ابطال رغم الخسارة

البدايات للكل لكن النهايات للمخلصين

            نعم الكل في بادئ الامر يعدك بما هو فوق المعتاد وبأن يقدم لك ماتريد وانه سيكون هو السند لكن في اول اختبار للوفاء بالوعد يخلف كل الوعود والعهود وهو درس تعلمته لم ولن انساه ماحييت نظراً لما مررت به من صعاب خسرت الكثير من ايامي بالتفكير ودموع سالت على وسادتي ليلاً لا استطيع التكلم لئلا يُقال اني ضعيفة وكما يقول الشاعر :
اراك عصي الدمع شيمتك الصبر
    إما للهوى نهيٌ عليك ولا امر ُ
بلى إني مشتاق وكلي لوعةٌ
ومن مثلي لا يُذاع له سرُ
كل من يراني يحسبني قاسية وباردة المشاعر لكن فحواي على عكس ذلك تماماً فأنا قلبي ارق من بتلة الوردة فلو تعرضت لشيء من القسوة فأني اذبل لكن كنت استند على نفسي في كل مرة فالضربة التي لا تميتك تقويك هكذا كنت انا امام الناس جلمود صخر لكن بيني وبين نفسي اسيرة مشاعر لا ابوح بها لكي لا استكين لها
اسهبت واطنبت اعلاه لا لشيء الا لأني وجدت في وقتي الحاضر إن الوفاء عملة صعبة لا يقتنيها الجميع انما النادرون فقط يمتلكون هذه الخصلة وقد اصبحت اصاب بخيبة تلو الاخرى بالاشخاص وبمواقف لا تخطر على بال احد ابداً لكن ثقتي بالله بأني على حق وماافعل لله وابتغاء وجه مرضاته وسيكون الجزاء في يوم لاينفع ابن آدم شيء سوى عمله كانت عزائي وسلواي والحمدلله الذي لا يُحمد على مكروهٍ سواه

        وبعد ان انتهت امتحانات الكورس الاول وانتهت عطلة نصف السنة داومت بالجامعة طبعا بعد مااخذتلي كسلة اسبوع بعد عطلة نصف السنة داومت جنت كاعدة انقل كم محاضرة فايتاتني جان القسم شبه فارغ الكل ملتهين يسوون عزايم توديع وسفرات وقسم مشغولين ببحوث التخرج المهم كاعدة واتفاجأت بخيال شخص وكف اكبالي باوعت عالحذاء لأن جنت منزلة راسي اكتب وبعدين رفعت راسي انصدمت بالشكل الجميل للشاب الواكف كدامي والاناقة والترتيب بأختيار الملابس بقيت صافنة بس اداركت نفسي كلتلة
لمى.. اتفضل
الشاب ... اولا السلام عليكم
لمى .. وعليكم السلام
الشاب .. اسمي دلشاد مرحلة ثانية وياكم بالقسم
لمى.. اهلا وسهلا
دلشاد... اهلا بيج بس حبيت اغتنم فرصة وجودج لوحدج واحجي وياج كم كلمة
لمى.. اتفضل
دلشاد.. بصراحة وبدون مقدمات واتمنى تخليني اكمل للأخير لأن من صدك فرصة تواجدج لوحدج وبعيد عن صديقاتج فرصة ماتُثمن بثمن اني ومن الاخير صارلي سنتين معجب بيج وكلما احاول افاتحج بالموضوع اتراجع ومااكدر ودائماً الظروف تأتي بعكس مااريد لكن هالمرة وبما انه نهاية السنة مابقالهة شي كلت لازم احسم الموضوع طبعا قبل كلشي اني الشاب الوحيد.بعائلتي المتكونة من ٣ بنات واني ووالدي ووالدتي طبعا اخواتي اثنين منهم متزوجات وهمة اكبر مني وبالمناسبة مخلصات جامعة واني واصغر مني اختي هسة هية رابع اعدادي 
لمى .. طبعا الشاب اني جنت الاحظة مرتب وانيق وهادئ وعكس اغلب الشباب وجنت اشوفة بأي مكان اروحلة بس ماجان ببالي اكو ااعجاب ، ماعرفت شجاوب وشكول واني معطيات حياتي سيئة بالبيت ظروف استثنائية منا اختي ومسألة انفصالهة الصارت حتمية ومنا اخوي الي بدوا والدي ووالدتي يروحون للأماكن اليكلولهم بيهة معتقلات امريكية راحوا لأبو غريب  وكالولهم ماعدنة هيج اسم وسمعوا اكوا معتقل بمطار بغداد وهم راحوا وكل نتيجة ماكووبعدين قرروا يروحون لمعتقل بوكا بالبصرة عسى ولعل يلكون اسمة او خبر عنة والدتي من القهر صار عدهة التهاب حاد بالكلى ووالدي بدة ضغطة يصعد وأثر على نظرة وهذا واكف كدامي يكولي اعجاب واريد اخطب زين كل هاي الاشياء مرت ببالي بسرعة بس ماحبيت اكسر خاطرة لأن مبين صادق بكلامة ، فكلتلة انطيني مجال فترة وارجعلك خبر .
دلشاد .. اكيد والج كل الوقت حتى تفكرين براحتج بس ها ترة مابقى شي وتبدي الامتحانات وانتي تنشغلين وهذا الي الاحظة انه انتي دائماً مشغولة بس سؤال انتي ليش هلكد بريئة ؟
لمى ...طبعا ابتسمت بس حرجني وخجلني ماعرفت غير بس اريد ابتعد فكلتلة  إن شاء الله ،يااللة اني من رخصتك استأذن .
دلشاد .. اهلا بيج .
    طبعا مشيت واني افكر شكول واحجي اهلي مااكدر اكوللهم همة بيا حال واني افتح موضوع خطبة ، احسن شي اخذ،رأي اختي بيان خلص الدوام واني بدوامة الخاطب الجديد بي كل المواصفات بس مااكدر اوافق مني لكيفي طبعا بعد.خيبات الامل حتى خططي  بالحياة مااعرف شلون تشابكت بعضها ببعض وكلشي صار هوسة ردت الكة نفسي بنص هاي المعمعة حاولت استجمع قواي واسأل اختي بيان طبعا ماجنت اخذ رأي صديقاتي لأن همة بعمري وينظرون للحياة من جانب واحد فقط مو مثل الكبار بالعمر لا الهم نظرات من جوانب متعددة طبعا هذا الشي مو يتعمم عالجميع لأن اكو زغار بالعمر بس عدهم خبرات وتجارب فذة واكو كبار العكس ماعدهم اي فكرة او فلسفة بالحياة لذلك امكانية تطبيق للقاعدة شواذ هنا محلها واضح
خلصت المحاضرات طلعت وبالفترة هذي التهيت بتقرير التخرج مصادروبحوث خارجية ومن نفس المنهج ولازم الدكتور المسؤول عن البحث يكون الة مجال خلال اليوم حتى يطلع على سير بحوث الطلبة المتخرجين كل هذا واني اركض منا واجي منا بحيث نسيت موضوع دلشاد الى إن اجة اليوم الي جنت بالمكتبة مالت القسم وجان محد اكو بس موظفة المكتبة مرة جبيرة بالعمر مخلية سماعات وجاي تسمع وبيدهة دفتر ملاحظات تكتب بي دخلت اني لوحدي جنت
لمى .. صباح الخير
الموظفة .. صباح النور
لمى .. مثل كل مرة اريد اخذلي جولة ادور عن كم مصدر للبحث
الموظفة .. اتفضلي اخذي راحتج ومن تكملين تعالي حتى نسجلهم
لمى .. إن شاء الله
دخلت وجان هدوء وصلت بأخير المكتبة وكفت ادور بهالاثناء حسيت شخص دخل وسلم عالموظفة واستأذنهة يستعير بعض المصادر بس بالي مو كلش جان يمهم التهيت ادور اجة شخص وكف بصفي
الشاب .. السلام عليكم
لمى .. عليكم السلام رفعت راسي واشوف دلشاد واكف كبالي طبعا جان لابس قميص سمائي وبنطرون بيجي والشعر شكارة فدشي والعيون ملونة صفنت بس اداركت الموقف حتى ميحس على الانبهار الي عشتة
لمى..آسفة جدا بخصوص ذاك الموضوع تدري انشغلت بحث التخرج ومحاضرات وامتحانات جدا آسفة
دلشاد.. اني استنتجت انتي لغيتي الموضوع فمحبيتي تحرجيني او هيج شي لذلك اليوم اجيت حتى اعرف السبب
لمى .. استنتاجك مو بمحلة كلش وهاليومين الرد حيكون عندك إن شاء الله
دلشاد .. إن شاء الله اكدر اساعدج بشي يعني ادور وياج عن الكتب التدورين عليهة
لمى .. شكرا مااحب اتعبك
دلشاد.. تعبيش هوة واني جاي ادور عن مصادر تقريري بطريقي اشوف اذا موجودات
انطيتة اسماء المصادر وبدينة ندور اني ويا بس لا اني حصلت شي ولا هوة
دلشاد .. اكو مكتبة ثانية خارج القسم خاصة بكلية الاداب لطلاب الدراسات بس لازم عندج باج او هوية خاصة بالطلاب حتى يسمحولج تستعيرين
لمى.. لا منين وحتى مااعرف شخص عندة هوية او باج
دلشاد .. ولا يهمج امشي وياي عندي صديق دراسات باللغة الانكليزية ونستعير بهويتة لو ننطي اسماء المصادر وهوة يجيبهم
طبعا كلش فرحت لأن معناها بهاي المصادر اخلص من بحث التخرج
استأذنة من امينة المكتبة وطلعنة نمشي اني ويا وانتبهت الكل يباوع بأستغراب لأن امشي وية هذا الطالب بس ماهمني ردت بس اخلص صعدنة لقسم الانكليزي رحنة لقاعة طلاب الدراسات شفت شباب ٣ ووياهم بنية مبينين دراسات راح دلشاد واني بقيت واكفة شوية بعيد عنهم شفتة وكف يمهم وسلم عليهم بعدين اجة ويا شاب وكف قريب علي سلم الشاب وعرفنة دلشاد على بعض
دلشاد.. لمى طالبة مرحلة رابعة بقسمي فؤاد صديقي واقاربي طالب دراسات آداب انكليزي طبعا لمى عدهة بحث التخرج بي نقص كم مصدر دورت علي بمكتبة القسم ومالكتة شفتهة صدفة محتارة بالمكتبة وطرحت عليهة فكرة تنطيك اسم المصادر حتى تستعير انتة من مكتبة طلاب الدراسات
فؤاد .. عادي ماكو اشكال بس اكتبيلي اسماء المصادر حتى استعيرهن الج وبنهاية الدوام همة يمج حيكونون إن شاء الله
لمى .. اي ثواني اكتبهم الك طلعت من جنطتي دفتر ملاحظات زغير وقلم كتبت بس اسماء المصادر وانطيتهم الة وكلتلة مشكور ولو ازاحمك
فؤاد .. ماكو كل زحمة
دلشاد .. يااللة نروح لمى
مشيت اني ويا نزلنة من الاداب انكليزي لقسم الجغرافية شفت حيدر يباوعلي بطرف عينة وبنات القاعة يسوولي حركة اوكي وبنات كروبي ضايجين طبعا مااهتميت بشي لأن مليت من حجم المشاكل ومليت من انه ابرر للآخرين تصرفات همة فاهميهة غلط طبعاً ماانطيت مجال لأي شخص يستفسر مني اتشكرت من دلشاد
لمى .. مشكور والله مااعرف شكولك تعبتك وياي
دلشاد .. ماتعبتيني بالعكس اتونست واني امشي وية البرائة هاي .وإن شاء الله بنهاية الدوام اجيبلج الكتب
لمى .. مشكور مرة ثانية
دلشاد .. راح تبقين تكولين مشكور للصبح
لمى.. اني اروح للقاعة لأن بصراحة تعبت
دلشاد.. اخذي راحتج
جاي امشي اجة حيدر
حيدر.. لمى ممكن دقيقتين عندي حجي وياج
لمى.. تعبانة حيدر الله يخليك اريد اكعد شوية
حيدر.. اي حقج
لمى .. شنو قصدك حيدر
حيدر.. ادري بيج ذكية وتعرفين شنو قصدي
عفتة ومشيت للقاعة شافوني بنات الكروب
حنين.. اي لمى من لكة احبابة نسى اصحابة
لمى.. عفية شبيكم اشو حجيكم مدري شلونة
زهراء .. معليج بأحد حبي سوي اليعجبج اهم شي مرتاحة
لمى .. والله موصوجكم صوجي اني باقية اسمع لكلامكم التافه
زينة طبعا ماحجت ولا كلمة بس اشوف بعيونهة حجي
عفتهم وانتظرت المحاضرة تخلص حتى اطلع