ابطال رغم الخسارة

خيبة أمل

في كثير من الأحيان نحاول الهروب من واقع قد يكون قبيحاً لكننا في الغالب نرتكب جرائم بحق أنفسنا
مرت الايام بصورة بطيئة ومملة لأن لا شيء جديد بحياة لمى نفس الروتين
لكن بيوم من الايام اجتي صديقة لمى اسمهة شيماء كالتلهة(لمى دكتور عبدالله هواي منطيج خصوصية )
لمى(طبعاً غير آني شاطرة ومتميزة عندة )
شيماء (لا لمى مااعتقد لهذا السبب وبس انتي شايفة من توكفين يمة وتسألينة لو من تاخذين ورقة الكوز(تسمية تطلق على الامتحان اليومي السريع للطلاب) احسة يصير كتلة من الخجل )
لمى ( وين المشكلة بالموضوع يا شيماء يا عيني تلكينة يخجل لأن بعدة شاب وزغير مو مثل الباقين او حديث عهد بالتدريس )
شيماء (لمى فتيتي كلبي انتي غبية لو تتغابين عفية )
لمى (شكو ليش غبية واتغابى )
شيماء (لمى دكتور عبدالله يمكن يحبج )
لمى (والله يا شيماء غير عليج سوالف كل أُستاذ ودكتور يهتم بطالبة لأن متميزة نعتبرة يحبهة استغفرالله منج )
شيماء ( آني بالبداية عبالي الموضوع عادي مثلج انتي هسة بس من شفتة ذاك اليوم شلون اتوتر من اختنكتي اتأكدت يحبج )
لمى (هههههههههه والله ياشيماء منين طلعتي بهالسالفة عفية )
شيماء (ظلي تستحين من هذا وذاك الى إن تعنسين )
لمى ( اي عادي خليني )
طبعا دكتور عبدالله انسان مهذب بشكل وشخصية متزنة جان بوكتهة عمرة ٣٣ سنة جان من يصحح دفتر لمى ينطيهة ملاحظات غاية بالروعة والتشجيع وبالقاعة يثني عليهة وعلى امتيازهة وجان يكللهة اتمنى اشوفج أستاذة او دكتورة بالجامعة
ولمى جانت تفرح جداً بهذا المدح ومن قبل منو؟ من قبل ناس غاية بالثقافة
وبيوم من الايام اجة جواد طلب دفتر لمى على غير مامتوقعة لمى لأن جواد إذا احتاج شي بيوم من الايام يدز صديقة حيدر لكن هالمرة اجة بنفسة وطلب دفتر الملاحظات
لمى ماكالت شي انطتهيا اخذة وبنهاية الدوام رجعة فاتحة على صفحة معينةبسرعة انطة الدفتر الهة وابتعد  اخذتة لمى من عندة اتفاجأت من لكت مكتوب فوك كلمة بقلم رصاص بطرف الورقة ( احبج )
بقت صافنة لمى صديقاتهة كاللولهة شكو
لمى (ماكو شي بس مكتوب بهاي الورقة هالشكل وشوفتهم المكتوب )
زهراء (اي هاي آني كتبتهة الج ذاك اليوم )
لمى مثل شي بلمح البصر رفعهة فوك ورجع بيهة للكاع
طلعت للبيت بدون كلام وية حنين ( رفيقة الدرب الطويل ) حسب تعبير لمى ولمى مافتحت حلكهة بكلمة
جانت مصدومة اتوقعتهة من جواد لكن بلحظات خابت آمالها
باليوم الثاني لمى كاعدة بباب مختبر الاحصاء اجة حيدر كاللهة ( لمى جواد يريد يستشيرج بموضوع )
لمى ( اي ليش لا ، خيرك جواد شنو الموضوع التريد تستشيرني بي )
جواد ( لمى ممكن بالقاعة نسولف )
لمى ( اي حاضر بالقاعة بالقاعة )
دخلوا للقاعة جانت فارغة وجان سبحان الله تنملي القاعة
لمى ( خيرك جواد سولف )
لأن ماجان ببالهة يريد يحجي وياهة موضوع خاص
جواد ( لا هيج ماكو شي  )
وطلع وهوة عصبي من القاعة
بوكتهة جان اكو طالب وياهم اسمة رياض حضر بدايات الموقف ومن شاف جواد شلون طلع عصبي ظل يدندن بأغنية معناهة جواد انضرب بوري
وببقية الايام حاول جواد يتقرب للمى بس صديقاتهة كلشي يسوي يكللوهة ترة ماكو شي من تصوراتج كون جواد يحبج
لمى صدكت بكلامهم لأن حسب توقعاتهة لو يحبهة صدك جان اجة وواجهة بحبة من شنو يخاف؟ اليحب كلشي يسوي حتى يفوز باليحبة مو يظل يتجبجب من عندة
بهاي الفترة بدة دكتور عبدالله يلمح للمى بأعجابة وبكونة مستعد يتقدملهة لكن وضحلهة هوة مرتبط بوحدة من اقاربة وعندة اثنين اطفال لمى ماحبت تهدم سعادة زوجتة واطفالة حتى هية تبني سعادتهة على اساس تعاستهم فوضحتلة هالشي بس بقة هوة عسى ولعل انه تقتنع في يوم من الأيام وبدة يقدملهة مساعدة بخصوص اي شي تحتاجة من بحوث وتقارير ورجع فتح الموضوع مرة ثانية
دكتور عبدالله (لمى ترة اني شاريج وبعدني رايدج على سنة الله ورسولة لا علاقات ولا خرابيط وصدكيني ماراح تأثرين لا على زوجتي ولا اطفالي مثل ماانتي حتكونين زوجتي هية هماتين انتي من شنو خايفة فهميني )
لمى ( دكتور هواي امور تخليني ارفض اولا زوجتك واطفالك
وثانيا مااحب اكون ثانية بحياة الرجل الي ارتبط بي
وثالثا الفوارق الاجتماعية
انتة دكتور وحسب ما سولفتلي ابن عائلة تملك كذا وكذا من الاملاك ووالدك جبير قومة يعني يا ترى يقبل ابنة الدكتور يرتبط بأنسانة وضع عائلتهة الاجتماعي دونهم بهواي امور خاصة ووالدك انسان متزمت دكتور كون واقعي يعني راح تواجهك هواي مشاكل خاصة وزوجتك بنت عمك قبولي بيك يعني قبولي دخول معركة خاسرة وانتة تجابه اهلك وبمقدمتهم ابوك علمودي اعجاب بمرور الزمن يختفي ويتلاشى اولادك وزوجتك اولى بيك )
دكتور عبدالله  ( بعد كدامي سنتين احاول بيهم وياج بلكي تغيرين رأيج )
لمى (خلكك طويل دكتور )
دكتور عبدالله  ( اليشوف هالبرائة والأخلاق العالية يكون مستعد يسوي كلشي حتى يقتني مثل هيج جوهرة )
لمى ( من رخصتك دكتور عندي محاضرة )
دكتور عبدالله ( شراح يصير لو ملتقي بيج قبل لا اتزوج جان اتغيرت خارطة حياتي وحياتج )
لمى  (مااتوقع يجوز جان هم بعد فترة تشوف وحدة وتنعجب بيهة وتتزوجهة )
دكتور عبدالله (ههههههههههههه والله عندج اساليب بكسر الواهس غاية بالاتقان )
لمى (استأذن دكتور عندي محاضرة )
دكتور عبدالله (اتفضلي بس اتمنى تفكرين بالموضوع )
طلعت لمى من مكتب الدكتور وهية كوة مسيطرة على اعصابهة
شافوهة صديقاتهة الي نهائياً مايعرفن بقصة دكتور عبدالله وياهة وطلبة بالزواج منهة لأن مارادت احد يمارس اساليب التقنيع وياهة بخصوص هالموضوع وبنفس الوقت مارادت السالفة تطش بين الطلاب والكل يعرف وهية ناوية من البداية ترفض رفض قطعي
من جهة اخرى بدأ المعجبين يتهافتون عليهة وعلى التقدم الهة وهية لا زالت مصرة على رفضهة الارتباط بأي شخص كان او يكون
حتى تفكيرهة بجواد بدا يضمحل لأن اقتنعت بكونة غير شجاع حتى يواجهة ويعترفلهة بحبة
بس بقة اعجابهة بشخصة قائم بقلبهة
بس بدت تتلافى اللقاء بي
بهاذي الفترة صديقتهم دينا فاتحتهم بموضوع هجرتهم الى سوريا لأن اوضاع العراق بالالفين وستة بدت تتدهور وظهرت اشياء الى واقع المجتمع العراقي خلت النسيج الاجتماعي يتحلل
انقهروا بنات الكروب بس بنفس الوقت فكروا بكون هاذي فرصة لنجاة دينا وعائلتهة عسى ولعل يلتقون في يوم من الأيام
تبادلوا الاشياء التذكارية بينهم وبينهة وطلبت منهم يدعولهة ولعائلتهة يوصلون لبر الامان بسلامة
ورة فترة قصيرة عرفوا دينا متزوجة شخص من نفس دينهة ومذهبهة ومسافرة ويا لكندا
وبعثتلهم سلامها واشتياقها وكالتلهم (بحياتي ما عرفت ولا عاشرت صديقات وكفوا بجانبي وساندوني وحموني حتى من نفسي مثلكم اشتاقلكم يومية واتذكركم بصلواتي وادعيلكم العذراء تحفظكم وعوائلكم من كل شر ومكروه )
وظهر شخص جديد يريد يرتبط بلمى وهوة من اقاربهة وايضاً رفضتة وبهاي الفترة وكفت والدتهة بجانبهة وايدتهة بمبدأ الرفض على الرغم من الضغوطات الي مارسها المحيطين بيهة ومحاولتهم اقناعها بالقبول بس هية استمدت قوة رفضهة من ذاتهة وموقف امهة الرافض لهالزيجة الي جانت والدتهة تكوللهة  (يمة انتي متعيشين وية هيج ناس وكحة والصلافة والحقد متجذر بيهة )
وبدت الامتحانات النهائية وخلصت على خير مايرام كسابق عهدنا بلمى متميزة بأجاباتها التي اذهلت جميع الكادر التدريسي وبمقدمتهم دكتور علي الي جان الدرجة مينطيهة بطلعان الروح وكفهة كدام الكل وكالهة  (انتي اول طالبة تقهرين جبروتي وتجيبين درجة كاملة ساعة كاملة كامش دفترج الامتحاني احاول اتصيدلج خطأ او هفوة حتى انقصج ولو نص درجة بس ما لكيت ولا حرف وعلى هذا الأساس اغرمج تقرير من عشر صفحات )
لمى (صار أُستاذ )
وهكذا انطوت سنة دراسية أُخرى