احترت جدا بكلام اختي بيان دلشاد شاب لابأس به لماذا ارفضه وكيف سأرفضه ساورني حزن شديد عليه جعلني افكر في الكيفية التي ارفضه فيها لكن دون إن اتسبب بجرحه قلت بيني وبين نفسي سأرفضه لكن بصورة لطيفة لكن شيء بداخلي يقول لي إن رفضي بحد ذاته مؤذي له سواء اكان لطيفاً إم غير ذلك فيبقى الرفض رفض مهما جملناه وقمنا بوضع مساحيق اللطف يبقى جارحاً
تعبت من التفكير ردت انام حتى لو شوية بس ماكو مااجاني النوم يومية بس اخلي راسي عالمخدة اروح بسابع حلم بس هسة لا ماكو ولا شوية حتى الغفوة ماكو
رحت لموبايلي اتذكرت اني قفلتة فتحتة واجت رسالة من حيدر ( بس فكري بالموضوع انتي اكثر شخص يعرفني واني اعرفج حتى اهلي يعرفوج على كد مااسولف عنج طبعا جنت اطرد فكرة ارتباطي بيج واكول هلكد مااحجي وياهة يجوز تعودت عليهة بس والدتي كالتلي متلكة احسن منهة واقلها تعرف كلشي عنهة بدون متكذب عليك اتزوجهة والله هيج كالتلي انتظرج تفكرين )
طبعا زادت حيرتي قاطات ... وبدة عقلي صراع جديد .. جانب من عقلي يكلي اي انتي وين تلكين مثل حيدر مال وحال وجانب يكلي وعلاقاتة ومبدئج الترفضين بي هالنوعيات من الرجال طبعا تعبت ومليت اتذكرت بالامتحانات جانت امي متخليني اشرب لبن تكلي يخليج تنعسين وتنامين رحت للثلاجة طلعت لبن وسويتلي بالدولكة مايقارب ٣ كلاصات لبن وثخنتة وعصرت ليمون شربتة كلة ماكو مااجاني النوم كمت توضيت صليت ركعتين وقريت قرآن ارتاحيت بقيت عالمصلاية كاعدة بيدي السبحة واستغفر الى ان غفيت عالمصلاية مااحس الة امي تكعدني
امي.. لمى لمى شبيج يمة ليش نايمة هيج
لمى.. مابية يوم بس نمت الظهر وطولت مااجاني نوم ومن جاي اسبح الظاهر غفيت ماادري بنفسي
امي.. شبيج شنو المضيك خاطرج يا يمة ؟
لمى.. مابية يوم بس امتحانات وبحث التخرج ومنا وضع البيت
امي .. ميخالف يمة تهون وتصير سوالف عليج بدراستج اخوج مابي شي إن شاء الله الولد الاجانة البارحة بالليل يكول جنت معتقل ببوكا وجان ويانة واخوج دازة علينة وإن شاء الله راح نروح للبصرة حتى نواجهة اني وابوج ونعرف منة ليش اعتقلوا وشلون واختج مااعرف شأحجي واكول بس غير الله يهديهم هية ورجلهة شنو ذنب هاي الاطفال تتشتت
لمى.. بس مااكدر مااتأثر صعب قابل انتوا غربة يا يوم
امي.. اريدج تصير قوية لا تتأثرين بكلشي ترة الاقدار مكتوبة والمكتوب عالجبين تشوفة العين مو من اقل شي تنكسرين خلي ارادتج قوية كلشي اتوقعي يصير وكلشي يمر عليج لا تضعفين وتستسلمين بسرعة لا حتى روحج عانديهة الرجيج مايعيش بهالوكت
لمى... صفنت بكلام امي حسيتهة انطتني جرعة قوة وقررت اخلي حد لكلشي ومااصير هينة وضعيفة
كمت توضيت وصليت الفجر ونمت شوية بعدين كعدني المنبه وكمت غسلت وبدلت بهالاثناء كعدت امي سوت ريوك اني مااكل مجرد شي قليل واشرب جاي حتى لا اصدع اخذت جنطتي ومحاضراتي حسب الجدول وطلعت من البيت رحت لبيت حنين دكيت الباب طلعتلي
لمى .. صباح الخير
حنين.. صباح النور
بعدهة ماحجيت ولا كلمة لا عاتبتهة على موقفهة ولا حجيت شي ولا بررتلهة ليش تركتهة وطلعت ورجعت وحدي بدون ماانتظرهة لأن مالي خلك صعدنة بالسيارة اني وياهة كل الطريق سرحانة بالاحداث الصارتلي هالسنتين خلتني انضج واصحى واوعى لأشياء ماجان ببالي تمر بحياتي في يوم من الايام لكن صار ومرت هالايام وعشت تجربتهة كأنما حرب لكن هذي الحرب رغم ماقدمت بيهة من ضحايا على صعيدي الشخصي بس فتحت عيني على اشياء هواي وكفت السيارة نزلنا بالكراج وتمشينا للجامعة دخلنة واول مادخلنة لمحت حيدر واكف وكأنة ينتظر احد بس ماشافني فتت وجان سمعت حيدر .. صباح الخير
حنين .. صباح النور
لمى .. صباح النور
حيدر... شلونكم اخباركم؟
حنين... الحمدلله
طبعا اني ساكتة بس اسمع لأول مرة اتعامل وية حيدر عبالك غريب لا ذاك اسلوبي ولا الشقة الجنت اني ويا نتشاقا حتى ماباوعت بوجهة شعور غير كأنما جاي اتعامل وية غريب حنين سألتة .. شو اليوم مغبش شكو مو عوايدك ؟
حيدر ... لا ماكو شي بس قررت اصير طالب مجتهد
حنين.. بعد وكت يمعود ترة احنة مرحلة رابعة وجاي نداوم النصف الثاني منهة كلهة شهرين وناس متشوف ناس
حيدر.. شبيج متشائمة يجوز اكو ناس يظلون للدوم سوة بعدين خليني عايش اللحظة عابت بس لمى اليوم ساكتة مو عوايدهة
لمى.. لا هيج بس بحث التخرج وترتيب المصادر شوية جاي افكر بيهم
طبعا احنة وصلنة قبل ساعة من بدأ المحاضرات لأن اني متعودة هالشكل اطلع من وكت قبل زحمة الشوارع
اثناء ما نمشي ودخلنة للكلية حنين شافت زهراء وترخصت وراحت
حيدر.. لمى تعالي هنا شوية قبل لا ندخل للقسم
لمى... رحت ويا وكفنة على جهة بمكان معزول بقيت ساكتة رفعت راسي لكيتة يباوعلي بصراحة خجلت لأن نظرتة غير جانت كلتلة (اي احجي )
حيدر.. ترة الرسمية زايدة اليوم عن حدهة شكو مو عوايدج لمى اني حيدر ليش هالشكل حتى متباوعين بوجهي
لمى.. شكولك مستغربة والله الكلمة متعبر عن الموقف بصورة صحيحة حيدر اني متعجبة عليك بليلة وضحاها صرت تحبني وانتة جنت كاتل روحك على دينا ومن رفضت الارتباط بيك صرت يا بنية تشوفهة تصاحبهة وهسة وصلي الدور مااعرف شحجي واكولك ومااريد اجرحك لأن انتة جنت صديق والك مواقفك بس هسة شصار واكتشفت تحبني مااعرف ترة للصبح اتكلب حتى مافكرت بمحاضرات اليوم
حيدر ... اني جنت اكابر عن حبج لأن اعرف مواقفج من العلاقات ومبادئج من الحب بصورة عامة متغير شي بي بس اني من شفتج وية هذا الولد ماكدرت اكتم بعد ردت اضربة واسحلة سحل شنو يمشي وياج وماخذ راحتة
لمى... اني مو صاحبة خبرة لا بالحب ولا بأمور الرجال بس يجوز مثل ميكولون شفتني ويا مع العلم ماكو كلشي من اللبالك خفت اطير من ايدك لأن الظاهر انتة تريدني مااحجي وية احد بس وياك تحتكرني فأنتة ظنيت انتة تحبني
حيدر.. اني مو غشيم انتي ماعندج شي ويا اي بس هوة يباوعلج بنظرة كلهة حب
لمى ... ضحكت كلتلة اي مو نسيت انتة خبير مال حب يومية وية وحدة مو كلب تكسي وهسة اجة دوري
حيدر.. شوفي اراهنج انتي الي
لمى.. رهانك خاسر طبعا انتة صاير كلش لا توكف بعينك صداقة ولا عشرة المهم عندك تسوي علاقة وبس
حيدر ... صح بس وياج غير آني وصادق بكل كلمة اكولجياهة صدكيني
لمى.. ترة لا اني مال حب ولا انتة مال تبطل سوالفك وتصبر تعيش وية شخص واحد كل عمرك انتة تحب التنويع شغلة الحب مو هسة وكتهة بجدولك الزمني من تشبع علاقات وضحك على عقول المايصدكن تكلهة احبج ذاك الوكت تصير انسان جاد بس تفقد ثقتك بالنساء وتصير عندك حالة نفسية اسمهة الشك لأن هلكد ما هنة غشيمات ويصدكنك راح تكون فكرة انه كل بنية سهل الايقاع بيهة والخانت ثقة اهل تخونك هاي مبادئك ناسي ومتناسي عن انه انتة ثعلب وماكر تتمسكن لحد ماتتمكن وتوكع بنات الناس وبعدين تكللهة مع السلامة اني مو مال زواج ماافيدج
حيدر... ترة هنة رخيصات يعني هسة انتي هاي سنة رابعة واجكد شباب حاولوا محد كدر ينول كلمة منج بس هنة يخلن نفسهن موضع تقشمر وراضيات وداعتج اصلا ساحلات نفسهن سحل مايصدكن اكللهن كلمة يطيرن العوبات
لمى .. عفية هاي فلسفتك كلش وضيعة ومااحبهة ومااحب لا ارتبط بيك لا بعلاقة حب ولا بزواج ولا بصداقة الله نجى دينا من حبالك وهسة كشفك الي
حيدر... بيش تردين احلفلج انتي غير غير غير افتهمي بابا
لمى .. عفية راح يطير وكت المحاضرة
حيدر.. جاي وياج اني هم اريد ادخل لأن اجاني انذار غياب
لمى..🙄
تمنياتي لكم بقرائة ممتعة
روح 🌧
حيدر.. نشوف
لمى .. اني رايحة للقسم
حيدر.. اني هماتين خلي نتمشى سوة
جاي نمشي جان اجت وحدة وكمشتة من ايدة واخذتة على جهة طبعا اني بقيت واكفة اتفرج مااعرف ليش يجوز اشباع فضول اوحتى اشوف بعيني ومااخلي كلبي يضعف لكلامة بقت تحجي ويا وبعصبية بس مااسمع شي بس طريقة كلامهة وتأشيراتهة بتوعد الة خلتني افتهم واخمن هاي جانت عدهة علاقة بي وعايفهة
أنت تقرأ
ابطال رغم الخسارة
ChickLitقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
