ابطال رغم الخسارة

بلا عنوان

        طبعا خلصت المحاضرة واني على اعصابي كاعدة كلشي ماافتهمت غير صراع بيني وبين نفسي جزء يريد ينهد بكل شخص نظرلي نظرة شك وجزء لا يكلي اهدئي محد يستحق تبرريلة اي شي انتهت المحاضرة لملمت اشيائي عالسريع وطلعت من القاعة بدون ولا كلمة جاي امشي قريب عالبوابة الرئيسية مال الجامعة وسمعت صوت
دلشاد .. بس على كيفج متكوليلي شادة محرك لو صايرة ببيب
لمى .. انداريت كلي بنفس اللحظة واني مبينة عصبية وضايجة وشوية انفجر (اتفضل)
دلشاد.. يمعودة اعصابج هاي الكتب جابهن فؤاد
لمى.. آسفة مو قصدي بس شوية ضجت
دلشاد.. اشوفج لوحدج وحنين مو وياج اشعجب ؟
لمى... لا بس شوية مستعجلة وهية تريد تمر عالكراج محتاجتهم فمكدرت انتظر
دلشاد.. خير إن شاء الله
لمى... هاي المصادر عادي يبقون عندي كم يوم واحتمال اسبوع
دلشاد.. اي عادي كلش كلش عادي
لمى.. شكرا من صدك تعبتك
دلشاد.. تعبج راحة اذا تردين اوصلج ؟
لمى.. لا ماكو داعي يااللة اخذ راحتك مع السلامة
دلشاد.. مع السلامة
اخذت المصادر من دلشاد وتحركت للكراج عالسريع صعدت بأول سيارة طبعا لأن وحدي كعدت بالكرسي البصف الباب وصلت للبيت واني تعبانة كلش بدلت وتغديت وصليت ونمت كعدت على صوت الموبايل باوعت هذا حيدر يتصل اووو شيريد
عفت الموبايل رجعت خليت راسي عالمخدة هماتين دك مرة ثانية يبووو شيخلصهة اليوم هسة اني منين خايفة شو خلي ارزلة على موقفة وياي
لمى ... الووووو
حيدر ... الوات شلونج
لمى... وعليكم السلام الحمدلله اتفضل خير خوماكو شي ؟
حيدر... لمى لا تطلعيني من طوري شهالرسمية التحجين بيهة وياي لمى اني حيدر شبيج مكلوبة
لمى... همزين انتة حجيتهة انتة حيدر هاي عود انتة التعرفني اني منو هالشكل تتصرف بشك وقلة ثقة ترة اليوم اني عرفت انتة ليش ضايج وتريد تحجي وياي عبالك جنت متوعدة وية هذا الطالب المرحلة ثانية بس يااللة اني عاذرتك لأن صديقة عمري ما حسنت الظن بية عود انتة تحسن الظن
حيدر... كملتي كلامج لو بعد
لمى ... اي واحب اكولك ماجنت متواعدة مثل ما ظنيتوا مجرد ما الولد شافني محتارة ادور مصادر لبحث التخرج ومالكيت اثناء تواجدة صدفة بالمكتبة مالت القسم واخذني لأقاربة طالب دراسات بآداب انكليزي حتى يستعيرلي المصادر من مكتبة الدراسات خلف الله علي
حيدر... وانتي شفتهمتي منة ورحتي ويا
لمى .. حيدر مااسمحلك تشكك بتصرفاتي وسلوكياتي رجاءً
حيدر .. اشكك وغصبا مادام ولد وبنية يمشون سوة وبدون سابق معرفة قابل اتنبأ لو اتكهن اني رجال حالي حال الناس الي الظاهر
لمى.. هاي انتة الانسان المثقف تحجي هالشكل عفية صدمتني انتة التعرفني اني شنو صارلك اربع سنين وياي ششفتني كل شويةوية شاب وهنا بجيت
حيدر... لمى حقي لأن احبج
لمى.. هنا اتفاجأت !!!!! شنو تحبني ؟ لعد وحبك لدينا سنتين تركض وراهة ومن سافرت تخبلت صرت كلساع مصادق بنية هاي شبيك حيدر اني لمى ، لا عبالك تقشمرني وانتة تعرف شلون صديقك وعدني وبعدين ماوفى بوعدة شتريد تكمل الفلم العافة عالنص لو شنو ؟
حيدر... بس انطيني مجال احجي من سافرت دينا وكمت اجي يمج وتكعدين تسولفين وياي واخابرج بحجة شنو مادة الامتحان لو مامفتهم فلان نقطة او فلان تعريف هواي تعلقت بيج وتعودت على وجودج شلون تواسيني وتهتمين بية ومن شفت شلون جواد عافج كلش انقهرت بس فرحت لأن كلت الجو خلا بس الي ردت اردلج الموقف او الجميل السويتي وياي بس شفتج مااهتميتي ماحبيت افتح الموضوع بعد بس ماردت تاخذين عني فكرة غير فكرة الصديق ابتعدت وصرت منو تنعجب بية اماشيهة فترة واكللهة ماافيدج صرت ابتعد اخاف اخسرج ويامة حجيت وية روحي وكلتلهة هاي معتبرتني اخو مااكدر اخسرهة ومن شفتج اليوم تخبلت بودي اكمشج وارزلج والحرك كلبي زايد انتي ولا اهتميتيلي لج احبج والله احبج شتردين خطوبة من باجر اخطبج وانتي تعرفين كلشي عني احجي ليش ساكتة ؟
لمى... شحجي وشكول انتة صدمتني اني معتبرتك اخ وصديق بس مو حبيب
حيدر... انطيج مجال وفكري
لمى.... مااكدر صعب راح اقفل التليفون لأن تعبانة
حيدر... براحتج
لمى ... مع السلامة.
حيدر ... مع السلامة
قفلت التليفون وخليت راسي عالمخدة وبجيت واني اتذكر كل المواقف وية حيدر مو قف موقف شلون نتشاقة شلون من طلاب القاعة يشوففففونة كاعدين لو نقرة لو نسولف ويكولون لايكين لبعض واني اشوفة يصفن لو يضحك واكلة والله ناس فارغة متشوف اثنين اذا ماكالت ذولة حبجية هوة جان يسكت واني بس اضحك واصنف تعبت ونمت ماكعدت الا ورة اذان المغرب كمت توضيت وصليت واتعشيت كمشت المحاضرات راجعتهم بعدين رحت عالمصادر اطلع منهة اليفيدني بس ماكدرت تشتت فكري اجتي هاجر اختي
هاجر.. هاي شصاير بيج؟
لمى.. ليش شكو ؟
هاجر... وجهج كلة مورم ، جنتي تبجين؟
لمى.. اي على رأفت
هاجر.. اي والله حتى اني اشتاقيتلة كلش
كابلتهة وكعدت ابجي منا صدماتي منا مشاكل عائلية عفية كلب اجكد يتحمل سبحان الله زارع بينة صبر بلا حدود الحمدلله على كلشي
دخلت اختي بيان وعلى وجهة نظرة استغراب
بيان.. شلونجن بنات ؟
لمى وهاجر.. الحمدلله
بيان .. شبيجن جنتن تبجن ؟
هاجر.. اي والله مشتاقين لرأفت ومنا سؤدد وسالفة طلاكهة  وامي وابوي خطية متبهذلين صحتهم بالنازل
بيان ... اي والله وضعنة من سيء للأسوأ بس الله كريم رب العالمين الة حكمة بكلشي حتى الاشياء النشوفهة حزينة الة بيهة حكمة سبحانة .
هاجر.. اشعجب جاية ؟مو عوايدة زوجج يجيبج .
بيان... مشتاقتلكم وضايجة والبنات هم خطية رادوا يشوفونكم ، شبيج لمى شو ساكتة مو عوايدج كل مرة ادوخينة بسوالفج ؟
لمى.. لا هيج وغمزتلهة حتى تصرف هاجر
بيان .. هجورة حبيبتي شوفي البنات خاف ضوجوا امي
هاجر.. لعد شكو سموهة بيبي خليهم يلعبون يمهة بلكي ينسونهة شوية القهر
بيان.. زين حبابة عندي موضوع خاص وية لمى اريد اسولفة بوحدنة ؟ 
هاجر.. شكو زواج خطوبة ؟
بيان.. يابة اجكد فضولية وتشلعين الكلب دروحي لاحكة على كل هاي السوالف
راحت هاجر بعد نقاش وصد ورد بينهة وبين بيان اختي الاصغر من سؤدد وعاصم
لمى.. بيان الله جابج اليوم اريد اسولفلج بس الحجي يظل بيناتنة اوعديني
هاجر .. خوفتيني شكو شصاير ؟
لمى.. ماكو شي بس توعديني متطلع منج كلمة من الراح احجي الج
بيان.. وعد مني مااحجي بس سولفي مو شلعتي كلبي
سولفت لبيان كلشي عن جواد عن دكتور عبدالله وعن كل التقدمولي وعن دلشاد وعن حيدر الصدمني بحبة
بيان .. لج هاي شنو كل هذاوانتي ولا حجيتي ولاكلتي لج غير شايلة كلب
لمى.. اي بس كوليلي شلون هسة
بيان.. دلشاد لا توافقين علي
لمى.. ليش؟
بيان.. بعدج زغيرة ومااكدر ازرع بداخلج اشياء تغير طبيعتج النفسية والعقلية حاليا يجي وكتهة واسولفلج ارفضي احسن الج والة وحيدر هسة صدي ونشوف شيصير
لمى.. زين هسة انتي زيدتي حيرتي شكول لدلشاد ؟
بيان.. كوليلة اهلي رفضوا وخلص
لمى.. وحيدر؟هذا هم طلعلي صفح هسة انتبه يحبني ! يومية وية وحدة
بيان .. رزلي كوليلة انتة يومية وية وحدة شنو تريد تضمني لقافلة ضحاياك ؟
لمى.. ان شاء الله بس انقهر على دلشاد مااعرف ليش احسة صادق بكلشي
بيان .. صدكيني احسلج

وللقصة تتمة تمنياتي لكم بطيب القراءة واستحسان الاحداث استودعكم الله ونلتقي في الاحداث المقبلة بعون الله
روح 🌧 اتمنى تضغطون على النجمة حتى تصعد القصة ويطلع عليهة بقية رواد الواتباد واكون ممتنة لكم