يقولون إن البدايات للكل لكن النهايات تكون للمخلصين فقط الذين اصبحوا إندر من الكبريت الأحمر صارت حفلة التخرج واني ماحضرتهة رغم جنت اخطط لهذا اليوم شلبس وشسوي لكن الظروف الجنت بيهة بذيج الفترة خلتني استغني عن اشياء هواي ووحدة منهن حفلة التخرج الماحضرتهة وبذاك اليوم كعدت الصبح متأخرة مخلية موبايلي صامت كمشتة شفت رسائل ومكالمات بديت اتفقدهة لكيت حنين متصلة ودازة رسالة(صباح الخير كلش اتأخرنة وراح اروح آني متكليلي وين صرتي؟ )
رسالة من زينة...( ضربتينة خوش بوري من مااجيتي مكانج خالي )
زهراء ....( يمعودة فاتتج الحفلة والصور جان اجيتي وغيرتي جو ترة هاي احلى ذكريات )
ولكيت رسالة من نفس الرقم الغريب الي دزالي في يوم من الأيام رسالة هم دازلي رسالة( جنت اتمنى اشوفج اليوم صار فترة طويلة ماشايفج جنت مشتاق اشوفج )
اجة ببالي جواد وجنت شبه متأكدة بأن هوة صاحب هذي الرسايل بس ولا تحركت عندي اي مشاعر تأكدت هالحب مثل ماانولد نوأد بدون اي تطورات تذكر وماحسيت بلوعة الهجران مثل مجنت متصورة بس كلت همزين مارحت وشفتة مااريد اعيش بأمل تزوج وصار من نصيب غيري وكلت ربي يعوضني خير ومامكتوب جواد يكون الي ثاني يوم داومت والكل جان يعتب علي لأن مااجيت واجوي بنات الشعبة وكالوا نريد ذكرى صورة وياج
طلعنة حتى ناخذ صورة واجة
حيدر.... شنو على وين العزم إن شاء الله؟
البنات... البارحة لمى مااجت ومااخذنة صور وياهة واتفقنة نعوضهة اليوم بصورة وياهة، تعال ويانة
حيدر ... اي ليش لا
صورة وبيهة لمى احلى صورة والله
لمى... باوعتلة بصورة خاطفة ودرت وجهي شفت وجهة مضروب ومخلي لزكة ولاف ايدة بباندج اجاني الفضول
لمى... شلونك حيدر اخبارك بخير إن شاء الله؟
حيدر... زين واتذكرتي وسلمتي، آني بخير انتي شلونج ليش مااجيتي البارحة؟ تونسنة شلون ونسة فاتتج
لمى ... بالعافية عليكم والله يتمم للجميع بالنجاح إن شاء الله، اشو مضرب وجهك وايدك لافهة بباندج خيرك ماكو شي إن شاء الله؟
حيدر... بعدين اسولفلج خلي ناخذ صورة بس طلب اريد صورة بس آني وياج هسة انتي قفلتي كل الابواب بوجهي خلي هالصورة بينة للذكرى الحلوة للايام الجنتي تعتبريني اخ وصديق .
لمى... كلت أخ وصديق والله اني ما اعتبرتك غير هالشكل بس انتة فتت زايد وصرت ادور حبيات بس مع ذلك مااخذ صورة وياك لوحدنة
احسن الك صدكني حتى بعدين ماتضطر تشك شخصي بجزء الصورة خاف شريكة حياتك تزعل حيدر الله يخليك عدل وضعك ورتب امورك ونزق الشباب وطيشة اشمرة وخلي كدام عيونك خاطر لوالدك ووالدتك الي انتة وحيدهم ويباوعولك بأجمل صورة ويتأملون بيك الخير تزوج كون أُسرة وارجع حيدر القديم اللي كل طالبة اعتبرتة أخ ووكفلهة موقف خوة.
حيدر ... منين تجيبين هذا الكلام الحلو؟
لمى... يكولون مايخرج من القلب يدخل الى القلب
وجاي احجي بكلب اخت محروك كلبهة على اخوهة
حيدر... الله يوفقني والكة وحدة بعقلج ورزانتج
لمى... عدل وضعك وصدكني تلكة الاحسن بس صفي نيتك
حيدر ... راح اخذ وياكم صورة جماعية عادي لو هم تستشكلين؟
لمى... عادي كل الهلا بيك يا اخوية.
بين ماالبنات ضبطن امورهن وعدلن نفسهن وخلصت كلامي وية حيدر رتبنة وضعنة واخذنة صورة رغم كلنة بنات وبس حيدر بيناتنة شاب جانت لقطة كلش حلوة واصر حيدر يكعد بالكاع ويسوي لقطة كلش حلوة وتلقائية.
بالرجعة للقسم شفت وحدة من قريباتي جانت اداوم ويانة بنفس الجامعة بس بغير كلية وجان اخوهة رايدني واني بوقتهة رفضت لأن شفتة الولد مو متناسبين آني ويا نهائياً ووالدتي هماتين سولفتلي اشياء عن طبعهم وشلون يختلفون عنة المهم شافتني
نازك... شلونج لمى؟
لمى... الحمدلله
نازك... اكلج منين هذا الصاك الوياج؟
لمى... هذا حيدر زميلي بالقسم
نازك... كلتيلي زميلج ؟ يمعودة قابل راح احسدج بس والله خوش صيدة مبين ابن حال ومال
لمى ... من رخصتج نازك عندي محاضرات
نازك... الله وياج عيني سلميلي عالمحاضرات
عفتهة ومشيت لأن مبينة سطحية وتافهة
دخلنة محاضرتين طولت ساعة وربع راجعتلنة بيهة الدكتورة المهمات والعدنة بي صعوبة لخصتة بنقاط بسيطة وبالمقابل كل الطلاب امتنوا الهة وشكروهة على هالمبادرة الحلوة واخير شي انطتني مفتاح غرفتهة ومجر مكتبهة حتى اجيبلهة دفتر الدرجات وعلبة بيهة حلويات ورحت جبتهم واجيت وانطيتهيا شكرتني
دكتورة نقاء... طلاب طبعا احب اوجهلكم نصيحة واخذوهة من انسان جرب هالشي اذا فد يوم حبيتوا شخص لا تخبون هالاحساس شرط يكون نهاية هالحب شراكة زوجية حتمية وخصيت الطلاب لأن البنية صعب تعترف بالحب لشاب لكن الشاب بالعكس تعتبر خطوة شجاعة
تدرون اني عمري ٤٣ سنة وانخطبت البارحة صح الراح من العمر مايرجع وهسة تكولون بعد وكت وين جنتي بس ماصادفت الرجل الشجاع الجسور اليتحدى شخصيتي القوية ويتقدم الي مثل ماسوة هالرجل الخمسيني الي مجرد شافني مرة بمكتبة ادور على كتاب وكدر يتبع خطاي ويرصد اخباري واجة واتقدملي ولأول مرة اقتنعت بالارتباط رغم كل محاولات اهلي السابقة بائت بالفشل تدرون حتى اني مستغربة لذلك حبيت افيدكم بالمعلومة هاذي وهذا حلوان الخطوبة
كلنة قدمنالهة التهنئة واتمنينالهة التمام والحياة السعيدة لأن هية نقاء واسمهة عليهة ٤ سنوات بالقسم مشفنة منهة شي موزين ابد هادئة ورزنة وتستحق كلشي حلو وبعدهة انطتنة للحضورنة كامل بالمحاضرات ٥ درجات آني بقيت اطلبهة ال٥ درجات وحيدر داعة بيهن يريدهن
حيدر.... ست هية لمى مامحتاجة ال٥ درجات انطينياهن الله يخليج ترة هية اختي والاقربون اولى بالمعروف
دكتورة نقاء... هاي وين لاكيهة هسة موزين نجحت هالدور سرت تتسول درجات
حيدر ... الدرجات اهم من الفلوس دكتورة
دكتورة نقاء.... والله كلشي يطلع منك ابو كرار اتفضل اخذ راحتك وشد حيلك عالنهائي وارفع درجتك
طبعا جنت آني بذاك اليوم كلش مرتاحة لأن حسيت نفسي خلصت من قيود كثيرة
واولهة العلاقة الي راد حيدر يقنعني بيهة بس الحمدلله مارضخت لأفكارة
وثانياً ... فكرة ست نقاء هاذي الفكرة جنت اتمنى توصل لأكبر عدد من الشباب حتى لايضيعون فرص ويظلون عايشين تحت وطأة كلمة( لو ) وعض اصبع الندم شرط تتوج هالمشاعر برابط مقدس وهو الزواج كأنما الدكتورة جانت كاعدة بكلبي
رجعت للبيت آني وحنين وخطية توسلت افوت للبيت وياهة لأن جان صيف وحارة دنيا الظهر بس اعتذرت على غير مرة
وصلت للبيت ولكيت اختي هاجر واكفة بالباب رأسن اشرتلي اسكت وافوت بهدوء واصعد فوك بدون صوت اني سويت مثل مارادت بس الخوف والريبة سكنوا كلبي وظل سؤال بيني وبين نفسي شكو ياستار شصاير؟
صعدت بدلت اجتي هاجر
هاجر... لج هاي اليوم نازك خابرت على عاصم وتكلة اختك مصاحبة واحد اسمة حيدر بس امي من سمعت شسوتلج بي وهسة دزت على امهة واخوهة وشبعتهم رزايل خلتهم يعتذرون بعد بالبداية شمروا حجي مثل السم بس والله امي لايغرج سكوتهة هزتهم هز لعبت لعب بيهم
لمى... طبعاً من شمرت الكلام الحقير بالجامعة عرفت بيهة راح تأول الشافتة وتسويلهة فلم هندي درجة اولى
لو بس اعرف ليش هالشكل مؤذية
هاجر... شنو متعرفينة غير من جنة ازغار نسميهة وكالة الانباء على كد ماتحب تفتن وتبهر السالفة
لمى ... شمدريني عود كلت صارت شابة وجامعية شمدريني بيهة بعدهة على طبعهة
زبن انتي ليش صعدتيني كبل لو مخليتني فايتة لأمهة واخوهة واحجي وياهم
هاجر .. اكعدي ترة امي ماقصرت بيهم
روح 🌧
متابعة ممتعة ومتأسفة لأنقطاعي المستمر عنكم اتمنى إن تحملوني على محمل حسن فلكل منا ظروف وخاصة مسألة استذكار الاحداث والاحداث مر عليهااكثر من ١٢ سنة
تمنياتي لكم بالتوفيق
أنت تقرأ
ابطال رغم الخسارة
ChickLitقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
