≤بسم الله الرحمن الرحيم≥
#أزهري...
#البارت|الرابع|~
#ل:فتاة الرياح
صلوا على محمد 💜
.
.
.
احببتك فتمردت..
كرهتك فغضبت..
أردت الرحيل فأوقفتني..
أردت البقاء فقلت لي ارحلي!!
اناني ومتملك..
لا تحبني ولكن لا تريد رحيلي!!
أصابك الجنون ام ماذا؟؟.
.
.
.
اباوع خالتي واكفه على صفحه وتبچي وخالي مبين عليه علامات الغضب واستبرق مو هنا بالدوام..
خالي صاح بي وگال:انته مو مطلقها شتريد منها خلي البنية تشووف طريقها..
گال بصياح:لحدددددد يدخلللل هي مرتي وتضل مرتتتتتي محد اله دخل..
خالو هز أيديه وچر مرته وطلعو من المطبخ..
شفت حذائه يم باب المطبخ لبسته وفتت علمود ما اچرح.. انصدمت من كعد على الكزاز وضغط أيديه حيل على گاع وكل الكزاز فات بايديه..
ركضت عليه وإني اكول اله:
كووم كوم تجرحت..
باوعلي بنظرة غاضبة..
كلت:حباب كووم شوف ايديك شبيها وبجيت لان خفت كام يطلع دم من أيديه..
كام وياي وتجهنه للسنك علمود اغسل ايديه،كمت أغسل بيهم على كيف واطلع الكزاز وإني ابچي لان فايت الكزاز باللحم حييل وهو مسوه أي ردة فعل اني من يمي توجعت وهو ولا عبالك..خلصت وكعدته على القنفه وجبت العده مال الاسعافات وكعدت اعقم بجروحه وهو كضاها يهز برچليه..
خلصت ولفيت أيديه بشاش.. باوعلي وگال:
حسيت بشعورچ من رفضتج اني اسف حيل سامحيني..
جان يحجي وميدحك عليه..
حسيت العبرة خنگتني وهو يحچي بالموضوع وعباله سهل من يكول اني اسف وسامحيني،اصلا اني سامحته من زمان بس هو عباله حاقده هو صح جرحني بس مو جبر اخلي يحبني لانو هذا الشي مو بيده الحب لو جان بيدنه جان ما حبينه كلنه ولا عذبنه نفسنه..
:لا تهتم الموضوع كله مو بالي جان حب مزعطه على كولتك..
باوعلي بصدمه مدري ليش هو مو ما يحبني ومو باله ليش اهتم من كتله الموضوع مو بالي..
:يعني انتي بعد ما تحبني..كالها بصوت ناصي وهو منتبه عليه ومركز عيونه عليه..
:اي وإني الي لازم اعتذر على التصرف الي بدر مني،ضحكت وكملت..
:جاهل ما عليه عتب..
كال بصوت ناصي وهو ينهض:
شكرا على مساعدتج تعبتج ويايه..وعافني وطلع بدون ميسمع جوابي..
شذكره هسه بالموضوع وإني كل ضني نساه شكد جنت ثوله وفطيره وغبية وإني اعترف اله وهو بكد أبويه لا فوك كل هذا مزوج..رجعت بيه ذاكرتي لاعترافي الثاني وجان بوكتها ستوني طابه ال ١٧...
.
جان يغسل على المغسله ورحت اله وإني شايله المنشفه اخذها مني ونشف وهو مبتسم كال:
اي شونج بالدراسة زينه؟
كلت بحماس:اي حيل زينه وكله درجات كامله..
كال:عفيه بالشطوره نريد كله درجات كامله نريدج من الاوائل..
كلت:أن شاء الله،انته مو رفضتني ليش تهتم لدرجاتي..لو ادري بي هيج ينكلب وحش جان ما حجيت..
:انتي جاااي تعرفين شجاي تمضرطين خبللله انتي يابه تره انتي كبرتي احسبي حساب لتصرفاتج لا ورب الخلقج اكوول لامج..
كلت بعصبية:اييي عااادي كول الها اكول الها اني احبك..
جرني من أيدي وهو يكز على أسنانه:
وربي اذا ما طلعتني مو بالج اسويلج شي اخليج على عمرج تعضين اصابعج ندم..
.
فزيت على صوت استبرق الي تكوول:
عزاااا شهل كزاز هذا، يا اهل البيت وينكم..
كمت وإني اشيل جنطة الاسعافات وتوجهت للمطبخ وكلت برود:
هذا اخوج الخبل كسرهن لانو الخانم تريد تزوج وما قابله ترجع اله..
استبرق:لا بربج حراااامات فاتني الاكشن..تعاي احچيلي كلشي بالتفصيل..
كلت بغضب:شحچي استبرق يعني هو هاج وكام يكسر وتجرحن أيديه اجرح من الكزاز وإني نضفتهن اله..
استبرق:والله يوم عن يوم يثبتلي اخووي انو هو مريض نفسي ولا جن طبيب نفسي..
ضحكت بسخرية وكلت:يعالج الناس وهو ما معالج نفسه اصلا...
.
.
.
اراد مني البقاء..
ففضلت الرحيل..
لاني احب كبريائي..
اكثر منه.
.
.
.
نزل هو من السيارة ونزل يوسف وياه وعلامات الغضب والبكاء مبينه عليه توجه هو ينزل بالجنط مال يوسف بعد ما قررت المحكمه حضانه يوسف لابوه لانو امه راح تتزوج الها حق تشوفه يومياً اذا رادت لكن ما الها حق تعيشه يمها وهي قبلت.. تعجبت بهل سهوله تترك ابنها بس علمود تتزوج زين هي ليش مقبلت ترجع لرجلها وتعيش هي وابنها وزوجها عيشه سعيده،بس والله مدري شلون تفكر هل مره..باوعلي يوسف بعيون باكيه فتحت اديه اله وكرمزت وإني استقبله لاحتضنه اجاني يركض وهو يبچي بچيت على بچيه وخرته عني وإني اكول اله:
نفس الحظ اثنينه امهاتنه تخلت عنه..
مدري ليش على غفلة الله ذب علينه الضحك ضحكنه اني وياه وهو كال:
بس اكوو فرق امج عافتچ غصبا عنها بس اني بارادتها..
كلت:عاادي يوسف الي ميريدنه منريده موو صح..
هز رأسه بأي وما جاوبني توجه ناحيتنه وهو يعيط بيوسف:
فووت لغرفتك ولا تشوفني وجهك افتهمممت..
انصدمت وما كدرت اسكت كلت بغضب وإني اباوع عليه:
لا تجي اطلع عصبيتك على الطفل تريد ذيج مرتك وروح احچي وياها،رفعت اصبعي السبابه وكلت بتهديد:
شووف وربي اذا سمعتك حاچي وياه كلمه اسوي شي ميعجبك..
كال وهو يعيط:انتي بالذااات ما اسمع صوتج اني وابني وما الج دخل..وجر يوسف مني خطية هو خاف وظل مجلب بملابسي..
رجعت جريت يووسف وإني اكز على اسناني:
يوسف من هل لحظه راح اعتبره ابني والله اذا شفتك محاچي بكلمه لو ضاربه اشوفك نجووم الظهر اذا انته هيج متعاجز منه وشوفته اتذكرك بالخانم على شنو جبته بس دا تعذبه لو جبته علمود تكسر خشمها..
كدت يوسف وتوجهت جووه واشوف خالتي تباوعلي ببتسامة على وجها ودموعها نازله يمكن عجبها تصرفي لان هي حيل تحب يوسف،وهمزين خالي جان طالع جان هسه صارت النه مشكلة..
يوسف:شكرا لانو ساعدتيني..
:حبيبي انته ماكو شكر بين الام وابنها انته صرت مثل ابني.. وحظنته شكد احب يوسف ويمكن الله دزه نعمه الي بلكي اكدر اعوض الفراغ الي بداخلي باهتمامي بي..
.
.
.
مر شهر تقريباً على دخول يوسف بحياتي گلب حياتي راسا على عقب وغيرني مئة وثمانين درجة ما جنت ادري هيج راح يغيرني..
جان هو شقاوچي حيل ويحب الضحك وجان ميفاركني ابدا ويمكن هذا الشي خلاني اتناسى امي لانو معندي فراغ كبير علمود اذكرها واكعد ابچي.
أقره الها قرأن اترحم الها وكمت من اذكرها ابتسم عكس گبل جنت كل ما اذكرها ابچي..يوسف غيرني وبشكل ملحوظ حييل كلها لاحظت هل شي يعرف كلشي عني كل اسراري عنده بس سر واحد مو خوفاً انو اكوله اله بس خجل استحي اكوول اله مرتين اعترفت لابوك وصدني استحي اكول اله اعترفت لابوك وهو مزوج امك احسها صعبة.
فاتت استبرق علينه واني ويوسف كاعدين نباوع يوتيوب على الموبايل..
استبرق:يله عيني كوموا تغدوا صبينه الغده..
يوسف:ايي عمه كمنه.. كالها وهو يضحك لانو يدري استبرق تتخبل من يكول الها عمه اتكول عبالك جنتي من يكول الي عمه..
استبرق:عمامه تعمعم ضلوعك..
عافتنه وراحت..
كلت:هيج احسلك.
يوسف:احب اضوجها اتونس..ضحكت عليه وإني اهز رأسي بقله حيله
نزلنه اني ويوسف ودخلنه للمطبخ علمود نتغدا يوسف شاف ابووه وتحاشى النظر اله،ابووه الي بعد زواج طليقته أو مرته على كولته تغير صار حتى العيادة ميفتحها وصار عصبي،دائما افكر اكول اذا هو يحبها هيج ليس طلقها ويوسف من شاف ابووه هيج بطل يختلط بي،بس خالي ابدا ما عاف حفيده يظل وياه ويطلعه ويعلمه هوواي اشياء ابووه ما علمها اله..
:تعاال بابا يمي..
يوسف يباوعلي وإني اباوع ليوسف مصدومين اول مره يصيحه من تزوجت ام يوسف..
:بابا شبيك صاير مفهي مو جاي اصحيك،لو ذولاك العالم علموك على التفهي..
انصدمت وباوعت عليه شفته كاتم ضحكته صدك عصبت إذا اني مفهيه لعد هو شنو..
:روح حبيبي يوسف لا العالم اطك الها فيوز ما دام اليوم باردات الفيوزات..
راح يوسف وهو يضحك لانو فهم قصدي..
عيونه صارت بكصته والله شعباله بس هو يحجي والله يالله..
حضن يوسف وهو يشم بي ادري بي مشتاكله بس تفكيره بطلقيته جاي يخرب عليه كل صفاته الزينه..
كام يحجي ويه يوسف ويوسف بس يهز برأسه صار عندي فضوول اعرف لان صوتهم جان ناصي وما اسمع خلص اجه يوسف يمي وإني اشر اله بعيوني شنو كالك قبل ميجاوب يوسف كال:
حبيبي وليدي هذا الحچي يضل بيني وبينك لا اتكول مو، وهو يباوع عليه..
خزرته ويوسف كال:
اي بابا..
باوعت على يوسف وإني اشر على روحي بمعنى حتى اني..وهو يهز برأسه اي خالي:شبيكم اليوم يمعودين أكلوا كضيتوها مناكر..
عاد سكتنه واحنه ناكل بس كل شوية ارفع راسي واخزره واكمل اكل..
.
.
.
ما زلت زهرة لا يحق لها الذبول..
ما زلت زهرة لا يحق لها الانكسار..
ما زلت زهرة حتى وإن اختفت الواني..
ما زلت زهرة حتى وإن سقطت اوراقي..
ما زلت زهرة حتى وإن دعستني الحيوانات باقدمها..
ما زلت زهرة لاني خلقت زهرة.
.
.
.
:خالي هذا الموضوع تناقشنه بي من زمان كلت الك دوام ما ادوام..
:بنتي بس هذا خطأ جاي اضيعين مستقبلج بأيدج..
كمت وإني اذب المخدة الي جنت حاطتها بحضني بعصبية:
اييي هو اني هذا الي اريدة اريد اضيع مستقبلي..
عفته ورحت لعبت روحي كل يوم والثاني عايدين عليه نفس الاسطوانه،ليش ما ادومين،حرام عليج هذا مستقبلج،جاي اضيعين نفسج....
عبالهم عاجبني الوضع ميدرون الي جاي يصير خارج ارادتي ما اكدر ما اكدر ياناس والله صعبة عليه اي اني اعترف اني ضعيفة وما اكدر اواجهه مشاكلي واحلها وافضل الانسحاب قبل التفكير اصلا..
اندك الباب جنه كاعدين اني ويوسف نلعب حيه والدرج..
:منوو؟؟
:اني يصير افووت؟؟
استغربنه اني ويوسف،جاوبت وكلت:
:اتفضل..
فات وهو يبتسم باس يوسف وكعد بصفنه..
:ايي شونج..
:زينة الحمدلله..
:ابووي كال مصره على قرارج صح هذا الشي؟؟
:ايي صح دوام ما ادوام هذا اخر و اول قرار عندي..
:بس الاشياء الي نخاف من عدها لازم نواجها ميصير نهرب منها لانو مراح يقل لو يختفي الخوف بالعكس يزيد..
شوفي اني وياج مو ضدج اعرف الي مريتي بس صعب أو يجوز ما اعرف لانو ممريت بالي مريتي بي بس اي مشكلة نريد نحلها لازم:
أولاً:لا تركيزين على المشكلة بحد ذاتها،لا ركزي على وجود حل للمشكلة،
يعني شلون؟؟ راح اكولج،مثلا دراستج لا تفكرين والله ما أريد ارجع لدراستي وتضلين تفكرين بيها، لا فكري انتي ليش ترجعين للدراسه،لان امج جانت حلمها تشوفج متخرجه مو صح؟ فكري انج تردين تكملين دراسة علمود امج مو بس علمودج.
ثانياً:لا تعقدين السالفة وهي صغيرة؛ يعني هاا والله شلون ارجع ادوام وامي ماكو،ماكو داعي هل تفكير العميق امج ما الها دخل بدراستج لا تعقدين المشكلة وهي تافهه ما اظن امج راح تزعل اذا دوامتي بالعكس؛ واذا تكولين منو وياي؟؟ والله كلنه وياج.
ثالثاً:حطي المشكلة كدام عينج وحطي الها هوواي حلول وفكري بهواي اشياء تساعدج للوصول إلى حل مناسب لا تفكرين ها والله ما اكدر ها والله صعب ماكو شي صعب اذا كلنه واجهنا.
رابعاً:كلنه نخاف مواجهه مشاكلنه نخاف نوكع بمشكلة اكبر من الي قبلها؛ بس هذا الشي اكبر غلط لازم نواجهه المشكلة علمود نعرف شلون نحلها ؛وأبسط مثال انتي لازم تحاولين ادوامين حتى لو لمدة يوم واحد وشوفي نفسج كدرتي تتقأملين أو لا ؛واذا ذاك الزمن وشفتي نفسج متكدرين تكملين محد راح يجبرج.
خامساً:اخذي وكت جبير وفكري زين ولا تخلين أحد يشوش عليج ولا تسمعين لرأي أحد اسمعي لعقلج وبس.
سادساً:من تنكسر عزيمته وقوتنه لازم نرجع نجبرها، ونصلحها، ونعالجها،
ما اكو احد ما يوم فشل أو انكسر بي شي وخلاه يوكف لمدة من الوقت..
لكن انتبهي!! جاي اكولج مدة موو طول العمر نضل احنه مبسطين وكاعدين لازم نوكف من جديد ونعود اقوى من قبل..
فكري بمكلامي زين وردي الي خبر،واهم شي اخذ وقتج لا تستعجلين..
يله ابني يوسف امشي نطلع نفرفر..
محتاجه شي
هزيت رأسي بلا..
:يله لعد في امان الله..
عافني وطلع غركانة بكلامه حرت شنو اسوي كل حچيه صح وكل حرف نطقه مابي ولا ذره غلط احس رأسي صار طبل من التفكير عاد لفيت رأسي نمت مو هو كال اخذي وقتج وإني ما راح اقصر..
.
.
.
ثلاثة أيام مرت وإني افكر بالموضوع احس نفسي اقتنعت بس نسيت النصائح الي كالهم الي اريد اطبقهم كلهم واشوف نفسي اقتنع بالكامل لو لا..
لأزمة موبايلي وإني مترددة اراسله اخذت رقمه من استبرق وخرت التوتر وكلت:
شبيح خبلة قابل انتي شمسويه هو راح تكولين اله دز الي النصائح قابل شنوو..
زفرت نفس وأخذت نفس وكلت بسم الله وبديت:
💭السلام عليكم..دست ارسال↖
💭اني المفهية على كولتك..ارسال↖
💭بس اذا متصير زحمة اذرلي النصائح الي كلتهم الي علمود اراجعهم واشوفهم زين بلكي اقتنع..ارسال↖
اروح وارجع انتظره يجاوب شووي وصلني واشعار بسرعة فتحت الموبايل..
💭وعليكم السلام ورحمه الله وبركاته
💭 هههههههههههههه هلا بالمفهية
💭ذني النصائح........
اتمنى تفكرين زين وتحطين عقلج براسج.
جاوبته:
💭لعد اني عقلي وين؟؟
جاوب:
💭مدري انتي اعلم؟؟
اووف مليق عفته وكمت اددق بالنصائح وكل نصيحه احاول أطبقها وبالاخير توصلت لنتجيه...بس كلت اخذلي يومين افكر زين بعدين اكول الهم..
.
.
.
نايمة بالليل كعدت حيل عطشانة يوسف نايم على أيدي وخرته على كيف علمود ميكعد ونزلت اشرب مي شربت خلصت دا ارجع صار كدامي..
:اعوذ بالله فززتني
:شقررتي؟
:بعدني جاي افكر..
كلب عيونه وكال:
كل عقلج..
:انته مو كلت اخذي وقتج بالتفكير؟
:ايي صدك على راحتج.
مشيت دا اصعد كال:
اكفيي عندي حجي وياج..
:شنوو؟
باوعلي وگال بدون مقدمات:
بعدج تحبيني؟؟
:لااا واضن كلت الك حبك طلعته من گلبي من زمان،وطلع اكثر من شفتك شسويت من تزوجت مرتك عرفتك شكد احبها ما مچبورة احبك وانته متحبني..
.
ما مجبور احب انسان
هو بعمره ما حبني
وما مجبور اظل اشتاگ
كلما لحظه فارگني
ليش انه افكر بي
وهو بيه ما فكر
كلما حاولت انساه
اعرف بروحي ما اگدر
وادورله عذر ظليت
واگل الروحي يتندم
اليسحگ عالورد معذور
اذا ما يدري بيه ينشم
ما مجبور احب انسان
اصلآ هو ما مهتم
مومعقوله اخلص اسنين
عمري بحبه بس احلم
ليش ابقه اظل ما اشوف
غيره واحد بعيني
وهو حتى (خارج قوس)
ابگلبه ما مخليني
بعد ما اريد اظل مشغول
بواحد ما اجي اباله
بس گلبي اتوبه اشلون
وهو يريد كتاله
ردت غيره احب وارتاح
لكن گلبي شيقنعه
يحب المايحبني وضال
مثل القانع بوضعه
احس بعيني لذه اصير
اذا بچاني اي دمعه
الساكن بالگلب والروح
محد يگدر يطلعه
للشاعر:جبار المياحي.
.
عفته ومشيت انصدمت بيوسف الي واكف على الدرج وهو يكول:
يوسف: تحبين بابا؟؟
.
.
.
هلا والله يالغالين شونكم يارب باحسن حال 💕
صدمة كبيرة مووو😂😂ادري المهم..
أولاً:رأيكم بردة فعل ابوو يوسف من تزوجت مرته،مع ام ضد؟وليش؟
ثانياً:شنو رأيكم بشخصية يوسف؟
ثالثاً: تتوقعون قبلت بطلتنة تكمل دراستها أو لا؟؟
رابعاً: تتوقعون شنو ردة فعل يوسف بعد الي سمعه؟؟
وبس والله شاركوني ارائكم جوه بالتعليقات٠
.
.
مودعين وربي يحرسكم ميضيع الي يم ربي 💜.
#للكاتبة:إِيلاف الابراهيمي.
أنت تقرأ
أزهري ||باللهجة العراقية||
Roman d'amour🔴{مكتملة} من انا؟!انا التي سخرت لها الأقدار حياة غير الحياة العادية... من انا؟!هل انا اللقيطة، ام اليتيمة، ام المتشردة، ام انا فرد زائد في هذا المجتمع ليس لي اي فائدة أن مت ام عشت... اشتقت ليس لاحبتي الذين فارقوني، بل اشتقت لروحي الضائعة اريد ان ار...
