نسمع كثيراً بقول تأتي الرياح بما لا تشتهي السفن وفعلاً هذا ما حدث بعد ما امتحنت امتحانات أخير السنة وجنت اتوقع نفسي اطلع الاولى على دفعتي الا إنه خابت آمالي وطلعت الثانية بفارق كم عُشر عن ترتيب الطالب الاول طبعاً كلش ضجت على الرغم من انه الكل قدملي التهاني بس حسيت هذا مو تقديري لأن كلش تعبت بوقتهة اربع سنين ماضربت محاضرة ابد ودرجاتي اعلى درجات بالقسم بشهادة الدكاترة والاستاذة لكن سكتت على مضض قررت اقدم ماجستير طبعاً وبتشجيع من دكتور عبدالله وست انفال إلا انه اثناء ماجاي اقدم مااعرف شنو الخلاني اسحب الاستمارة واتراجع عن قرار دراسة الماجستير ومن رجعت للبيت شفت نفسي لازم اجمع مبلغ مادي لابأس بي وبعدين اقدم ماجستير لأن الدراسات مصاريف وبحوث وروحة ورجعة واهلي تعبوا فقررت ادور وظيفة تلائم شهادتي وبقيت ابحث عن وظيفة عسى ولعل احظى بوظيفة مناسبة الى إن قررت اروح للجامعة واشوف اذا بيهة مجال اتعين بقسم الجغرافية رحت دخلت للقسم من بعيد شفت جواد من شافني بسرعة البرق غير طريقة آني ولا اهتميت ولا عبالك شفتة دخلت للسكرتارية صار بوجهي دكتور عبدالله
لمى ..... السلام عليكم دكتور
دكتور عبدالله .... وعليكم السلام أهلا لمى، ليش هيج ماقدمتي دراسات مو كلتلج قدمي مادامج عندج معلومات وعقلج فريش ليش هالشكل. اتوقعت الكاج وية طلبة الدراسات كلش ضجت من ماشفت اسمج.
لمى... مامهيئة نفسي بالوقت الحالي للدراسات دكتور بس اجيت اليوم عسى ولعل الكي وظيفة بقسم الآداب الجغرافية، حتى استفاد اثناء تواجدي بالقسم وبنفس الوقت حتى ابقى محافظة على المعلومات الاعرفهة عن مجال قسمي
بعدها اخذني دكتور عبدالله للعمادة مالت القسم ودخل عالعميد وكالي انتظر بالسكرتارية دخل وطلع وطلب مني ابقي رقم تليفوني عدهم ومتى ماصحت فرصة وكان هنالك مجال للتعيين راح يتصلون علي اني بصراحة تملكني نوع من اليأس بس مع ذلك تركت رقمي وطلعت وقدمت شكري لدكتور عبدالله ضجت كلش يعني بعد دراسة وتعب ومعدل عالي كلشي ما حصلت لا تعيين لا دراسات، رجعت للبيت تعبانة كلش وراسي يريد يطلك بدلت واكلت قليل واخذت بندول ونمت ......
سمعت موبايلي يدك فزيت حيدر يتصل ...
استغربت حيدر صارلة فترة طويلة مامتصل
لمى... الوووووو
حيدر... الوات شلونج ياالكاطعة لاخابرتي لا سألتي حتى رسالة مادزيتي بالجذب كولي انفجرت علي مفخخة عبوة مات عدل ماعندج صديق .
لمى..... خلينة هالشكل خاف أسأل وخاف تاخذهة بغير قصد واني ماصدكت الموضوع انتهى.
حيدر... شوفي منو الجاي يذكر منو انتي تتحارشين
لمى... لا والله بس هالشكل جنت اتوقع في حال اتصلت وسألت عنك
حيدر... المهم سمعت اليوم رايحة للجامعة خير ماكو شي؟
لمى... والله رحت حتى اقدم على كرسي المعيد الي على اساس من نصيب الطلاب الاوائل.
حيدر....وشكالولج؟
لمى....اخذوا تليفوني وكالوا يتصلون علي؟
حيدر...معناهة ايسي خلوج عالشحن حتى تملين منج لكيفج.
لمى.... اتوقعت هالشكل وماعولت على وعودهم الله كريم.
حيدر....بس كولي اي هسة اتقدملج
لمى... كلش ضجت وجاوبتة حيدر راح اسد التليفون
حيدر... هههههه هاي شبيج صايرة متتحملين شقة
لمى... انتة تعرف واني اعرف انتة ماجاي تتشاقة
حيدر..... امممممممم إن بعض الظن اثم
لمى.... ميخالف المهم شلونك اخبارك الاهل شلونهم
حيدر.... زينين الحمدلله انتوا شخباركم
لمى... تحت رحمة الله
حيدر... قدمت على تعيين على الداخلية
لمى...الله يوفقك ويتمملك على خير ان شاء الله
حيدر.... مشكورة يوم الالج وتحصلين تعيين
لمى... إن شاء الله
مع السلامة حيدر
حيدر.... الله معاج
سديت سماعة التليفون وماحسيت الا عاصم فوك راسي وبدة ينتقد اتصال حيدر
عاصم... جامعة وخلصت شنو معنى اتصالة عليج
لمى... حاب يسأل لا اكثرولا اقل
عاصم... مااشوف بيهة داعي
لمى... ترة اني فوك هاي الشبهات
عاصم... ماكايل شي بس بعد لا يتصل زين؟
كمت وصرت عصبية كلش اول تالي عاصم يشكك بية من شوكت هالججي كلش ضجت بحيث طلعت السيم كارت وكسرتة وشمرتة وظليت آكل بروحي اكل
لليل سألوني على موبايلي رادوا كلتلهم ماعندي اي موبايل بعد لأن السيم كارت كسرتة الكل تفاجأ كالوا ليش؟
لمى.... احسن لأن الظاهر ماكو بعد حسن ظن حتى من الاقربون
وسولفتلهم كلشي ظلوا يحجون على انه تسرعت وماكو داعي وعاصم من حجة ساعة عصبية ورجال وحقة وغيرتة كل هذاالحجي مابرد كلبي.
وشلت على عاصم بكد الدنيا بس ورة يومين اجة
عاصم..... مو القصد اني اشك بيج بس مااشوف الهة داعي يعني التزامكم الجامعي الجان جامعكم انتهى واني اخاف عليج يا خوية
لمى.... بس اني تربيتكم ومااتوقع الصار من فراغ بس صدكني اني الاهم عندي سمعتكم مو من تالي احيبلكم الكلمة العاطلة وعالعموم ارتاح بعد ماكو موبايل
عاصم... والله احسنلج من دوخة الراس والرصيد
لمى.... الله كريم
ردت بس اكوم لأن هوة برودة عكس البركان البكلبي
ورة فترة بديت اقدم بالمدارس اذا يحتاجون مدرسة جغرافية او محاضرة اي شي المهم احرك نفسي وبقيت ادور سنة بهالفترة طلع اخوي رأفت من السجن ويافرحتنة بي مامصدكين بيناتنة بقينة اسبوع كامل ننام ثلاث ساعات ونكعد كبالة نريد نشبع منة غير الناس الاجت تبارك وناس اجت تسأل عن اسماء معتقلين اذا جانوا ويا او لا
بعد فترة بدت والدتي تشكي من كلياتهة ومتقبل تروح طبيب وبس تاخذ مسكنات الى إن المسكنات كامت متأثر بيهة وبالجبر والقوة قبلت تروح للطبيب
من راحت سووا تحاليل واشعة ومفراس وتبين الوالدة عدها مرض السرطان بالكلى اليسرى ومنتشر وبمرحلة متقدمة جدا
اظلمت الدنيا بعيونة مامصدكين ابد امي بيهة هالمرض صارت اوضاعنة بالبيت حزينة وكآبة اخذوهة لغير دكتور وكال لازم نستأصل الكلى انزرع عدنة امل ولو بصيص ودخلت الوالدة للعمليات ورة فترة من العملية بدت تاخذ جرعات كيمياوي وبدة وضعهة يدهور كامت متكدر تمشي حتى اديهة تقيدت حركتهم كلش صار وضعنة كلش سيء اتأذينة واحنة نشوفهة تذبل يوم بعد يوم الى إن بيوم من الايام جان ليلة الجمعة وضعهة كلش ادهور ردنة ناخذهة للمستشفى ماقبلت كالت تعبت مابية حيل بعد مستشفيات اريد ارتاح كعدت كبالهة ومااعرف شكول بس ابجي واني اباوع عليهة واحجي بداخلي... صدك بعد مااشوفج ومااصبح بوجهج واتشاقة وياج واعصب من متقبلين تاكلين شلون اذا اشتاقيتلج وين اشوفج وشلون اشوفج؟ تعبت من البجي وماحسيت الة غافية يمهة فزيت لكيتهة غافية خليت راسي يم كلبهة لكيتة يدك لهناك فزت كالت صيحي اخوانج كعدتهم كلهم
رادت اهلهة خابرناهم واجوي ظلت تلوب كدامنة مثل السمجة المطلعينهة من المي وخالي جان يقرة قرآن يمهة وهوة يبجي الكل اجة بقى بس خالي الجبير رادتة بالاسم ومن دخل شوية وماحسينة الا امي تمددت لا ايد ولا رجل مااعرف شنو شعوري وشسويت مااتذكر بالضبط بس كل الاتذكرة شمرت نفسي بنص الشغل وبالليل انام شوية بعد ما أشبع بجي عالمخدة ومرت ايام الفاتحة وبعدهة بدت الوحشة على امي اشتاقلهة اباوع لمكانهة اتخيلهة بدت معاناتي صرت عصبية والنفسية كآبة
دعائكم لوالدتي بالرحمة والغفران ولأمواتكم بالمثل
روح 🌧
أنت تقرأ
ابطال رغم الخسارة
ChickLitقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
