أزهري ||باللهجة العراقية||

البارت|الثاني|~

≤بسم الله الرحمن الرحيم≥

#ازهري...
#البارت|الثاني|~
#ل:إِيلاف الابراهيمي

صلوا على محمد💜
.
.
.
كم بيعدون انتم عن نظري ولكنكم الأقرب إلى قلبي،يقولون أن لا أحدا يموت وراء أحد قد يكون كلامهم صحيحا لكن نحن نموت روحيا ليس جسديا...
لا اريد ان احب ولا اريد التعلق بأحد في آخر المطاف سأبقى وحيدة،وتبقى الذكريات دواءا لعلاج اشتياقي...
لاتفارق صوركم عقلي ولا ضحكاتكم مسامعي ولا رائحتكم انفي،
يقولون كلما ابتعدت المرء عن العين يقل حبه!
لما انا يزيد؟
.
.
.
احس نفسي مربوطة عبالي حلم،بس صحيت وصدك لكيتهم شادين أيديه ورجليه بالجرباية تخبلت هسه من صدك كمت اعيط:هي وينكم تعالو فكوني والله اليوم العب بيكم لعب ويننننننكم...
لكن لا حياة لمن تنادي محد اجاني،كمت ابچي واحچي ويه نفسي:
ماما حبيبتي وينج انتي شوفي شسوا بيه بنتج زهرتج رابطيها مثل الحيوان ارجعي الي والله محتاچتچ...
سمعت صوتها تكلي:
اني يمچ لا تخافين..
ابتسمت ودموعي تنزل:صدك امي انتي هنا..
سمعت صوتها وهي ترد:اي والله يمچ تحملي وراح يچي هو يفگج...
ضليت احجي اريدها اجاوبني وماكو ضليت ابچي لحد ماتعبت وغفيت...
سمعت طگه مفتاح رأسا كعدت وفاتت استبرق وراها امها...
كلت:يله فكوني والله الم عليكم المنطقة..
استبرق وهي تحط الأكل كالت:انتي الي جبرتينه نسوي هذا الشيء وبس يرجع هو من السفر نخلي يتفاهم وياج ويعرف علتج شنو تره انتي لا أول ولا اخر وحده تموت امها،بس ضليت اسمع بمثل يكول:مكرچ ركصني يامرة لحد ماشفتة...
:هييييييي انتي شلووون تحجين هي وياي طبعا ما ميتة امج علمود تحسين بلي جاي احس بي ولا ميت ابوج علمود تحسين انج ضعتي وما الج سند بالدنيا وعندج اخ اذا احد يكولج على عينج حاجب راح يوكف وياج ويأخذ حقچ تعرفين شنو شعوووري وإني اشوف امي نايمة بتابوت وجسدها قطعة ثلج وشفتها بيضة،تعرفرررفين شعووري والبنات الي وياي يحچون على ابهاتهم وشنو كالو وشنو سووا الهم وإني ما اكدر اجاوب لان ابوووي دفنته من ١٦سنة جووووه التراب تعرفييييين شعوووري وهمه يسووون اجتماع اولياء امور ويكولن منريد الأمهات نريد الآباء منين اجيب وهو ياحسرة جوووه التراب،طبعا انتي ماحاسه بشعووري امج يمچ وابوج يمچ واخوج هم بس اني منو يمي محد يمي ما ضلي أحد بس ورقه بسسسسس تعرفين شنو ورقه ومكتوب بيها بحبر اسوود لا تحجين شيييي انتي ما تعرفينة...
حچيت كل هذا الحچي وإني دموعي ما وكفت كامو يبچون هي وامها كلت الها بصوت ناصي وإني دايرة وچهي:
وهسه بلا مطرود اخذو اكلكم واطلعوووو..
كالت امها:بس...ماخليتها تكمل وعطت:
برااااااا مااااااريد اااااااشوف أحد بيييكم...
طلعوا ورچعت ابچي بصوت اقوى شوكت يچي الي يفكني لو هو هنا چان ما خلاهم هيج يسوون بيه ليش سافر وعافني بين مجموعة ذئاب يارررب يرچع بأسرع وقت يارب...
.
.
.
يومين وإني مربوطة بس يأخذني للحمام اقضي حاجتي ويرجعون يربطوني چنت ما اعاند انتظرة يچي ويشوف حالتي اي اكل ينطوني ما اكل بس اشرب مي هزلت وضعفت كلش هووواي...
ماحن گلبهم علي ولا شوي بالعكس خلصانات مني انتظر رحمة الله ويرچع من السفر ويفكني...
.
.
.
سمعت صوت هووسة عالي جوة غمضت عيوني بسلام وابتسمت اكيد هوو رجع لان اسمع اصوات سلام ويتحمدون اله بالسلامة...
.
:على كيفكم هنه ثلاثة أيام الي غبت بيهن حتى رحت على محافظة مو دولة...
:حتى لو والله البيت محلو من دونك..
:الله يخليچ الي يالغالية
استبرق:هلا والله خوية هلا والله بنور البيت..
:هلا بسوسة شونج ان شاء الله بخير..
: الحمدلله خووية بخير ونعمة...
:لعد وينها شو ماكو...
:منهي يمه؟؟!
:شنو منهي اكو غيرها عدنه بالبيت...
ضلوا استبرق وامها وحدة تباوع على الثانية ميعرفون شنو يردون...
: ماجاوبني شمسويات بالبنية شمعزيات...
عافهن وهو يصعد الدرج بسرعة لحكنة استبرق وامها حاول يفتح الباب شاف المفتاح من بره محطوط عقچ حواجبة باوع عليهن حس الموضوع بس أنه فتحة وفات...
.
.
.
اسمع خطواته على السلم خطوات امان، خطوات سريعة كأنها متشوقة وهي تصعده لتنقذني اتنظرت هذه الخطوات كثيرا واخيرا سمعتها،اتى منقذي،اتى الذي سيفك قيدوي ويخلصني منها...
.
.
.
باوعلي وگال الهن:شمشويات بالبنية تدرون هذا يسمونه اجرام، وعاط بيهن:
تعرررررررررفن شنوووو معنى اجراااااام...
تقرب عليه وبده يفك بقيدوي اول مفكني حظنتة قوووي وهو هم هدني وبعد شعري عن عيوني،وگال:
شونچ زينة،شنووو سوا بيچ بغيابي؟؟؟
مجاوبت بشئ بس بچيت...هو گام وتقرب منهن وچر شعر استبرق وگال:
شمشويات بالبنية يولن هاي بدال ماتحاولن اطلعوهاا من الحاله الي هي بيها ازودهن يولييي ماصاار الها اسبوع يله رجعت تحچي تريدن ترچعن الها الحالة...
گالت امها:يمه هد اختك خل نتفاهم..
گال:يا تفاهم هاي عود انتي الچبيرررة وهيچ هو انتن خليتن بيها تفاهم...
استبرق:هد شعري الله عليك...
هو هد شعرها،وگالت:والله مسوينة شي بس ربطنها
:لا هم عااااايزچ تسوين شي انوب والله ادفنچ انتي وحية،باوعلي وگال:
شنوو متنطوها اكل ميتة البنية مو حررررام عليچن،هي ستوها طالعة من مصيبة مووو حرام اتزودن مصيبتها...
گالت امه:ابني والله ننطيها اگل متقبل تأكل⁦...
گال بصياح:ليشششش محد خابرني وگال تعااال گولوا الي ليشششش هااا،
ادك واسئلكم عنها تكولن جنها الوردة هاااااا جاووووبن احچنننن..
:ابني والله منگدر الها حالة النفش بالغراض والعياط تكرر عدهاا هواي ومحد يفهما غيرك ما چان عدنا غير هل حل..
:والله بس خل يرچع ابوووي بخير وسلامه من العمرة اله اكوول على كل سوالفچن وهو يتصرف وياچن...
باوعلي وگال:گومي تحظري نطلع
مجاوبت بشئ بس هزيت رأسي كمت علمود اتحظر وهمه طلعوا من الغرفة بدلت وتحظرت والشال ذبيتة ذب ونزلت كاعد هوو بالصالة ينتظرني باوعلي وابتسم وگال:شنوو هل چمال الله..ابتسمت مچاملة،گادني وركبنة بالسيارة من رگبنة بالسيارة التفت إلي وعدل الي شالي ظبة وفوت شعري ولفة الي باوعلي وگال:هيج احلى بهواي...
رحمه اگلنه بمطعم خلصنه ورجعنه بس ما توچهنة للبيت توچهنة للعيادة مالته فتح العيادة مالتة سد الباب وگال:
نامي هناك على ذاك السرير...رحت وتمددت باوعت عليه چاب وردة وحطها يم رأسي ريحتة الوردة كانت حيييل طيبة بحيث حسيت كل اعصابي هدأت وجسمي ارتخة...
كعدت على الكرسي وگال:شكو شي بداخلچ گولي..
طووولت هوواي يله جاوبت،وهو صافن محچة كلشي غمضت عيوني وبديت:
ضايعة،تايهة،يتيمة،خايفة،مشتاقة لاهلي،لبيتي،لغرفتي،لصديقاتي،لكتبي،لضحكتي،لشكلي،الله من أخذ امي ما اخذها بس هي حتى اني أخذني وياها اشوفها بگل مكان وين ما اروح هي
گدامي،اتمنى ترجع وتغني الي:لا تبكي يا صغيري لا انظر نحو السماء...
اغنيها وإني اباوع على السماء واگول الها صغيرچ چاي يبچي يا امي چاي تنزل دموع صغيرچ الي تكولين اله لا تبچي بس هيهات تسمعني،
وچنت من أعثر واكع تكومني وتضحك عليه وتكوم تغني: تاته تواته بنت الحچي خياطه،ونكوم سووه واحنه نضحك،مشتاقة لصوت مكينتها وهو يرن بأذني من تخيط،احبها هواي هوووواي احبها والله...
طاقتي نفذت خلاص بعد مااگدر اتحمل اريد اشم عطرها واسمع صوتها،تخيل انسان متعود تنام على صوته وتكعد على صوته وتأكل من أيده تكعد ثاني يوم بس مگعدت انته على صوته ولا اگلت من أيديه ولا غفيت على ايديه،صعب موو؟وحييل صعب هم..اهلي كلهم راحوا وعافوني كلهم محد ظل الي بس ورقة بيضة مكتوب بيها بحبر اسود وذكريات ظلت محفورة بعقلي متقبل تطلع منه،ليش عافتني مو اني احبها ما فكرت بيه وهي على فراش الموت،اريد اهلي امي چانت بالنسبة إليه أهل چانت هي:الام،والاب،والاخت،والاخ،والچد،والچدة،
راحت ماما وراحوا كلهم وياها محد ضل الي لانو هي چانت كلهم...
اقرب ناسي متحملوني وربطوني علمود يخلصون مني شترچه وانتظر من الغريب لعد...سكتت شووي وبديت اغني وإني ابچي:
.
.
راحوا وماخذوني اهلي ويمكن نسوني
بعدهم يتموني وانا صغيرة على همي
يادنية وين اهلنه وين اهل المحنة
تفاركنه بحزنه ونشف دمعي ويه دمي
بابووي ارچع اصيح وترهم الصيحه على صوتي...
.
مگدرت اگمل وإني ابچي كمت ابچي اقوى فتحت عيوني اباوع عليه مدنك رأسه ويبچي،نزلت رچلية من السرير وتقربت اله وحنتظة حضني قووي هوواي ضلينة متحاضنين واثينه نبچي بعدني وگال:
اني اهلچ والله وإني امچ لاتخافين ما اعوفچ..
:گالوها قبلك هوواي واولهم امي بس وينها هسه هي عافتني،لاتوعد وانته تريد تعوف...
سكت وماجاوب مسح عيونه وگال:
امشي نرچع للبيت ترتاحين...رچعنه رأسا صعدت غرفتي وقفلت الباب بدلت وكعدت على الچرباية چريت دفتري وقلمي وبديت اكتب:
.
.
.
حضنه كان دافئا،وصوته كان حنونا،لمسته كانت رقيقة،ونظراته مريحة...
جميلا ذلك الاحساس لا اعرفه لكنه دافئ،ابتسامة تشرح قلبي،امان،وراحة،واطمئنان احس وانا بجانبه...
وعدني أن يبقى بجانبي أه ه ه كم اتمنى ذلك،هذه هي الحياة يرحل انسان من حياتك ليدخل انسان اخر هذه هي سنه حياتنا وهذا هو مصيرنا.
.
.
.
هدوء فضيع وبرود ابشع،هذا هو هذا الداخلي...
النوم ملجأ الكثير من الناس،لتخلص من الواقع المر،وانا من ضمنهم أصبحت الوسادة بمثابة يد امي التي كنت انام عليها،والفراش حضنها،واصبح السرير امي التي اشكي لها همومي،وارمي بكل دموعي بحضنها...
.
.
.
كلت بغضب مكتوم احاول اكتمة من الكاعدين:
اني ما أريد اكمل دراسة انته شكو لا تددخل راجاءا..
جاوبني بهدوء بس ضغطته على أيده وبروز شرايين رگبيتة عكس نبرة صوته:
فهميني ليش متريدين تكملين؟؟؟تره حرام عليچ هذا مستقبلچ كافي اضلين بهذا الضعف...
كل الكاعدين أيدوا كلامه والهم خالي الي گال:
يا بنتي امچ الي راحت الله يرحمها عزيزة علينه كلنه بس شنسوي هي هاي الدنيا الحي ابده من الميت...
كلت وإني اباوع على فراغ واحرك رچلية يمنه ويسره وفوك وچوه عبالك جاي العب:شكد سهل الكلام بس صعبة الافعال،لاخر مرة راح اشرح الكم لان تعبت نفسيا وجسديا،مااكمل دراسة وامي ماكو منو يشتري الي ملابس الجامعة؟؟وامي ماكوو..
منو يدفع فلوس الخط؟؟وابووي ماكو..
ماچنت مفتقدة ابوي وماچنت احس مكانة خالي...بس من ماتت امي عبالك ابوي مات بنفس اليوم وبچيت عليهم اثنيهم عبالك ستوني دافنة ابووي ولا چن من ١٦ سنة!!
شلون اكمل دراسة وهمه ماكو من يلبسني الروب من اتخرج؟؟
ومنو يباوعلي بفخر من اذب قبعة التخرج؟؟وكأني ذبيت تعبة..
منو راح اشوف بعيونه الفخر والفرحة؟؟وهمه يشوفون الشي الي تعبوا عليه صار هسه لازم يحصلون حق تعبهم.
ليش امثل القوة وإني من داخلي متهشمة؟؟ليش انچذب وانافق؟؟ونحمل بدال الهم همين،هم الانكسار والتحطم الداخلي،وهم تمثيل القوة..
اذا كدورا الي قبلي فاعذروني اني ما اكدر...يمكن راح تكون هوواي ماتت امهم ماسوا مثلچ!!صح لان امهم يجوز چانت ام عادية،بس اني امي غيررر لذلك من راحت انتهت حياتي،لبسي تره مو اني چنت اختاره امي،درچاتي العالية ماچنت احصلها بتعبي لا بتعب امي،حتى شعري الطويل والحلو هذا مو من تعبي عليه هذا من تعب امي،امي بنتني من اصبع رچلي لشعر رأسي...
وما چنت اثق بنفسي چنت اثق بيها لان ادري بيها ما يمگن تخذلني وتخلي الناس تستضعفني...
وتچون بكل دم بارد تكوووولن الي انسي!!!
والحي ابده من الميت!!!
انتو ماچاي تحچون على اي شخص ميت الي جاي تحچون عليها امي تعرررفون شنو امي..هي اي تستاهل ابدي حياتي على مودها وافدي عمري لأجلها...
ماتت بسبب خيط خيييييييط تعرفون شنو يعني ماتت بخيطططط من احچي لاي احد اكيد راح يضحك علية بس والله امي ماتت بسبب خيط عبرت الشارع تشتري بگرة وچتي سيارة طائشة اخذت ما تبقى من انفسها الي چنت اتنفسها وياها...
گلهم چانوا مركزين ويه كل كلمة اكولها،باوعت على خالي جان منزل رأسه وبس اسمع شهگاته،گمت وعفتهم وإني أبرد من الثلج ما نزلت ولا دمعة من عيني،لكن!!قلبي وعقلي الي بچوا مو عيوني هل مرة.
.
.
.
بعد ست اشهر بالضبط من وفاة ماما اليوم قبطت الشهر السادس بالضبط سديت القران الكريم وإني ابوسه هاي الختمة السادسه من ماتت لحد الآن ختمتة ست مرات على روحها،ولو بيدي كل يوم اختمه على روحها...
نزلت الدرچ واني ما نزعت ثوب الصلاة،عقارب الساعة چانت تشير على انو الساعة بالتسعة الصبح،اسمع صوتهم چاي من المطبخ فتت ورسمت شبح ابتسامة على وچهي وصبحت عليهم...
باوعت عليه حاط ابنه بحظنه ويوگل بي يحچي وياه ويناقشه وهو عبالك يحچي ويه واحد كبير يريد يبني شخصيته من هسه، انقهر على الطفل مرات لانو ابو وأمه منفصلين وبعدين اذكر،منفصلين احسن من ما ميتين ويقطع نفسه من شوفتهم على الاقل همه گدام عينه.
باوعلي وگال بطفولة:
اني كلش احبچ مثل صديقتي ايو.
انرسمت ابتسامة كلش چبيرة على وچهي وما تحملت وگمت وبسته،
من يچي يمنه حيل اتونس وياه واحس همي شوية يقل.
گلها ابتسمت ما ادري لان شافوا ابتسامتي لو لان على سالفته؟.
.
كاعدين نلون اني وياه بدفتر تلوين اكثر شي احبه بالحياة التلوين والكتابة من هوايتي المفضلة...
كلت اله بعد ما خطأ بالتلوين: لا يوسف شعر دورا بني مو اشقر..
باوعلي بنظرة تشبة نظرة أبوه بالضبط وگال:
عادي الاشياء اللي ما تعجبنه نبدلها ونغيرها لشي يريحنه وإني ما احب شعر دورا بني احبه أشقر..
انصدمت من كلامه!!هو عمره ما يتجاوز العشر سنوات،واحس انطاني حكمة چبيرة ضلت معلمة ببالي..
باوعت للتلوين ماتي چنت الون فلة والاقزام السبعة،اخذت لون احمر ولونت شعر فلة وسويت طوقها اسود..
باوع عليه وابتسم وإني رديت:
هيج احلى واريح الي،باوعلي وگال:
الي يريحنه لازم نسوي حتى لو چان كسر للقاعدة هيچ يكول بابا...
فات علينه واحنه نلون باوع علينه وهو مبتسم باس ابنه وإني گرصني من خدي گلبت عيوني بملل لان أكره هل شغله،گال:
ايي شونكم..
جاوبه يوسف:زينين بابا..
رد يوسف صد على أبوه وضل يباوع عليه عرفه عنده سالفه..
:شكوو بابا تريد شي..
هو راح كعد يم أبوة وشاوره هو ابتسم وباوع عليه وگال:
تدلل العصر عود مو يوسف..هز يوسف رأسه بأي ورجع گعد يمي..
اني بطبعي ابد مو فضولية بس شو مدري ليش اجاني احساس اريد اعرف واحس الموضوع يخصني.
.
.
.
حب:هو رچفة يد،ونبضات قلب مجنونة،وابتسامة هادئة،وعيون فيها لمعة باهرة،واشياء تدغدغ القلب،وشعور باطمئنان وحنان وسعادة لاتوصف...
هذا هو باختصار يتكون من حرفين واستطاع جميع المشاعر الجميلة بحرفين فقط!!
أن الحب معجزه لا يستطيع أحد التخلي عنه لأنه شريان الحياة،وطاقة ايجابية كل منا يحتاج إليه..
يمكن بحرفين أن ترفع أحد من اسفل الارض الى السماء وتجعل له جناحان يطير بهما.
.
.
هلا والله يالغالين شونكم يارب باحسن حال..
المهم سكركم شونه؟😂الله يبعده عنكم ان شاء الله.

اولا:شنو رأيكم برده فعله للبطل على الي سوا امه واخته.
ثانيا:شنر رأيكم بقرار بطلتنه وهي متريد تكمل دراستها.
ثالثا:شنو تتوقعون اسم البطل لأنو مذكرته ابدا.
رابعا:وشنو الشي الي كاله يوسف لابوه.

شاركوني ارائكم جوه بالتعليقات٠
.
.
مودعين وربي يحرسكم ميضيع الي يم ربي💜💜.

#للكاتبة:إِيلاف الابراهيمي.