكرهني عبالك بايك ورث اهلها..
.
.
.
إسرائيل:من احترك جدك لابان الله حاط هنا عقل لو شنو..
لابان:والله هي صعبة وما تنفهم مدري انته الله يمكن ضارب عقلك بأس تربيع هل هيج ذكي..
إسرائيل:لا والله لا ضاربة ولا مقسمة بس كول اني جنت ادرس خوما مثلك..
لابان:صدك بس اصير سادس تدرسني انته لو من هسه ادور مدرسين..
إسرائيل:ابو الگلگ هسه اطلع من الخامس عود كوم فكر بالسادس..
لابان:لا ليش ما اطلع قابل الي نجحوا احسن مني..
إسرائيل:عفية السبع هيج اريدك..
لابان:اله صدك آزادي شخبرها..
إسرائيل:اااااخ يا هم كلبي ووجعه هل آزادي..
يول كل ما اكول الها شوكت اتقدم الج تغير الموضوع مرمرت كلبي تمرمر..
لابان:يجوز البنية تستحي روح گبل على ابوها واطلبها منه..
إسرائيل:شلوون اطلبها من ابوها گبل غير اشوفها هي جاهزة هسه لا..
انوب هي ما اطلع منها لا حق ولا باطل..
لابان:ايي لعد شعندك مستعجل تره العمر كدامكم على كيفكم..
إسرائيل:يمعووود يا العمر كدامنه هاي اني شوفت عينك ما ظل شي واطخ ال٣٠ وهي هاي السنه تتخرج على شنو مأخريها اشو مكون نفسي من غرفة وعندي عيادة وحتى عندي إمكانية افتح بيت اذا ما عاجبها تكعد ويه اهلي..
طبب لابان على فخذي وكال..
لابان:يله ابو يوسف لا تخاف كل تأخيره بيها خيره..
ودعني وراح لبيتهم شووية ودك موبايلي جان المتصل آزادي..
كلت بيني وبين نفسي والله عمرج طويل ستوني جنت بطاريج..
إسرائيل:هاا حبيبي شونج..
شنووووووو بس بطلي بجي خل افهم آزادي مجاي افهم شي عليج اهدي وفهمني..
شجاااااااااااي تكوليننن..
.
.
.
هلا والله يالغالين شونكم يارب تكونون بخير وسلامه 💕
طبعاً كلش هووووووووووووواي مشتاقة الكم ومشتاقة اكتب هم..
اتمنى اي شخص يقرة روايتي ينشرها ويسوي تاك لأي شخص يعرفه يحب يقره علمود تصعد الرواية وتعرفون اني ما مرة طلبت منكم هيج شي بس تقديرا لتعبي واذا متحبون براحتكم حبايب..
توقعاتكم شنو:
أولاً:شنو رأيكم بإسم البطل؟
ثانياً: حبيتوا السرد على لسان إسرائيل؟
ثالثاً:شنو تعني تصرفات إسرائيل تجاه زهرة؟
رابعاً:شنو الشي الي كالته آزادي لإسرائيل؟
.
وبس والله شاركوني ارائكم جوه بالتعليقات 💜
.
.
.
مودعين وربي يحرسكم ميضيع الي يم ربي 💜

#للكاتبة: إيلاف الابراهيمي.