≤بسم الله الرحمن الرحيم≥
#أزهري...
#البارت|الواحد والعشرون|~
#ل: إيلاف الابراهيمي.
صلوا على محمد 💜
.
.
.
شلون انطاك كلبك تبتعد وتروح
جاوبني بعذر يقنعني من اسال
مات الكلب بعدك موتت فراك
وبس يسمع بجيتك ينهض ويعدل
واذا انت رحت المن اكول اهواك
وبعد ياهو الاوصفه ويامن اتغزل
لغيرك ماتوسل كلبي فد يوم
ولان هو يحبك بيك يتوسل💔.
.
.
.
ما جاوبتها خليها لحالها تحجي..
توجهت للحمام ذبيت ملابسي وفتت جوه الدوش خلصت لفيت المنشفة على خصري وطلعت باوعت الغرفة ما الها محط رجل من الهوسة البيها رجعت لبست نعال الحمام علمود ما ادوس على الكزاز..
بدلت وصفنت هسه شلون الم هل الهوسة..
اول شي رجعت الدوشك مال الجرباية وعزلته چبت البروش وكمت اگنس الكزاز جمعته كله يم الباب انوب رجعت اكنس الجوة الجرباية دنكت وجتي عيني على صورتها وصورتي جريتهن وضميتهن بالمجر الي يم رأسي ما انطاني گلبي اذبهن..
خلصت جبت جيس چبير جبت المكرافة ولميت الكزاز كله وذبية بالجيس فتحت القفل مال الباب وطلعت اباوع البيت هدوء وماكو أحد يمكن نايمين لان الساعه ٢ الظهر..
طلعت للحاوية وذبيت الجيس ورجعت لغرفتي..
اباوع صارت خاوية ما بيها لا ورد ولا غراض يعني هسه صدك صارت مال واحد عزابي..
رميت نفسي رمي على الجرباية واحس اكو برودة بگلبي وراحة سببها شنو ما اعرف..
اكو مقولة بعلم النفس تكول اذا احد عصب بس انطيه شي يكسره رأساً يهدء..
فأني لان كسرت هدئت..
جريت موبايلي ودكيت على دكتور زياد..
إسرائيل: السلام عليكم دكتور..
زياد: هلا هلا حبيبي شونك عاش من سمع صوتك..
إسرائيل:تسلم يالغالي،خابرت اريد احجز موعد يمك اعرف لازم اخابر السكرتير بس والله ما عندي رقمه..
زياد:لا يمعود العيادة ماتك شوكت ما تجي افوتك ولا يهمك..
إسرائيل:اي والله ادري بيك ما تقصر،لعد باجر العصرية اني يمك..
زياد:هي هاي هلا بيك..
سديته منه وصفنت على السگف حاولت انام ما كدرت وما اردي اطلع بره الغرفة واختلط بأحد..
جتي صورتها على بالي على فجأة مع انو اني ما جنت افكر بيها..
ابتسمت..
إسرائيل:راح افضة الج يا زهيرة..
لو لإسرائيل انتي لو للگبر..
باوعت التلفزيون مكسر ما طلعته اذا شافه ابوي عاد يكوم يحجي..
دگ موبايلي رفعته قريت الاسم زفرت بعصبية شعدنه يدگ الظهرية..
جاوبت من ورة خشمي..
إسرائيل:خير لابان اسف اقصد المهندس لابان الموقر..
لابان: هههههههههههههه حلوة هاي مال الموقر..
عوفنه من هل السوالف اريدك اليوم اقصد اشوفك..
تنهدت بعصبية..
إسرائيل:شتريد ما اظن ظل كلام بينه..
واذا الموضوع زهرة فاني اكلك من هسه سده..
وسديت الموبايل بوجهه..
شوي وصلتني رسالة..
💭:اذا ما جيت تره سهل حيل اگول الزهرة ما تصعب عليه بس خليني محترم العشرة الي بينه لحد الان..
الساعة ٤ بكهوة عادل انتظرك..
والله يا الله نوب ما ظل علي بس لابان الي جنت ادرسه يهدد..
تنفست اروح وامري لله نشوف شريد هل المره وإني متأكد هم راح يفتح موضوع زهرة..
.
.
.
عرفت الزعل حجة ونيتك اوداع
واضح ... والبعد كل امنياتك
يل عايفني .. اعوفك سهلة والله
اهزن بالي وانكت ... ذكرياتك
لكن مهلة منك ... رايد الليل
اطوي جروحي واطلع من حياتك💔
.
.
.
فتت للگهوة وإني عيوني على الطولات ادور اله شفته من بعيد حرگ ايديه الي نزعت نظارتي وأخذت نفس واتقدمت اله..
گام بوجهي..
لابان:هلا شلونك..ومد ايديه..
اني كعدت وبدون ما مد ايدي وكتله..
إسرائيل:وعليكم السلام، اي لابان ابدي بالموضوع لان ما عندي وكت تعرف انته وكتي ثمين..
هو كعد ويباوعلي بحقد..
لابان:ما دامك هيج مستعجيل دكتور إسرائيل لعد راح افوت بالموضوع مباشرة..
سويت بأيدي مثل حركة الدولاب وكلت..
إسرائيل:اييي ولي يسلمك عجل عجل..
لابان:بنت عمي، زهرة اريد تعرف عدها عمام..
عمي ما نريد نأخذها يمنه بس على الاقل تعرف مو تظل على عمه عيونها..
كمت وإني اشيل السويج والمحفظة..
إسرائيل:سلملي على الوالد وبعد لا تتصل بيه اذا نفس هل الموضوع لبست نظارتي وطلعت من الگهوة..
تحلم اخلي زهرة تلتقي بيك..
رجعت للبيت بودي الغرفة ما اطلع منها..
فتت وتلكتني استبرق..
استبرق:هلا خوية شونك..
إسرائيل:هلا سوسه..
تقربت منها وحضنتها..
استبرق:لا تسمع كلام امي وابوي اخذ وقتك وظل وحدك صفي بالك راجع نفسك ومن تشوف نفسك جاهز انو تطلع وتكعد ويه العالم اطلع..
بستها من راسها..
إسرائيل:والله بس انتي تفهميني..
حجيت شوي وياها بعدين رجعت لغرفتي انبطحت بملابسي وغفيت لان جنت نعسان حيل..
.
.
.
زياد:اول شي أحنه لازم نعالجك من الادمان..
أولاً لازم نتقطع نهائيا عن اخذ المخدرات..
جاوبت بهدوء..
إسرائيل:اي صار الي يومين تاركه..
زياد:وشلون تحس نفسك؟
إسرائيل:حيل تعبان اريد أخذه بس امنع نفسي..
زياد:اممم راح تحممل فترة بس راح ترجع مره ثانية..
ثاني خطوة تقرب من عائلتك اكعد وياهم انته عندك طفل ما شاء الله العب وياه لهي نفسك لا تظل وحدك..
ثالثاً ارجع لعملك..
بعد ما مكمل وضحكت باستهزاء..
إسرائيل: هههههههههههههه وشلون اعالج المرضى وإني مدمن..
زياد:ما فهمت قصدي لا تفتح العيادة لكن سوي بحوث ادرس ماستر سوي انجاز عملي..
ذني اهم ثلاثة خطوات..
بعدين لازم تروح للمستشفى تسوي تحاليل ويعرفون شكد نسبة المخدرات بجسمك..
وعلى هل المبدئ راح يحللونه الك من خلال مادة البروتوكول..
هزيت رأسي وسكتت انطاني ورقة علمود ما يأخروني راسا يسون الي تحاليل ويعرفون اني مدمن والدكتور دزني لان ميصير اسوي تحاليل خاصة بالمخدرات من غير وصفه دكتور..
رجعت للبيت واني احس روحي ضايع مدري وصلت تلاكيني يوسف حتى ما بوسته بس كتله شلونك وفتت لغرفتي..
ها حياتي غرفة وبس اكل وجبة وحدة باليوم صاير لو جيس بسكت واحد يشبعني..
كعدت ثاني يوم الصبح علمود اروح المستشفى تحظرت وطلعت وصلت فتت لقسم التحاليل جانت البنية محلله اخذت مني دم ولعاب وادارا بولي..
كالت باجر اجي اخذ التحليل واعرضه على الدكترو المختص الي..
شو من دا اطلع صاحتني..
إسرائيل:نعم اختي..
حسيتها خفيفة ومدري شلونها اتموع بكلامها..
:انطيني رقمك علمود من يطلع التحليل اخابرك..
تحجي وتمضحك..
إسرائيل:ما حاجة خيتي هو اني باجر امر أخذه مو تكولين باجر يطلع..
شو هاي ما عجبها الحجي..
عفتها وطلعت ما تولين هو اني ما عايزني بس انتي خليني حاير بالبلوة العندي..
.
.
.
نزعت تضاراته وهو مركز بالورقة مال التحليل..
اصلا اني قريتها قبله نسبة السم الي جنت أخذه بجسمي ٣٠٪ يعني تعتبر نسبه چبيرة..
زياد:خلصنه اول مرحله لازم نبدي بالمرحله القادمه..
وهي البروتوكول ومن بعدها تباشر دورات العلاج النفسي..
وصدگ بديت اروح للمستشفى كل يوم ويحطون ماده البروتوكول بجسمي وصار شهر على هل المنوال ذاب كل السم الي بداخلي وعفته جان صعب انو اكطعه صح مرات حيل أريده واتهستر بس هسه الحمدلله احسن والصلاه التزمت بيها احسن لعبت دور كبير بعلاجي صدك لو كالوا أن الصلاة تنهى عن الفحشاء والمنكر..
ما رحت للفترة مال العلاج النفسي ما اطيقها لذلك العصبية ظلت عندي وما اتحمل اي زله أو سالفه خطأ راسا اگب بوجهم..
فتحت عيادتي بعد غياب طويل جنت عايش على اجار العمارة والمحلات الي عندي ومأجرهم..
يوصلني تقريبا كل شهر منهن اربع ملايين جانوا يكفون وزايد..
رجعت من العيادة وإني احس روحي مرتاح كعدت على الغده شوي ونزلوا زهرة ويوسف..
يوسف الي صار فترة هامله وما احجي وياه صحته يجي يمي اجه واشوف زهرة تباوع علينه ومركزه حبيت اداهرها..
اجه يوسف كعد بحضني حطيت حلكي يم اذنة..
إسرائيل:شوف راح اسوي نفسي اشاورك ومن تكوم راح اكلك عود خلي بيني وبينك لا تكون لأحد ماشي..
يوسف:ماشي بابا..
إسرائيل:عفيه يروح ابوك..
صدك ضليت اسوي نفسي اشاور بي ويوسف يضحك..
گام من يمي و كلت..
إسرائيل:لا تكول لأحد مو بابا..
هو هز راسه وظلت زهرة تحوص تريد تعرف شنو السالفة وكضتها الوگت كله تخزر بيه وإني اكرط عصبيتها..
هاي شنو إسرائيل حبيتها؟
اااه اي حبيتها مو اي حب الحب الاناني الحقير الي اريدها بس الي مستعد اموتها بس متروح لغيري اي لهل درجة واصل..
حركت مشاعر جديدة بداخلي..
ما ادري اذا هي بعدها تحبني لو لا بس حتى إذا متحبني راح اخليها تحبني من اول جديد الي يريد الحلو يصبر على مره مو هيج ابو المثل يگول وإني راح اصبر..
.
.
.
جرحني شكثر لكن عشكَتگ موت
بس بالك تفكّر تجرح إحساسي
حبّيتك نعم بس غلطة الشطار
طلعت مو ألف بس للرقم ناسي
ومابعتك ابد تعرف لان ليش ؟؟؟
مدمن عالعشگ وانت الصرت كاسي
.
.
.
إسرائيل:زياد حل عني ولي يسلمك كتلك محاضرات نفسيه ما احظر بعد تراني كلشي ما بيه وجاي اشتغل وشحلاني..
زياد:اااخ بس من راسك اليابس،شبيك تلهث؟
وكفت وإني اخذ نفس دنكت رأسي ورجعت رفعته..
إسرائيل:ماكو شي بس جاي العب رياضه أركض..
زياد:اي كثر منها تفيدك..
حجيت وياه شوي وسده جانت الساعه ب٧ الصبح الجو حلو اركض بين الشوارع والافرع الي متفوت بيها سيارات وحاط سماعات بأذني ما احس اله طلع كدام وجهي..
إسرائيل:مبين من بدايتها هل الصباح يربي صبر ايوب،خير شتريد يا حضرة المهندس الموقر..
لابان:اخر مهله الك لو اكول الها بنفسك لو اني اكول الها بنفسي..
ركضت وعفته وكفت بنص الطريق وعطت عليه..
اسرائيل:اعلى ما بخييييلك اركبه..
عفته وكملت ركض بس لحاله يحجي اصلا يخاف يجي..
وصلت للبيت راسا طلعت مي من الثلاجة وشربت..
حسيت اكو طرقعه أو أحد جاي ينزل..
شوي وفاتت زهرة ما متبهه عليه تفرك بعيونها شعرها مكنفش فتحت الثلاجة وهي اتهمس ادور مي ضحكت على شكلها طلعت بطل فتحته وهي مغمضة شربت سدت الثلاجة دا تصد لكتني وراها شهكت شهكه كلت طلع كلبها..
إسرائيل: هههههههههههههه اسم الله اسم الله هذا اني شبيج خفتي..
زهرة: يعني بربك واحد ستوة كاعد وما يشوف دربه يشوف عزرائيل كدامه شيسوي مثلاً..
تقربت منها وهي ترجع ليورة لحد ما انلطخت بالثلاجة..
مدينه ايدي اعدل الها شعرها وابعده من على عيونها..
إسرائيل:متأكدة اني عزرائيل..
كامت تممتم وتقطع بالحجي..
زهرة:هاا..لا..يي.يعني..
رفعت الها حاجبي تقربت من وجهها حيل بحيث كمت انتفس أنفاسها الي تطلع من خشمها..
غمضت عيوني ثواني احس شي صحاني بعدت بسرعة..
إسرائيل:ارجعي نامي..
ظلت صافنة بوجهي عطت بيها..
إسرائيل:ما جاي اسمعين انگلعي عن وجهي..
راحت تركض مسحت على وجهي وإني احاول ارجع لطبيعتي فتت لغرفتي اخذت ملابس وفتت اسبح وكل شوي اتذكر الموقف واستغفر ربي..
يعني لو متهور وياها جان ما سامحت نفسي ابد..
ما اردي الوثها وانتهك عذرية شفايفها..
خليها نقية ونظيفة ما أريد انتهكت برائها..
طلعت من الحمام بدلت ونشفت شعري بالشسوار وتوجهت لعيادتي..
جانت استبرق اليوم ما عدها شي عاد كالت ما اروح..
.
.
.
مو اول خساره
خسرت گبلك ناس !!
شي مهضوم
شي ھمزين خاسرها
اكو وادم اتونسک وانت فاگد روح
واكو بعرسک تجي وتنصب چوادرها..
.
.
.
كمت افتح الباب وانصدمت ب لابان راسا دفعني وفات..
لابان:وينها زهرة خل تعرف عدها عمام..
وتشوف خالها وابنه المثالين الي اووووولا ضامين عنها الموضع كلها..
كلن بصوت ناصي واني ادفع بي وأحاول ما اسوي شوشره علمود زهرة ما تحس..
إسرائيل:اطلع اطلع ولي يسلك بعدين نتفاهم..
اطلع لا تسمعك..
لابان:اني ايدها تسمعني بنت عمي واريدها..
إسرائيل:لابان جاي اكلك اطلع مو وكتك ما راح تتحمل زهرة الخبر..
دفعني حيل وهو يعيط..
لابان:بنت عمي ما الك دخل لازم تعرفنه وتعترف بينه..
ما تحملت عطت بي ولزمته من خوانيگه..
إسرائيل:انته شخبلتنه بنت عمي وبنت عمممممي..
هسسسسه اذكرت عندك بنت عم هااااا وين جنتوووا عنها قببل هاا وين جنتوا انتو خنوثوا امشي انكلع عن وجهي ما أريد ادميك وانته بيتي..
لابان:لا والله شو تعال دميني خل اشوفك الأمهات شجابببببت زهرة بنت عمي واحنه اهل ابوها احق بيها واجيت اخذها..
فزيت على صيحه امي ما اشوف اله زهرة طايحه ركضت عليها شلتها وحطيتها بالسيارة صعد ابوي وياي اباوع بالمراية لابان لحگنه والله اذا صار بيها شي اعدمه من الوجود..
وصلنه للمستشفى شلتها ونزلت وإني روحي لايبه عليها..
.
.
.
هلا والله يالغالين شونكم يارب تكونون بخير وسلامه 💕
چثيررررر الشكر الكم صار اسبوع تقريباً الرواية محافضة على المرتبة السابعة فراق الله يخليكم الي ولا يحرمني منكم 😍💕
المهم توقعاتكم شنو:
أولاً: تتوقعون إسرائيل ينتقم من لابان؟
ثانياً: لابان حباً بزهرة جاي يسوي هيج لو اكو ثار قديم؟
ثالثاً: إسرائيل يرجع للمخدرات؟
رابعاً:إيلنور راح تلعب دور؟
.
وبس والله شاركوني ارائكم جوه بالتعليقات 💜
.
.
.
مودعين وربي يحرسكم ميضيع الي يم ربي 💜
#الكاتبة: إيلاف الابراهيمي.
أنت تقرأ
أزهري ||باللهجة العراقية||
Roman d'amour🔴{مكتملة} من انا؟!انا التي سخرت لها الأقدار حياة غير الحياة العادية... من انا؟!هل انا اللقيطة، ام اليتيمة، ام المتشردة، ام انا فرد زائد في هذا المجتمع ليس لي اي فائدة أن مت ام عشت... اشتقت ليس لاحبتي الذين فارقوني، بل اشتقت لروحي الضائعة اريد ان ار...
