آني جواد من عائلة متوسطة في وضعها المادي عندي اخوان أربعة كلهم يكبروني بالعمر ومتزوجين وعدهم عوائل اخواني الكبار تلاثة منهم مستقلين ببيوت لوحدهم بصف بيت العائلة ورابع واحد لا بعدة عايش وية والدي ووالدتي وآني
اما بالنسبة لأخواتي فعندي اثنين اخوات زوجناهن لأقاربنة بالمحافظات الجنوبية لأن يحبون والدي وحبوا يناسبونة
شكلي مقبول انطي شبه لهذا الممثل 👇

اهلي متزمتين جداً من الناحية الدينية وعدهم الانتماء العشائري امر مهم جدا
وعدنة البنية حدهة خامس ابتدائي وتكعد بالبيت طبعاً جنت اتضايق كلش من هالشي خاصة بعد ما دخلت الجامعة وشفت البنات حسيت بحرمان اخواتي وشلون وهنة زغار زوجوهن اهلي
اني طبيعة المناخ العائلي العشت بي خلتني اكون انتقائي بكلشي وخاصة بلبسي واصدقائي لأن والدي واخواني الكبار دائماً يمارسون دور الرقيب على تصرفاتي
طبعاً بسبب ألفارق العمري البسيط بيني وبين اولاد اخواني بحيث بعضهم يكبرني بثلاث سنين او اقل والبعض بعمري والاخرين اصغر خلتني اكون صديقهم مو عمهم وخاصة ابن اخوي (محمد) اي شخص يضيعني يلكاني يمة اني ويا بنفس العمر بس آني كملت دراسة وهوة اكتفى بشهادة السادس لأن التزم بمصلحة ابو الي هوة اخوي جان عندة محلات يبيع قماش جملة ومفرد
دخولي للجامعة خلاني اتغير ١٨٠ درجة بتفكيري خاصة بعد ما انعجبت بوحدة من البنات بس جنت استحي افاتحهة بموضوع اعجابي لأن آني اخجل احجي وية بنات وهية جانت شخصيتهة قوية خفت تفتهمني غلط هاذي البنية جانت وياي بالقاعة اسمهة..لمى.. شاطرة ملتزمة بالدوام والمحاضرات والعجبني بيهة اكثر مو مثل بقية البنات متخلي مكياج يعني طبيعية وملابسهة متجذب الانتباه مرتبة وتلبس الوان غاية بالرسمية ماشفتهة يوم من الايام تمادت وية شخص بالقاعة جانت تفوت مجرد بس تسلم
وعلاقتهة وية البنات طيبة ماعدهة حزازيات بالعكس صديقة الكل بس هية وكروبهة عدهم طقوس خاصة
زاد اعجابي بلمى بس بنفس الوقت خفت اصارحهة واخسر صداقتهة واضيع المشيتين لا احظة بحبهة واخسر صداقتهة
كل عادات تكرهة بديت اهجرهة طبعاً آني جنت ادخن بالختلة من اهلي وبالجامعة كذلك من اضوج اشوفلي ختلة واكعد ادخنلي جكارة بس من عرفت لمى تكره تشم ريحة دخان الجكاير كطعتهن وكمت مااتقرب منهن ابداً وبديت البس ملابس الوانهة مقاربة لألوان الملابس التلبسهن حتى بس اجذب انتباهة بس ابداً ولا يمهة الموضوع
احاول اتقرب الهة بس اشوفهة صعبة علي يعني جدا جدا اخجل منهة مااعرف ليش يجوز لأن احبهة اخجل واستحي منهة لهالدرجة يعني آني نيتي جداً سليمة وياهة
بيوم من الايام اجاني حيدر صديقي شاب اتعرفت علي بالجامعة كالي ( جواد ليش متتعرفلك على بنية مرتبة وبلكي وتصير القسمة وتتزوجهة )
جواد ( والله عليك سوالف يا حيدر انتة شاخط لو شنو فلمك )
حيدر ( ترة انتة مصعب الموضوع ومنطي حجم كلش اكبر منة )
جواد ( حيدر ترة اني معجب بلمى بس مااكدر اصارحهة اخاف اصارحهة واخاف ترفض وحتى الصداقة والسلام البيناتنة تقطعة خليني عايش على امل إنه يجي يوم وتحس بحبي الهة وتقتنع )
حيدر ( انتة طلعت بلوة ومحد يدري بيك صدك لو كالوا من السكوتي موتي ومالكيت غير لمى تحبهة ولك هاي اتعبك لأن صعبة فوك متتصور مرات اشك عدهة مشاعر بس من اشوفهة تساعد البنات والشباب بتوضيح المسائل اكول لا اني غلطان بس يجوز هية متحب مبدأ العلاقات لأن ماشفتهة فد يوم عبرت شخص مع العلم اني شاب واعرف نظرة الشباب وشنو معناها )
جواد ( شنو قصدك يا شباب )
حيدر( خليني ساكت جواد اخاف عليك تنجلط )
جواد ( تحجي لو شلون شجاي تقصد )
حيدر ( جواد تعرف هذا الولد احمد كاظم اليجي يمنة مرات للقاعة لو من يشوفنة واكفين يجي يوكف؟ ترة هذا ما ميت علي وعليك هذا معجب بلمى وسألني ذاك اليوم بحكم مرات يشوفني واكف يم كروبهم إذا جانت مرتبطة او لا؟ بس آني ظلمتهة بوجهة كلتلة يمعود هاي قافلة وديربالك تحجي وياهة كلمة ترة يجوز حتى تشتكيك لعمادة الكلية، بس ها مو لخاطرك ، لأن آني هسة عرفت انتة معجب بيهة )
جواد( لخاطر منو لعد ؟)
حيدر ( لخاطر محمد علي الولد يريد يتقدملهة ويخطبهة، وبصراحة آني كلتلة ما تلكة احسن منهة واني واحد من الناس لو ما كلبي مشغول جان تقدمتلهة لأن ماتتفوت )
جواد( هذا الحجي من شوكت )
حيدر( صار تقريباً اسبوع او اقل )
وبدأ الصراع بداخلي يكبر منا المعجبين بدوا يتهافتون من كل حدب وصوب عليهة ومنا شجاعتي التخوني ومتخليني اقتربلهة
بعد فترة قصيرة وصلني خبر انه محمد مفاتحهة بموضوع الخطوبة ورافضتة وقبلهة رافضة شاب بالقاعة الثانية بنفس مرحلتنة،
صرت من اشوفهة اصفن واحاجي نفسي اكول شراح يصير لو هسة اني اصارحهة اقلها يكفيني شرف المحاولة بس اتراجع لأن اشوفهة شلون جاي ترفض كل من يتقدم الهة طبعا بهاي الفترة صارت عدنة ظروف بالبيت وشغلتني هواي وماحسيت إلا باقتراب امتحانات اخير السنة
واني بمكاني ما تقدمت ولا خطوة
شفت الكل متواجد اثناء الامتحانات الة لمى تجي وكت دخولنة للقاعة الامتحانية حاولت اعرف وين تروح كل هالوقت
حاولت اسأل صديقاتهة بس كلت خاف اثير الانتباه لأن اني الكل يعرفني مالي احتكاك بالاخرين بس سلام وبس بعدين كلت لنفسي ماعندي وسيلة غير حيدر هوة حتى عندة رقم تليفونهة طبعاً هوة الوحيد الي تاخذ وتنطي ويا لمى حتى احسدة على جرأتة وشلون يوكف ويضحك ويسولف وهية تنطلق ويا حتى بديت اغار من عندة المهم رحت لحيدر للبيت العصر جان يوم خميس وامتحانة الاحد رحتلة حتى بدون ما اتصل واكلة جايك
وصلت لبيتهم اتصلت علي دك ومافتح خط كلت يجوز نايم خلي ادك الباب دكيت الباب طلعلي والدة
جواد...السلام عليكم عمو
ابو حيدر... وعليكم السلام اهلاً عمو اتفضل ادخل
فات ابو حيدر قبلي للبيت وهوة يأهل ويسهل بية بصوت عالي حتى يكون اهل البيت على علم بوجود ضيف
دخلني للاستقبال وطبعاً هوة الرجال رغم عمرة الجبير بس احسة قريب علينة مايخلي حواجز بيناتنة ابداً يعاملنة مثل مايعامل ابنة حيدر
ابو حيدر... شنو لهالدرجة مشتاق لحيدر ماصبرت اتفاركة كم ساعة
جواد.... ضحكت وجاوبتة لا عمو بس عدنة امتحان صعب الاحد واجيتة حتى يوضحلي المهمات
ابو حيدر... والله يا عمو من بداية السنة لهسة بالامتحانات يا اللة شفتة كمش كتاب وبدة يقرة
جواد... لا تخاف على حيدر عمو حيدر ذكي يقرالة ربع ساعة يجيب درجة نجاح
ابو حيدر.... خلي اكعدلكيا للذكي صديقك حتى ينطيك شوية من ذكائة
جواد...... طبعاً ضحكت من كل كلبي
شوية واجة ابو حيدر جايب مي بعدين عصير وكيك بعدين فواكه كل هذا الوقت واني منتظر حيدر يكعد من النوم مرت تقريبا ساعة الا ربع وشرف حيدر
حيدر.... السلام عليكم
جواد.... وعليكم السلام وين صرت صارلك ساعة
حيدر.. جنت نايم تعبان شنو انتة متنام ماتتعب لخاطر الله لا وانوب يكول لأبوي نريد نأشر المهمات شلكيتني من اليعرفون المهم من المو مهم حتى انطيكياهن
جواد... انتة وين وآني وين حيدر الامتحانات صارلهة اسبوع بدت ولمى ماتبين بس وكت دخول قاعة الامتحان مع العلم حنين وياهة بنفس المنطقة والخط موجودة وكل بنات الكروب موجودات بس هية لا
حيدر... وانتة شكو ليش ماتصارحهة وتفضنة ترة مرضتني بس اكلك خاف ارتبطت بشخص شوف برودك وين وصلك راحت عليك
جواد... حيدر لا تلعب نفسي بأفكارك السودة خابرهة وسوي نفسك تسألهة على الامتحان بعد اخوك
حيدر... ليش منو كالك اني مسوي موبايلي سبيل بعدني زغير اكبر واسبل عن روحي مو هسة
جواد... مني آني هسة اجيبلك كارت ابو ال ١٠
حيدر... اي احجي هالشكل من الصبح هذا الحجي اليفتح النفس بس قبل كلشي انطيني فلوس الكارت
جواد... هاك بس فضني
كمش حيدر موبايلة واتصل مرة ماجاوبت لمى اتصل مرة ثانية فتحت خط وفتح حيدر سبيكر
حيدر... السلام عليكم شلونج لمى
لمى... وعليكم السلام هلو حيدر شلونك
حيدر... الحمدلله لو الرصيد منج جان حتى ماسلمتي كبل تدخلين بالموضوع
لمى... اني ما اتصل اخلص الرصيد مسجات اخابر شكو وصرف رصيد على شنو مو نعرف نقرة ونكتب اذن المسجات توفي بالغرض
حيدر.... كالولي كرميدة وما صدكت
لمى... وانتة شكو يعني مخابرني حتى تغثني لو شنو لا وجمالة مكعدني من النوم شتريد حباب
حيدر.... لا بس محتاج منج تنطيني المهمات مال امتحان يوم الاحد
لمى... الظاهر فلوسك زايدة بس يااللة اني شكو
وبعد ما لمى انطتة المهمات
حيدر...لمى شو هالايام ماكو قبل الامتحان وين تغطين؟ وتجين وكت فوتتنة لقاعة الامتحان
لمى... زين شنو سبب هالسؤال حرص لو فضول لو شنو
حيدر... اعتبريني اخوج واريد اعرف وين تروحين وبصراحة مرات احتاج توضيح لأشياء اقراهة وماافهمهة
لمى... هاااا كلتلي اخوية وتوضيح خوش ليش لا شوف حباب اني اروح اقرة بالتربية يم الحديقة بالختلة
حيدر..... بالتربية خوش زين اشمعنة بالتربية
لمى... حيدرشكو شواسألتك مدري شلونهة
حيدر... شبيج نتشاقة وياج كلت خلي اضبط عليج واعيش دور الاخ المايخلي اختة تتنفس
لمى... همزين انتة مو اخوي لعد محتاج شي بعد؟
حيدر.... سلامتج مع السلامة
لمى .... مع السلامة
أنت تقرأ
ابطال رغم الخسارة
ChickLitقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
