انتَ تُريد وأنا أُريد والله يفعل مايُريد
كنت كثيرة التعلق بهذه المقولة في هذه الفترة من حياتي لأن ماحدث لم يكن في حسباني ولم يكن ضمن مخططاتي
هُجرت كيف ولماذا ؟ لا اعرف! اصبحت نوعا ما وقحة مع الاخرين ولدي نوع من العدوانية على سبيل المثال عندما يكون هناك امتحان لمادة ما فأني حتى لو جنت ماضابطة المادة زين امتحن من دون الكل مع الكل يجون يكلولي بس اجلي حتى استاذ المادة او الدكتور ميخلي اسئلة صعبة النة اذا شافج امتحنتي هسة اني بدون جواب اخذ اشيائي وادخل القاعة المخصصة للامتحان وامتحن بدون ماافكر بيهم حتى بنات كروبي بدوا يستغربون من تصرفاتي وصرت اضحك على اتفه الاسباب مااعرف ليش ؟ كمية الحزن بداخلي جبيرة وضع عائلتي واخوي المنعرف وين واختي الي زوجهة يريد ينفصل عنهة وميريدهة بقرار مصمم علي رغم تدخل اطراف للمصالحة بس هوة ابد ولا كأنما مصر عالطلاق واختي التندمت بعد فوات الاوان وعائلتهة تشتت خاصة اطفالها والناس البدت تلوم بينة وكل عائلة عدهم مطلقة الناس تنظر لكل افراد العائلة نظرة مأخوذة بذنب بتهم حتى لو كان الذنب تافه طبعا هاي السنة كلش تعبت من جميع النواحي بحيث مرة امشي واجيت اندعم ماحسيت غير حنين جرتني جرة من ايدي حسيت ايدي انخلعت هية جرة وهية وكعت واني فوكاهة اريد استوعب الصار مااعرف بعدين انتبهت
حنين... كالت يمعودة شبيج كومي تكسرت
كمت من فوكاهة خطية شصاير بيهة عدلت نفسي لميت اغراضي وابو السيارة ولا كأنما ولا نزل ولا اعتذر حرك سيارتة وطلع
لمى.. فهميني شلون صار هيج
حنين .. صارلي ساعة اسولف وياج وانتي بس اي و اي اني جاي امشي اتقدمت عنج بخطوات انداربت شفت السيارة جاي ترجع وانتي تمشين عبالك بلا وعي اصيح ماكو متسمعين وين جنتي سارحة وانتي تمشين ؟ من خوفي عليج جريت ايدج وانتي ماشاء الله تكومتي فوكاي كسرتيني
لمى ... والله ماجنت منتبهة
حنين.. لمى شبيج من شفتي جواد اجة يسلم لحد الان وانتي ولا كأنما ويانة متكليلي شبيج ؟
لمى.. لا هيج ماكو شي
طبعا اجة جواد وشفتة واني بدون وعي مني استرجعت كلشي صار عبالك شريط الاحداث البارحة صاير اجة وكف اكبالي سلم علي
جواد.. شلونج لمى شخبارج
لمى .. ماجاوبت بقيت بس مدنكة وكلتلة الحمدلله
جواد.. اني اسف
لمى ... قطعت كلامة وانتفضت واكفة على شنو الاسف ؟ انتة وعدت صح بس ماصار بينة شي مجرد كلام انحجة بوقتة وراح
جواد.. لو تعرفين السبب تعذريني
لمى.. ماحاجة اعرف سبب انتة وعدت واخذت عهد على نفسك ونقضت وعدك وانسى الموضوع
جوا.. انتي ليش ماتنطيني مجال احجي
لمى .. مابيناتنة اي حجي ورجاءً انطيني مجال اريد اروح
جواد.. طول عمرج انانية متشوفين بس نفسج ومتسمعين بس نفسج ومستبدة برأيج
لمى.. وكل هذا والسور الناري الخليتة حوالية وانتة اخترقتة بجذبك ووعودك بليلة وضحاها جاي خاطب بدون سابق انذار بعد محاولات واستقتال حضرتك حتى تصيد الفريسة الغبية الي هية اني والله لازم انحني احتراما للدور الاديتة ببارعة تامة انقل نفسك لفنون جميلة وادخل قسم التمثيل بس مو بصفتك طالب لا بصفتك أُستاذ مانادمة على شي بس ملاني الاسف على نفسي وعلى كلبي الصدك بيك يجوز اتراهنت وية نفسك انه توكعني بمصيدتك الله العالم
جواد.. كافي لخاطر الله انطي لواحد مجال خلي يحجي
لمى.. شكرا مااريد اسمع اي شي منك ماصار شي وخر من الطريق عفية خلي افوت
جواد.. اذا ماتحركتي واجيتي وراي هسة وبدون كلام صدكي احجي هنا وبصوت عالي والماجان يعرف خلي يعرف كلبي واحترك وانتهى مايهمني احد بعد بس انتي اريد افهمج الموقف واروح بعد متشوفيني
لمى.. ها يعني لهالدرجة اني مهمة بالنسبة الك ؟ وتريد تبررلي ، شوف جواد بررت لوما بررت الموضوع بالنسبة الي انتهى تبريرك واعتذارك مايهمني بعد خلي اكون صريحة وياك اكثر بيوم العرفت بيك خاطب قبلهة بيوم من فتت انتة وحيدر من يمي وانتة ماسلمت جنت بهذا اليوم بالذات ناوية اردلك موافقتي بأنه تجي وتتقدملي وحتى جنت مستعدة اوكف وياك واقنع اهلي بس موقفك بذاك اليوم خلاني اتراجع ، وثاني يوم اجيت وانتة تتقبل تهاني الطلاب بخطوبتك جازفت بسمعة اهل ومشيت ورة وعودك لاتوكفين وية هذا لا تلبسين هذا اهلي محافظين مااريدج تنطين لزمة ويطلعلي احد بمعارضتة صفح ، بس الحمدلله كشفك قبل مااعلن استسلامي لكذبك
جواد.. بس لخاطر الله امشي شوية وياي خلي اوضحلج والله بعد متشوفيني وعد مني
لمى.. درت وجهي وفتت للقسم ردت ادخل للقاعة واجة سريع كمش سير الجنطة اني وكفت لأن استغربت تصرفة كلش مارفعت راسي اجيت افوت للقاعة رغم هوة صار كبالي
جواد.. والله العظيم اذا مامشيتي كدامي هسة لا احجي بعلو صوتي وخلي اليصير يصير
لمى .. طبعا باوعت لوجهة شفت كمية الغضب بيني وبين نفسي كلت يسويهة شفت حنين اجت
حنين .. خير شكو شبيكم ؟
جواد .. ماكو شي بس عندي موضوع وية لمى
حنين .. لمى بيج شي احجي
لمى.. حنين هذي جنطتي وهذي محاضراتي خليهم عندج شوية وراجعة
حنين .. بنظرة كلهة تساؤل ،اي ليش لا
مشى جواد واني ورا امشي اخذني لمكان بالجامعة طبعا بس بعيد عن الانظار وهادئ
هوة بقى واكف واشرلي كال اكعدي
لمى .. ماحاجة اكعد كول لعندك خلي ارجع
جواد .. انتي ليش تخلين صوتي يعلى ليش تعاندين
لمى .. والله اذا اجاوبك خاف اجرحك واني مااحب اذي شخص لأن مشاعر الناس مو لعبة وكسر الخواطر مو شي هين مو لو مومو ؟
جواد .. اني عاذرج لأن حقج فما راح اجاوبج
لمى.. عود شنو كاسرة خاطرك اني لو استجدي عطفك مثلا ترة من حجيت هالشكل لا عبالك على شي لأن زعلانة على نفسي شلون اتقشمرت وانضحك علي وصرت احس نفسي ساذجة لأن بكلمتين حلوة اتقشمرت لا اكثر ولا اقل
جواد.. احبج وراح ابقى للموت احبج صح اتزوجت بس مجبور
لمى.. صفكت ووكفت ثائرة ليش عيني انتة مو رجال وين اكو رجال يجبرونة البنية بهالوكت كامت ماتنجبر مو رجال طول بعرض ينجبر والمن زوجوك لبت عمك بابا جذب على غيري عذرك اقبح من ذنبك ،شوف جواد مافارغة اسمع تبريرات كلهة جذب احتفظ بمي وجهك وخليني ماخذة صورة عنك جميلة بغض النظر عن نقضك لوعودك يااللة مع السلامة ، انداريت وماحسيت الا واحد لزمني من ايدي اني تصنمت واتفاجأت من تصرفة
جواد .. لخاطر الله اسمعيني شوية والله انجبرت وحق ايمانات المسلمين انجبرت اني لا عبالج اجلت السنة بطران شردت منج ماردت اواجهج اعترف اني جبان كدامج
لمى.. طبعا مستغربة شلون كامش ايدي ويحجي ويبجي انتبهت لنفسي سحبت ايدي منة ودرت وجهي ، هذا هو الله يهنيك قسمة وماصارت ، حسيت وجهي صار جمر وحرارة تطلع مني وعيوني بلا وعي تدمع لو مو تدمع اني جاي ابجي
زين جواد سؤال لمن تعرف نفسك انتة مو مخير ليش خليتني اح....... سكتت ،مااريد اعاتبك الصار صار وراح ليش ولو بعد مايفيدن
جواد.. لمى ترة البنية اقاربنة ولوما اني اتزوجتهة جان سارت بحور دم الاعراف العشائرية ماترحم والمايمشي بيهة يعتبر خارج عنهم ويطردوا
لمى .. قاطعتة هذا هو جواد خلص كل الحجي الله يخليك خليني ارجع
جواد.. يعني متردين تسمعيني ؟
لمى .. السمعت والما سمعت شنو الفايدة ؟ زواج وتزوجت وكلتلك ماصار بينة شي كلهة وعد منك وما صار وانتهى بس خلي نفسك صاحب قرار بحياتك لا تخلي الاخرين يرسمون مسارها الك ويقررون بدلا عنك
تحركت بسرعة بس جسمي وكلبي يرجفن اهتزيت هز لو ماشايفتة احسن بدون اي نقاش فتت للقاعة اخذت جنطتي ومحاضراتي وطلعت اجت حنين تركض وراي وتسولف بس مانتبهة الهة ابد ظل كلشي بهاللقاء ينعاد بمخيلتي بس بصورة جدا بطيئة لحد ماحسيت ايدي انخلعت وتكومت فوك حنين
تمنياتي لكم بمتابعة ممتعة معي وآسفة لفترات انقطاعي الطويلة بسبب ظروف خاصة
روح 🌧
أنت تقرأ
ابطال رغم الخسارة
Genç Kız Edebiyatıقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
