ابطال رغم الخسارة

اتقاد شرارة الحب

وبعد مرور عام وبدأت العطلة الصيفية واخذ جواد الحيز الأكبر في تفكير لمى
جانت لمى تفكر بصورة دائمة بجواد لكن جانت محتارة بين انه يحبها او لا مجرد اوهام سيطرت على تفكيرها لأن بدت جذوة الحب تتقد وبصورة متنامية شي ورة شي الى ان سيطرت عليهة الفكرة بصورة كلية وبدت تتمنى تخلص ايام العطل ويبدأ الدوام حتى تشوفة واقتربت ايام الدوام واشترت لمى ملابس للجامعة جانت تحب تلبس الوان رسمية متحب تبالغ ومجانت تبالغ حتى بمظهرهة منتهى النزاكة والترتيب وبدأ العد التنازلي للدوام وبدأت تجهيزات لمى وعنايتها بشرتها على امل تكون سنة جديدة مليئة بالحب على حد توقعاتها ومن بدأ الدوام تركت لمى الخط وبدت تروح فورتات هية وصديقتها حنين الساكنة وياهة بنفس المنطقة
دخلوا للجامعة بأول يوم دوام والتقت بكل طلاب الشعبة لكن فكر لمى جان مشغول بجواد وبس الي اجة فايت وكت ومن شافتة لمى سرحت بخيالهة انه راح يجي ويصارحهة بحبة وشلون يتقدملهة ويخطبهة وبهالاثناء قطع تفكير لمى صوت دينا وهية تحجي وياهة وتكللهة(لمى اني جوعانة خلي نروح للكافتريا ناكل شي)
لمى(بشرود..... ها... اي...اي ليش لا بس خلي نروح لكافتريا التربية نشتري شي ناكلة ونكعد بمكان ختلة اندليتة العام من جنت اقرة بأمتحانات نهاية السنة بالتربية )
دينا(صدك وين صاير)
لمى(مكان معزول تشوفين الكل ومحد يشوفج)
دينا(الله وايدج)
زهراء(بنات روحوا انتوا اني مااروح)
حنين(بنات اني اروح وياكم لأن ميتة جوع طالعة بلا ريوك مااشتهيت بالعطلة تعودت انام واكعد فايت وكت فما اشتهيت اتريك لأن كاعدة من وكت)
زينة(اني هماتين بس زهراء ليش متجين ويانة عالواهس)
زهراء(عندي شغلة وما مشتهية آكل )
راحوا البنات لكافتريا كلية التربية ومناك تاخذهم لمى للمكان الكتشفتة جديد حتى يتخذوا مقر استراحتهم
اما زهراء فالظاهر جان براسهة موال حب جديد بعد تعرضها للخيبة والخذلان من حبيبها السابق العافها وتزوج وحدة على رادة اهلة مثل ماكال لزهراء وهالمرة جانت تحس بنظرات طالب بالشعبة الثانية يشاغلها اسمة حيدر
البنات اتفقوا يشترون لفات كص وعصاير ولبنى كالعادة متقبل تدخل للكافتريا صديقاتعا همة يشترولهة انتظرتهم يجيبولهة اكلهة وعصيرهة واخذتهم للمكان المنشود واتفاجأوا بوجودة مكان مرتب وهادئ ومعزول بين الضحك والسوالف وانتهاء الوقت قررن البنات يومية بأستراحة المحاضرتين الثالثة والرابعة يجون يكعدون بالمكان الجديد رجعن للقسم والاغلب جانوا طالعين ولمى شافت جواد جان لابس قميص احمر وسترة نيلي وبنطلون كابوي ازرك بقت تباوع علي وهوة متجه نحوهم هية من شافتة اقترب وجهة صار نار وضحكت بصورة تلقائية اجة كال (السلام عليكم)
جاوبوا(وعليكم السلام )
لمى(شلونك جواد )
جواد(الحمدلله)
لمى(جواد انتة عاقل وهادئ شجابك على حيدر يختلف عنك )
جواد(ابتليت بي انوب ابو كلما يشوفني يسألني علي واني اظل الوز عالرجال بحيث اطلعة الشاب المثالي)
لمى والبنات اخذتهم السوالف واجة حيدر الي ماكو حلقة بنات اذا مو هوة واكف بنصهة وماخذة الواهس ومنطلق بالسوالف والضحك  يعيب عالرايح والجاي
بهالاثناء اجت زهراء بس وين جانت محد يعرف اخذت حنين وراحوا على جهة بعيدة عن الكل لمى من شافت جواد التهى يسولف وية حيدر ضاجت جانت راسمة غير توقعات من يشوفهة يصارحهة او يصير تقدم نوعا ما بس بائت امالهة بالفشل الذريع
راحت لمى تدور على حنين حتى تاخذهة وتطلع للبيت لأن شافوا بعد ماكو محاضرات لأن بداية عام جديد
لملمت كتبهة الستلمتهن من مكتبة القسم وطلعت هية وحنين صعدوا بالفورت ورجعن كل وحدة البيتهم ورة كم يوم خابرت اخت لمى الجبيرة عليهة وسألتهة ولأول مرة عن وضعها العاطفي وجاوبتهة لمى(سماءالحب خالية ) لأن استحت تسولف لأختهة عن مكنونات صدرهة وعن حبهة لجواد فجاوبتهة اختهة(يمعودة هذا زوجي جايبلج عريس يكول علي رجال وكد الكلمة ومايعيبة شي جمال وابن عائلة اخوانة واخواتة كلهم متزوجين بس هوة باقي)
لمى(اخاف ارتبط بالوقت الحاضر خاف لا مايخليني اكمل دراستي)
سؤدد(انتي شتحجين نشرط عليهم تكملين دراستج )
لمى(مااعرف شكولج بس يعني اكدر اوفق بين دراستي والزواج)
سؤدد(اي يا عيني قابل انتي اول لو آخر وحدة تزوجت وتدرس وبعدين هية الجامعة سهلة واسمة نجاح )
لمى(شو خايفة)
حاولت لمى مترفض بصورة واضحة لا اختهة تحس عليهة فبدت تماطل وتحجج واختهة بكل حجة تلكة حل الى ان وعدتهةتفكر بالموضوع تضاربت مشاعر لمى وصارت عصبية وبداخلهة تكول ليش جواد ماصارحني اقلها ارفض واني بمنتهى القوة مامخليني لا طايلة سمة ولا ارض شهالبرود الشايلة هذا الكائن
ثاني يوم داومت وبدت تسولف لصديقاتهة عن موضوع الخطيب وتاخذ رأيهن بي كالولهة اقبلي واذا عالدراسة خلي اهلج يشرطون علي تكملين بهالاثناء شافت حيدر يمشي وراهم بس مااجة على بال لمى إن يكون سمع كلامهم او لا بذيج اللحظة لأن عقلهة جان يسولف بوادي وقلبهة بوادي آخر رجعت لمى للبيت بعد نهاية الدوام وشافت اختهة جاية وجايبتلهة دشداشة رياضية ماروني قديفة واستقبلتهة بأن بسرعة اسبحي ورتبي نفسج لأن ام الولد واختة جايات يشوفوج هية انصدمت ام لمى جانت ماقابلة لأن مبدأهة تكملة الدراسة والوظيفة لأن جانت تكول المرة لازم تصير سيدة نفسهة ومتبقة تحت رحمة الرجال فأمهة اصلا مااهتمت للموضوع وكأن قلبهة يعلم بالجاي دخلت لمى للحمام ومن طلعت لبست الدسداشة الجابتهة اختهة وعدلت نفسهة بهالاثناء اجت ام الولد واختة جانن كبار بحيث الاماية مرة عجوز والبنتاية هماتين جبيرة دخلت لمى وسلمت عليهم بس فصلت عن العالم الخارجي تفكيرهة هل صحيح الخطوة الخطتهة لو لا صديقاتها شجعوهة اخواتهة كالولهة البنية مصيرهة الزواج بس امهة معارضة للموضوع برمتة خافت لمى من الام لأن حستهة ماقابلة وحستهة قوية ومتسلطة بعد ماضيفوهم وخلصوا وبدوا يسولفون ويسألون عن العمر والدراسة طبعا هذا الحجي بس المرية تسولف بينما المرةالعجوز ولا حجت بس تباوع لهناك طلعوا وكالوا نرجعلكم خبر لمى حست نفسهة ضايجة راحت بدلت الدشداشة واتغدت لأن من اجتي مااتغدت ومن ضوجتهة نامت ماكعدت الة بالليل على صوت اختهة ورجل اختهة الي اجوي حتى يعلنون انه ام الولد ماقبلت على لمى بحجة فارق العمر
سكتت لمى وانسحبت لغرفتهم فوك سدت الباب وبدت تسولف وية روحهة بأنه حتى من رادت تهرب من وهم الحب فشلت على كعدتهة ماحست بنفسهة الا نايمة كعدت بعد فترة على صوت اخوهة عاصم يصيح عليهة حتى تتعشة ردت علي(مااشتهي )
عرفوا بيهة ضايجة موهينة بنية تنرفض هذا يعتبر شي يزلزل ثقتهة بنفسهة لو مهما كانت درجة قوة الشخصية
داومت ثاني يوم وهية تعبانة شافت جواد ودارت وجهة من عندة وراحت لمكان معزول هوة ممر بنهاية القسم محد يتواجد بي الا ما ندر راحت بي ولحكتهة زهراء حضتهة وبدت لمى تبجي بقهر وحركة كلب وخلتهة زهراء براحتهة وماحجت ولا كلمة وياهةخلتهة بكيفهة كملت لمى بجي راحت غسلت وجهة وكعدت بالحديقة الخلفية للقسم وهية سارحة وتتمنى لو وينعاد الموقف وهية الترفض هاي الزيجة بدال ماتنرفض وتنجرح كرامتهة اتفاجأت بحيدر وجواد اجوهة سلموا عليهة
لمى(اشعجب جواد اليوم مامرتب نفسك اني اعتبرك بوتقة النظافة والترتيب).... سكت جواد والجاوب حيدر(خطية اتخربط البارحة ونقلوا للمستشفى )
لمى(صدك جواد مابيك غير العافية ماتستاهل )
حيدر(خطية انضرب بوري)
لمى حست الكلام يعنيهة وتذكرت بيوم الاجو بي النسوان يشوفونهة حيدر جان وراهة بس ماجانت منتبهة بعدين خمنت انه حيدر سمع حجيهة وية البنات وكال لجواد عن موضوع الخطبة بس هم بقت محتارة ومامتأكدة اذا جانت وعكة جواد الصحية بسببهة
بهاي الفترة لمى كلش تغيرت وقل اكلهة وتراجعت صحتهة نوعاً ما وبدت تشمر مجهودهة على الدراسة وصارت اشطر من قبل حتى قل اهتمامها بجواد وخلصتهة بين الجامعة والدراسة وتقديم البحوث والتقارير وبدة الوضع ببغداد يسؤ وبدة التهجير الطائفي والسيارات المفخخة وبدة حيدر يسأل لمى عن دينا اسئلة شخصية هواي خمنت من خلالة انه حيدر يحب دينا
دينا بنية مسيحية بس منتهى الرقة والادب والترتيب وجان حيدر كاتل نفسة عليهة فكال للمى انه يحب دينا لمى استغربت كالتلة(حيدر البنية مسيحية وانتة مسلم شهاللعب بعدين هية وحيدة امهة وابوهة شتتوقع تعوفهم علمودك اني اكول حبك هواء بشبك بس انتة ماحاس بهالشي ) وبقت تعيد نفس الموال علي
البنية دينا حست بحب حيدر الهة وبدت تتجنبة إلى أن اجت فترة بقت تتغيب بيهة عن الدوام لأن خافت لا تنجرف وتظل تحبة وتتسبب هذي العلاقة فيما بعد بنتائج تعتبرهة دينا كارثية
فأبتعدت قدر استطاعتها عن حيدر